[Sariyan likken yanqande]
7
A sankunte nta axa yi in waaxinu, nan ti in faayi sefene katta sero ya yi ku beenu gaa sariyan tu, ayiwa kanda wa sariyan maxa seren kanma ba, a ga feti birantaaxu ke wuce ? 2 Misaale : na yugon toxo bireene ya ni, yaxun sariyan kacen gaa yaxaren ŋa. Xa yugon ga na kara, sariyan ti yaxare ke ntaxa ɲaana a kacen ŋa de ! 3 Ken moxo yi kuŋa, selli kiine ke biranten ŋa yaxare ke ga ni seri tana ya fo yi, i tini a da jeenaana ya de. Xa kiinen ga na kara bire be, sariyan da a xannen duuraaxu, ken ŋa a ra wa ɲaana yugo tana foyaaxun ŋa, a nta ɲaana jeenaana yi ti ken ŋa. 4 Ken me ya na axa xa yi in waaxinu : sariyan maxa, axa xa ɲi ga kara do Alimasiiwun kallen ŋa ya, kuudo axa nan ɲa kamane tanan foyaaxun ŋa, ken ga ni ke be ga wulli gilli furun naxa. Ken ɲa ya, kuudo o na xidime Alla da ti golli sirun ŋa.¤ 5 O ga ɲi o haadamarenfati junuubunton ŋa bire be, yangoburugumaaxun ɲi o suufunun ŋa, a gaa o xaɲana ti sariya ke yi, kuudo o na xidime kallen da. 6 Xa saasa kuŋa, o ga ɲi ke be komaaxun ŋa, a kace ntaxa o xannun ŋa, o da o yinme kita bakka sariyan maxa. Ken ŋa keeta o gollini Alla da ti Fanka Sennen killi kurunban ya yi. Sariya safanta xase ke be kiyen ga ɲeme, o ntaxa ken killen kanma.7 O tini manne kuŋa ? Nan ti sariyan ni yangon ya yi ba ? Ken fe wala ! Xa, n ma ɲi yangon tu sariyan ga n maxa fe. Ken moxo baananne yi, n ma ɲi yaaxarangillaaxun tuunu sariyan ga n maxa a ko nan ti : « maxa yaaxarangillaaxu »*. 8 Yangon da ke ɲaamarixanne ya wutu, na yaaxarangillaaxu ke danben su wara in ŋa ti a yi. Sariya gan ntaxa du yi, yangon nta bireene. 9 Nke ken maxa, sariyan ga ma ɲi du yi, n biranten ya n ɲi. Xa ɲaamarixannen ga ri, yangon bire, 10 nke kara. Ɲaamarixanne be ga n xawa in kiɲana birantaaxun ŋa, ken da in kiɲa kallen ya yi. 11 Baawo yangon da feeran kita ti ɲaamarixannen ya yi, na in janba, na kallen kiɲa in ŋa ti ken ŋa. 12 Ken kuŋa, sariyan sennen ya ni. Ɲaamarixanne ke xa sennen ya ni, i teleŋonten ya ni, i siren ya ni.
13 Ken kuŋa, ke be siren ga ni, yaala ken ya n ɲaŋi in kallen sababun ŋa ba ? Ken fe wala ! Yangon ya ni. Yangon da fo siren ya wutu na in kari ti a yi, kuudo na yangon maɲantaaxun xurandi, na yangon tooran kasafoyen su bangandi ti ɲaamarixanne ke kutanden ŋa.
14 O wa a tu kuŋa nan ti sariyan ni allanxallen ya, xa inke ken ni fateganken ya, in komongaage yangon ŋa. 15 Ke be gaa fin ŋa : n gaa ke be ɲaana in nta a tu ; n gaa ke be mulla in nta ken ɲaana, xa in gaa ke be xonno, n na ken ya ɲaana. 16 Ayiwa in ga nta ke be mulla in gaa ken ya ɲaana, ken ŋa in duŋe ti sariyan siren ya ni. 17 Nke ma ken dabari ti du yi kundun ŋa de. Xa yango ke be gaa in ŋa de, ken ya ni. 18 Ken kuŋa in da a tu keeta nan ti in haadamarenfati junuubunte ke, fo sire hadarinte nta in ŋa. Foosiriɲanŋen tun wa in ŋa, xa in ra nta a dabarini. 19 Baawono in gaa fo siren be mulla, in ga nta a dabarini ; n ga nta fo buren be mulla, in na a ya dabarini. 20 Ayiwa ! N ga nta ke be mulla in ga na ken dabari, ken ŋa nke ma ken dabari ti du yi kundun ŋa de. Xa yango ke be gaa in ŋa de, ken ya ni.
21 N da a ɲi kuŋa ; nan ti in ga na lafi fo siren ɲaana, fo buren ya riini in ŋa. 22 N sondomen ɲaxalinta xooren ya ni ti Alla sariyan ŋa de, 23 xa in suufun noxon ŋa, n da sariya tana ya faamu, ken gaa Alla sariya ke gajanŋa bakka in kiilun ŋa. Ken na in roono yangon sariyan kason ya yi, ken na in suufu noxon ya. 24 Bone da inke haadamarenme ya xooro ! Ko xa na inke kisini bakka ke yonki kittun ŋa, a gaa kallen foyaaxun ŋa ? 25 Tiigeyen wa Alla da ti o kaman Isa Alimasiiwu sababun ŋa. Ken kuŋa in na ti axa da : n haqilen noxon ŋa, n xidimene Alla sariyan ya da, xa in lanpuntaaxun da, n xidimene yangon sariyan ya da.