6
Pamakan si Isa ma saga Aꞌa Limangibu Hekana
1-4 Dakayuꞌ llaw, sōng paꞌin waktu paghinang Hinang Paglakad, pehēꞌ si Isa ni dambilaꞌ danaw Jalil (ya niōnan isab danaw Tibiri). Aheka toꞌongan saga aꞌa bay paturul ni iya sabab taꞌndaꞌ eꞌ sigām hinangna kawasahan ma saga aꞌa taga-saki. Manjari patukad si Isa maka saga mulidna ni bīd-bīd boꞌ aningkōꞌ mahēꞌ.
5 Sakali pagꞌndaꞌ si Isa aheka toꞌongan saga aꞌa patudju ni iya, ahꞌlling iya ma si Pilip dakayuꞌ mulidna, yukna, “Maingga pamꞌllihanta kinakan pamakan baꞌanan aꞌa itu?” 6 Angkan buwattēꞌ patilaw si Isa, sabab sinulayan eꞌna pangandol si Pilip. Malaingkan kinataꞌuwan eꞌ si Isa bang ai song hinangna.
7 Anambung si Pilip, yukna, “Minsan gadji walumbulan mbal makabꞌllihan tinapay sarang pamakan saga aꞌa itu, minsan hal dangkuriꞌ pararangan.”
8 Manjari ahꞌlling giꞌ dakayuꞌ mulid si Isa saddī, si Andariyas danakan si Simun Petros. 9 Yukna ni si Isa, “Itiyaꞌ maitu dakayuꞌ ondeꞌ-ondeꞌ lꞌlla, aniyaꞌ lima tinapayna maka duwa daingna. Sagōꞌ pamagayta bang hal itu pamakan baꞌanan aꞌa itu?”
10 Yuk si Isa, “Sōꞌunbi saga aꞌa ilu aningkōꞌ.” Aniyaꞌ mainaꞌan parang-parang aluha ati magtingkōꞌan sigām kamemon. Aniyaꞌ sigām limangibu aꞌa bang lꞌlla sadja niꞌitung, saddī dꞌnda maka ondeꞌ-ondeꞌ. 11 Ningāꞌ eꞌ si Isa tinapay heꞌ. Pinagsukulan eꞌna boꞌ yampa pagbahagiꞌna ma saga aꞌa magtingkōꞌan inān. Damikiyanna daing, bay binahagiꞌ eꞌna ma sigām pila-pila ya kabayaꞌan sigām. 12 Asso paꞌin sigām kamemon, ahꞌlling si Isa ni saga mulidna, yukna, “Timukunbi kapinna ilu boꞌ mbal kaugun.” 13 Magtūy aniyaꞌ sangpūꞌ maka duwa ambung pinꞌnnoꞌan eꞌ sigām maka kapin tinapay lima hekana inān.
14 Pagꞌndaꞌ saga aꞌa ma paltandaꞌan bay tahinang eꞌ si Isa inān, yuk sigām, “Bꞌnnal koꞌ itu, ya na itu nabi asal lagarantam piꞌitu ni dunya.” 15 Kinataꞌuwan eꞌ si Isa in saga aꞌa inān anganiyat anaggaw iya boꞌ nilogos magsultan. Angkan iya alaꞌan magtūy minnēꞌ ati patukad dangan-danganna ni būd.
Si Isa Lumꞌngngan ma Kuwit Tahik
16 Logob-logob paꞌin lahat, palūd saga mulid si Isa ni bihing danaw. 17 Pasakat sigām ni bayanan boꞌ pauntas ni dambilaꞌ danaw, tudju ni daꞌira Kapirnaum. Sangom na, sagōꞌ halam giꞌ si Isa bay makaꞌabut ni sigām. 18 Akosog na baliyu maka anganggoyak na tahik. 19 Makabusay paꞌin sigām saga lima atawa nnom kilometro lawakna, taꞌndaꞌ eꞌ sigām si Isa lumꞌngngan min kuwit tahik, pasekot na tudju ni bayanan sigām. Jari tināw sigām toꞌongan. 20 Sagōꞌ ahꞌlling si Isa, yukna, “Daꞌa kam tināw. Aku koꞌ itu.” 21 Minnēꞌ sigām bilahi amasakat iya ni bayanan. Pagsakatna paꞌin, magtūy sigām saruꞌun-duꞌun atꞌkka ni patudjuhan sigām.
22 Pagꞌllaw dakayuꞌ, inaꞌan ma dambilaꞌ danaw saga aꞌa bay pinakan eꞌ si Isa. Tataꞌu asal eꞌ sigām dakayuꞌ du bayanan bay pameyaꞌan saga mulid eꞌ. Maka kinataꞌuwan isab in si Isa halam bay paruwaꞌ ameyaꞌ ma saga mulidna. Luwal saga mulid bay pauntas parambilaꞌ. 23 Jari itu aniyaꞌ saga bayanan saddī bay min daꞌira Tibiri parungguꞌ ni kasekotan bay pagkakanan sigām tinapay, puwas bay pagsukulan eꞌ Panghūꞌ Isa. 24 Na, pagꞌndaꞌ saga aꞌa itu in si Isa maka saga mulidna halam na mainaꞌan, paruwaꞌ sigām ni saga bayanan inān boꞌ anumpang tudju ni Kapirnaum amiha si Isa.
Si Isa Sapantun Pagkakan Makakallum
25 Tabāk paꞌin si Isa eꞌ sigām ma dambilaꞌ danaw, yuk sigām ni iya, “Tuwan Guru, sumiyan kapiꞌitunu?”
26 Yuk sambung si Isa, “Bꞌnnal ya pangahakaku itu ma kaꞌam, ya angkan aku pihabi sabab asso kam eꞌ tinapay. Sagōꞌ halam tahatibi paltandaꞌan makainu-inu ya bay tahinangku inān ma pangꞌndaꞌbi. 27 Daꞌa pagtuyuꞌinbi kinakan magkabalos. Ya pagtuyuꞌanbi subay kinakan mbal magkabalos, ya makakallum saumul-umul. Aku Anak Manusiyaꞌ ya amuwanan kaꞌam kinakan itu sabab aniyaꞌ kapatut pamuwan aku eꞌ Mmaꞌku Tuhan, bainat in aku makasulut atayna.”
28 Manjari atilaw sigām ni si Isa, yuk-i, “Na, ai na paꞌin subay hinang kami boꞌ tabeyaꞌ kami kabayaꞌan Tuhan?”
29 Anambung si Isa, yukna, “Ya na itu kabayaꞌan Tuhan subay hinangbi: subay kam angandol ma aku, ya pinapiꞌitu eꞌna.”
30-31 Yuk sigām isab ni si Isa, “Paltandaꞌan ai paꞌndaꞌannu kami supaya kami magkahagad ma kaꞌa? Kaꞌmboꞌ-mboꞌantam ma masa awal eꞌ bay amangan manna mahēꞌ ma lahat paslangan. Tasulat koꞌ inān ma deyom Kitab, ya yuk-i, ‘Bay sigām buwananna kinakan min sulgaꞌ.’ Jari ai hinangnu?”
32 Ya sambung si Isa ma sigām, “Bꞌnnal ya pangahakaku ma kaꞌam, nggaꞌi ka si Musa ya bay amuwanan kinakan min sulgaꞌ. Mmaꞌku Tuhan ya amuwanan kaꞌam kinakan bꞌnnal min sulgaꞌ. 33 Sabab in kinakan pamuwan eꞌ Tuhan, ya na aꞌa deyoꞌ bay min sulgaꞌ, ya amuwan kallum ma manusiyaꞌ.”
34 Manjari angamuꞌ saga aꞌa inān ni si Isa, yuk-i, “Tuwan, satꞌggol kami allum buwanin kami kinakan ya pagbissalanu ilu.”
35 Yuk si Isa, “Aku na koꞌ kinakan makabuwan kallum. Sasuku ameyaꞌ ma aku mbal lingantu pabīng. Maka sasuku angandol ma aku mbal patay boheꞌ pabīng. 36 Sagōꞌ bay na sa kam hakaꞌanku, minsan aku taꞌndaꞌbi mbal du kam magkahagad. 37 Ameyaꞌ du ma aku aꞌa kamemon ya pamasukuꞌ aku eꞌ Mmaꞌku, maka mbal sulakku sasuku ameyaꞌ ma aku. 38 Ya angkan aku piꞌitu min sulgaꞌ nggaꞌi ka angahinang kabayaꞌan baranku, sagōꞌ kabayaꞌan Tuhan ya bay amapiꞌitu aku. 39 Ya kabayaꞌan Tuhan subay halam aniyaꞌ lungayku saga aꞌa bay pamasukuꞌna ma aku. Gom paꞌin pakallumku sigām kamemon ma llaw katapusan. 40 Sababna ya kabayaꞌan Mmaꞌku Tuhan ma aꞌa kamemon, sasuku angꞌndaꞌ maka magkahagad ma Anakna, tantu sigām kaniyaꞌan kallum kakkal ni kasaumulan. Pakallumku isab sigām ma llaw katapusan.”
41 Sakali itu magdugal saga nakuraꞌ inān ma pasal pahꞌlling si Isa heꞌ, ya yuk-i, “Aku itu kinakan min sulgaꞌ.” 42 Yuk sigām, “Bang kitam mbal asāꞌ, aꞌa itu si Isa anak si Yusup! Kataꞌuwanta inaꞌ-mmaꞌna. Jari angay iya ahꞌlling buwattēꞌ, in iya konoꞌ min sulgaꞌ?”
43 Anambung si Isa ma sigām, yukna. “Pahali kam magdugal. 44 Halam aniyaꞌ makapameyaꞌ ma aku, luwal bang kabuwanan bayaꞌ eꞌ Mmaꞌku ya bay amapiꞌitu aku. Ati sasuku ameyaꞌ ma aku pakallumku du ma llaw katapusan. 45 Aniyaꞌ tasulat ma deyom Kitab Kanabi-nabihan buwatittu: ‘Pinanduꞌan sigām kamemon eꞌ Tuhan.’ Sai-sai,” yuk si Isa, “akale maka angikut ma pamanduꞌ Mmaꞌku, ameyaꞌ du isab ma aku. 46 Halam aniyaꞌ bay makaꞌndaꞌ Tuhan, luwal aku ya piꞌitu min Tuhan. 47 Bꞌnnal ya pangahakaku itu ma kaꞌam, sasuku magkahagad ma aku aniyaꞌ kallumna kakkal ni kasaumulan. 48 Aku ya kinakan makabuwan kallum,” yuk si Isa. 49 “Saga kaꞌmboꞌ-mboꞌanbi bay makakakan manna ma lahat paslangan, sagōꞌ waꞌi du sigām magpatayan. 50 Malaingkan saddī in kinakan min sulgaꞌ itu. Bang aniyaꞌ aꞌa amangan kinakan itu, aꞌa inān mbal amatay. 51 Aku ya kinakan min sulgaꞌ, aku ya kinakan makabuwan kallum. Bang aniyaꞌ amangan kinakan itu-i, allum du iya sampay ni kasaumulan. Ya pamakanku manusiyaꞌ isiku koꞌ, ya paglillaꞌku boꞌ supaya allum saga manusiyaꞌ kamemon sampay ni kasaumulan.”
52 Manjari maglugat saga Yahudi ma sabab pamissala si Isa inān, yuk-i “Aꞌa itu, buwattingga kapamuwanna isina pamakan ma kitam?”
53 Yuk si Isa ni sigām, “Bꞌnnal ya pangahakaku itu ma kaꞌam, bang mbal kakanbi isi Anak Manusiyaꞌ maka bang mbal inumbi lahaꞌna, halam aniyaꞌ kallumbi bꞌnnal. 54 Sagōꞌ sasuku amangan isiku maka anginum lahaꞌku, kakkal du kallumna sampay ni kasaumulan. Maka pakallumku iya bang taꞌabut llaw kahinapusan, 55 sabab isiku itu asal kinakan bꞌnnal, maka lahaꞌku itu inuman bꞌnnal. 56 Sasuku amangan isiku maka anginum lahaꞌku pataptap ma aku, maka aku isab pataptap ma iya. 57 Bay aku pinapiꞌitu eꞌ Mmaꞌku ya kakkal salama-lama, maka kakkal isab kallumku ma sababna. Damikiyanna saga aꞌa amangan isiku, allum du isab ma sababku. 58 Ya na itu kinakan deyoꞌ bay min sulgaꞌ,” yuk si Isa. “Saddī koꞌ itu min kinakan niōnan manna ya bay takakan eꞌ kaꞌmboꞌ-mboꞌanbi ma masa awal eꞌ. Minsan sigām bay amangan manna heꞌ, magpatayan na paꞌin sigām bang taꞌabut gantaꞌan. Sagōꞌ sasuku amangan kinakan min sulgaꞌ itu, allum sampay ni kasaumulan.” 59 Binissala itu eꞌ si Isa waktu kapamanduꞌna ma deyom langgal Kapirnaum.
Aheka Bebeyaꞌan Angꞌbba min si Isa
60 Takale paꞌin panduꞌ si Isa itu, aheka bebeyaꞌanna ahꞌlling, yuk-i, “Ahunit makalanduꞌ pamanduꞌ itu. Halam aniyaꞌ makasandal akale.”
61 Halam aniyaꞌ bay angahakaꞌan si Isa sagōꞌ kataꞌuwanna asal in pamanduꞌna inān pagdugalan eꞌ sigām. Angkan yukna ni sigām, “Alaꞌat bahāꞌ ataybi ma sabab pamanduꞌku inān? 62 Na, buwattingga bahāꞌ bang taꞌndaꞌbi aku, Anak Manusiyaꞌ, pabīng ni lahat bay baiku? 63 Hakaꞌanta kam,” yuk si Isa, “Rū Tuhan ya taga-kawasa amuwan kallum bꞌnnal, pangitaꞌu manusiyaꞌ mbal. Makakallum pamanduꞌku itu, sabab luwas koꞌ itu min Rū Tuhan. 64 Sagōꞌ aniyaꞌ ma kaꞌam mbal magkahagad ma aku.” Buwattēꞌ pahꞌlling si Isa sabab kataꞌuwanna sangay min katagnaꞌ bang sai mbal magkahagad ma iya, maka bang sai song anukbalan iya ni bantana. 65 Ahꞌlling giꞌ si Isa, yukna, “Ya itu sababanna angkan yukku ma kaꞌam, halam aniyaꞌ ameyaꞌ ma aku bang nggaꞌi ka Mmaꞌku Tuhan ya amuwanan iya bayaꞌ.”
66 Pagka buwattēꞌ pahꞌlling si Isa, aheka saga mulidna bay alaꞌan min iya maka mbal na ameyaꞌ ma iya. 67 Angkan si Isa atilaw ni saga mulidna kasangpūꞌ maka duwa, yukna, “Ya du kaꞌam bahāꞌ, alaꞌan isab?”
68 Anambung si Simun Petros, yukna, “Tuwan, sai pameyaꞌan kami bang nggaꞌi ka kaꞌa? Luwal kaꞌa taga-lapal bissala ya amuwan kallum kakkal ni kasaumulan. 69 Magkahagad kami ma kaꞌa, maka kataꞌuwan kami in kaꞌa Dakayuꞌ-kayuꞌ Asussi ya bay piꞌitu min Tuhan.”
70 Yuk si Isa ni sigām, “Bay kam peneꞌku kasangpūꞌ maka duwa, sagōꞌ aniyaꞌ dangan min kaꞌam ilu pasōran saitan.” 71 Ya pinagbissala inān eꞌ si Isa si Judas anak si Simun Iskariyut. Sabab si Judas itu, minsan iya dakayuꞌ mulid si Isa min kasangpūꞌ maka duwa, tukbalanna du si Isa ni saga bantana ma sinosōng.