Roomunko 14

[Memuɲiye]

Sere be danqanaaxun lanpunten ga ni, xa da a gemundi a kaman ŋa ; xa maxa a haqililan bexu-bexu. 2 Xo misaale : yogo danqanaaxun saabu da, a wa fon su yigana, na a ɲi yogo danqanaaxun lanpuyen saabu da, a na soxofon baane ya yigana. 3 Ke be gaa a su yigana, a n maxa ke baane roxo ; ke xa be ga nta a su yigana, a n maxa kennin jalagi, baawo Alla da a genmanlenmaaxu ya. 4 Ko ni anken ŋa, an gaa seri tana jalagini, an kome ba ? A nda sigi i xaren ŋa ma a nda xenu, ken ni a kamanyugon ya xibaare yi. A sikki xa ya, baawo o kamanyugo Isa ra wa tikkiti a yi.

5 I be nda a sinma nan ti koota yogo ya n fasu koota yogo yi ; yogo tana xa maxa kooton su n baana ; be su n danqanaaxu ti i yinme haqililan ŋa tannu. 6 I be gaa kooton darontaaxun jaaten ragana, a na i darono ti ya yi ; i be gaa fon su yigana xa, a xa na ken ɲaana ti Tunka Duumanten ya yi, baawo a na Alla nawaarini ya. I be ga nta fon su yigana, a kaman xa na ken ɲaana ti Tunka Duumanten ya yi, a wa Alla nawaarini. 7 N na ti kuŋa : o du baananbe su nta bireene i yinme da ; sere su nta kalla i yinme da xa. 8 O gaa bireene, o bireene Kamanen ya da. O gaa kalla, o kalla Kamanen ya da. Ken kuŋa o kara wo, o bire wo, Kamanen ya fo ni o yi. 9 Baawo kara ya nan wundi, kuudo nan ɲa furun do biranton kaman ŋa.

10 Ken kuŋa saasa, anken na an waaxin jalagini manne yi ? Anken xa be ga ni an na an waaxin roxono manne ? O danmon su riini kiiten ŋa ya Alla tunkantaaxaaden jon me naxa. 11 Na a toxo ti a wa ŋa nan ti : « N kuna ti in ŋalintaaxun ŋa, nke Tunka Duumante, ma xurungo su ga ri tusi in wure, ma xanne su ga da tiigandun ɲa inke Alla da. » 12 Ken moxo yi, o du baananbe su yinme wa riini dantaxi Alla da.

13 O na mejalaginden wara kuŋa. Sinme ya an ga nta ɲaana an waaxin da jaarabe yi na a sankundi. 14 N wa a tu, n danqanaaxunten wa a yi xa ti Kamane Isa yi nan ti : fo wo fo duuron sobinte fe ti i du yi. Xa sere be nda fon sinma fo sobinte yi, a na sobi anken maxa. 15 An gaa ke be yigana kuŋa, an ga na an waaxin sunondi ti ken ŋa, xanuye nta an jikkun ŋa. Alimasiiwun ga kara sere be da, maxa a bonondi do yigandinxibaare yi. 16 Seron gaa fo koono an do fo be yi, hari anken da fo ga nta a yi, maxa a ɲa. 17 Baawo Allantunkaaxu feti yigandinfi do minifonfi yi, xa, Allantunkaaxun ni teleŋoyen do xeerin do sewoyen ya yi gilli ŋa. 18 Nan xidime Alimasiiwun da ke moxo yi, Alla na ken ya mulla, ken ya n gemme seron ŋa.

19 Ken kuŋa, fo be gaa riini ti xeerin ŋa, a do danqanaaxun jiidiyen ŋa, o n duruxoto na kun ya muuru me da. 20 O n maxa Alla gollen bonondi do yigandinxibaare yi. Fon su sennen ya ni, ken nta gilli. Xa yigande be yigeyen ga maɲa seren maxa, ken ni ke be yigeyen gaa riini ti an waaxin finbinden ya yi. 21 Ke be ga ni fo sire, ken ni ya, an nan maxa tiye yiga, an nan maxa mini, ken do fo wo fo ra gaa ɲaana sababu yi na an waaxin finbindi. 22 An ken danqanaaxu be gaa an maxa, tigiti a yi an do Alla naxa. Sewoyen wa seren da, sikka ga nta sere be yi i danqanaaxun noxon ŋa. 23 Xa sikkan gaa sere be yi, an ga na a yiga su, an jalaginten ya ni, baawo a ma giri an danqanaaxun ŋa ; fo wo fo xa su ga ma giri an danqanaaxun ŋa, yangon ya ni.