10
N waaxinu, n yonkin muurifon do in allanɲaageyen na do in waaxi Banisirayilaganko ku kisiyen ya yi. 2 Baawo in wa seedene a yi nan ti fanqaanon ya ni Alla da, xa ken fanqe nta tuwaaxu xalasinte kanma. 3 I sanku do Alla baarindimoxon ŋa ya, ken ya ni i gaa baariyen muurunu ti i du yi, i ma du toxo Alla baarindikillen maxa. 4 Baawo Alimasiiwu ya ni sariyan maxafagandaanan ŋa, kuudo ku beenu su gaa toŋondini, i na baari.5 Muusa kitaaben ga da ke be ko teleŋontaaxun xibaaren kanma sariyan killen ŋa, a ya faayi ke : « Sere be nda sariyan ɲaamarixannun batu, an wa bireene ti i ya. »* 6 Xa baariye be gaa gilli danqanaaxun ŋa, a ti : « Maxa a sinma an sondomen ŋa nan ti :* “ Ko xa n segene kanmun ŋa ” »* na Sugandiyenmen yanqandi ? 7 « Ko n yanqana furun kaara »* na Sugandiyenmen segendi bakka furun naxa ?* 8 A da manne ko kuŋa ? « Fo wo fo ga n tinka an ŋa, ken ni digaamen ya, a wa an raqen ŋa, a wa an sondomen ŋa. »* Ken digaame ni danqanaaxu ke digaamen be o gaa a kiɲandini ya. 9 Baawo an ga na xiire ti an raqen ŋa nan ti Isa ni Kamanen ya, an ga danqanaaxu ti an sondomen ŋa nan ti Alla da a wundu bakka furun naxa, an kisiini ya.¤ 10 Baawo nan danqanaaxu ti an sondomen ŋa, ken wa an kandana katta baariyen ŋa ; nan xiire ti an raqen ŋa, a wa an kandana katta kisiyen ŋa. 11 Na a toxo ti Safandi Sennun da a ko nan ti : « Sere su nda danqanaaxu ti a yi, a kaman nta yaagunu. » * 12 Ken kuŋa, fatanpansiye nta Yehuudiya do xabiila tana naxa : Kaman baane ke ya na i su maxa, fonnansiren ya ni katta laxaraxaasaana su yi. 13 Baawo
« sere wo sere ga laxaraxaasa ti Tunka Duumanten toxon ŋa,
ken kanman wa kisiini. »*
14 Ken kuŋa an laxaraxaasana kan moxo an ga ma saxu a yi ? An saqa a yi kan moxo xa an ga ma a xibaaren mugu ? An na a xibaaren mukku kan moxo sere ga ma a kiɲandi an ŋa ? 15 Sere na a kiɲandini kan moxo a ga ma xayi ? A safanten wa xadi nan ti : « xibaariliŋikiɲandaanon tanwuttun ga n faranpara sa ! »* 16 Xa, be su ma Xibaari Liŋen batu. Annabi Yesayaahu da a ko kuŋa nan ti : « Tunka Duumante, ko n toŋondi ti o waajunden ŋa ? »* 17 Ken kuŋa, danqanaaxun riini do terinkeyen ya yi, terinkeyen xa riini do waajunden ya yi Alimasiiwun fin kanma.
18 N na axa tirindi kuŋa : yaala Yehuudiyanun ma a mugu ya ba ? I da a mugu haali. A safanten ni ti :
« Waajundaanon xannen mugi ɲiiɲen yaaxen kanma,
i diganxannun xa kiɲe ma duna xenpan ŋa. »*
19 N wa tirindindini kuŋa : yaala Isirayila ma ɲi a xala ya ba ? Alla daali Muusa seneqen ŋa nan ti : « N wa tayinnaaxun roono an ŋa katta xabiila yi, hari xabiila tinmante fe ; n na an butundini ti yinmanbinninjama ya yi. »* 20 Annabi Yesayaahu ken wakkile na a ko yinme ya, nan ti Alla daali :
« N ɲi do jama yi, i ma ɲi in muurunu ;
n bange jama yi, ku be ga ma ɲi in fi tirindini. »*
21 Xa, Alla ga da ke be ko Banisirayilaganko xibaaren ŋa ni ya :
« N da in kitten fuutu do ku allankannanbalinu do ku kutaano yi kiyen muuma. »*