7
Usulan Manusiyaꞌ maka Panohoꞌan Tuhan
1 Na, aniyaꞌ patimuk ni si Isa saga Parisi maka saga guru saraꞌ agama bay palūd pinaꞌan min Awrusalam. 2 Taꞌndaꞌ eꞌ sigām saga mulid si Isa amangan boꞌ halam bay angoseꞌ tangan sigām. Haram konoꞌ bang ma saga Parisi. 3 Ya addat saga Parisi maka kamemon bangsa sigām Yahudi, mbal amangan bang halam bay makakoseꞌ tangan dahū, sabab amogbog usulan bay pangꞌbba eꞌ kaꞌmboꞌ-mboꞌan sigām. 4 Bang sigām tapoleꞌ min tabuꞌ mbal amangan bang halam bay angoseꞌ dahū. Aheka giꞌ isab saga usulan binogbogan eꞌ sigām, buwat pangoseꞌ saga sawan maka siliꞌ maka saga pamanganan tumbaga.
5 Angkan tinilaw si Isa eꞌ saga Parisi maka saga guru saraꞌ agama inān, yuk-i, “Angay saga mulidnu mbal amogbog usulan bay pangꞌbba eꞌ kaꞌmboꞌ-mboꞌantam ati amangan minsan halam bay sinussi tangan sigām dahū?”
6 Anambung si Isa, yukna, “Kaꞌam ilu hal magbauꞌ-bauꞌ ameyaꞌ ma Tuhan, boꞌ halam. Bꞌnnal toꞌongan ya bay tasulat eꞌ si Isaya ma deyom Kitab, ya yuk-i,
‘Saga aꞌa itu, yuk Tuhan, angahulmat aku maka lapal kabtangan sigām,
sagōꞌ alawak deyom atay sigām min aku.
7 Ya pagpudji sigām ma aku halam aniyaꞌ pūsna,
sabab ya pamanduꞌ eꞌ sigām hal panohoꞌan
bay pinahinang eꞌ manusiyaꞌ, nggaꞌi ka deyoꞌ bay min aku.’
8 “Ya du kaꞌam,” yuk si Isa, “anaikutan panohoꞌan Tuhan ati usulan manusiyaꞌ ya bogboganbi. 9 Apanday kam pahāp!” yukna. “Taikutanbi panohoꞌan Tuhan supaya bogboganbi saga usulan bay pangꞌbba eꞌ kamattoꞌahanbi! 10 Kira-kirahunbi saraꞌ-panohoꞌan ya bay tasulat eꞌ si Musa, ya yuk-i, ‘Wajib kam magaddatan mmaꞌbi maka inaꞌbi.’ Maka itu giꞌ, ‘Sai-sai ahꞌlling alaꞌat ma mmaꞌna atawa inaꞌna, aꞌa inān subay pinapatay.’ 11 Sagōꞌ kaꞌam,” yuk si Isa, “magsaddī-saddī ya pamanduꞌbi ma saga aꞌa. Ma pamanduꞌbi, bang aniyaꞌ gantaꞌ amissala ni inaꞌ-mmaꞌna, yukna, ‘Mmaꞌ, atawa Inaꞌ, arak bay panabangku kaꞌa kaniyaꞌku itu, sagōꞌ mbal na sabab pagkulban.a’ 12 Na, bang buwattēꞌ pamissala aꞌa inaꞌan,” yuk si Isa, “mbal na iya pahinangbi ai-ai panabangna ma mmaꞌna atawa inaꞌna. 13 Manjari minnēꞌ pahalambi dī panohoꞌan Tuhan ati panduꞌanbi saga usulan bay pangꞌbba eꞌ kaꞌmboꞌ-mboꞌanbi. Maka aheka giꞌ isab saga kahinanganbi buwattēꞌ.”
Ya Makatamak Pangatayan Manusiyaꞌ
14 Puwas eꞌ nilinganan baꞌanan aꞌa inān eꞌ si Isa, sinōꞌ patimuk pabīng ni atagna. Yukna ma sigām, “Pakale kam kamemon ma bissalaku itu. Hatiunbi toꞌongan. 15 Nggaꞌi ka kinakan pasōd ni deyom baran aꞌa ya makalumuꞌ iya. Ya makalumuꞌ iya saga ai-ai ya paluwas min deyom atayna. 16 Sasuku kam makakale, ikutunbi toꞌongan.”
17 Jari makalaꞌan paꞌin si Isa min saga aꞌa inān, pasōd iya ni deyom lumaꞌ ati tinilaw eꞌ saga mulidna pasal bay pamanduꞌna heꞌ. 18 Yukna ma sigām, “Kaꞌam isab, halam aniyaꞌ panghatibi? Angay mbal kataꞌuwanbi? Bang aniyaꞌ kinakan pasōd ni deyom baran aꞌa bay min luwasan, mbal makalumuꞌ iya. 19 Sabab mbal makasampay ni pangatayanna sagōꞌ pasōd ni deyom bꞌttongna boꞌ yampa paluwas min baranna.” Minnēꞌ tapahati eꞌ si Isa in kinakan kamemon halal asal.
20 Yuk si Isa lagiꞌ, “Ya paluwas min deyom pangatayan manusiyaꞌ, ya na heꞌ makalumuꞌ iya. 21 Sabab deyom atayna toꞌongan ya paluwasan honaꞌ-honaꞌna alaꞌat. Ya heꞌ poꞌonna angkan iya maghinang kalaꞌatan, buwat saga angahinang kahinaꞌan ma dꞌnda, anangkaw, amapatay, angaliyu-lakad, 22 anganapsuhan kaniyaꞌ aꞌa kaseheꞌan, angakkal, magbaꞌis, angimbū, angalimut, magmalangkahi, maka magkarupangan. 23 Saga kalaꞌatan itu kamemon,” yuk si Isa, “paluwas min deyom pangatayan aꞌa, angkan iya alumuꞌ.”
Pangandol Dꞌnda Bangsa Girīk
24 Jari palanjal si Isa minnēꞌ tudju ni jadjahan daꞌira Tira. Mahēꞌ paꞌin, pasōd iya ni dakayuꞌ lumaꞌ boꞌ pahantiꞌ mahēꞌ. Kabayaꞌanna subay halam aniyaꞌ makataꞌu pasal kamahēꞌna, sagōꞌ mbal kalimbungan. 25 Aniyaꞌ dꞌnda mainaꞌan bay makakale pasal si Isa. Dꞌnda itu taga-anak dꞌnda-dꞌnda sinōd saitan. Jari pagkalena pasal kamahēꞌ si Isa magtūy iya pehēꞌ pasujud ni atag tapeꞌna. 26 In dꞌnda itu nggaꞌi ka Yahudi sagōꞌ bangsa Piniki min lahat Siriya. Jari angamuꞌ iya junjung ni si Isa bang paꞌin pinalaꞌan saitan min baran anakna. 27 Sagōꞌ anambung si Isa magparalilan, yukna, “Subay pinaꞌsso dahū saga anak lissi sabab mbal manjari niāꞌ kinakanna boꞌ nilarukan ni saga eroꞌ.”
28 “Bꞌnnal, Tuwan,” yuk dꞌnda. “Sagōꞌ minsan saga eroꞌ ma deyoꞌ lamisahan amangan du momok kinakan ya apakpak eꞌ ondeꞌ.”
29 Manjari ahꞌlling si Isa ma iya, yukna, “Amoleꞌ na ka. Nirūlan du ka ma sabab bissalanu ilu. Alaꞌan na saitan min deyom baran anaknu.”
30 Amoleꞌ na dꞌnda ati tabākna anakna palege ma pabahakanna. Halam na saitan.
Aꞌa Bisu maka Umaw Kauliꞌan
31 Alaꞌan si Isa min jadjahan Tira inān pabalik ni atag danaw Jalil. Niuntas eꞌna lahat Sidun, labay isab min lahat niōnan Sangpūꞌ Daꞌira. 32 Na, aniyaꞌ aꞌa bisu mbal agon makabissala pabontol, binowa ni si Isa eꞌ saga aꞌa. Angamuꞌ sigām junjung ni si Isa bang paꞌin pinatꞌnnaꞌ tanganna ma seheꞌ sigām. 33 Jari binowa iya eꞌ si Isa pasaddī min deyom kahekaꞌan, ati tinampongan eꞌ si Isa tainga aꞌa heꞌ. Angaludjaꞌ isab si Isa, boꞌ yampa ntananna dꞌllaꞌ aꞌa heꞌ. 34 Puwas eꞌ pahangad si Isa ni langit boꞌ anganapas paheya. Yukna ni aꞌa bisu maka aumaw inān, “Eppata!” Hatina “Paukab na kam!”
35 Makakale magtūy tainga aꞌa inān. Pinausay magtūy dꞌllaꞌna ati abontol na eꞌna amissala. 36 Jari niamay-amayan saga aꞌa inān eꞌ si Isa, sinōꞌ daꞌa angahaka ni sai-sai ma pasal inaꞌan-i. Sagōꞌ mangkinna sigām sinōꞌ daꞌa angahaka, mangkinna sigām angahaka. 37 Jari ainu-inu toꞌongan sasuku makakale. “Aꞌa itu,” yuk sigām, “ahāp sidda kahinanganna kamemon. Minsan aꞌa bisu tapakale eꞌna, aꞌa umaw tapabissala eꞌna.”