15
Usulan bay Pangꞌbba eꞌ Kaꞌmboꞌ-mboꞌan
1 Manjari aniyaꞌ pinaꞌan ni si Isa saga aꞌa Parisi maka guru saraꞌ agama bay min daꞌira Awrusalam. Atilaw sigām ma iya, 2 yuk-i, “Angay saga mulidnu ilu mbal angisbat usulan bay pangꞌbba eꞌ kamattoꞌahantam? Amangan sigām minsan halam bay angoseꞌan tangan sigām pahāp.”
3 Anambung si Isa, yukna, “Na, kaꞌam ilu. Angay langgalbi panohoꞌan Tuhan ati beyaꞌbi saga usulan bay min kamattoꞌahanbi? 4 Entomunbi panohoꞌan Tuhan, ya yukna, ‘Wajib kam magaddatan mmaꞌbi maka inaꞌbi.’ Maka itu giꞌ, ‘Sai-sai anuknaꞌan mmaꞌna atawa inaꞌna, aꞌa inān subay pinapatay.’ 5 Sagōꞌ bang ma pamanduꞌbi, bang aniyaꞌ aꞌa gantaꞌ amissala ni mattoꞌana, yukna: ‘Kaniyaꞌku itu, arak bay panabangku kaꞌam sagōꞌ pasukuꞌku na ni Tuhan.’ 6 Minnēꞌ iya apuwas konoꞌ min saraꞌ pasal pagaddat ma kamattoꞌahan. Jari tasulakbi dī panohoꞌan Tuhan pagka pagmatayanbi saga usulan bay pangꞌbba eꞌ kaꞌmboꞌ-mboꞌanbi. 7 In kaꞌam ilu hal magbauꞌ-bauꞌ ameyaꞌ ma Tuhan, boꞌ halam. Bꞌnnal asal ya kallam Tuhan bay tasulat eꞌ nabi Isaya, 8 yuk-i,
‘Saga aꞌa itu angahulmat aku maka lapal kabtangan sigām,
sagōꞌ alawak deyom atay sigām min aku.
9 Ya pagpudji sigām ma aku halam aniyaꞌ pūsna,
sabab ya pamanduꞌ eꞌ sigām saga panohoꞌan bay pinahinang eꞌ manusiyaꞌ.’ ”
Ya Makatamak Pangatayan Manusiyaꞌ
10 Puwas eꞌ, nilinganan baꞌanan aꞌa inān eꞌ si Isa, sinōꞌ patimuk pabīng ni atagna. Yukna ni sigām, “Pakale kam ma bissalaku. Pahati kam toꞌongan. 11 Nggaꞌi ka kinakan pasōd ni deyom bowaꞌ ya makalumuꞌ aꞌa. Ya makalumuꞌ saga bissala alaꞌat paluwas min bowaꞌna.”
12 Sakali pinaꞌan ni si Isa saga mulidna. Yuk sigām, “Kataꞌuwannu bahāꞌ apꞌddiꞌ atay saga Parisi ma bay bissalanu insiniꞌ?”
13 Yuk sambung si Isa, “Kamemon tinanom ya halam bay tinanom eꞌ Mmaꞌku ma deyom sulgaꞌ, nilarut du. 14 Daꞌa kam magsusa pasal sigām. Sigām angamalim, sagōꞌ ibarat sigām aꞌa buta. Bang buta angambit seheꞌna buta, tantu sigām ahūg karuwangan ni deyom lowang.”
15 Sakali ahꞌlling si Petros, yukna, “Pahatiun kami pasal bay pamaralilnu ilu.”
16 Yuk si Isa, “Oy! Sampay kaꞌam ilu masi aꞌawam! 17 Halam bahāꞌ tahatibi? Bang aniyaꞌ kinakan pasōd ni deyom bowaꞌ aꞌa, pasampay du ni deyom bꞌttongna boꞌ yampa paluwas min baranna. 18 Sagōꞌ ya bissala alaꞌat paluwas min bowaꞌ aꞌa, bay pinoꞌonan asal min deyom atayna. Ya heꞌ makalumuꞌ iya. 19 Sabab deyom atay manusiyaꞌ ya paluwasan honaꞌ-honaꞌna alaꞌat, ya angkan iya maghinang kalaꞌatan kaginisan, buwat saga amapatay, angaliyu-lakad, angahinang kahinaꞌan dꞌnda-lꞌlla, anangkaw, magputing, maka angalimut. 20 Kamemon itu makalumuꞌ aꞌa. Sagōꞌ bang kita amangan ma halam bay angoseꞌan tanganta buwat pamanduꞌ saga Parisi, nggaꞌi ka heꞌ-i makabuwan kalumuꞌan.”
Pangandol Dakayuꞌ Dꞌnda min Lahat Kanaꞌan
21 Sakali palanjal si Isa minnēꞌ tudju ni jadjahan daꞌira Tira maka daꞌira Sidun. 22 Aniyaꞌ dꞌnda bangsa Kanaꞌan min lahat inān bay pehēꞌ ni si Isa anganjunjung. “O Tuwan,” yukna, “tubuꞌ si Daꞌud, maꞌaseꞌ ka ma aku. Anakku dꞌnda sinōd saitan, abinsanaꞌ sidda.”
23 Sagōꞌ halam makasambung si Isa minsan dakabtang. Jari pasekot saga mulidna amogos iya pasal dꞌnda inān, yuk-i, “Sohoꞌun iya alaꞌan! Mbal iya pahali angalinganan kitam!”
24 Anambung si Isa, yukna, “Bay aku sinōꞌ piꞌitu anabang saga aꞌa bangsa Israꞌil sadja, ya saliꞌ dalil bili-bili alungay min labayan.”
25 Sagōꞌ takale paꞌin lling itu eꞌ dꞌnda, magtūy iya pasujud ni tongod tapeꞌ si Isa. “O Tuwan,” yukna, “tabangun aku.”
26 Sinambungan iya eꞌ si Isa pinaralilan, yukna, “Mbal manjari niāꞌ kinakan saga anak lissi boꞌ nilarukan ni saga eroꞌ.”
27 “Bꞌnnal, Tuwan,” yuk dꞌnda. “Sagōꞌ minsan saga eroꞌ amangan du momok kinakan ya apakpak min lamisahan tag-ipatan ma sigām.”
28 Sakali anambung si Isa, yukna, “Arung, ahogot imannu. Nirūlan du bay pangamuꞌnu ilu.” Manjari ma waktu heꞌ-i saruꞌun-duꞌun du kauliꞌan anakna dꞌnda heꞌ.
Aheka Aꞌa Kauliꞌan eꞌ si Isa
29 Puwas eꞌ alaꞌan si Isa min lahat inaꞌan, amaklay min bihing danaw Jalil. Jari patukad iya ni bīd-bīd aningkōꞌ mahēꞌ. 30 Landuꞌ aheka aꞌa bay pinaꞌan ni iya amowa saga pengkaꞌ, saga aꞌa akuꞌil, saga buta, saga umaw, sampay baꞌanan aꞌa sasuku taluwaꞌ ginisan saki. Pinatꞌnnaꞌ sigām eꞌ seheꞌ sigām ma tongod tapeꞌ si Isa, ati kauliꞌan sigām eꞌna kamemon. 31 Ainu-inu toꞌongan saga aꞌa inān, pagꞌndaꞌ sigām ma aꞌa bay umaw makapahꞌlling na, aꞌa bay akuꞌil kauliꞌan na, bay pengkaꞌ makalꞌngngan na pabontol, bay buta makaꞌndaꞌ na. Manjari sinanglitan eꞌ sigām Tuhan, ya pagtaꞌatan bangsa Israꞌil.
Mpat Ngibu Aꞌa Pinakan eꞌ si Isa
32 Sakali nilinganan eꞌ si Isa saga mulidna boꞌ yukna, “Maꞌaseꞌ aku ma saga aꞌa itu, sabab katꞌlluna llaw itu ya kamaitu sigām ma aku, maka halam na aniyaꞌ kinakan sigām. Mbal aku bilahi amapoleꞌ sigām ma halam bay amangan dahū, arakalaꞌ pinunung sigām ma palꞌngnganan.”
33 Tinilaw iya eꞌ saga mulidna, yuk-i, “Maingga bahāꞌ pangāꞌanta kinakan sarang pamakan baꞌanan aꞌa itu? Itiyaꞌ kitam ma lahat halam aniyaꞌ kalumaꞌanna!”
34 Yuk si Isa, “Pila heka tinapaybi ilu?”
“Pituꞌ tinapay,” yuk sigām, “maka saga daing arikiꞌ mbal aheka.”
35 Manjari sinohoꞌ eꞌ si Isa kahekaꞌan aꞌa inān magtingkōꞌan ma tanaꞌ. 36 Niāꞌ eꞌna kapituꞌ tinapay maka saga daing eꞌ, boꞌ yampa magsukul ni Tuhan. Puwas eꞌ pinagpōng-pōng eꞌna tinapay maka daing-daing eꞌ boꞌ sōnganna ni saga mulidna. Ati tinopod-toporan saga aꞌa inān eꞌ sigām. 37 Magkakanan sigām kamemon sampay magꞌssohan na. Aubus paꞌin bay amangan, aniyaꞌ pituꞌ ambung aheya apꞌnnoꞌ eꞌ kapin kinakan bay tatimuk eꞌ saga mulid eꞌ. 38 Saga aꞌa bay magkakanan inān aniyaꞌ saga mpat ngibu bang lꞌlla sadja niꞌitung, saddī dꞌnda maka ondeꞌ-ondeꞌ. 39 Jari pinapoleꞌ saga aꞌa inān eꞌ si Isa. Pariyataꞌ iya ni bayanan boꞌ yampa pauntas ni lahat Magadan.