Roomunko 15

[Mexanuye]

Ayiwa oku beenu xoton ga ni danqanaaxun noxon ŋa, ku beenu lanpunton ga ni danqanaaxun noxon ŋa, o n xawa sikki i danŋa ya, o n maxa o yinme baane xeerin muuru. 2 O du baananbe su n xawa liŋoono i kapanlenman danŋa ya ti siroyen ŋa, kuudo na a senbendi. 3 Baawo ken ma i yinme liŋu muuru, xa a wa ŋa nan ti : « An kayindaanon kayindun xenu in ŋa. » 4 Fo wo fo ga ɲi ga safe kuŋa nan xaso, a safe o xaranŋunden ya xanne maxa, kuudo o na jikken kita ti muɲun do buttuxotoye be Safandi Sennun do a ga ri katta o yi. 5 Yelli muɲun do buttuxotoyen Alla gan na genmen sabatindi axa do me naxa, nan yaaxe Isa yi, 6 kuudo ŋanniyun nan ɲa baane yi, na Alla kuufa doome, o kamanyugo Isa Alimasiiwu faaba. 7 Alimasiiwun ga da axa bisimilla moxo ke be, axa xa na me bisimilla ken moxo yi Alla daronden da.

8 N wa a koono axa da kuŋa nan ti : sunnanto, kun ga ni Yehuudiyanun ŋa, Alimasiiwun ɲaŋi i da golliɲaŋaana yi ya, na Alla tonŋuntaaxun bangandi, kuudo laayidunu be ga wuti faabenun da, na a sabatindi. 9 Na a ɲi xabiila kuttun na Alla tiigana a hinneyen ya da, xoyi a gaa Safandi Sennun ŋa moxo be yi nan ti : « Ken ya saabu da ni in gaa an ɲaxana xabiilanun do me naxa, na an toxon darontaaxun suugu. » 10 A koni xadi nan ti : « Xabiilanu, xa sewo do Alla jaman batten ŋa » 11 nan ti xadi : « Xabiilanu, xa su na tiiga, jamon su gan na a tiiga. » 12 Annabi Yesayaahu da a ko xadi nan ti : « Yisaayi bonsonŋen wa bangeene, ke be ga giri kuudo nan mare xabiilanun jamon kanma. Xabiilanun jikken na a ya yi. » 13 Yelli jikken Alla gan na axa faga ti sewoyen fo xooren do xeerin ŋa danqanaaxun kanma, kuudo axa jikken na fagu ti senben ŋa.

[Diganlagaru]

[Pawulu xayi yinme]

14 N waaxinu, nke yinme saxunten ya na axa yi nan ti xenpa nta axakun yinmenu siroyen ŋa, fataama xa nta axa tuwaaxu danbe su yi. Axa ra wa me toŋono xa. 15 Xa ken do i fi su, n da duruxoto na noqunu safa katta axa yi, xo haqiliyanqande ya, na a sababun ɲa in ga da neema be kita gilli Alla yi. 16 A da in ɲa xidimaana yi Isa Alimasiiwu da katta xabiila tananun ŋa, na in duransugandi Alla da, kuudo xabiila tananu na ɲa sadaxa yi, Fanka Sennen ga da sadaxa be senondi, a ga liŋo Alla da. 17 Ken kuŋa, n wa in kunkun wuttu ti Isa Alimasiiwu kapanlenmaaxun ŋa ti in golli ɲaŋunton ŋa Alla da. 18 N nta wakkilene na fo ko, a ga feti Alimasiiwun ga da ke be ɲa ti in ŋa, kuudo na xabiila tananun kanda katta allanbatiyen ŋa ti gollen do sefe, 19 ti kaawafiinun do taagumansun senben ŋa, a do Alla Fanka Sennen senbe. Ken moxo yi, nan giri Yerusalaamu do i yoorindan ŋa, ma Yiriliiku maran ŋa, n da Alimasiiwun Xibaari Liŋen kiɲandi do noqun su yi. 20 Noqu be Isa Alimasiiwu toxon ga nta no, n da in senben kini kun ya yi na Xibaari Liŋen gangu do i ya, kuudo in nan maxa daga ware sere tana batten ŋa, n gaa sefe roono a sefon kanma. 21 A safanten gaa Safandi Sennun ŋa moxo be, n sukke do ken moxo ya yi, a ga ti : « A xibaaren ga ma koni sero beenu da, kun wa riini a wari ; ku beenu xa ga ma a xibaaren mugu, i wa riini a faamu. »

22 Ken yinme ya n da in raga ta gabe, na in fata dagana axa noqu. 23 Saasa kuŋa, dingira ntaxa ku maro yi, ku beenu haaju xoore gaa in ŋa. Gelli siina gabu saasa, n da a xanu in nan daga bogu ti axa yi, 24 n ga na ɲi dagana Esipaaɲi yi bire be xa, n da a sinma in wa bakka ti non ŋa na axa wari. N do axa ga na xiide bogu me yi wucinne, axa na in dangindi dagana.

25 Saasa in faayi telle Yerusalaamu ya yi, nan xidime Isanjamon da. 26 Baawo Maxidoona maran do Haaxe maran Isanjamon da deemande ŋanniyen wutu doome, ti i wa a dabarini Yerusalaamu Isanjaman misikiinun da. 27 Yabo ke, i yinmenu ya n da a ŋanniya, tanbon xa ya ni de, baawo xabiila tananun da fo kita bakka ikun xa diinan xeerin ŋa ya. Ken kuŋa, i xa n xawa i deemana ti kitayun ŋa ya. 28 Ken ga na ɲeme bire be yi kuŋa, deemandu ku ga kini i ya nan duguta, n wa dagana Esipaaɲi yi, n na bogu ti axa yi. 29 Ayiwa in wa tu nan ti in daganten ŋa axa noqu, n do Alimasiiwun xeerin fo gaben ya n joofene.

30 N waaxinu, in wa axa ɲaagana kuŋa, ti o kama Isa Alimasiiwu yi, ti Fanka Sennen xanuyen ŋa, xa n gaja kafini in ŋa ti axa allanɲaageyun ŋa in danŋa, 31 kuudo in na kisi ku baranto be gaa yi, n gaa dagana ti golle ke xa be yi Yerusalaamu yi, Isanjaman na duŋe ti a yi moxosiri. 32 Ken moxo yi, n sewonten na ri katta axa yi. N na tuuma kafiini axa yi ti Alla duŋeyen ŋa. 33 Xeerin Tunkan gan na ɲa do axa su batten ŋa ! Anmiina.