[Alla hinneye]
11
N wa tirindindini kuŋa nan ti : yaala Alla da i jaman sedi ya ba ? Ken fe wala ! Baawo inke yinme ni Banisirayilaganken ya, Ibirahiima bonsonŋe, nan bogu Beniyamiina fonlaqen ŋa. 2 Alla yinme wa i jaman tu i tageyen kaane, a ma a sedi xa. Yaala Safandi Sennun ga da fi be ko annabi Hiliyaasu xibaaren ŋa, axa nta a tu ya, bire be a ga taŋe Alla yi Banisirayilaganko xanne maxa nan ti : 3 « Tunka Duumante, i da an annabinyinmun kari, na an sadaxindiranun guruja. N baane ya n toxo, i wa in xa yonkin muurunu. »* 4 Xa, Alla da manne jaabu kini a yi ? « N da wujuunu ɲeri yugo tanga, kun ma demu i xurungun jipana Baali wure. »* 5 Ken moxo baananne ya ni lenki ke kiye xa yi, sero beenu ga sugandi ti Alla neeman ŋa, fo wa i batten ŋa. 6 Ayiwa selli ken sugandinde ga ni neeman ya yi, ken feti ɲangolle ken ŋa keeta, ken ga fe xa, neeman feti neema yi kuŋa ! 7 Ken wure ni manne ? Ke be Banisirayilaganko gaa a muurunu, i ma a kita ; seri sugandinton kun da a kita. Alla da seri kuttun ɲa xandunxoto yi. 8 A wa Safandi Sennun ŋa ke moxo yi nan ti :« Alla da i haqilun beexi :
yaaxon na i yi ya, i n maxa warindi,
tarun na i yi ya, i n maxa mugi, ma lenki ke koota. »*
9 Tunka Daawuda xa ti :
« I fakken gan na ɲaŋi i da sinsinŋe do selleqe yi,
nan ɲa i da finbiyen do yanganxatan sababun ŋa.
10 Yelli i yaaxon gan bitana ma i ga finki !
I xoodon gan nta tuuma hari abada ! »*
11 N wa tirindindini kuŋa nan ti : yaala i ga finbi wo, i lapite yanqana ya bogo-bogo ba ? Ken fe wala ! Xa i yangon ya n sigi xabiila tananu ga da kisiyen kita, kuudo i na suuxu kun ŋa. 12 Ayiwa selli ikun yangoburugumaaxun ya ga da dunadunko bannaaxundi, i xennen ga da xabiila tananun kuura, yaala xenpa wa ikun yinme durasaageyen tonon ken ŋa ba ?
13 N wa a koono axa da kuŋa, axakun xabiila tananu, nan ti : inke ga ɲa faare yi katta axakun ŋa, ken na inke maxa ɲaxaliyi xooren ya, 14 ken kuŋa, n ramuuriyen ni ya : in na katu in yinme sunpun do in xattin walla suuxen ŋa, kuudo in na katu i yogonu kisini. 15 Na a toxo ti i ɲanŋen ŋa fonkaaradunko yi, Alla do dunadunko naxan ga gemu ti ken ya yi, ayiwa i ga saage jaateene kafiini seron ŋa, ken ken ɲaana kan moxo, ken nta ɲaana xo furen ya ga bire sa ? 16 Ayiwa yeregendijuran su wa senoono, baawo tufullu fanon sadaxi Alla danŋa ya nan seno. Yitten ɲiimen ga seno tan, kingun xa seno.¤ 17 Xa kingu yogonu ga na benti, anken gundunjayituuna ga tokki do a yi kafiini kingun kuttun ŋa, kuudo an na katu bireene ti ɲiimu ku jin ŋa, 18 maxa du jakki a kun kingu kanma de ! An na du jakkini kan moxo ? Ɲiimu ku nta bireene anken ŋa ! Anken ya n bireene ɲiimu ku yi ! 19 An na ti tannu : « Kingun kuti ya kuudo inke xa na tokki a yi. » 20 Tonŋun ya ni ke ! I danqanaaxun fuyintaaxun ya n sigi i ga benti, anken xa be ga ni, danqanaaxun ya n sigi an ga toxo maliini do a yi. Maxa kaawa du yi kuŋa de ! Kanu ya du. 21 Baawo Alla ga ma a yinme kingun toxo, a ra wa ɲaana a nta an xa toqo de ! 22 Alla hinneyen do a ɲaŋoyen faayi : a ɲanŋen ya ni katta ku beenu ga xenu yangon noxon ŋa. Hinnaanan ya ni ti anken ŋa, selli an ga na tigiti a ken hinneye yi, ken ga fe an xa bentiini ya de ! 23 Ikun Yehuudiyanu xa be ga ni, i ga ma bire danqanaaxunbalaaxun noxon ŋa su, i wa tokkiini, baawo a katudanŋen wa Alla da na i tokki xadi. 24 Anken be ga kuti bakka jayituunanyitte tana yi gunnen ŋa, ken ya ga ni an burujun ŋa, an ri tokki jayituunanyittin sorogonten ŋa, ken do fiinun laadan da me sooxi. Ken kuŋa, ku kingu be yinme ga kuti bakka ke jayituunanyittin sorogonte yi, kun tokkinden ken ken ŋa i yinme jayituuna tinŋe ke yi, newoye xenpa ya ni !
25 Ken kuŋa in waaxinu, n nta a mulla ke gundarafi n toxo axa da biten ŋa, n gaa kanna axa n maxa daga du sinma tuwaano yi : Banisirayila jaman yogo wa toqo xandunxotaaxun ŋa ma xabiila kuttun danmon su ga na kisi bire be. 26 Ken moxo yi, Banisirayila danman su na kisi. A na Safandi Sennun ŋa ken moxo ya yi xa, nan ti :
« Kisindaanan wa riini gilli Siwoona deben ŋa,
a na allankannanbalaaxun kopa bakka Yaaxuba dunkoonun ŋa.
27 Ayiwa in ga na i yangon wutu bakka i kanma,
ken ya n ɲaana in laayidu wutunten ŋa in do i naxa. »*
28 I da Xibaari Liŋen xoni, i ɲa allanxonno yi. Ken ya ni axakun nafan ŋa. Xa, ken su kanma, Alla ga da i sugandi, ken ni xanuyen ya, a da i xanu ti i seri fanon ya yi. 29 Na a toxo ti Alla nta nimisini katta i neema kuyinten do i seri xirinton xirinden ŋa. 30 Ken moxo ya ni kuŋa, waxati dangi, axakun ma Alla batu ; saasa ken keeta, ikun allanbatiyinbalaaxun ɲa sababu yi Alla hinne axakun ŋa. 31 Ken moxo baananne ya ni, ikun allanbatiyinbalaaxun ga ɲa axakun da hinneyen ŋa saasa, kuudo i xa na hinneyen kita. 32 Baawo Alla da haadamarenmen su kaso allankuteyen ya noxon ŋa, kuudo i na i hinneyen koyi a su yi.
33 Tonŋun-tonŋu ! Alla neeman guujinten ya ni, a tuwaaxun do a jaatirageyen nan jufa ; a rakuton nta tuyini, a dagakillun nta tereene.
34 « Ko xa na Tunka Duumanten ŋanniyen tu kuŋa ?
Ma ko xa n ɲa a da toŋondaana yi ?*
35 Ko fina n da tanbo ro a yi,
kuudo a xa na an saaga ? »*
36 Baawo fo wo fo giri a ya yi, fo wo fo na ti a ya yi, a ya fo ni fo wo fo yi. Nooron darontaaxun wa a da ma abada ! Anmiina.