3
Si Yahiya Magpapandi Anagnaꞌ Amanduꞌ
1-2 Na, taꞌabut paꞌin kasangpūꞌ maka limantahun kapagsultan si Tibirus, ya Sultan Mahatinggi ma bangsa Rōm, aniyaꞌ palman Tuhan atꞌkka ni si Yahiya anak si Jakariya, waktu kamaheꞌna ma lahat paslangan. Ma waktu inaꞌan Puntus Pilatu ya maggubnul ma lahat Yahudiya, si Herod ya magparinta ma lahat Jalil, danakanna si Pilip ya magparinta ma lahat Ituriya maka ma lahat Tarakunit, maka si Lisani ya ma lahat Abilene. Si Annas maka si Kayapas bay Imam Muwallam. 3 Manjari palꞌngngan na si Yahiya angalatag kalahat-lahatan ma jadjahan sapaꞌ Jordan magnasihat palman Tuhan. Yukna, “Pataikut kam min dusabi boꞌ kam pinandi taubat ati niampun du dusabi eꞌ Tuhan.” 4 Tasulat asal ma deyom Kitab nabi Isaya ma awal lagiꞌ. Yuk-i,
“Aniyaꞌ aꞌa angalingan ma lahat paslangan, yuk-i,
‘Sōng na atꞌkka Panghūꞌ. Lanuꞌinbi lān palabayanna,
pabontolunbi palꞌngngananna.
5 Saga lꞌbbak kamemon subay pinapantay,
kabūd-būran kamemon subay pinaratag.
Saga lān abengkok subay pinabontol,
maka palabayan magtinggil-lꞌbbak subay pinalanuꞌ.
6 Manjari taꞌndaꞌ eꞌ manusiyaꞌ kamemon
kapanglappas Tuhan ma sigām.’ ”
7 Na, landuꞌ aheka aꞌa pinaꞌan ni si Yahiya mikipandi, angkan yukna ma sigām, “Kaꞌam ilu, addatbi saliꞌ sapantun addat sowa pangangakkal. Sai bahāꞌ bay angahakaꞌan kaꞌam in kaꞌam subay papuwas min mulkaꞌ ya song patꞌkka? 8 Bang kam sabꞌnnal-bꞌnnal pataikut na min dusabi, hinangunbi hinang ahāp, tandaꞌ saksiꞌ in addatbi apinda na. Daꞌa kam magpinaꞌin in kaꞌam mbal minulkaꞌan saukat na kam panubuꞌ si Ibrahim. Hakaꞌanta kam, minsan saga batu itu tahinang du panubuꞌ si Ibrahim eꞌ Tuhan! 9 Kaꞌam ilu saliꞌ hantang kayu araiꞌ na pinuwad maka kapa, tobtob min poꞌonna. Sabab kayu kamemon sasuku mbal ahāp buwaꞌna, pinuwad du boꞌ nilarukan ni deyom api tinunuꞌ.”
10 Manjari tinilaw si Yahiya eꞌ baꞌanan aꞌa inān. Yuk sigām, “Ai subay hinang kami?”
11 Yuk si Yahiya, “Sasuku kam magduwa badjuꞌ pamuwanunbi dakayuꞌ ma aꞌa halam taga-badjuꞌ. Sasuku isab kam taga-kinakan pamahagiꞌunbi ma aꞌa atiksaꞌ.”
12 Aniyaꞌ isab pehēꞌ mikipandi ma si Yahiya Magpapandi saga aꞌa magāꞌ sukay parinta. Yuk sigām, “Tuwan Guru, kami itu? Ai subay hinang kami?”
13 Yuk si Yahiya, “Bang kam angāꞌ sukay daꞌa palabihunbi min bay panohoꞌan kaꞌam eꞌ parinta.”
14 Ya du saga sundalu, bay atilaw ma si Yahiya. Yuk sigām, “Kami sundalu itu, ai subay hinang kami?”
Ya sambung si Yahiya, “Daꞌa kam angalangpas, daꞌa kam anumbung ni saraꞌ ma nggaꞌi ka bꞌnnal. Maka daꞌa kam anawad ma gadjibi.”
15 Na, makakale paꞌin saga aꞌa inān ma si Yahiya, magtūy sigām aholat-holat bang kalu si Yahiya in Al-Masi, ya nilagaran eꞌ sigām. 16 Angkan ahꞌlling si Yahiya ma saga aꞌa inān, yukna, “Aku itu, hal boheꞌ ya pamandiku kaꞌam. Saguwāꞌ aniyaꞌ aꞌa song piꞌitu labi bangsahan sidda min aku. Minsan engkot taumpaꞌna mbal aku tinōp angahubaran iya. Saddī bowahan pamandina ma kaꞌam. Hatina in iya amasangon Rū Sussi ni deyom baranbi. Kaseheꞌan isab pinandi eꞌna maka api. 17 Sinilang du eꞌna aꞌa ahāp maka aꞌa alaꞌat, buwat sapantun aꞌa anahapan pai. Ya paina tinauꞌ eꞌna ma deyom tatauꞌanna, sagōꞌ hampaꞌna tinunuꞌ ma api mbal kapꞌddahan.”
18 Aheka isab bissala si Yahiya saddī bay pagnasihatna lapal ahāp ma saga aꞌa. Bay sohoꞌna isab sigām amindahan kaul-piꞌil sigām.
19 Na, aniyaꞌ waktu pamabukag si Yahiya ma gubnul Herod. Sabab dusahan si Herod magpūn maka si Herodiyas ya bay hꞌnda siyalina, maka ma sabab kahinanganna alaꞌat kaseheꞌ. 20 Manjari karuhunan si Herod maghinang alaꞌat sabab pinakalabusu eꞌna si Yahiya.
Pamandi ma si Isa
21 Ma waktu kapamandi lagiꞌ si Yahiya ma aꞌa kamemon, pinandi isab eꞌna si Isa. Pagubus, hinabu si Isa anabbut ni Tuhan, magtūy paukab deyom sulgaꞌ, 22 ati pareyoꞌ Rū Sussi pinaka luwa assang, patapuꞌ ma iya. Aniyaꞌ isab suwala ahꞌlling min deyom sulgaꞌ, yuk-i, “Kaꞌa ya Anakku kalasahanku, landuꞌ makasulut atayku.”
Kapangkatan si Isa
23 Na, ma waktu kapanagnaꞌ si Isa magnasihat panduꞌna ma manusiyaꞌ, aniyaꞌ saga tꞌllumpūꞌ tahun umulna. Anak si Yusup iya bang ma pangannal saga aꞌa,
ya Mattat bay anak si Libi, ya Libi bay anak si Malki,
ya Malki bay anak si Janni, ya Janni bay anak si Yusup.
25 Si Yusup bay anak si Mattati, ya Mattati bay anak si Amos,
ya Amos bay anak si Nahum, ya Nahum bay anak si Esli,
ya Maꞌat bay anak si Mattati dakayuꞌ, ya Mattati itu bay anak si Simain,
ya Simain bay anak si Yosek, ya Yosek bay anak si Joda.
27 Si Joda ya bay anak si Joꞌanan, ya Joꞌanan bay anak si Resa,
ya Resa bay anak si Sirubbabil, si Sirubbabil bay anak si Salati,
ya Malki bay anak si Addi, si Addi bay anak si Kosam,
ya Kosam bay anak si Elmadam, si Elmadam bay anak si Ēr.
29 Si Ēr ya bay anak si Yussaꞌ, si Yussaꞌ bay anak si Eleꞌeser,
ya Eleꞌeser bay anak si Jurim, si Jurim bay anak si Mattat,
si Simiyun bay anak si Yuda, ya Yuda bay anak si Yusup,
ya Yusup bay anak si Jonam, ya Jonam bay anak si Eliyakim.
31 Si Eliyakim ya bay anak si Meleya, ya Meleya bay anak si Menna,
ya Menna bay anak si Mattata, ya Mattata bay anak si Natan,
ya Jesse bay anak si Obed, ya Obed bay anak si Bowas,
ya Bowas bay anak si Sala, ya Sala bay anak si Nasson.
33 Si Nasson ya bay anak si Amminadab, ya Amminadab bay anak si Admin,
ya Admin bay anak si Arni, ya Arni bay anak si Hesdon,
ya Hesdon bay anak si Peres, ya Peres bay anak si Yuda.
34 Si Yuda ya bay anak si Yakub, si Yakub eꞌ bay anak si Isaꞌak,
ya Isaꞌak bay anak si Ibrahim, ya Ibrahim bay anak si Tera,
ya Sirug bay anak si Reyo, ya Reyo bay anak si Peleg,
ya Peleg bay anak si Eber, ya Eber bay anak si Sela.
36 Si Sela ya bay anak si Kainan, ya Kainan bay anak si Arpaksad,
ya Arpaksad bay anak si Sēm anak si Nū, ya Nū bay anak si Lamek.
37 Si Lamek bay anak si Metosela, ya Metosela bay anak si Idris,
ya Idris bay anak si Jared, ya Jared bay anak si Mahalalel,
ya Enos bay anak si Sēt, ya Sēt bay anak si mboꞌ Adam,
maka si Adam bay anak Tuhan.