7
N xana liŋu, ku laayidunu wuti oku ya da, ken kuŋa, o na o faton do o yonkinu senondi bakka sobe su yi. O senontaaxun na tinme Allankannen noxon ŋa.[Pawulu sewoye]
2 Xa ɲa sondonxullu yi katta o yi de ! O ma fo bure ɲa sere wo sere yi, o ma sere wo sere bonondi, o ma sere wo sere nanbara. 3 N ma ke ko xo na axa kiiti de, n da a ko nan xaso nan ti* : axa wa o sondomun ŋa, ayiwa o do axa wa doome kallen do bireyen su yi. 4 N saxiiraaxu be gaa axa kanma, a nan xoora. N gaa in kunkun wuttu ti axa yi moxo be, xenpa su nta a yi. N butten tallan xoto. Xotan do i moxo su, n sewo ma a gaa dangini haqen ŋa.
5 Ken ya ni, gelli o nan ri Maxidoona yi, o ga kori tuumana. O du ga da ke be kita, ken ni xotan baane ya yi : Banŋe wo banŋe yaaxandunbe, xaaxantaaxun xa wa o yi. 6 Xa, Alla ke be gaa buttuxotoye kinni jikkirankutunton ŋa, a ya n da o xa buttu xotondi ti Tiito riyen ŋa. 7 Tiito riye ke baane fe de, a do a ga da buttuxoteye be kita axa yi ya ni. N xiide be gaa axa yi, a da ken xa ko in da, kafiini axa yaaxanji, a do axa duruxotoye katta in ŋa. Ken da in tallan sewondi moxosiri.
8-9 Ayiwa selli hari in bataaxe ke sefon ga da axa sunondi, n ma nimisi a xayinden ŋa*. N ra ɲi nimisini, xa saasa ke, n sewo, baawo in ɲi a tu nan ti hari axa ga na suno, wuccu lamaane ya ni. N ma sewo ti axa sunoye ke yi de, n sewo ti axa sunon ga da axa kanda katta duurasaageyen ŋa ya. Ken ya n gemu Alla yi. Ken kuŋa, o ma fo bure su ɲa axa yi. 10 Baawo sunoye be gaa gemme Alla yi, a wa riini ti duurasaageye be gaa riini ti kisiyen ŋa. Nimisiye su ntaxa ken ŋa. Ke duna ken xa sunoyen riini ti kallen ya yi. 11 Sunoye be gaa gemme Alla yi, axa da wari a ga saare ti ke be yi axa danŋa ba ? A ga saare ti fiinu be yi, i faayi : axa ŋanniyun siro moxo, axa duufaasandimoxo, ken do fi buren gaa dikki axa yi moxo be, axa kanu moxo, ken do in xiiden gaa axa yi moxo be, axa duruxoto moxo, nan kafi axa ga da teleŋontanbalaaxun gaja moxo be. Axa da a koyi ya nan ti axa tan nta xibaare ke* yi lewu. 12 Ken ya ni in ga da ke su safa katta axa yi, n ma a ɲa ti ke be ga toorandi walla ti ke be ga toore, aayi. N da bataaxe ke safa katta axa yi ya, kuudo ŋanniyi sire be gaa axa maxa katta o yi, a na bange axa naxan ŋa Alla jon ŋa. 13 Ken ya n da o buttun xotondi.
A fillande, o ga da Tiito wari a sewonten ga ni moxo be, axa su ga da a haqilen taaxundi moxo be, ken da fo tallan kafu o sewoyen ŋa. 14 N ga da in kunkun wutu ti axa yi Tiito jon ŋa, axa ma in yaagundi. Xo moxo be o ga demu tonŋun koono axa da fo wo fo yi, ayiwa o ga da o kunkun wutu ti axa yi Tiito xa da moxo be, a ɲa tonŋu yi. 15 Axa ga da sefexannun su batu, na Tiito bisimilla ti allankannen do daroyen ŋa moxo be, a ma mungu do ken ŋa. Ken ya saabu da, axa xanuyen ga tallan xooro a maxa. 16 N sewonten ya ni in ra gaa in saxiiraaxun roono axa kanma fo wo fo yi.