LUKAS
Pahati Pasal Jūd itu
Ya makasulat baꞌanan jūd maka sulat ma deyom Kitab itu bay bangsa Yahudi. Luwal si Lukas ya nggaꞌi ka, sabab bangsa Girīk iya.
Doktol asal si Lukas maka alanga pangadjiꞌna. Bagay toꞌongan iya maka si Paul, angkanna piꞌingga-piꞌingga palꞌngnganan si Paul magnasihat lapal ahāp pasal Panghūꞌ Isa, maumu parongan ma iya si Lukas. Minsan si Paul ma deyom kalabusu, minsan iya binowa ni daꞌira Rōm boꞌ nihukum, halam si Lukas bay angꞌbba min iya.
Jūd itu bay sinulat eꞌ si Lukas pamataꞌuna bagayna si Teyopilus, dakayuꞌ aꞌa bangsahan nggaꞌi ka isab Yahudi. Nihaka eꞌ si Lukas ma deyom jūd itu pasal kapiꞌitu si Isa ni dunya itu magbaran manusiyaꞌ. Ya kabayaꞌan si Lukas in aꞌa kamemon, Yahudi maka bangsa kaseheꞌ, subay makataꞌu pasal si Isa in iya asal Anak Tuhan pinapiꞌitu eꞌ Tuhan angalappas ma manusiyaꞌ min hukuman dusa sigām. Pinapastiꞌ eꞌ si Lukas itu nggaꞌi ka hal bangsa Yahudi ya tinabangan eꞌ si Isa sagōꞌ bangsa kamemon ma deyom dunya. Nihaka eꞌna bang buwattingga panabang si Isa ma saga aꞌa sakihan maka ma saga aꞌa katiksaꞌan, luba-lagiꞌna ma saga aꞌa dusahan. Nihaka isab eꞌ si Lukas pasal kamemon bay kalabayan eꞌ si Isa min llaw kapanganak ma iya sampay ni llaw kamatayna, sampay isab ni kallumna pabalik.