8
Mpat Ngibu Aꞌa Pinakan eꞌ si Isa
1 Mbal atꞌggol minnēꞌ aheka isab saga aꞌa patimuk pinaꞌan. Pagka halam aniyaꞌ kinakan sigām, nilinganan eꞌ si Isa saga mulidna pehēꞌ ni iya. Yukna ma sigām, 2 “Maꞌaseꞌ aku ma baꞌanan aꞌa itu sabab katꞌllu na llaw itu ya kamaitu sigām ma aku, maka halam aniyaꞌ kinakan sigām. 3 Bang sigām papoleꞌku ma halam bay makakakan, arakalaꞌ pinunung sigām ma palꞌngnganan, sabab aniyaꞌ kaseheꞌ atā pamoleꞌan sigām.”
4 Yuk saga mulidna ma iya, “Na, maingga bahāꞌ pangāꞌanta kinakan sarang pamakan kaheka aꞌa itu? Itiyaꞌ kitam ma lahat halam aniyaꞌ kalumaꞌanna itu!”
5 Atilaw si Isa ma sigām, yukna, “Pila solag tinapaybi ilu?”
“Pituꞌ,” yuk sambung sigām.
6 Manjari sinohoꞌ eꞌ si Isa katimukan aꞌa inān magtingkōꞌan ma tanaꞌ. Niāꞌ eꞌna pituꞌ tinapay inān boꞌ magsarang-sukul ni Tuhan. Puwas eꞌ pinagpōng-pōng eꞌna boꞌ yampa sōnganna ni saga mulidna, ati tinopod-toporan baꞌanan aꞌa inān eꞌ sigām. 7 Aniyaꞌ isab ma sigām saga daing anahut, salat hekana. Pinagsukulan eꞌ si Isa boꞌ tinopod-topod isab eꞌ mulidna ma saga aꞌa heꞌ. 8 Jari magkakanan sigām kamemon sampay asso. Puwas eꞌ aniyaꞌ pituꞌ ambung aheya apꞌnnoꞌ eꞌ kapin kinakan bay tatimuk eꞌ saga mulid. 9 Saga aꞌa bay magkakanan inān, aniyaꞌ kulang-labi mpat ngibu. Manjari pinapoleꞌ na sigām eꞌ si Isa, 10 ati paruwaꞌ iya maka saga mulidna ni bayanan boꞌ pauntas pehēꞌ ni lahat Dalmanuta.
Saga Parisi Mikipaꞌndaꞌ Paltandaꞌan
11 Pagtꞌkka disi Isa ni Dalmanuta, aniyaꞌ pehēꞌ ni iya saga aꞌa Parisi amowa iya magsuꞌal. Bilahi sigām anulayan iya, ya poꞌon sigām mikipaꞌndaꞌ paltandaꞌan, palsaksiꞌan in iya bꞌnnal taga-kapatut min Tuhan. 12 Manjari anganapas si Isa paheya sabab kasusa deyom atayna, ati yukna ma sigām, “Angay bahāꞌ saga aꞌa ma patahunan itu, hal angamuꞌ paltandaꞌan? Bꞌnnal ya pangahakaku ma kaꞌam, halam aniyaꞌ paltandaꞌan pinaꞌndaꞌan kaꞌam.”
13 Jari alaꞌan iya min sigām. Pariyataꞌ iya pabīng ni bay pameyaꞌanna boꞌ pauntas iya pehēꞌ ni dambilaꞌ danaw.
Pagbandaꞌ Pasal Panduꞌ saga Parisi maka si Herod
14 Na, halam aniyaꞌ lutuꞌ tabowa eꞌ saga mulid si Isa, halam taentom. Luwal dansolag tinapay bay ma deyom bayanan asal. 15 Jari pinanduꞌan sigām eꞌ si Isa, yukna, “Kamayaꞌ-mayaꞌ kam. Halliꞌinbi pasulig tinapay min saga Parisi maka pasulig sultan Herod!”
16 Magsuli-suli saga mulid pasal pahꞌllingna itu sabab halam tahati eꞌ sigām. Yuk sigām, “Angkan maraiꞌ buwattēꞌ pahꞌlling si Isa sabab halam kitam bay amowa tinapay.”
17 Kinataꞌuwan asal eꞌ si Isa bang ai ya pagsuli-suli sigām, angkan yukna, “Angay kam magsuli-suli pasal halam aniyaꞌ tinapaybi? Halam giꞌ tahatibi bahāꞌ? Akulang bahāꞌ akkalbi? 18 Aniyaꞌ matabi sagōꞌ mbal kam makaꞌndaꞌ. Aniyaꞌ taingabi sagōꞌ mbal makakale. Araiꞌ halam taentombi bay hinangku llaw inaꞌan-i, 19 waktu bay kapagpōng-pōngku tinapay lima hekana pamakan saga limangibu aꞌa. Pila heka ambung aheya bay pangisihanbi kapin kinakan?”
Yuk sigām, “Sangpūꞌ maka duwa.”
20 “Maka tinapay pituꞌ hekana-i,” yuk si Isa, “ya bay pagpōng-pōngku ma saga aꞌa mpat ngibu. Pila ambung bay pangisihanbi?”
“Pituꞌ,” yuk sigām.
21 “Na,” yukna, “mbal na paꞌin kam makahati.”
Aꞌa Buta Kauliꞌan eꞌ si Isa
22 Jari atꞌkka na disi Isa ni kalumaꞌan Betsaida, maka aniyaꞌ saga aꞌa amowa aꞌa buta. Angamuꞌ sigām junjung bang paꞌin iya pinatꞌnnaꞌan tangan si Isa. 23 Sakali binalutan eꞌ si Isa tangan aꞌa buta heꞌ ati niambit eꞌna paluwas min kalumaꞌan inān. Ma luwasan paꞌin, niludjaꞌan eꞌna matana boꞌ yampa patꞌnnaꞌna tanganna ni iya. Puwas eꞌ tinilaw iya eꞌ si Isa, “Aniyaꞌ bahāꞌ taꞌndaꞌnu?”
24 Patongas aꞌa heꞌ angꞌndaꞌ ni dahuanna. “Ahoꞌ,” yukna, “aniyaꞌ taꞌndaꞌku saga aꞌa, sagōꞌ luwana saliꞌ poꞌon kayu sikalꞌngnganan.”
25 Pinatꞌnnaꞌ eꞌ si Isa tanganna ni mata aꞌa itu, kaminduwana na, jari pagpatongna ma buwattinaꞌan kauliꞌan na matana maka asawa na eꞌna angꞌndaꞌ ma kamemon. 26 Puwas eꞌ pinapoleꞌ iya eꞌ si Isa maka eꞌna ahꞌlling, yuk-i, “Daꞌa ka pasōd pabīng ni deyom kalumaꞌan.”
Si Petros Magpasabꞌnnal Pasal Al-Masi
27 Manjari itu palanjal si Isa maka mulidna ni saga kalumaꞌan ma sakalibut daꞌira Kesareya Pilipi. Na, ma labayan paꞌin, atilaw si Isa ma saga mulidna, yukna, “Sai konoꞌ aku bang ma pahꞌlling saga aꞌa?”
28 Yuk sambung saga mulid eꞌ, “Bang ma aꞌa kaseheꞌan kaꞌa konoꞌ si Yahiya Magpapandi. Bang ma aꞌa kaseheꞌ in kaꞌa nabi Elija. Maka bang ma aꞌa kaseheꞌ isab dakayuꞌ nabi ka bay ma masa awal eꞌ.”
29 “Na, bang ma kaꞌam,” yuk tilaw si Isa, “sai sa aku itu?”
Anambung si Petros. “Kaꞌa Al-Masi,” yukna, “ya tapeneꞌ eꞌ Tuhan.” 30 Puwas eꞌ binandaꞌan eꞌ si Isa saga mulidna, sinōꞌ daꞌa angahaka ni sai-sai in iya Al-Masi.
Pamissala si Isa Pasal Kamatayna
31 Na, minnēꞌ anagnaꞌ si Isa amanduꞌan saga mulidna pasal ai song tumꞌkka ni iya. “Aku,” yukna, “Anak Manusiyaꞌ, aheka du kabinasahan song patꞌkka ni aku. Maka sinulak du aku eꞌ saga pagmattoꞌahan maka saga kaimaman alanga maka saga guru saraꞌ agama. Pinapatay du aku sagōꞌ taꞌabut paꞌin katꞌllu llawna, allum du aku pabīng.” 32 Pinapastiꞌ toꞌongan eꞌ si Isa pahꞌllingna itu ma sigām, jari binowa iya eꞌ si Petros paokat min kaseheꞌan boꞌ supaya pinabukagan. 33 Sagōꞌ palingiꞌ si Isa angꞌndaꞌ ma saga mulidna ati pabukaganna si Petros. “Alaꞌan ka min aku, saitan! Ya pamikilnu ilu pikilan manusiyaꞌ koꞌ, nggaꞌi ka pikilan Tuhan.”
34 Jari pinatimuk eꞌ si Isa kahekaꞌan aꞌa inān maka saga mulidna. Yukna, “Bang aniyaꞌ aꞌa bilahi ameyaꞌ ma aku, subay nggaꞌi ka kabayaꞌan baranna ya dūlanna. Subay tanggungna hāgna pamapatayan iya, hatina subay paglillaꞌna kabinasahan. Minnēꞌ iya makajari ameyaꞌ ma aku. 35 Sai-sai allogan kallum-baranna amutawan du kallum-nyawana min Tuhan. Sagōꞌ sai-sai mbal allog ma kallum-baranna, lillaꞌ isab amatay ma sababku maka ma sabab lapal ahāp itu, tantu iya makabāk kallum kakkal. 36 Sababna,” yuk si Isa, “bang aniyaꞌ aꞌa gantaꞌ kaniyaꞌan kamemon altaꞌ deyom dunya itu, boꞌ halam aniyaꞌ kallumna kakkal, aheya lugiꞌna. 37 Halam aniyaꞌ tapangalꞌkkatna kallum-nyawana bang amutawan na min iya. 38 Saga aꞌa ma tahun itu, dusahan asal kahekaꞌan sigām maka mbal angisbat Tuhan. Sasuku aiyaꞌ angahakaꞌan saga aꞌa pasal kapameyaꞌna ma aku maka ma panduꞌku, kinaiyaꞌan isab eꞌku. In aku Anak Manusiyaꞌ mbal angakuhan aꞌa inān ma waktu kapiꞌituku pabalik. Pabalik du aku aliput eꞌ sahaya Mmaꞌku, sineheꞌan isab aku eꞌ saga malaꞌikat asussi.”