9
Kasangpūꞌ maka Duwa Mulid Sinōꞌ Magnasihat
1 Na, tapatimuk paꞌin eꞌ si Isa mulidna kasangpūꞌ maka duwa buwananna sigām kawasa pamalaꞌan saitan min deyom baran aꞌa sampay amauliꞌ saki indaginis. 2 Puwas eꞌ sinōꞌ sigām palꞌngngan magnasihat pasal pagparinta Tuhan ma manusiyaꞌ. Sinōꞌ sigām amauliꞌ isab sasuku taluwaꞌ saki. 3 Yukna ni sigām, “Daꞌa kam amowa ai-ai ma palꞌngngananbi. Daꞌa kam amowa tungkud atawa puyuꞌ pamowahan ai-aibi atawa lutuꞌ atawa sīn. Daꞌa isab kam amowa badjuꞌ pasalinanbi. 4 Maingga-maingga lahat katꞌkkahanbi, bang kam sinagina eꞌ aꞌa sinōꞌ pariyataꞌ ni lumaꞌna, subay kam pahantiꞌ mainaꞌan satꞌggolbi ma kalumaꞌan inaꞌan-i. 5 Bang gantaꞌ aniyaꞌ kalumaꞌan papehēꞌanbi, boꞌ aꞌana inān mbal magaddatan kaꞌam, alaꞌan kam minnaꞌan. Paspasinbi dahū bagunbunna min tapeꞌbi tandaꞌ saksiꞌ in kaꞌam apuwas min sigām.”
6 Manjari maglꞌngnganan na saga mulid si Isa angalatag kalahat-lahatan. Piꞌingga-piꞌingga patꞌkkahan sigām, pinagnasihat eꞌ sigām lapal ahāp maka pinauliꞌ eꞌ sigām saga aꞌa asaki.
Asasaw Pikilan si Herod
7 Manjari itu takale eꞌ si Herod, ya angꞌntan pagparinta ma lahat Jalil, pasal pakaradjaꞌan itu kamemon. Asasaw pikilanna sabab magsaddī-saddī pangupama saga aꞌa. Bang ma aꞌa kaseheꞌ si Yahiya Magpapandi koꞌ inān, allum na pabīng min kamatayna. 8 Bang ma kaseheꞌ nabi Elija koꞌ inān panyataꞌ piꞌitu ni dunya. Bang ma kaseheꞌ isab, dakayuꞌ nabi koꞌ inān bay ma masa awal, boꞌ allum na pabalik. 9 Yuk si Herod, “Si Yahiya bay sōꞌku pinonggolan kōkna. Daka sai aꞌa ya takaleku pinagbissala itu.” Sakali pasulay na paꞌin si Herod amowa magꞌndaꞌ maka si Isa.
Limangibu Heka Aꞌa Pinakan eꞌ si Isa
10 Na, saga aꞌa bay kawakilan eꞌ si Isa pabīng na ni iya min kalꞌngnganan sigām. Nihakaꞌan iya pasal kamemon bay tahinang sigām. Manjari binowa sigām eꞌ si Isa pinaꞌan ni daꞌira Betsaida, sigām-sigām sadja. 11 Makataꞌu paꞌin baꞌanan aꞌa inān bang piꞌingga si Isa, magtūy sigām paturul ma iya. Sinagina sigām eꞌ si Isa ati panduꞌanna sigām pasal pagparinta Tuhan. Pinauliꞌ isab sasuku taga-saki.
12 Sōng paꞌin pasꞌddop llaw, pehēꞌ ni iya mulidna kasangpūꞌ maka duwa. Yuk sigām, “Sōꞌun lagiꞌ baꞌanan aꞌa itu pehēꞌ ni saga kalumaꞌan ma katilibutta itu, maka ni lumaꞌ saga aꞌa maghuhuma, boꞌ supaya sigām amiha balanjaꞌ maka pahantiꞌan. Sabab halam aniyaꞌ lumaꞌ ma lahat itu.”
13 Sagōꞌ anambung si Isa ma saga mulidna, yukna, “Kaꞌam na amakan sigām.”
Yuk sigām, “Lima du tinapay ma kami maka duwa du daing. Luwal bang kami pehēꞌ amꞌlli tinapay pamakan baꞌanan aꞌa itu!” 14 (Aniyaꞌ saga limangibu bang hal lꞌlla niꞌitung)
Yuk si Isa ni saga mulidna, “Sōꞌunbi sigām magtingkōꞌan limampūꞌ-limampūꞌ ma datumpuk.” 15 Aubus paꞌin sigām pinatingkōꞌ kamemon, 16 niāꞌ eꞌ si Isa lima tinapay maka duwa daing eꞌ. Pahangad iya ni langit boꞌ yampa magsukul ni Tuhan. Puwas eꞌ pinagpōng-pōng eꞌna kinakan inān boꞌ sōnganna ni saga mulidna pinagtopod-topod ma saga aꞌa inān. 17 Magkakan sigām kamemon sampay magꞌssohan na. Pagubus sigām amangan, tinipun eꞌ saga mulid si Isa kapinna, aniyaꞌ sangpūꞌ maka duwa ambung aheya apꞌnnoꞌ.
Si Petros Magpasabꞌnnal Pasal Al-Masi
18 Aniyaꞌ dakayuꞌ llaw, sabu paꞌin si Isa dangan-danganna angarap ni Tuhan, pehēꞌ ni iya saga mulidna. Tinilaw sigām eꞌna, yukna, “Sai konoꞌ aku, bang ma pangupama saga aꞌa?”
19 Yuk sambung saga mulid eꞌ, “Bang ma aꞌa kaseheꞌan kaꞌa konoꞌ si Yahiya Magpapandi. Bang ma aꞌa kaseheꞌ in kaꞌa nabi Elija, maka bang ma aꞌa kaseheꞌ isab dakayuꞌ nabi ka bay ma masa awal, allum na pabīng.”
20 “Na, bang ma kaꞌam,” yuk si Isa. “Ai yukbi? Sai sa aku itu?”
Anambung si Petros, yukna, “Kaꞌa ya Al-Masi ya tapeneꞌ eꞌ Tuhan.”
Pamissala si Isa Pasal Kamatayna
21 Puwas eꞌ binandaꞌan eꞌ si Isa saga mulidna sinōꞌ daꞌa angahaka ni sai-sai bang sai iya. 22 Yukna isab ni sigām, “Aku itu, Anak Manusiyaꞌ, pinatꞌkkahan kabinasahan aheka. Pinaginꞌmbal du isab aku eꞌ saga pagmattoꞌahan maka eꞌ saga kaimaman alanga maka saga guru saraꞌ agama. Pinapatay du aku sagōꞌ taꞌabut paꞌin katꞌllu llawna, allum du aku pabīng.”
23 Jari ahꞌlling si Isa ni sigām kamemon, yukna, “Bang aniyaꞌ aꞌa bilahi ameyaꞌ ma aku, subay nggaꞌi ka kabayaꞌan baranna ya dūlanna. Kahabaꞌ llaw subay tanggungna hāgna pamapatayan iya. Minnēꞌ iya makajari ameyaꞌ ma aku. 24 Sai-sai allogan kallum-baranna amutawan du kallum-nyawana min Tuhan. Sagōꞌ sai-sai mbal allog ma kallum-baranna, boꞌ lillaꞌ isab amatay ma sababku, makabāk du iya kallum kakkal. 25 Sababna,” yuk si Isa, “bang aniyaꞌ aꞌa gantaꞌ kaniyaꞌan altaꞌ deyom dunya kamemon, aheya lugiꞌna bang halam aniyaꞌ kallumna kakkal, maka bang iya amutawan min Tuhan. 26 Sai-sai aiyaꞌ angahaka patampal in iya sukuꞌku maka panduꞌku ya pameyaꞌanna, jari aku itu, Anak Manusiyaꞌ, aiyaꞌ isab angakuhan aꞌa inān ma waktu kapiꞌituku pabalik. Pabalik du aku aliput eꞌ sahayaku, maka sahaya Mmaꞌku Tuhan, sampay sahaya baꞌanan malaꞌikatna asussi. 27 Bꞌnnal ya pahꞌllingku itu ma kaꞌam,” yuk si Isa, “aniyaꞌ ma kaꞌam mbal amatay satꞌggol halam taꞌndaꞌna pagparinta Tuhan pinatꞌnnaꞌ.”
Kapinda Pangluwahan si Isa
28 Na, palabay paꞌin saga dapituꞌ min bay pamissala si Isa inān, binowa eꞌna si Petros maka si Yahiya maka si Yakub patukad ni diyataꞌ būd boꞌ angamuꞌ-ngamuꞌ ni Tuhan mahēꞌ. 29 Hinabuna angamuꞌ-ngamuꞌ, apinda pangluwahanna maka apoteꞌ sidda sꞌmmekna, landuꞌ makasilaw. 30 Sakali aniyaꞌ duwangan lꞌlla, ya na nabi Musa maka nabi Elija, 31 magpanyataꞌ pinaꞌan aliput eꞌ sahaya, ati magsuli-suli sigām maka si Isa pasal kamatay ya pamakadal Tuhan ma iya, ya song kalabayanna ma daꞌira Awrusalam. 32 Na, si Petros maka saga seheꞌna bay atuli sagōꞌ pagbatiꞌ sigām, taꞌndaꞌ eꞌ sigām sahaya si Isa maka aꞌa duwangan ya anꞌngge ma bihingna. 33 Jari itu, song paꞌin alaꞌan duwangan inān min si Isa, ahꞌlling si Petros ma iya, yuk-i, “Tuwan guru, ahāp kami makamaitu. Angahinang kami tꞌllu panggung-panggung pasindunganbi maitu, dakayuꞌ ma kaꞌa, dakayuꞌ ma si Musa itu, maka dakayuꞌ ma si Elija.” (Amūng-mūng sadja iya, sagōꞌ halam kataꞌuwanna bang ai katꞌnnaꞌan llingna.)
34 Ma sabu paꞌin ahꞌlling si Petros, aniyaꞌ gabun patuwaꞌ angalandungan sigām ati tināw saga mulid inān pagka kalandungan eꞌ gabun. 35 Aniyaꞌ suwala ahꞌlling min deyom gabun eꞌ, yuk-i, “Anakku koꞌ itu bay peneꞌku. Kalehunbi iya.”
36 Paghondong paꞌin suwala inān, luwal si Isa laꞌa ya taꞌndaꞌ eꞌ saga mulid inān. Halam sigām bay ahꞌlling-hꞌlling pasal bay taꞌndaꞌ eꞌ sigām inān.
Ondeꞌ-ondeꞌ Sinōd Saitan Kauliꞌan eꞌ si Isa
37 Pagꞌllaw dakayuꞌ, makalūd paꞌin disi Isa min būd inān, aheka toꞌongan aꞌa pasampang ni iya. 38 Aniyaꞌ lꞌlla angalingan min deyom katimukan inān, yuk-i, “O Tuwan! Angamuꞌ aku junjung ni kaꞌa, kaꞌaseꞌin konoꞌ anakku tunggalan itu! 39 Bang pasān sinōd iya saitan. Pataghaꞌ sadja iya angolang, amaspad saga baranna maka anuput-nuput bowaꞌna. Landuꞌ iya minula eꞌ saitan, saliꞌ halam aniyaꞌ kahondonganna. 40 Bay amuꞌku saga mulidnu itu amaluwas sagōꞌ mbal tapaluwas eꞌ sigām.”
41 Yuk si Isa, “Kaꞌam saga aꞌa ma patahunan itu, asāꞌ pahāp pikilanbi! Halam toꞌongan aniyaꞌ imanbi! Subay buwattingga giꞌ tꞌggolku ma kaꞌam anandalan kabuwattilubi boꞌ yampa kam magkahagad?” Jari ahꞌlling iya ni mmaꞌ ondeꞌ, “Bowahun piꞌitu anaknu,” yukna.
42 Na, sabu paꞌin ondeꞌ inān binowa ni si Isa, nihantakan iya ni tanaꞌ eꞌ saitan maka pinapaspad. Sagōꞌ pinabukagan saitan eꞌ si Isa ati pinauliꞌ ondeꞌ inān boꞌ niꞌndeꞌan ni mmaꞌna. 43 Jari ainu-inu saga aꞌa mainaꞌan kamemon, pagꞌndaꞌ sigām ma kaheya kawasa Tuhan.
Amissala si Isa Pabalik ma Pasal Kamatayna
Hinabu masi magkainu-inuhan saga aꞌa inān ma saga hinang si Isa kamemon, ahꞌlling iya ni saga mulidna, yukna, 44 “Pandogahinbi toꞌongan ya pamissalaku itu ma kaꞌam. Aku itu, Anak Manusiyaꞌ, araiꞌ na sinōngan ni pagbayaꞌan saga aꞌa.” 45 Saguwāꞌ in bissala si Isa inān halam tahati eꞌ saga mulidna. Tuꞌud nilimbungan hatina min sigām. Mbal isab sigām makatawakkal atilaw iya bang ai hatina bay yukna heꞌ.
Sai ya Katapusan Alanga?
46 Ma llaw dakayuꞌ magjawab saga mulid si Isa bang sai ma sigām ya katapusan alanga. 47 Kinataꞌuwan asal eꞌ si Isa bang ai ma deyom pikilan sigām, angkan niāꞌ eꞌna dakayuꞌ ondeꞌ-ondeꞌ arikiꞌ, pinatꞌngge eꞌna ma bihingna. 48 Yukna ni sigām, “Sasuku anaimaꞌ dakayuꞌ ondeꞌ-ondeꞌ arikiꞌ buwattitu ma sabab ōnku ya pamanyabutanna, baranku ya tinaimaꞌ eꞌna. Maka sasuku anaimaꞌ aku, taimaꞌna isab Tuhan ya bay amapiꞌitu aku ni dunya. Sai-sai areyoꞌ pagatayna min kaseheꞌanna, ya inaꞌan katapusan alanga.”
Sasuku Mbal Anaggaꞌ Kitam Amogbog du
49 Jari ahꞌlling si Yahiya, yukna, “Tuwan, aniyaꞌ taꞌndaꞌ kami dakayuꞌ aꞌa anabbut ōnnu pamaluwasna saitan min deyom baran aꞌa. Bay iya lāng kami sabab in iya nggaꞌi ka seheꞌtam.”
50 Sagōꞌ ahꞌlling si Isa, yukna, “Daꞌa iya lāngunbi sabab sasuku mbal anaggaꞌ kaꞌam amogbog du.”
Si Isa Mbal Tinaimaꞌ eꞌ saga Aꞌa Samariya
51 Manjari itu, pagka song taꞌabut na waktu pamaꞌangkat si Isa ni sulgaꞌ, amanuyuꞌ toꞌongan iya pehēꞌ ni Awrusalam. 52 Aniyaꞌ saga aꞌa sohoꞌna parahū min iya, ati pehēꞌ sigām palꞌngngan tudju ni dakayuꞌ kauman ma lahat Samariya anakapan pahantiꞌanna mahēꞌ. 53 Saguwāꞌ saga aꞌa ma kauman inān mbal bilahi anaimaꞌ si Isa sabab Awrusalam ya patudjuhanna. 54 Kinataꞌuwan paꞌin itu eꞌ duwa mulidna, si Yakub maka si Yahiya, yuk sigām ni si Isa, “Tuwan Panghūꞌ, bilahi ka bahāꞌ bang kami anohoꞌ api pahūg min sulgaꞌ pangamula saga aꞌa inān?”
55 Sagōꞌ niharap duwangan itu eꞌ si Isa boꞌ pahꞌllinganna. 56 Manjari palanjal sigām minnēꞌ boꞌ ni kalumaꞌan saddī.
Saga Aꞌa Maghawal-hawal Ameyaꞌ ma si Isa
57 Ma palꞌngnganan paꞌin sigām, aniyaꞌ dakayuꞌ aꞌa amissala ni si Isa, yukna, “Tuwan, bilahi aku ameyaꞌ ma kaꞌa piꞌingga-piꞌingga papeheꞌannu.”
58 Yuk si Isa ma iya, “Gōm hayop talun aniyaꞌ patꞌnnaꞌanna, maka kamanuk-manukan aniyaꞌ pugaranna. Saguwāꞌ aku itu, Anak Manusiyaꞌ, halam taga-pahantiꞌan luggiyaꞌ.”
59 Ahꞌlling si Isa ni aꞌa dakayuꞌ, yukna, “Piꞌitu ka ameyaꞌ ma aku.”
Sagōꞌ magtumagal aꞌa heꞌ, yukna, “Tuwan, pabaꞌirun giꞌ aku pabīng ni lumaꞌ. Subay na apuwas pangubulku ma mmaꞌku boꞌ yampa aku ameyaꞌ ma kaꞌa.”
60 Anambung si Isa, yukna, “Patut bang aꞌa amatay pinakubul ma saga aꞌa kaseheꞌan ya halam kaniyaꞌan kallum taptap. Sagōꞌ kaꞌa, pehēꞌ ka palꞌngngan magnasihat pasal pagparinta Tuhan.”
61 Aniyaꞌ isab aꞌa dangan ahꞌlling ma si Isa, yukna, “Ameyaꞌ aku ma kaꞌa, Tuwan, sagōꞌ dūlin aku amaꞌid min mattoꞌa-danakanku dahū.”
62 Yuk si Isa ma iya, “Bang aniyaꞌ aꞌa magararu ma humana boꞌ hal palingiꞌ angꞌndaꞌ ni buliꞌanna, mbal taluwaꞌ. Damikiyanna bang aꞌa bilahi ameyaꞌ ma aku boꞌ abimbang ma ai-ai bay bbahanna heꞌ, mbal iya tōp maghinang ma pagparintahan Tuhan.”