[Dumaxayanqaye maraanon da]
13
Maraano beenu gaa fankan ŋa, haadamarenme su na du maxayanqa i da, baawo mareye nta no ke be ga ma giri Alla yi. Ku be gaa du yi, Alla ya n da i taaxundi. 2 Ken kuŋa sere be nda barati maraanon maxa, a na xo an ga barati Alla ɲaamarixannen ya yi. Allankutaanon kun xa na yanganxatan ya kiɲana du yi. 3 Baawo maraana feti kanufo yi fiisiriɲaŋaanan maxa, xa fiiburiɲanŋaanan ya n kanna. An wa a mulla nan maxa kanu maraanan ŋa ? Fo siren dabari, an na a tiiganden kita ! 4 Baawo a xa na Alla gollen ya yi, an jamun danŋa. Xa selli an gaa fo buren ya dabarini, kanu de ! Baawo xafu fe sariyankaafan gaa a maxa. Ken kuŋa, Alla golliɲaŋaanan ya ni, binbagandaanan ya ni Alla butten yanganxatan da, katta sero ku beenu gaa golli buren ɲaana. 5 Ken ya n sigi waajibin ga ni an na du maxayanqa, hari roxoyen kannun baane fe de, haqilen xibaaren yinme xa ya ni. 6 Ken yinme xa ya ni kuŋa, axa gaa sagallun tugana, na a toxo ti i na Alla gollen ya dabarini. 7 Axa do ke be ga n xawa, xa da ken tuga : xa da sagallun do baratanun tuga axa ga n xawa a tugana sere be yi. Axa ga n xawa kanna ke be yi, xa kanu a yi, axa ga n xawa ke be darono, xa da a daro.[Mexanuye]
8 Mexanuye ga fe, xa maxa tanbo ro sere su yi, baawo xanuyen gaa sere be yi katta i kapanlenman ŋa, ken kaman da sariyan maxafaga. 9 Na a toxo ti ɲaamarixannun ŋa : « Maxa jeeni, maxa sere kari, maxa fayi, maxa yaaxarangillaaxu. »* Ku do i meenu su gaa digaame ke be noxon ŋa, ken ni ya : « An na an kapanlenman xanu xoyi an yinme moxo ».* 10 Xanuyen nta fo wo fo toorono kapanlenma yi. Na an kapanlenman xanu, ken ni na sariya ke ya maxafaga.
11 Ken kuŋa, axa na a tu o gaa waxati be yi saasa, wundiyen biren da a baga o da gilli xenqon ŋa keeta, baawo kisiyen tinko o yi moxosiri nan xoto o ga danqanaaxu ti Alimasiiwun ŋa waxati be. 12 Wuron laato, yillankaron tinko. O na biten gollun wara kuŋa, na xureyen gajanyokkun ya wutu keeta. 13 O na o terekillun sirondi xo kiiranxulle ti teleŋontaaxun ŋa, o n maxa mini ma o ga mande, o n maxa fesexi. Jeeniyen do sangen moxonma su, o n maxa a ɲa. Gajanŋen do haasidaaxu, o na i wara. 14 Ganta, xa da Kamanen ya yaaxa, Isa Alimasiiwu. O n maxa du toxo yonkin maxa do i liŋun batten ŋa.