MARKUS
Pahati Pasal Jūd Itu
Si Markus itu abataꞌ lagiꞌ ma waktu kamaitu si Isa Al-Masi ma dunya. Lahatna bay mahēꞌ ma daꞌira Awrusalam, ati lumaꞌ di-sigām ya maumu pagtipunan saga mulid si Isa bang sigām anambahayang.
Tagnaꞌ kapagnasihat si Paul maka si Barnabas pehēꞌ ni saga bangsa nggaꞌi ka Yahudi, si Markus itu bay ameyaꞌ ma sigā sabab siꞌitna asal si Barnabas eꞌ. Sagōꞌ halam iya bay makatatas paseheꞌ ma sigā angkan iya amoleꞌ ni lahatna. Palabay paꞌin duwantahun minnaꞌan, ma song paꞌin disi Paul palanjal pabīng pehēꞌ ni saga lahat bay pagnasihatan sigā tagnaꞌ, bilahi si Barnabas amowa si Markus, sagōꞌ mbal bilahi si Paul. Jari aniyaꞌ pagsaggaꞌan sigā duwangan. Si Barnabas ya bay amowa si Markus pehēꞌ ni lahat saddī boꞌ magnasihat pasal si Isa mahēꞌ.
Atꞌggol-tꞌggol minnēꞌ ameyaꞌ na si Markus ma si Petros pehēꞌ ni lahat atala. Bang ma aꞌa kaseheꞌan si Petros ya sababanna angkan si Markus bay tabowa angandol toꞌongan ma Panghūꞌ Isa, maka si Petros ya bay amanduꞌan si Markus angkan iya makataꞌu pasal saga hinang makainu-inu bay tahinang eꞌ si Isa.
Ya jūd tasulat eꞌ si Markus itu bay sinulatan saga aꞌa nggaꞌi ka bangsa Yahudi, ya mahēꞌ ma daꞌira Rōm. Bay sinulat eꞌna supaya sigām makataꞌu pasal si Isa maka kawasana. Jari tasalsila eꞌ si Markus saga hinang makainu-inu bay tahinang eꞌ si Isa Al-Masi supaya amꞌnnal saga aꞌa in iya bꞌnnal taga-kawasa maka taga-kapatut angampun dusa.