6
Alla golliɲanlenmon ga ni o yi, a ga da ke neema be kini axa yi, xa duruxoto, a kitayen nan maxa ɲa xafu yi. 2 Baawo Alla da a ko ti annabi Yesayaahu yi nan ti :« Bire be ga n xawa, n da an jaabi.
Kisiyen koota, n da an deema.* »
Ayiwa, bire be ga n xawa, ken ni saasa yinme ya yi ! Kisiyen koota faayi, saasa yinme ya ni ! 3 O nta a mulla na sere su sankundi, kuudo o nan maxa toxobure su kita o gollen ŋa. 4 O du na du maxankutunu moxon su ya yi xo Alla xidimaano, ti bone ke danben su muɲiyen ŋa, kun ga ni : xotan do tooran do bitteye, 5 katundu, kasorankaaxu, jaman jiiraxennu, ken do golli xoton do wuyanyaaxo, kafiini dulle. 6 O na du maxankutunu ti senontaaxun do tuwaaxun ya yi, ken do muɲiyen do fonnansiraaxu, kafiini Alla Fanka Sennen do xanuyi haxiixan ŋa, 7 a do tonŋun sefen do Alla senbe. Teleŋontaaxun ya ni o gajanyokke, o na gaja ti a yi, o na du tanga ti a yi. 8 O dore, o roxe, o tiige, o toxoburu, i da o ɲa gaaranto yi, na a ɲi tonŋunton ya ni o yi. 9 A wa xo i nta o tu, na a ɲi o tuyinton ya ni moxo siri. An tini o kalla ya, na a ɲi o faayi bireene ya. I da o yanganxata, xa i ma o kari. 10 I danŋa, i na o sunondini ya, na a ɲi o sewonton ya ni koota su. I danŋa, fuqaarun ya ni o yi, na a ɲi o wa sere gabe ɲaana banna. I danŋa, fo wo fo nta o maxa, na a ɲi fo wo fo na oku ya da.
11 N xana liŋu Korintinko, o da sefen xullen ko axa da ti sondonxulle yi. 12 O ma bite su koyi axa yi, axa ya n da biten koyi o yi. 13 Ayiwa in faayi gaa sefene axa da xo in ren saaranto ya yi : Axa xa be ga ni, xa da axa sondomun xurandi.
[Duukoroosiye kapanlen burun ŋa]
14 Ayiwa, axa do allankannanbalinun nan maxa likke su wutu doome. Manne xanaaxu na teleŋonte do teleŋontanbali naxan ŋa ? Manne kapanlenmaaxu na xuraye do bite naxan ŋa ? 15 Kan genme na Sugandiyenmen do Ibiliisa¤ naxan ŋa ? Kan taqe na danqanaaxunte do danqanaaxuntanbali naxan ŋa ? 16 Manne genmanlenmaaxu na Allanbatika do muno xa naxan ŋa ? Baawo oku ya ni Alla ŋalinten batikan ŋa, xo Alla ga da a ko Tawureeta noxon ŋa moxo be nan ti :
« N wa riini daaxe do i batten ŋa, n do i na yaala doome.
N na ɲa i Alla yi, i na ɲa in jaman ŋa*. »
17 Ken ya ni Tunka Duumanten ga ti :
« Xa bogu ke jaman noxon ŋa, xa ɲa axa duran ŋa. Xa maxa kati fo sobinte su yi*.
Ken ŋa, nke yinme na axa bisimilla*. »
18 Tunka Duumante, ke be ga ni Senbenton Senbente, a ti xadi :
« N wa ɲaana axa da faabe, axa na ɲaŋi in da renyugu do renyaxaru* yi. »