[Isanjaman biremoxo]
[Biremoxo ti xanuye]
12
N waaxinu, n wa a muurunu axa maxa kuŋa ti Alla hinneyen ŋa : axa na du sadaxi a da ti axa biremoxon ŋa, ken sadaxa ya ŋalinten ni, a sennen ni, Alla wa a mulla xa, ken ya ni batiyi xalisinten ŋa. 2 Xa maxa du yaaxa do lenki ke duna yi, xa ganta, axa bireyen nan faraaxi do faamuyi kurunba be Alla gaa a kinni axa yi, kuudo axa na i liŋun tu : ke be nafa gaa a yi, a gaa a mulla, a tinmanten ga ni.3 Ayiwa in na a koni axa da ti neema ke be ga kini in ŋa, nan ti axa du baananbe su da : xa maxa du xiima noqu yi a ga nta xawa. Xa, Alla ga da fiinun taxandi moxo be ti danqanaaxun lanɲaran ŋa, an na an duruxoto do ken ya yi. 4 Baawo a na xo suufun gaben gaa jongini o siginton ŋa moxo be ya, kun suufunu gollun fatamanton ga ni bakka me yi. 5 Ken moxo baananne ya ni, o xa gabun ya jonginton na yonki baane yi, ken ga ni Alimasiiwun ŋa, suufunu ku jonginton ya na me yi.* 6 Be su do durankuye ya ni ti neema ke be ga kini o yi. Allanxibaarinden ya ga ni i be kuyen ŋa, an na a golli ti danqanaaxun lanɲaran ŋa. 7 A ga ɲa xidimeyen ya yi seron da, xidime. I be xallen ga ɲa xaranŋunden ya, xaranŋundindi. 8 I be ga ɲa buttuxotondaana, a nan buttuxotondi. Ke be gaa kuyindini, a na a ɲa ti fiisirontaaxu yi. Ke be ga ɲa maraana yi, a na duruxoto. Sere be ga ɲa hinnaana yi, a na a ɲa ti sewoye yi.
9 Axa me xanuyen nan ɲa sooben ŋa, xa da fo buren xoni, xa n mali fo siren ŋa. 10 Xa da me xanu xo danqanaaxuntayenmun mexanuye, xanuyen fo tinmante, xa da me saama do me daronden ŋa. 11 Xa maxa lanpu, xa sigi, xa na axa yonkinun xaaya, nan golli Kamanen da. 12 Xa sewo ti jikken ŋa, xa n sabari sunon waxatin ŋa, xa n duume do allanɲaageyen ŋa. 13 Xa sigi Isanjaman deemanden ŋa. Xa sukke do jaatigisiraaxun ŋa. 14 Ku beenu gaa axa toorono, xa duwa i da ; xa duwa ya de, xa maxa i langa.* 15 Ku beenu gaa sewono, xa sewo do i ya ; ku beenu gaa wuunu, xa wu do i ya. 16 Xa duŋe me da. Xa maxa du xoorondi, xa, xa da du maxayanqa ya. Xa maxa du raga fintuwaano yi. 17 Xa maxa fo bure tuga sere su yi ti fo bure ; xa da fo siren ɲanŋen ya ŋanniya seren danben su jon me naxa.* 18 Axa ra gaa a da, xa da axa duruxotoyen su dabari, genmen nan toxo axa do seren danben su naxa. 19 Xa yinmenu n maxa tanbu bure tuga, n xana liŋu ; xa da ken toxo Alla butten maxa, na a toxo ti a wa Safandi Sennun ŋa nan ti : « Binbaganden daga inke ya da, nke ya ni tugandaanan ŋa. »* Ke ni Tunka Duumanten daalen ya. 20 Xa, « selli dullen gaa an xonnen ŋa, a yigandi ; selli daqu gaa a yi, a ku, a nan mini, baawo ken na xo an ga da yinbinxoren ya jurumi a yinmen ŋa. »* 21 Maxa du ni fo buren da, xa, fo buren ni ti fo siren ŋa.