Roomunko 16

[Kuuɲindu]

N wa o gidanyaxare yogo xibaaren koono axa da, a toxon ga ni Foobe. Duntenŋen ya ni, xidimaana ya ni Kekkeere Isanjaman ŋa. 2 Xa da a bisimilla ti kamanyugo yi xo Isanjaman do moxo be ga n xawa ; a haajun ga na kiɲe fo wo fo su yi axa maxa, xa na a deema ti ken ŋa. Baawo a ɲa faasandaanan ŋa gabe da, a da hari inke yinme faasa. 3 Xa na Pirisiika do Hakkiila kuuɲi in da, n kapanlenmon ya ni Isa gollen ŋa. 4 I da i yonkinun sedi do in yonkin kisinden ya batte, ken feti inke baane tiigande yi de, xabiila tananun Isanjamon su ya na i tiigana. 5 Isanjama ke xa be gaa meɲiini i kan noxon ŋa, xa na i kuuɲi in da. Xa na in xana liŋe Hepeneeto kuuɲi in da. A fina ya n danqanaaxu ti Alimasiiwun ŋa Haasi jamaanen noxo. 6 Maariya ke be ga tanpi do axa batten ŋa buru, xa na a kuuɲi. 7 Xa na Handoroniike do Juuɲa kuuɲi in da, maarenmun ya ni, n do i su ɲi raganden ŋa doome yi. Alimasiiwun wuruginton ya ni, i xa ya n da hari inke saama toŋondini ti Alimasiiwun ŋa. 8 Xa na Hanpilaato kuuɲi in da, n xana liŋen ya ni ti Kamanen ŋa. 9 Xa na Wuribaano kuuɲi in da, o kapanlenman ya ni ti Alimasiiwun ŋa, a do in xana liŋe Sitaaxu. 10 Xa na Hapeele kuuɲi in da, a isagankaaxun banganten ya ni. Haritobuulu kaadunko, xa na i kuuɲi in da. 11 Xa na Heroojo kuuɲi in da, in maarenxanan ya ni. Isanjama be gaa meɲiini Narikiiso noqu, i ga danqanaaxu ti Kamanen ŋa, xa na i kuuɲi in da. 12 Xa na Turufeena do Turufoosa kuuɲi in da, i golli Kamanen da buru. Xa na Periisi kuuɲi, n xana liŋe, a tanpi Kamanen da moxosiri. 13 Xa na Ruufu kuuɲi, Kamanen ga da ke be sugandi, a do i ma, n xa yinme ma ya ni. 14 Xa na Hasukkiriito kuuɲi, a do Felegoona do Herimeesi, kafini Patorooba do Heremaasi, kun do waaxinu beenu gaa do i batte. 15 Xa na Filoogo do Juuliya kuuɲi, a do Neruusu do i waaxi yaxare, ken do Wolinpa, kafini Isanjaman sere su gaa do i batten ŋa. 16 Xa da kuuɲinden sanqi axa do me naxan ŋa ti meexandunsunbunden ŋa. Isanjaman su kuuɲinden wa katta axa yi.

17 N waaxinu, n wa axa ɲaagana, ku beenu gaa booxeyen riitini jaman ŋa, na seron jaarabi bakka axa ga da xaranŋunde ke be kita, xa na du tanga i ya. 18 Baawo ku serandanbu kundu nta o kaman batta, ken ga ni Isa Alimasiiwu yi, ganta i gollini katta i liŋun ya yi. I na haqili lanpunton neenene ti i musulahandigaamun do i jakkindun ya yi. 19 A su wa axa allanbatten tu moxosiri. N wa sewono ti axa yi kuŋa. Xa, n na a mulla axa n faami ti fi siren ya yi, xa n baari bakka fi buren ŋa. 20 Fonne sa xeerin Tunka Alla na juri axa taanun wure. O kaman Isa neeman gan na ɲa do axa batten ŋa.

21 N kapanlenma Timoote wa axa kuuɲini, a do Luuko do Yaaso, kafini Soosipotoro yi, n maarenxananu ku. 22 Nke Terito ya n da ke bataaxe safa Pawulu da, n xa wa axa kuuɲini ti Kamanen ŋa. 23 Gaayi wa axa kuuɲini, n do Isanjaman su jaatigi ya ni. Debe ke naaburen xarinlengumen wa axa kuuɲini, ken ga ni Harasiite. Karitoosi wa axa kuuɲini, o waaxi. 24 {O kama Isa Alimasiiwu neeman gan na ɲa axa su kanma. Anmiina.}

25 N gaa Isa Alimasiiwu ke be gangunu, fi lasamanto beenu ga ɲi gundon ŋa gelli nan xaso, kun ya n bangeene. Alla ke be ra gaa axa xotondini ti ken xibaare lanɲaran ŋa, o na a tiiga. 26 Saasa kuŋa, ken gundo farase xabiilan su ya danŋa ti annabinyinmun kitaabun ŋa, xo ga ɲaamarindi moxo be, kuudo i na danqanaaxu ti a yi, na a batu. 27 Alla baane ya ni tuwaanan ŋa, abadannooron na a ya da ti Isa Alimasiiwu yi ! Anmiina.