[Meedeemande]
8
N waaxinu, Alla ga da neema be ɲa isanjaman da Maxidoona yi, o wa a mulla na a tuyindi axa yi. 2 Tooran gaben da i gaata, xa ken do i fi su, i sewoyi buren do i misikiinaaxu buren yinme ya n saare ti i fonnansiraaxu dangihaqen ŋa. 3 N ra wa seedene xa nan ti, ke be ga ɲi i maxa, i da ken kuyi. I da fo kuyi, a ga n xoora ken yinme yi. Sere ma i waajibi xa mene. 4 A do xadi, i ga da in xanjo nan mali in ŋa, nan ti in nan duŋe ti i xa na i taqen kafu Yerusalaamu allanjaman maxa kapanlenmaaxun gollen ŋa*. 5 I ga da ke be dabari, o ma ken jigi lewu. I da i du kini Kamanen ya yi fina, na du kini o xa yi nan gemu Alla liŋun ŋa. 6 Ken ya ni o ga da a muuru Tiito maxa, nan ti a ga da deemandirageye ke be gollen jopa axa banŋe, a na a tinmandi. 7 Fon su a axa maxa ma a gaa dangini haqen ŋa : saxiiraaxu, sefe moxo sire, allanfiinun tuwaaxu, axa ŋanniyi siri xoore, ken do axa ga da xanuye be kita o yi. Ken kuŋa, axa fonnansiraaxun xa nan xooro ke golle noxon ŋa. 8 Ku feti ɲaamarindi digaamu yi de, n da kuttun ŋanniyisirigumaaxun ko axa danŋa ya, kuudo in na a tu selli axa xanuyen ga ni xanuyi haxiixan ya yi. 9 O kama Isa Alimasiiwu ga neemandi moxo be, axa wa ken tu. Bannan ya ni, xa a da du fuqaaraaxu axa da. A da ken ɲa ya, kuudo axa na bannaaxu ti a fuqaaraaxun ŋa.10 A siren ya ni in na in sinmayen ko axa da ken xibaare kanma : gelli yeeru, axa fina ya n da ke golli sire ŋanniya Yerusalaamu batijaman da, axa da axa duruxotoyen dabari na golle ke jopa xa mene. 11 Saasa ke, xa da a tinmandi. Ken moxo, axa ŋanniyi sire ke na tinme xo axa duruxotoyen moxo ti senbun lanɲaran ŋa. 12 Baawo, seren gaa kuye be dabarini ti ŋanniyi siren ŋa, ken ya n liŋi Alla da. Ke be gaa an maxa, Alla na ken ya jaatene ; ke be ga nta an maxa, a nta ken jaatene.
13 A wure feti axa na du ɲa misikiinu ti axa wa yogo ɲaana banna, a wure ni axa n ɲoro ya. 14 Lenki ke koota, naaburen gaben wa axa maxa, naabure ga nta sero be maxa, axa na i deema. Ken moxo, koota be naabure gaa i xa maxa, i na axa deema. Ken ga na ɲa, axa na ɲoro me yi. 15 A wa Tawureetan ŋa nan ti :
« Sere be ga da fo gaben sagara, a ma dangi haqen ŋa.
Sere be xa ga da fo lamaane sagara, a ma konto*. »
[Deemandun tunsindaano]
16 Tiigeyen wa Alla da, a ga da Tiito ŋanniyen sirondi katta axa yi, xo a ga da inke yinme ŋanniyen sirondi katta axa yi moxo be. 17 O ga da dagaye be muuru Tiito maxa, a liŋo a da ma a gaa dangini haqen ŋa. Axa fin gaa a yonkin ŋa moxo be, a yinme ya n da a saata nan daga axa kaara. 18 O da o waaxi yogo wara do a batten ŋa. Ken waaxi, isanjaman su na a toxo siren ya koono, na a saxu a ga da golle be dabari Xibaari Liŋen kiɲanden ŋa. 19 Ken baane fe de, isanjaman ya n da a sugandi a nan ri do o batten ŋa ke fonnansiraaxu gollun dabarinden ŋa. Ken xa ni golle ya yi, o gaa a dabarini na darontaaxun saaga o Kaman ŋa, o ŋanniyi siren xa na tuyi. 20 Ke naaburu xoore be ga xaliife o yi kundu, o wa o duruxotoyen su dabarini kuudo toxo buren n maxa o kita do naabure ke batten ŋa. 21 O na a mulla na fo siren ya dabari, ke be gaa gemme Kamanen baane yi fe de, xa ke be gaa gemme Kamanen do seron ŋa ya ni.
22 O wa o waaxi tana walla do i batten ŋa. O da a guuga nan saxu a yi fi gabe yi, o da a ɲi a duruxotonten ya ni do Alla gollen ŋa. Fo ya n tallan kafu a ken duruxotoye yi, baawo a saxunten wa axa yi moxosiri. 23 Tiito, n kapanlenman ya ni, n do a su ya n golli doome axa danŋa. O waaxinu ku, Isanjamon ya n da i wara do a batten ŋa, i nan golli Sugandiyenmen darontaaxun da. 24 Ayiwa, xanuye be gaa axa maxa katta i ya, xa da a daliilun koyi i ya isanjamon su jon ŋa. Oku xa ga da o kunkun wutu ti axa yi, xa na ken xa daliilun koyi i ya isanjamon su jon ŋa.