MARKUS
1
Lapal Ahāp Pasal Al-Masi ya Tasulat eꞌ si
MARKUS
Pagnasihat si Yahiya Magpapandi
1 Ya na itu tagnaꞌan lapal ahāp pasal si Isa Al-Masi Anak Tuhan. 2 Tasulat asal eꞌ nabi Isaya ma deyom Kitab, yuk-i,
“Itiyaꞌ sosohoꞌanku,” yuk Tuhan.
“Sohoꞌku iya parahū min kaꞌa
boꞌ supaya sakapna lān palabayannu.”
3 Aniyaꞌ aꞌa angalingan ma lahat paslangan, yukna,
“Lanuꞌinbi lān palabayan Panghūꞌ,
pabontolunbi palꞌngngananna.”
4 Manjari itu patuwaꞌ si Yahiya pinaꞌan ni lahat paslangan maka eꞌna amandi saga aꞌa tandaꞌ saksiꞌ in sigām angꞌbba na min dusa sigām. Magnasihat iya ma saga aꞌa mainaꞌan, yukna, “Pataikut kam min dusabi boꞌ kam pinandi, ati niampun dusabi eꞌ Tuhan.” 5 Jari aheka aꞌa pehēꞌ ni si Yahiya min kaluhaꞌan lahat Yahudiya maka min daꞌira Awrusalam. Magpasabꞌnnal sigām pasal bay dusa sigām ati pinandi sigām eꞌ si Yahiya ma sapaꞌ Jordan.
6 Ya pasꞌmmek si Yahiya inān bulbul hayop untaꞌ bay tinꞌnnun,a maka dakayuꞌ sabitan kuwit sapiꞌ pakambot ma hawakanna. Ya kinakanna ampan dulu maka gulaꞌ buwani. 7 Anganasihat isab iya, yukna, “Aniyaꞌ piꞌitu damuli min aku aꞌa akawasa lagiꞌ min aku. Minsan engkot taumpaꞌna, mbal aku tinōp angahubaran iya. 8 Aku itu, hal boheꞌ ya pamandiku kaꞌam. Sagōꞌ iya inān, saddī bowahan pamandina ma kaꞌam, hatina in iya amasangon Rū Sussi ni deyom baranbi.”
Pamandi ma si Isa
9 Jari itu, ma waktu heꞌ-i, atꞌkka si Isa bay min Nasaret, dakayuꞌ kauman mahēꞌ ma lahat Jalil. Pinandi iya eꞌ si Yahiya ma sapaꞌ Jordan. 10 Na, makariyataꞌ paꞌin iya min deyom boheꞌ magtūy taꞌndaꞌna paukab langit maka Rū Tuhan pareyoꞌ tudju ni iya magpabaran magpasalupa assang. 11 Aniyaꞌ isab suwala ahꞌlling min deyom sulgaꞌ, yuk-i, “Kaꞌa ya anakku kalasahanku, landuꞌ makasulut atayku.”
Kapanulay ma si Isa
12 Jari pinapehēꞌ magtūy si Isa eꞌ Rū Tuhan ni lahat paslangan. 13 Mpatpūꞌ llaw mpatpūꞌ bahangi ya kamaheꞌna, sinasat na paꞌin eꞌ nakuraꞌ saitan, kalu tabowa magdusa. Ya seheꞌna mainaꞌan saga hayop talun, maka aniyaꞌ saga malaꞌikat angayura iya.
Si Isa Ameneꞌ Mpat Aꞌa Pamulid ma Iya
14 Na, takalabusu paꞌin si Yahiya, pehēꞌ si Isa ni lahat Jalil magnasihat pasal lapal ahāp min Tuhan. 15 “Taꞌabut na waktu bay pinagkallam,” yukna. “Asekot na waktu pagparinta Tuhan maitu ma manusiyaꞌ. Taikutinbi na dusabi maka kahagarunbi na lapal ahāp itu.”
16 Manjari itu, hinabu si Isa palꞌngngan ma bihing danaw Jalil, aniyaꞌ taꞌndaꞌna duwangan lꞌlla magdanakan, si Simun maka si Andariyas. Inaꞌan sigā angahūg pokot ma danaw, sabab magdaraing asal. 17 Yuk si Isa ma sigā, “Piꞌitu kam ameyaꞌ ma aku. Asal kam bay magāꞌ daing sagōꞌ bang aku ya pameyaꞌanbi panduꞌanta kam magāꞌ pagkahibi manusiyaꞌ ameyaꞌ ma aku.” 18 Na, takale paꞌin lling si Isa eꞌ duwangan inān, magtūy niꞌbbahan eꞌ sigā pokot sigā ati ameyaꞌ na ma si Isa.
19 Jari makalawak-lawak paꞌin si Isa minnēꞌ aniyaꞌ isab taꞌndaꞌna duwangan lꞌlla magdanakan, si Yakub maka si Yahiya, anak si Sibidi. Inaꞌan sigā ma diyataꞌ bayanan amahāp pokot. 20 Nilinganan magtūy sigā eꞌ si Isa, jari niꞌbbahan mmaꞌ sigā mainaꞌan ma diyataꞌ bayanan beyaꞌ maka saga tendogna ginagadjihan. Ati ameyaꞌ sigā ma si Isa.
Aꞌa Kapalaꞌanan Saitan eꞌ si Isa
21 Atꞌkka disi Isa pehēꞌ ni daꞌira Kapirnaum. Jari taꞌabut paꞌin llaw Sabtuꞌ, llaw mulliya ma bangsa Yahudi, pasōd si Isa ni deyom langgal mainaꞌan amanduꞌan saga aꞌa. 22 Ainu-inu saga aꞌa makakale ma pamanduꞌna sabab atā pagbiddaꞌanna maka pamanduꞌ saga guru saraꞌ agama. Taga-kawasa asal si Isa bang amanduꞌ.
23 Manjari ma waktu inaꞌan du aniyaꞌ lꞌlla sinōd saitan ma deyom langgal eꞌ. Angolang iya pakosog, yukna, 24 “O Isa min Nasaret! Ai maksudnu piꞌitu? Piꞌitu ka bahāꞌ amakaꞌat kami? Kataꞌuwanku bang sai ka. Kaꞌa ya Dakayuꞌ-kayuꞌ Asussi ya piꞌitu min Tuhan!”
25 Saguwāꞌ nilāng saitan inān eꞌ si Isa, yukna, “Pahali ka! Paluwas ka min aꞌa ilu!”
26 Jari pinapaspad aꞌa inān eꞌ saitan ati angolang iya pakosog boꞌ yampa paluwas min baranna. 27 Takuddat saga aꞌa kamemon bay mainaꞌan, ya poꞌon sigām magtilaw-tilawan di-sigām, yuk-i, “Ai bahāꞌ itu? Panduꞌ bahaꞌu maraiꞌ. Aꞌa itu taga-kawasa magpanohoꞌan minsan ma saga saitan ati bineyaꞌ iya eꞌ sigām!”
28 Manjari pasaplag magtūy kabantugan si Isa ni kaluhaꞌan lahat Jalil eꞌ.
Aheka Aꞌa Kauliꞌan
29 Puwas eꞌ, paluwas disi Isa min langgal boꞌ pehēꞌ ni lumaꞌ disi Simun maka si Andariyas. Parongan isab ma iya si Yakub maka si Yahiya. 30 Na, matoꞌa dꞌnda si Simun waꞌi palege sabab niꞌmmunan. Kahakaꞌan magtūy si Isa pasal sakina, 31 ati pinaꞌan iya ni atag palegehanna. Binalutan eꞌna tangan dꞌnda heꞌ, tinabang papunduk. Manjari kauliꞌan mmunna ati pabuhat iya angalabot disi Isa.
32 Pasꞌddop paꞌin llaw, binowa ni si Isa sasuku magsakihan atawa sinōd saitan. 33 Sikatimukan lawang lumaꞌ inān heꞌ saga aꞌa kamemon min daꞌira inān. 34 Aheka aꞌa bay kauliꞌan eꞌ si Isa saki sigām kaginisan, maka aheka isab saitan bay pinaluwas eꞌna. Halam bay pasagaranna ahꞌlling saga saitan inān sabab kinataꞌuwan eꞌ sigām bang sai si Isa.
Anambahayang si Isa ma Lahat Halam Magaꞌa
35 Pagsalung paꞌin, ma halam giꞌ minsan apoteꞌ sobangan, punduk si Isa boꞌ alaꞌan min lumaꞌ. Pehēꞌ iya ni jadjahan halam magaꞌa boꞌ anambahayang. 36 Na, pagka iya halam ma lumaꞌ, piniha iya eꞌ disi Simun. 37 Jari tabāk paꞌin, ahꞌlling sigām ni iya, yuk-i, “Inaꞌan saga aꞌa kamemon amiha kaꞌa.”
38 Anambung si Isa, yukna, “Sūng kitam palintas ni kalumaꞌan kaseheꞌ. Subay aku magnasihat isab mahēꞌ sabab ya na heꞌ poꞌonna angkan aku piꞌitu ni dunya.” 39 Jari nilatag eꞌ si Isa kaluhaꞌan lahat Jalil inān. Magnasihat iya ma deyom kalanggalan sigām maka pinaluwas eꞌna saga saitan bay ma deyom baran aꞌa.
Aꞌa Niꞌipul Kauliꞌan
40 Manjari aniyaꞌ aꞌa niꞌipul pehēꞌ ni si Isa. Pasujud iya ma atag si Isa, maka eꞌna anganjunjung, yukna, “Bang ka bilahi, kauliꞌannu du aku.”
41 Tꞌkkahan aseꞌ si Isa ma aꞌa inān ati paꞌabutna tanganna ni iya. “Bilahi sadja aku,” yukna. “Palanuꞌ ka.” 42 Saruꞌun-duꞌun du alaꞌan ipul aꞌa inān, ati kauliꞌan na iya. 43 Magtūy iya pinabaꞌid amoleꞌ eꞌ si Isa maka niamay-amayan isab eꞌna. 44 Yuk si Isa ma iya, “Daꞌa ka angahaka ni sai-sai ya bay tahinang itu ma kaꞌa. Saguwāꞌ pehēꞌ ka patūy ni imam boꞌ palilingun barannu ma iya. Puwas eꞌ tukbalin pagkulban ni Tuhan buwat bay pamanduꞌ si Musa, tandaꞌ saksiꞌ ni kahekaꞌan aꞌa in kaꞌa ilu alanuꞌ na min sakinu.”
45 Sagōꞌ aꞌa inān paluwas minnēꞌ maka eꞌna anuli-nuli toꞌongan pasal ipulna bay kauliꞌan. Pasaplag suli-sulina, angkan si Isa mbal na makatampal ma deyoman kauman. Mainaꞌan sadja iya ma jadjahan kulang aꞌana. Sagōꞌ pehēꞌ na paꞌin ni iya saga aꞌa min kalahat-lahatan.