[Alla do i seri sugandinto - Yehuudiyanu]
[Pawulu hanmiye Yehuudiyanun danŋa]
9
N hadarinten na Alimasiiwun ya yi, n yonkin wa seedene in da ti Fanka Sennen ŋa, nan ti in na tonŋun ya koono, n nta gaarana : 2 suno xooren do mamayi laamanten ya na in sondomen ŋa. 3 N ra wa duŋene yinme na in yinmen ro tooran danben su wure yi do in xabiilan batten ŋa, n sunpun do in xatti, gadaxanu in nan booxe bakka Alimasiiwun ŋa yinme. 4 Ikun ya ni Banisirayilagankon ŋa, Alla ga da i renmaaxu. A da i nooron koyi i ya, na tafundun ro i do i do me naxa, na sariyan kini i ya, a do batimoxon do laayidunu, 5 na burujugankaaxun ɲaŋi i da, kuudo Sugandiyenmen na bange bakka i ya ti fatigankaaxun ŋa, aken Alla ya na fon su kanma. Tiigeyen wa a da ma abada.¤ Anmiina.6 A feti xo Alla laayiduxannen ga xenu, baawo ku beenu su ga bogu Isirayila yi, a su ma ɲa Banisirayila haxiixa yi. 7 Ken moxo baananne ya ni, Ibirahiima xa soxoodin su feti allanlenme. Baawo Alla da a ko nan ti : « N ga da an bonsonŋe be laayidun wutu, n na a bangandini bakka Isiyaaxa ya yi. »* 8 Ken wure ga ni nan ti : fatagankanlenmu ku feti allanlenmu. Laayidun renmun baane ya n jaateene allanlenmun ŋa. 9 Laayidu ke digaamen ya faayi ke kuŋa : « Waaga dan kundu in wa riini, Saaratu wa renyugo kitana xa. »*
10 Ken baane fe de, saxan dangi Rebexa do Isiyaaxa baane ya naxa, oku ɲa Isiyaaxa bonsonŋun ŋa do ken ya yi. 11-12 Xa ken do i su, gelli renmu ku ga ma saare yinme du fina, Alla da a ko nan ti : « Sooman wa xaayeene xoxonen da. »* Ken bire da a ɲi i ma fo sire ma fo bure dabari fina, o gaa tini a maanan ni ken ya yi. Xa Alla na i suganden ya yi, ken ya n duumene. Ken nta jongini ɲangolle yi, Alla nda i be xiri ya ni. 13 Xoyi a gaa noqu tana yi Safandi Sennun ŋa nan ti : « N da Yaaxuba xanu, xa, n bara Yesaawu yi. »*
14 O na man koono kuŋa ? Nan ti teleŋontanbalaaxun wa Alla noqu ba ? Ken fe wala ! 15 Baawo Alla ti Muusa danŋa ya : « N hinnene sere ya yi, n gaa a mulla nan hinne sere be yi ; n na seren ya neemana, n gaa a mulla na sere be neema. »* 16 Ken jonginte nta sere liŋu yi, a jonginte nta sere sikke xa yi, xa ganta, Alla yinme hinneyen ya ni. 17 Alla daali Firawuna da Safandi Sennun noxon ŋa nan ti : « N da an taaxundi gujan ŋa ku fiinu ya xanne maxa, kun ga ni na in senben koyi ti an ŋa, a do na in toxon tuyindi ɲiiɲen danman su yi. »* 18 Ken moxo ya ni kuŋa, Alla gaa hinnene seren ŋa a ga n liŋi a da moxo be, a na seren ɲa kiiluranxote xoyi a ga n liŋi a da moxo be.
19 Yaala an wa in tirindini ba nan ti : « Manne ni a gaa jalagindini ? Ko n katta baratini a ramuuriyen kaane ? » 20 Haadamarenme, an xa ni ko yi an gaa Alla kutana ? « Yaala gina taganten ra wa tini tagandaanan da : “ Manne ni an ga da in ɲa kundu ? ” »* 21 Ma sago nta ginatagaanan danŋa i doori xootinten kanma ya, na fo faranparen do fo kundun dabari bakka mali baananne ke yi ? 22 Alla lafi i butten koyini na i senben tuyindi. Xa ken do fi su ku beenu yanganxatanxollon ga fagu, i gaa bonon raqen ŋa ken su kanma, a muɲi kun danŋa moxo siri. 23 Ken ni ya kuudo sero beenu ɲoŋoxollon fakkon ga ni ti hinneyen ŋa, a na i nooro xoora guujinte ke tuyindi i ya, a ga da i kaane taaxu ti ken nooro be yi. 24 A ga da ku beenu xiri, kun ni oku ya, Yehuudiyanu baanenu fe de, i do xabiila kuttun su ya ni. 25 Xoyi Alla ga da ke be ko annabi Hoseeya kitaaben ŋa :
« Ku beenu ga ma ɲi in sero, n na i xiri in sero ;
sere be ga ma ɲi liŋa in da, n na a xiri in liŋu. »*
26 « Dingira ke be yinme a ga koni i da nan ti : “ in sero feti axakun ŋa ”,
i wa riini xiri : “ Alla ŋalinten renmu. ” »*
27 Annabi Yesayaahu yinme gangundi Banisirayilaganko fin kanma nan ti :
« Hari Banisirayilaganko nda gabo xo geejin seyijuran ya yi,
fon lamaanu ya n kisiini tannu,
28 baawo Tunka Duumanten ken da a ko nan ti i kiite ke ɲaana ya nan tinme ɲiiɲen kanma yi wucu depe noxo. »*
29 Annabi Yesayaahu da a ko ken moxo xa yinme du ya yi a ɲanŋen kaane, nan ti :
« Kurun kaman gan n maxa soxoodinu toxo o maxa,
o ɲi ɲaana xo Sodoomunko ya,
o na ri ɲa xo Hamooranko moxo. »*
[Banisirayilaganko saxiironbalaaxu]
30 O tini manne kuŋa ? Xabiila kuttu ku seron be ga ma baariyen killen muuru, kun da a kita. Ken baariye giri danqanaaxun ya yi. 31 Na a ɲi xa Banisirayilaganko da sariyan batu do baariyen killen muurunden ya yi, i ma katu ken da. 32 Manne n ri ti ken ŋa ? Baawo i ma a muuru ti danqanaaxu yi ; i da a muuru ti ɲangollen ya yi. I finbi finbigide ke ya yi. 33 A safanten na ke moxo ya yi nan ti :
« N faayi finbigiden saxundini Siwoona yi,
xenundindigiden ya ni.
Ayiwa sere su nda danqanaaxu ti a yi,
a kaman nta yaagunu. »*