Roomunko 8

[Biremoxo do Fanka Sennen ŋa]

Keeta ken ke, ku beenu gaa kafiini Isa yi, yanganxata su ntaxa kun kanma. 2 Baawo sariyan be gaa bireyen kinni ti Isa Alimasiiwu kapanlenmaaxun ŋa, ken da in bogu yangon do kallen sariyan kandan wure. 3 Annabi ga kori ke be danŋa, ti haadamarengankaaxun lanpuyen ŋa, Alla da ken ya dabari : a da i yinme renmen haadamarenman ya xayi riini o fati junuubunto ku sawuran ŋa, kuudo na yangon senben bonondi bakka yonkin ŋa. 4 Ken ɲa ya kuudo sariyan gaa teleŋontaaxu be muurunu, ken na tinme o yi, ken ŋa o nta bireene yonkiliŋun kandan wure, xa o bireene Fanka Sennen ya kandan wure. 5 Baawo ku beenu haqilun gaa do yonkiliŋun ŋa, i sinmeyun kandene do yonkiliŋun ya, xa ku beenu haqilun gaa do Fanka Sennen ŋa, i sinmeyun kandene do Fanka Sennen liŋun ya. 6 Na an sinmeyen taaxu yonkiliŋun ŋa, ken na an kandana katta kallen ya yi, xa na an sinmeyen taaxu Fanka Sennen liŋun ŋa, ken na an kandana katta bireyen do xeerin ya yi. 7 Baawo sinmeye be gaa do yonkiliŋun ŋa, ken gollen ni murutiyen ya katta Alla yi. A nta duŋene Alla sariyan ŋa, a ra nta a yi yinme ya mene ! 8 Na an toxo yonkiliŋun ken maxa, ken ra nta liŋoono Alla da. 9 Xa ganta, axakun nta yonkiliŋun maxa, axa na Fanka Sennen ya maxa, baawo Alla Ruuhun hadarinten wa axa yi. Sere be Alimasiiwun Ruuhun ga nta an ŋa, an nta a foyaaxun ŋa de ! 10 Nan ti Alimasiiwun hadarinten wa axa yi do i fi su, faten ken kalla ya, na a sababun ɲa junuubuntaaxun ŋa, xa, yonkin ken ŋaliini ya, baawo a baarinten ya ni. 11 Ayiwa Alla Fanka Sennen ya n da Isa wundu bakka furun naxa. Ken Fanka Senne hadarinten wa axa yi. Ke Alla be ga da Isa Alimasiiwu wundu gilli furun naxan ŋa de a ya na axa xa fati lanpunto ku birandini ti ken Fanka Senne yi !

12 Ken moxo ya ni kuŋa in waaxinu, tanbon wa o yi de ! Xa ken feti o nan bire do yonkiliŋun ŋa de ! 13 Baawo axa ga na bire ti yonkiliŋun ŋa su, axa kalla ya, xa axa ga na yonkiliŋun gollun kari ti Fanka Sennen ŋa su, axa ŋaliini ya.

14 Na a toxo ti ku beenu su gaa kandeene ti Alla Fanka Sennen ŋa, kun ya ni allanlenmun ŋa. 15 Axa ga da ken Fanka Senne be kita kundu, fo fe a gaa axa komaaxunu, na xaaxantaaxu kiɲa axa yi xadi, Fanka Sennen na axa renmaaxunu Alla ya da, ken ya n sikki o ra gaa a gangunu ti : « Abba ! » Ken ga ni : Baaba wo ! 16 Aken Fanka Senne yinme wa seedene o yonkinun ŋa nan ti allanlenmun ya ni o yi. 17 Ayiwa renmun ya ga ni o yi, xeyimaxantanlenmon ya ni o yi kuŋa ; Alla xeyimaxantanlenmo, Alimasiiwu xeyanlenmon ya ni o yi, baawono o ga na taqe kita bakka a tooran ŋa, o na taqe kitta bakka a nooron xa yi ya.

[Alla nooro do i renmun ŋa]

18 N wa a sinmana kuŋa nan ti toora ke be gaa du yi lenki, ken do nooro ke be gaa riini koyi o yi, i nta katiini me yi du ! 19 Baawo duna xorotinten ya n dugundini waxati be Alla gaa i renmun bangandini. 20 Duna xenu xafun kittun ya yi, a yinme liŋu feti ken ŋa, xa Alla ke be ga da a xenundi, ken ya n da a sababu. Xa ken do i fi su, jikken wa finna a yi : 21 bonontaaxun komonkacen wa riini bogu aken duna xa yinme yi, kuudo a na taqe kita allanlenmun dukiteyi nooronten ŋa. 22 O wa a tu kuŋa nan ti, harisa duna danman su wa guutumene jalan karandun maxa. 23 Duna baane xa fe, oku xa be Fanka Sennen kuyi fanon gaa o maxa, o xa guutumene o noxonun ya yi, o gaa o allanlemaaxun dukku, ken ga ni o faton dukiteyen ŋa. 24 Baawo o rajiginton ya n kisi, ganta an ga da ke be wari ti an yaaxen ŋa, ken feti rajigiye yi keeta. Eh ! An ga da ke be wari ti an yaaxen ŋa, an na ken rajigini kan moxo yi xadi ? 25 Xa, o ga na fon jigi ke be o ga nta a walla, ken ni na a terinka ti muɲun ya yi.

26 Ken moxo baananne ya ni xadi, Fanka Sennen gaa riini o deema o lanpuntaaxu ke yi, baawo o nta a tu o ga n xawa allanɲaagene moxo be, xoyi a ga n xawa. Xa Fanka Sennen yinme ya n ɲaagene o da, nan guutume ti fon ŋa neenun ra ga nta ke be serankoono. 27 Ke be gaa sondomen faayini, a wa a tu Fanka Sennen sinmeyen ga ni ke be yi. Baawo Fanka Sennen faasandini Alla seri sennun ya da ti Alla ramuuriyen ŋa.

28 O wa a tu xa nan ti ku beenu gaa Alla mulla, Alla ga da i xiri ti rakuton ŋa, fin danben su ɲaŋi do kun jamun ya batten ŋa. 29 Baawo Alla ga da sero ku beenu tu i tageyen kaane, a da a rakutu i tageyen kaane yi ya xa kuudo na i xawaaraaxu i renmen ŋa, ma renme ke na ɲa sooman ŋa waaxi gabu naxa. 30 A ga da a rakutu ku beenu da, a da i xiri xa ; a ga da ku beenu xiri, a da i baari ya xa ; a ga da ku beenu baari, a da i nooron kini i ya.

[Waseduye ti Isa Alimasiiwu xanuyen ŋa]

31 Manne tana n koniini kapa ke yi ? Selli Alla gaa o da, ko n katta o gajanŋa ? 32 Aken be ga ma hari i yinme renmen kisi, a ga da a kini kallen ŋa o su da, manne n sikki a ga nta fo wo fo kinni o yi ti i fonnansiraaxun ŋa do ken renme batte ? 33 Ko na Alla seri sugandinton jalagini ? Sere su ! Baawo Alla yinme ya n da i baari. 34 Isa Alimasiiwu kara, ken baane fe de ! A wundi yinme ya xa. A wa Alla tayen ŋa, a wa faasandini o da. Ken kuŋa ko n katta jalagindini ? 35 Ko na o booxono bakka Alimasiiwun xanuyen ŋa ? Tooran ba ma liixiye ? Tooronden ba, ma dulle ? Feeton ya ni ma kasaaran ya ni ? Kaafan ba ? 36 A wa ŋa ke moxo yi nan ti : « Kallen ya na o xaɲana do an sababun ŋa kiyen do wuro ; i da o raga xo waayindigallen jaxon ya. » 37 Xa ken su kanma, oku ni niyindaana xooron ya yi ti ke be ga da o xanu. 38 N saxunten wa a yi kuŋa nan ti, kalle wo, bireye wo, maliika wo, seetanfanka wo, saasa wo, xunbane wo, senbe xooron wo, 39 kanmun senbun wo, ɲiiɲen senbun wo, tagefo tana wo, Alla xanuye be ga bange o danŋa Isa Alimasiiwu yi, o kaman yugo, fo wo fo ra nta o do ken fatana bakka me yi.