2
Kapaganak ma si Isa
1 Ma waktu inaꞌan si Agustus ya Sultan Mahatinggi ma bangsa Rōm. Manjari anguldin iya subay sinulat ōn aꞌa kamemon ma sabarang lahat ma kaluhaꞌan pagsultananna. 2 (Yampa aniyaꞌ uldin buwattēꞌ pamasulat ōn aꞌa kamemon, ma waktu kapaggubnul si Kirinu ma katilingkal lahat Siriya). 3 Jari magpoleꞌan saga aꞌa kamemon ni lahat kaꞌmboꞌ-mboꞌan sigām boꞌ magpasulat ōn sigām.
4 Jari si Yusup bay pauntas min Nasaret ma lahat Jalil tudju ni lahat Yahudiya, ni kauman Betlehem ya lahat panganakan sultan Daꞌud ma masa awal eꞌ. Pinaꞌan iya magpasulat ōnna sabab tubuꞌ iya min si Daꞌud. 5 Magbeyaꞌ iya maka si Mariyam, ya bay pinahꞌndaꞌan iya, supaya tasulat ōn sigā. Abꞌttong asal si Mariyam. 6 Jari mahēꞌ paꞌin sigā ma Betlehem, taꞌabut llawna, 7 ati nianakan eꞌna anakna siyaka, lꞌlla. Pinalampinan eꞌna maka sꞌmmek boꞌ yampa pinalege ma deyom tuꞌung pamanganan hayop niꞌipat, sabab halam aniyaꞌ lugal ma lumaꞌ paghahantiꞌan eꞌ.
Tungguꞌ Bili-bili maka Malaꞌikat
8 Na, aniyaꞌ ma jadjahan inaꞌan-i saga aꞌa anungguꞌ bili-bili sigām ma deya, waktu sangom paꞌin. 9 Sakali aniyaꞌ malaꞌikat min Tuhan panyataꞌ ni sigām, maka aninag sahaya Tuhan ma sakalibut sigām. Jari tināw sidda sigām. 10 Sagōꞌ yuk malaꞌikat ni sigām, “Daꞌa kam tināw sabab aniyaꞌ lapal ahāp pamowahanku kaꞌam, lapal makakōd atay saga aꞌa kamemon. 11 Aniyaꞌ Manglalappas nianakan ma kaꞌam, in iya Al-Masi ya Panghūꞌbi. Llaw itu du ya kapaganak ma iya, ma Betlehem, kauman sultan Daꞌud. 12 Ya na itu paltandaꞌan pamabꞌnnal kaꞌam: makabāk du kam ondeꞌ pinalampinan maka sꞌmmek, inaꞌan palege ma deyom tuꞌung pamanganan hayop.”
13 Pataghaꞌ aniyaꞌ bangsa sulgaꞌ laksaꞌan taꞌndaꞌ eꞌ saga tungguꞌ bili-bili inān pabeyaꞌ ma malaꞌikat dakayuꞌ. Amudji sigām Tuhan, yuk-i,
14 “Mahaldikaꞌ ni Tuhan Mahatinggi.
Bang paꞌin aniyaꞌ kasannangan isab ma dunya itu,
ma sasuku makasulut iya!”
15 Makalaꞌan paꞌin saga malaꞌikat inān pabalik ni sulgaꞌ, magtūy magsuli-suli saga tutungguꞌ bili-bili inān, yuk-i, “Sūng na kitam ni Betlehem. Ndaꞌtam bang ai paniyaꞌ inān, ya bay pamataꞌu kitam eꞌ Panghūꞌ.”
16 Jari magdaiꞌ-daiꞌ sigām pehēꞌ ati tabāk eꞌ sigām si Mariyam maka si Yusup. Taꞌndaꞌ isab eꞌ sigām ondeꞌ palege ma deyom tuꞌung pamanganan hayop. 17 Makaꞌndaꞌ paꞌin sigām ma ondeꞌ, magtūy pangahaka eꞌ sigām bay pamissala malaꞌikat pasal ondeꞌ inān. 18 Ainu-inu toꞌongan sasuku makakale ma haka saga tungguꞌ heꞌ. 19 Sagōꞌ tinauꞌ kamemon saga pakaradjaꞌan itu eꞌ si Mariyam ma deyom atayna boꞌ taliꞌ-taliꞌna pahāp. 20 Jari pabīng na saga tungguꞌ inān ni kahayopan sigām, maka eꞌ sigām ananglitan maka amudji Tuhan ma sabab kamemon bay takale maka bay taꞌndaꞌ eꞌ sigām. Sabab bꞌnnal toꞌongan bay pamissala malaꞌikat ma sigām.
Pangislam ma si Isa
21 Walungꞌllaw paꞌin ondeꞌ inān ma luwasan, niꞌislam iya ati niōnan Isa, ōn bay pangōn iya eꞌ malaꞌikat ma halam giꞌ pinangiraman.
22 Ajukup paꞌin waktu pagsussi ya pangahād ma si Mariyam ma sabab saraꞌ si Musa, binowa si Isa pehēꞌ ni Awrusalam eꞌ si Yusup maka si Mariyam boꞌ tinukbalan ni Tuhan. 23 (Tasulat asal ma Saraꞌ min Panghūꞌ: “Kamemon saga anak lꞌlla siyaka subay pamasukuꞌ ma Tuhan.”) 24 Tinukbalan isab eꞌ sigām pagkulban buwat bay tasulat ma Saraꞌ Panghūꞌ heꞌ, ya yuk-i, “duwa assang atawa duwa anak malapatiꞌa ya subay pagkulbanbi.”
25 Na, ma waktu inaꞌan aniyaꞌ dakayuꞌ mattoꞌa lꞌlla ōnna si Simiyun maglahat ma Awrusalam. Ahāp addatna, magtataꞌat asal ma Tuhan. Nilagaran eꞌna waktu pangalappas ma bangsa Israꞌil, maka kapagbayaꞌan iya eꞌ Rū Sussi. 26 Bay iya pinataꞌu asal eꞌ Rū Sussi in iya mbal amatay satꞌggol halam giꞌ taꞌndaꞌna Al-Masi, ya panganjanjiꞌ eꞌ Panghūꞌ. 27 Manjari si Simiyun itu pinapinaꞌan ni langgal pagkulbanan eꞌ Rū Tuhan. Saltaꞌ paꞌin si Isa binowa pinaꞌan eꞌ mattoꞌana boꞌ bineyaꞌ eꞌ sigā usulan Saraꞌ si Musa, 28 nihambin ondeꞌ eꞌ si Simiyun. Magpudji iya, yukna,
29 “O Tuhan Sangat Kawasa, atanu du aku.
Ahantap pangatayanku minsan aku papoleꞌnu na,
sabab tatuman na janjiꞌnu.
30 Taꞌndaꞌ na eꞌ mataku aꞌanu Manglalappas,
31 ya bay sakapnu ma matahan manusiyaꞌ kamemon.
32 Ondeꞌ itu sapantun sawa pamabukis kahandaknu
ma saga bangsa ya nggaꞌi ka bangsa Israꞌil,
pamaheya kabantugan saga aꞌanu bangsa Israꞌil.”
33 Na, ainu-inu toꞌongan inaꞌ-mmaꞌ si Isa ma sabab kabtangan si Simiyun itu ma pasalan anak sigā. 34 Pagubus, niamuꞌan sigām kahāpan eꞌ si Simiyun. Yukna isab ni si Mariyam ya inaꞌ inān, “Ya panganggantaꞌ Tuhan ma anaknu itu, in iya sababan angkan aheka aꞌa bangsa Israꞌil makabāk kalappasan, maka aheka isab magni-kalaꞌatan. Paltandaꞌan iya min Tuhan sagōꞌ sinulak iya eꞌ kahekaꞌan aꞌa, 35 boꞌ kasakupan bang ai toꞌongan pinikil eꞌ sigām. Maka kaꞌa ilu, Mariyam,” yuk si Simiyun, “makananam du ka kasusahan saliꞌ hantang kalis parugsuꞌ ni deyom ataynu.”
36-37 Aniyaꞌ isab mainaꞌan dakayuꞌ nabi dꞌnda niōnan si Anna, anak si Panuꞌal, min panubuꞌ si Aser. Atoꞌa na iya toꞌongan, walumpūꞌ maka mpat tahun umulna. Pituntahun du bay kapagpūnna maka hꞌllana ati abalu iya sangay minnēꞌ. Atukid iya magni-langgal pagkulbanan, ati mainaꞌan iya llaw-sangom amudji Tuhan. Amuwasa iya sampay anambahayang. 38 Manjari pasabu si Anna itu ma waktu inaꞌan-i ati magsukul toꞌongan iya ni Tuhan maka anuli-nuli pasal ondeꞌ inān ni aꞌa kamemon, sasuku angalagaran waktu panglappas saga aꞌa Awrusalam.
39 Manjari itu, aubus paꞌin si Yusup maka si Mariyam maghinang kamemon bay panohoꞌan ma deyom Saraꞌ Panghūꞌ, pabīng na sigām ni lahat Jalil, ni kauman Nasaret ya patꞌnnaꞌan sigām luggiyaꞌ. 40 Pasulig ondeꞌ inān sampay pakosog baranna. Alalom pangitaꞌuna maka pinaniyaꞌan iya barakat min Tuhan.
Si Isa ma Langgal Pagkulbanan
41 Na, magtukad saga mattoꞌa si Isa ni Awrusalam kahabaꞌ-kahabaꞌ tahun boꞌ maghinang Hinang Paglakad. 42 Jari itu, taꞌabut paꞌin sangpūꞌ maka duwantahun umul si Isa, magbeyaꞌ sigām pehēꞌ ni paghinangan buwat kabiyaksahan bangsa Yahudi. 43 Atammat paꞌin paghinang eꞌ, amoleꞌ na sigā ni lahat sagōꞌ taꞌbba si Isa ma Awrusalam ma halam kinataꞌuwan eꞌ mattoꞌana. 44 Pangannal sigā inaꞌan du iya magbeyaꞌ paꞌabay ma sigā. Jari dangꞌllaw ya kalꞌngngan sigā boꞌ yampa sigā amiha iya ma deyom kabagayan maka kahekaꞌan sigā, sagōꞌ halam iya tabāk mainaꞌan. 45 Pagka buwattēꞌ, pabīng sigā tudju ni Awrusalam amiha iya mahēꞌ. 46 Apuwas paꞌin tꞌllumbahangi, yambohoꞌ iya tabāk ma deyom langgal pagkulbanan magsamatingkōꞌ maka saga guru. Inaꞌan iya akale maka atilaw na paꞌin ma sigām. 47 Sasuku makakale ma iya ainu-inu toꞌongan sabab alalom pangitaꞌuna, maka taluwaꞌ panambungna. 48 Pagꞌndaꞌ mattoꞌana ma iya landuꞌ sigā ainu-inu. Yuk inaꞌna, “Otōꞌ, angay buwattilu hinangnu ma kami? Asusa toꞌongan aku maka mmaꞌnu amiha kaꞌa.”
49 Yuk si Isa ni sigā, “Angay aku pihabi? Halam bahāꞌ kataꞌuwanbi in aku subay maitu ma lumaꞌ Mmaꞌku?” 50 Saguwāꞌ halam tahati eꞌ sigā bang ai pamissalana.