MATIYU
1
Lapal Ahāp Pasal Al-Masi ya Tasulat eꞌ si
MATIYU
Kapangkatan si Isa Al-Masi
1 Ya itu kapangkatan si Isa Al-Masi, panubuꞌ si Daꞌud ya panubuꞌ si Ibrahim.
2 Si Ibrahim bay mmaꞌ si Isaꞌak,
ya Isaꞌak bay mmaꞌ si Yakub.
Si Yakub bay mmaꞌ si Yuda maka saga danakanna,
3 si Yuda bay mmaꞌ si Peres maka si Sera (si Tamar ya inaꞌ sigām).
Si Peres bay mmaꞌ si Hesdon,
ya si Hesdon bay mmaꞌ si Aram.
4 Si Aram bay mmaꞌ si Amminadab,
ya Amminadab bay mmaꞌ si Nasson.
Si Nasson bay mmaꞌ si Salmon,
5 ya Salmon bay mmaꞌ si Bowas (si Rahab ya inaꞌna).
Si Bowas bay mmaꞌ si Obed, inaꞌna bay si Rūt.
Si Obed bay mmaꞌ si Jesse,
6 ya Jesse bay mmaꞌ sultan Daꞌud.
Si Daꞌud inān bay mmaꞌ si Sulayman, inaꞌna bay hꞌnda si Uriya.
7 Si Sulayman bay mmaꞌ si Rehobowam,
ya Rehobowam bay mmaꞌ si Abiya,
ya Abiya bay mmaꞌ si Asa.
8 Si Asa bay mmaꞌ si Josapat,
ya Josapat bay mmaꞌ si Joram,
ya Joram bay mmaꞌ si Usiya.
9 Si Usiya bay mmaꞌ si Jotam,
ya Jotam bay mmaꞌ si Ahas,
ya Ahas bay mmaꞌ si Hijikiya.
10 Si Hijikiya bay mmaꞌ si Manasse,
ya si Manasse bay mmaꞌ si Amon,
ya Amon bay mmaꞌ si Jusiya.
11 Si Jusiya bay mmaꞌ si Jekoniya maka saga danakanna.
12 Min waktu kapamowa bangsa Israꞌil ni lahat Babilon sampay ni waktu kapaganak ma si Isa, buwattitu ya sugsuganna.
Si Jekoniya inān bay mmaꞌ si Salati,
ya Salati bay mmaꞌ si Sirubbabil.
13 Si Sirubbabil bay mmaꞌ si Abiyud,
ya Abiyud bay mmaꞌ si Eliyakim,
ya Eliyakim bay mmaꞌ si Asor.
14 Si Asor bay mmaꞌ si Sadok,
ya Sadok bay mmaꞌ si Akim,
ya Akim bay mmaꞌ si Eliyud.
15 Si Eliyud bay mmaꞌ si Eleyasar,
ya Eleyasar bay mmaꞌ si Mattan,
ya Mattan bay mmaꞌ si Yakub.
16 Si Yakub bay mmaꞌ si Yusup
ya hꞌlla si Mariyam inaꞌ si Isa,
ya niōnan Al-Masi.
17 Manjari aniyaꞌ sangpūꞌ maka mpat pangkatan min si Ibrahim sampay ni si Daꞌud, sangpūꞌ maka mpat pangkatan min si Daꞌud sampay ni waktu bay pamalaꞌan saga aꞌa Israꞌil ni Babilon, ati sangpūꞌ maka mpat pangkatan isab minnēꞌ sampay ni waktu kapaganak ma Al-Masi.
Kapanganak ma si Isa
18 Buwattitu ya kalꞌngnganan kapanganak ma si Isa Al-Masi. Inaꞌna si Mariyam bay makapagbintak asal maka si Yusup, sagōꞌ ma halam giꞌ sigā takawin tananam eꞌ si Mariyam in iya angiram sabab min kawasa Rū Sussi.a 19 Aꞌa adil asal si Yusup ya tunang si Mariyam eꞌ, angkan iya agaraꞌ pabaibad min iya ma halam aniyaꞌ makataꞌu. Mbal iya bilahi amuwanan si Mariyam kaiyaꞌan ma mata mairan. 20 Na, sabu paꞌin si Yusup amikil-mikil pasal pakaradjaꞌan itu, aniyaꞌ malaꞌikat min Tuhan pauppi ni iya. Yuk malaꞌikat, “O Yusup panubuꞌ si Daꞌud, daꞌa ka ahawal-hawal magdakayuꞌ maka si Mariyam ilu, sabab min kawasa Rū Tuhan ya angkan aniyaꞌ kabꞌttonganna. 21 Anganak du iya lꞌlla, ati Isa ya pangōnnu ma iya sabab iya ya angalappas bangsana Israꞌil min paldusahan sigām.”
22 Na, pinatꞌkka saga pakaradjaꞌan itu kamemon boꞌ aniyaꞌ katumanan ma bay pangallam Tuhan ma dakayuꞌ nabi, ya yuk-i, 23 “Aniyaꞌ inān budjang angiram, ati anganak iya lꞌlla, Emmanuwel ya pangōn sigām ma iya.” Hatina ‘Tuhan patꞌnnaꞌ ma kitam.’