7
Si Isa maka Dauranakanna
1 Puwas eꞌ maglꞌngngan si Isa ma lahat Jalil sadja. Mbal iya makalanjal ni lahat Yahudiya sabab bilahi amapatay iya saga nakuraꞌ Yahudi mahēꞌ. 2 Sagōꞌ asekot paꞌin waktu paghinang bangsa Yahudi ma niōnan Hinang Panggung, 3 ahꞌlling ni si Isa saga danakanna lꞌlla, yuk-i, “Ahāp bang ka palanjal minnitu. Subay ka pehēꞌ ni lahat Yahudiya supaya taꞌndaꞌ eꞌ saga mulidnu bang ai hinangnu. 4 Sababna bang aꞌa bilahi abantug, subay mbal limbunganna hinangna. Pagka kaꞌa ilu maghinang saga hinang makainu-inu itu, subay ka magpataꞌu ni aꞌa kamemon.” 5 Minsan saga danakanna itu mbal amarassaya ma iya.
6 Anambung si Isa ma sigām, yukna, “Halam giꞌ taꞌabut waktu kapamaꞌndaꞌku di-ku. Sagōꞌ bang kaꞌam, minsan ai waktu makajari sadja, 7 sabab kaꞌam ilu mbal kinabꞌnsihan eꞌ saga aꞌa ma dunya itu, ya mbal angisbat Tuhan. Malaingkan kinabꞌnsihan aku eꞌ sigām sabab pahꞌllinganku na paꞌin kahinangan sigām alaꞌat. 8 Pehēꞌ kam ni paghinangan,” yuk si Isa ni saga danakanna. “Aku itu mbal giꞌ pehēꞌ sabab nggaꞌi ka giꞌ waktuku.” 9 Aubus paꞌin bay llingna itu, mainaꞌan giꞌ iya ma lahat Jalil.
Si Isa ma Paghinangan Yahudi
10 Makalikut paꞌin saga danakanna ni paghinangan, mbal atꞌggol paturul isab si Isa pehēꞌ sagōꞌ mbal iya parongan ma kahekaꞌan aꞌa inān angkan halam kinataꞌuwan kapehēꞌna. 11 Pinagpiha iya eꞌ saga nakuraꞌ Yahudi mahēꞌ ma paghinangan. Magtilaw sigām bang maingga iya.
12 Aheka saga aꞌa ma deyom katimukan inān maghigung-higung ma pasalan si Isa. Yuk kaseheꞌan, “Aꞌa ahāp si Isa.” Yuk isab kaseheꞌan, “Mbal, sabab parupangna saga aꞌa.” 13 Sagōꞌ halam aniyaꞌ makatawakkal anuli-nuli patampal ma pasalna sabab tināw sigām ma saga pagnakuraꞌan.
14 Sōng-sōng paꞌin atongaꞌ paghinang, pehēꞌ si Isa ni langgal pagkulbanan ati anagnaꞌ iya amanduꞌ. 15 Ainu-inu saga Yahudi ma pamanduꞌna, yuk-i, “Aꞌa itu halam bay makapagguru. Minningga bahāꞌ pangāꞌanna kataꞌuna?”
16 Anambung si Isa ma sigām, yukna, “Pamanduꞌku itu nggaꞌi ka min kataꞌuku, sagōꞌ min Tuhan ya amapiꞌitu aku. 17 Bang aniyaꞌ aꞌa bilahi angahinang kabayaꞌan Tuhan, kataꞌuwanna du pamanduꞌku itu bang min Tuhan atawa min paghonaꞌ-honaꞌku sadja. 18 Bang aꞌa gantaꞌ amissala min honaꞌ-honaꞌna hal, ya angutna kabantugan ma baranna. Sagōꞌ bang angutna kabantugan ma bay anohoꞌ iya, na, abontol aꞌa inān maka mbal angakkal.” 19 Ahꞌlling giꞌ si Isa ni saga nakuraꞌ inān, yukna, “Bay kam kapangꞌbbahan saraꞌ eꞌ si Musa, sagōꞌ halam aniyaꞌ min kaꞌam minsan dakayuꞌ amogbogan saraꞌ heꞌ. Angay kam bilahi amapatay aku?”
20 Anambung kahekaꞌan aꞌa, yuk sigām, “Kaꞌa ilu sinōd saitan! Sai bilahi amapatay kaꞌa?”
21 Yuk sambung si Isa, “Min tꞌdda du aku bay angahinang hinang makainu-inu pasaltaꞌ ma llaw Sabtuꞌ, ati kainu-inuhanbi kamemon. 22 Bay kam sinohoꞌ eꞌ si Musa subay angislam saga anakbi lꞌlla, boꞌ nggaꞌi ka min si Musa usulan itu sagōꞌ min kaꞌmboꞌ-mboꞌanbi tagnaꞌ. Angkan islambi anakbi bang taꞌabut llawna, minsan magsaltaꞌ maka llaw Sabtuꞌ. 23 Na, bang taꞌislambi anakbi lꞌlla ma llaw Sabtuꞌ supaya mbal talanggal saraꞌ si Musa, angay angkan akagit ataybi ma aku pagka pauliꞌku saki aꞌa ma llaw Sabtuꞌ du isab? 24 Daꞌa kam magdaiꞌ-daiꞌ anōngan aku dusa ma saukat na kam mbal kaꞌamuhan ma bay hinangku. In hukumanbi subay abontol.”
Ya Itu Bahāꞌ Al-Masi?
25 Manjari aniyaꞌ saga aꞌa Awrusalam magsuli-suli, yuk-i, “Ya na itu bahāꞌ aꞌa piniha eꞌ saga nakuraꞌ pinapatay? 26 Ndaꞌunbi,” yuk sigām. “Itiyaꞌ iya amissala patampal sagōꞌ mbal sinaggaꞌ eꞌ saga nakuraꞌ. Makatantu bahāꞌ sigām, in iya bꞌnnal Al-Masi? 27 Bang piꞌitu Al-Masi, mbal iya kinataꞌuwan bang minningga. Sagōꞌ aꞌa itu, kataꞌuwantam asal bang minningga.”
28 Amanduꞌ paꞌin si Isa ma deyom langgal pagkulbanan, pinatanog suwalana, yukna, “Ahoꞌ. Kataꞌuwanbi aku bang minningga. Halam aku bay piꞌitu hal min kabayaꞌanku. Bay aku sinohoꞌ piꞌitu eꞌ Tuhan, ya mbal magputing. Mbal iya kataꞌuwanbi, 29 sagōꞌ aku,” yuk si Isa, “ataꞌu du ma iya sabab minnēꞌ asal aku, maka iya ya bay anohoꞌ aku piꞌitu.”
30 Manjari pasulay sigām anaggaw iya, sagōꞌ halam aniyaꞌ minsan makaꞌntanan iya sabab halam giꞌ taꞌabut waktu pamapatay iya. 31 Malaingkan aheka aꞌa mainaꞌan magkahagad ma iya. Yuk sigām, “Ya na itu Al-Masi sabab halam aniyaꞌ makahinang hinang kawasahan palabi giꞌ hekana min saga hinang si Isa itu.”
32 Manjari takale eꞌ saga Parisi bang ai pinaghigung-higung eꞌ kahekaꞌan aꞌa inān ma pasal si Isa, angkan sigām maka saga imam alanga bay anohoꞌ saga jaga langgal pehēꞌ anaggaw iya. 33 Amissala si Isa ni saga aꞌa magtimukan inān, yukna, “Mbal aku atꞌggol maitu ma kaꞌam. Sōng na aku amoleꞌ pehēꞌ ni bay anohoꞌ aku piꞌitu. 34 Pihabi du aku, sagōꞌ mbal aku tabākbi sabab mbal kam makaturul ni papehēꞌanku inān.”
35 Manjari magsuli-suli saga nakuraꞌ Yahudi, yuk sigām, “Piꞌingga bahāꞌ aꞌa itu angkan iya mbal tabāktam? Pehēꞌ iya bahāꞌ ni kalahatan Girīk, ya paglahatan bangsatam magpulak-palik eꞌ? Pehēꞌ bahāꞌ iya amanduꞌan bangsa Girīk? 36 Ai hatina ya yukna inān, in kitam amiha iya, sagōꞌ mbal tabāktam. Maka mbal kitam makaturul ni papehēꞌanna?”
Boheꞌ Makabuwan Kallum Kakkal
37 Manjari taꞌabut paꞌin llaw katangbus paghinang inān, ya llaw aheya, anꞌngge si Isa amissala. Pinatanog laꞌa suwalana, yukna, “Sasuku kam patay boheꞌ, piꞌitu kam ni aku boꞌ kam painumku. 38 Sasuku magkahagad ma aku kataluwaꞌan sulat Kitab ya yuk-i, ‘aniyaꞌ patubud min deyom atayna saliꞌ dalil boheꞌ anasahan, boheꞌ makabuwan kallum.’ ” 39 Ya boheꞌ patubud pinagbissala eꞌ si Isa itu, hatina Rū Tuhan ya song pamuwan ma saga aꞌa magkahagad ma iya. Sagōꞌ ma waktu inaꞌan in Rū Tuhan halam giꞌ bay tapamuwan sabab halam giꞌ taꞌabut waktu pamabangsa si Isa eꞌ Tuhan.
40 Makakale paꞌin saga aꞌa ma bissala si Isa itu, yuk sigām kaseheꞌ, “Bꞌnnal koꞌ itu, ya na itu nabi asal lagarantam.”
41 Yuk kaseheꞌ, “Al-Masi iya.”
Sagōꞌ saddī lling kaseheꞌan. Yuk sigām, “Nggaꞌi ka iya Al-Masi, sabab Al-Masi nggaꞌi ka min lahat Jalil. 42 Yuk Kitab in Al-Masi subay panubuꞌ sultan Daꞌud, maka subay nianakan ma kalumaꞌan Betlehem sabab ya na lahat sultan Daꞌud.” 43 Jari magsaddī pamikil saga aꞌa ma pasalan si Isa. 44 Aniyaꞌ sigām bilahi anaggaw si Isa, sagōꞌ halam aniyaꞌ minsan makaꞌntan ma iya.
Mbal Magkahagad Pagnakuraꞌan Yahudi
45 Ma katapusanna pabalik na saga jaga inān. Tinilaw sigām eꞌ Imam Muwallam maka Parisi ya bay anohoꞌ sigām anaggaw si Isa yuk-i, “Angay iya halam tabowabi piꞌitu?”
46 Anambung saga jaga heꞌ, “Halam toꞌongan aniyaꞌ aꞌa amanduꞌ buwat pamanduꞌ aꞌa inān.”
47 Yuk saga Parisi, “Ya du kaꞌam bahāꞌ taparupang eꞌna? 48 Aniyaꞌ bahāꞌ nakuraꞌ atawa Parisi magkahagad ma iya? Tantu halam, minsan dakayuꞌ. 49 Ya sadja magkahagad saga aꞌa katimukan itu, aꞌa awam ma pasal saraꞌ si Musa. Angkanna sigām taluwaꞌ mulkaꞌ Tuhan!”
50 Sakali ahꞌlling si Nikudimus, ya bay makapehēꞌ ni si Isa waktu sangom eꞌ. Yukna ma saga pagkahina Parisi, 51 “Bang ma saraꞌtam mbal kita manjari amatꞌnnaꞌan hukuman ma aꞌa abila halam bay pinabissala dahū, supaya kinataꞌuwan bang ai bay hinangna.”