6
Si Isa Sinulak eꞌ saga Aꞌa Nasaret
1 Alaꞌan si Isa minnēꞌ boꞌ pabīng ni daꞌira Nasaret ya kauman luggiyaꞌ. Ameyaꞌ isab saga mulidna. 2 Manjari itu, pagꞌllaw Sabtuꞌ paꞌin, anagnaꞌ iya amanduꞌ ma deyom langgal, ati ainu-inu kahekaꞌan saga aꞌa ya akale ma iya. Yuk sigām, “Oy! Minningga bahāꞌ pangāꞌanna pangadjiꞌna itu? Pangitaꞌu ai bahāꞌ bay pamuwan ma iya, angkan iya makahinang saga hinangna kawasahan itu? 3 Bang kami mbal asāꞌ, ya na koꞌ itu karpentero, anak si Mariyam, danakan disi Yakub maka si Joses maka si Judas maka si Simun. Maka saga danakanna dꞌnda itiyaꞌ isab ma lūngantam itu.” Ati alaꞌat atay sigām ma si Isa.
4 Angkan yukna ma sigām, “In nabi pinagaddatan asal ma sabarang lahat. Ya sadja mbal magaddat ma iya bang aꞌa min lahatna luggiyaꞌ maka saga lahasiyaꞌna maka saga seheꞌna magdalumaꞌ.”
5 Jari halam aniyaꞌ hinang makainu-inu tahinang eꞌ si Isa mahēꞌ. Luwal saga aꞌa sakihan salat bay patꞌnnaꞌanna tanganna boꞌ kauliꞌan. 6 Ainu-inu toꞌongan iya bang angay saga aꞌa mainaꞌan mbal angandol ma iya.
Kasangpūꞌ maka Duwa Mulid Sinōꞌ Magnasihat
Na, talatag eꞌ si Isa saga kalumaꞌan ma jadjahan inān amanduꞌan saga aꞌa. 7 Nilinganan eꞌna saga mulidna kasangpūꞌ maka duwa pehēꞌ ni iya, ati sohoꞌna sigām palꞌngngan duwangan-duwangan magnasihat lapal Tuhan. Bay sigām buwananna kawasa pamalaꞌan saga saitan min deyom baran aꞌa, 8 ati sohoꞌna sigām subay mbal amowa lutuꞌ, atawa puyuꞌ pamowahan ai-ai, atawa sīn ma deyom sabitan sigām. Luwal tungkud ya makajari binowa eꞌ sigām. 9 Makajari sigām magtaumpaꞌ, sagōꞌ mbal sigām tinugutan amowa badjuꞌ pagsalinan. 10 Yuk si Isa ma sigām, “Bang kam gantaꞌ sinagina eꞌ aꞌa sinōꞌ pasōd ni lumaꞌna, subay mainaꞌan pahantiꞌanbi sampay taꞌabut waktu katulakbi min lahat inān. 11 Maka bang aniyaꞌ lahat patꞌkkahanbi boꞌ mbal anagina kaꞌam saga aꞌana, atawa mbal bilahi akale ma kaꞌam, alaꞌan kam min kalumaꞌan inaꞌan. Paspasinbi dahū bagunbunna min tapeꞌbi, tandaꞌ saksiꞌ in kaꞌam apuwas min sigām.”
12 Jari maglꞌngnganan na saga mulid magnasihat. Yuk pagnasihat sigām in manusiyaꞌ subay angꞌbba toꞌongan min dusa sigām sampay papinda ni Tuhan. 13 Aheka saga saitan bay tapalaꞌan eꞌ saga mulid eꞌ min deyom baran aꞌa, maka aheka aꞌa sakihan bay sinapuhan maka nsꞌllan, manjari kauliꞌan.
Kamatay si Yahiya Magpapandi
14 Manjari itu takale eꞌ Sultan Herod pasal kahinangan si Isa, sabab abantug ōnna ma kalahat-lahatan. Magupama isab saga aꞌa ma pasalna. Aniyaꞌ aꞌa kaseheꞌan magpaꞌin, yuk-i, “Si Yahiya Magpapandi bay pinakallum pabīng min kamatayna ya angkan tahinangna saga hinang kawasahan inān.”
15 Yuk aꞌa kaseheꞌ, “Nabi Elija koꞌ inān!”
Aniyaꞌ isab aꞌa kaseheꞌ ahꞌlling, yuk-i, “Nabi koꞌ inān buwat saga kanabi-nabihan bay ma masa awal eꞌ.”
16 Sagōꞌ pagkale itu eꞌ si Herod, yukna, “Si Yahiya koꞌ inān, ya bay sohoꞌku pinonggolan kōkna. Allum na iya pabīng.” 17-18 Angkan buwattēꞌ pahꞌlling si Herod sabab iya ya bay magpanohoꞌan anaggaw si Yahiya. Sinōꞌ iya nihengkotan maka kilikili boꞌ yampa niꞌisi ni deyom kalabusu. Buwattitu ya kahālanna: sultan Herod itu bay angahꞌnda si Herodiyas hꞌnda siyalina si Pilip, boꞌ paꞌin allum lagiꞌ si Pilip eꞌ. Manjari itu, pagka magtimbul na sigām, pinabukagan sultan Herod eꞌ si Yahiya, yuk-i, “Mbal manjari bang ka magtimbul maka hꞌnda danakannu! Dusahan ka!”
19 Na, ya inaꞌan sababanna angkan alaꞌat atay si Herodiyas ma si Yahiya. Ya kabilahianna subay pinapatay. Sagōꞌ halam iya karūlan sabab 20 aloman si Herod ma si Yahiya. Kinataꞌuwan asal eꞌna in si Yahiya aꞌa abontol maka aꞌadil. Angkan iya bay nihampanan eꞌ si Herod. Bilahi sidda akale si Herod ma pagnasihat si Yahiya, minsan makasasaw pikilanna.
21 Sakali aniyaꞌ waktu pamarūl kabayaꞌan si Herodiyas. Taꞌabut paꞌin llaw panabu kapaganak ma sultan Herod, magpajamu iya ma saga bagꞌllal ma pagsultananna, maka ma saga nakuraꞌ kasundaluhanna, maka ma saga aꞌa taga-ōn ma lahat Jalil. 22 Na, atimuk paꞌin saga aꞌa, pasōd pinaꞌan anak si Herodiyas budjang angigal, ati kasulutan sidda si Herod maka saga aꞌa maglurukan eꞌ. Jari amissala sultan ni budjang inān, yukna, “Angamuꞌ sadja ka. Ai-ai kabayaꞌannu, pamuwanku du ma kaꞌa.” 23 Anapa lagiꞌ iya, yukna, “Sapahanta ka, ai-ai amuꞌnu ni aku, pamuwanku toꞌongan ma kaꞌa minsan santongaꞌ altaꞌku kamemon.”
24 Paluwas budjang minnēꞌ boꞌ tilawna inaꞌna. “Inaꞌ,” yukna, “ai subay amuꞌku?”
Anambung inaꞌna, yukna, “Amuꞌun kōk si Yahiya Magpapandi.”
25 Magtūy paraiꞌ-daiꞌ budjang angamuꞌ ni sultan, yukna, “Tuwan sultan, ya itu amuꞌku ni kaꞌa, pamuwanun ma aku saruꞌun-duꞌun kōk si Yahiya Magpapandi, pinatꞌnnaꞌ ma talam!”
26 Anā, aheya kasusahan sultan sagōꞌ mbal iya bilahi amindahan janjiꞌna sabab bay iya makasapa ma alopan saga luruk eꞌ. 27 Magtūy iya magpanohoꞌan ma dakayuꞌ sundaluna, sinōꞌ pehēꞌ angāꞌ kōk si Yahiya. Jari pehēꞌ na sundalu inān boꞌ amonggolan kōk si Yahiya ma deyom kalabusu lagiꞌ. 28 Puwas eꞌ pinatꞌnnaꞌ eꞌna ma talam boꞌ yampa bowana pehēꞌ ni budjang eꞌ. Jari sinōngan eꞌ budjang ni inaꞌna. 29 Makakale paꞌin saga mulid si Yahiya pasal inaꞌan-i, pehēꞌ sigām angāꞌ mayatna kinubul.
Limangibu Heka Aꞌa Pinakan eꞌ si Isa
(Matiyu 14:13-21, Luke 9:10-17, Yahiya 6:1-14)
30 Na, pabīng ni si Isa saga aꞌa kawakilanna ati nihakaꞌan iya pasal kamemon bay tahinang sigām maka bay tapamanduꞌ sigām ma saga aꞌa. 31 Na, aheka aꞌa magpehēꞌ-piꞌitu ma atag inaꞌan, ya poꞌon sigām mbal makaluhaya minsan magkakan. Angkan yuk si Isa ni saga mulidna, “Sūng kitam ni lahat halam magaꞌa, kitam-kitam sadja, boꞌ supaya kam makahali-hali minsan mbal atꞌggol.” 32 Jari amusay sigām minnēꞌ tudju ni lahat lꞌngngaw-lꞌngngawan, hal sigām sadja.
33 Saguwāꞌ aheka aꞌa bay makaꞌndaꞌ katulak sigām, ati takilā sigām. Manjari aheka saga aꞌa min kalumaꞌan inān kamemon, magdaiꞌ-daiꞌ amaklay min bihing susulan tudju ni patandanan disi Isa ati makarahū atꞌkka pehēꞌ. 34 Pagdeyoꞌ paꞌin si Isa, taꞌndaꞌna baꞌanan aꞌa itu, landuꞌ toꞌongan aheka. Tꞌkkahan iya aseꞌ ma sigām sabab sapantun sigām bili-bili halam aniyaꞌ angupiksaꞌ. Jari aheka pamanduꞌ ma sigām. 35 Pagka abay kohap na, pehēꞌ saga mulidna ni iya. Yuk sigām, “Tuwan, sōng sangom na, maka itiyaꞌ kitam ma lahat lꞌngngaw-lꞌngngawan. 36 Sohoꞌun lagiꞌ saga aꞌa itu pehēꞌ ni kalumaꞌan maka ni saga maghuhuma ma kareya-reyahan itu boꞌ makabꞌllihan di-sigām kinakan.”
37 Sagōꞌ anambung si Isa, yukna, “Kaꞌam na ya amakan sigām,” yukna.
Yuk sigām ma iya, “Ē! Baꞌanan aꞌa itu, subay tamba aꞌa walumbulan tꞌggolna boꞌ aniyaꞌ makabꞌllihan sigām tinapay! Ati sohoꞌnu kami amꞌlli?”
38 Atilaw si Isa, yukna, “Pila heka tinapaybi ilu? Ndaꞌunbi pehēꞌ.”
Pagtaꞌu paꞌin, yuk sigām, “Lima du tinapay maka duwa daing.”
39 Manjari magpanohoꞌan si Isa ma saga mulidna. Sinōꞌ pinatingkōꞌ saga aꞌa inān kamemon magtumpuk-tumpuk ma kaparangan. 40 Makatingkōꞌ paꞌin sigām, aniyaꞌ limampūꞌ, atawa dahatus aꞌa ma datumpuk. 41 Jari niāꞌ eꞌ si Isa lima tinapay maka duwa daing heꞌ boꞌ pahangad tudju ni langit magsukul ni Tuhan. Pinagpōng-pōng eꞌna tinapay ati sōnganna ni saga mulidna boꞌ pinagtopod-toporan saga aꞌa. Ya du duwa daing, bay pinagbahagiꞌ-bahagiꞌ eꞌna isab ma sigām kamemon. 42 Magkakanan na saga aꞌa inān kamemon sampay magꞌssohan na. 43 Pagubus paꞌin sigām amangan, tinipun eꞌ saga mulid kapin tinapay maka daing, ati apꞌnnoꞌ sangpūꞌ maka duwa ambung aheya. 44 Ya aꞌa bay amangan inān aniyaꞌ saga limangibu bang hal lꞌlla niꞌitung.
Si Isa Lumꞌngngan ma Kuwit Tahik
45 Puwas inān magtūy anohoꞌ si Isa ma saga mulidna subay paruwaꞌ ni bayanan. Pinarahū sigām eꞌna pauntas ni dambilaꞌ danaw ni daꞌira Betsaida, sabuna amapoleꞌ kahekaꞌan aꞌa inān. 46 Tapapoleꞌ paꞌin, patukad si Isa anambahayang ma bīd-bīd. 47 Sangom paꞌin lahat, inaꞌan saga mulidna ma tꞌngngaꞌ danaw boꞌ si Isa inaꞌan ma deya dangan-danganna. 48 Taꞌndaꞌna saga mulidna kahunitan magdayung sabab anaggaꞌ sigām baliyu. Jari itu, pagdaiꞌ llaw paꞌin, pehēꞌ iya tudju ni sigām palꞌngngan min kuwit tahik. Arāk kalabayan eꞌna saga mulidna, 49 saguwāꞌ taꞌndaꞌ iya eꞌ sigām palꞌngngan ma kuwit tahik, ati pangannal sigām umagad. Magsilahak toꞌongan sigām, 50 sabab niumagad sigām kamemon pagꞌndaꞌ sigām ma iya.
Sagōꞌ amissala magtūy si Isa ma sigām. “Paiman kam,” yukna. “Aku koꞌ itu. Daꞌa kam tināw.” 51 Jari paruwaꞌ si Isa ni bayanan boꞌ pabihing ni saga mulid eꞌ. Pagduwaꞌ paꞌin, pahali baliyu. Takꞌbbal isab atay sigām. 52 Sabab halam tahati eꞌ sigām pasal kahinang si Isa ma tinapay. Tuꞌud sigām atuwas pinanduꞌan.
Saga Aꞌa Gennesaret Kauliꞌan
53 Jari itu, atꞌkka paꞌin sigām ni dambilaꞌ danaw, parungguꞌ sigām ni bihing ma Gennesaret. 54 Pagdeyoꞌ paꞌin sigām min bayanan, takilā magtūy si Isa eꞌ saga aꞌa 55 ati magdauragan sigām angalatag kalahatan ma jadjahan inaꞌan-i. Binowa eꞌ sigām aꞌa taga-saki maka palegehan sigām, maingga-maingga lahat ya kakalehan sigām kamaheꞌan si Isa. 56 Maingga-maingga katꞌkkahanna, ai na ka ma kalumaꞌan, ai na ka ma daꞌira, ai na ka ma lahat deya, pinalege magtūy saga aꞌa asaki ma halaman tabuꞌ. Ati angamuꞌ sigām junjung ni si Isa, bang paꞌin pinaꞌabut ni iya tangan saga aꞌa sakihan minsan laꞌa hal tōng sꞌmmekna. Manjari sai-sai bay makaꞌntan ma sꞌmmek si Isa kauliꞌan du magtūy.