2
Saga Aꞌa min Sobangan
1 Si Isa bay nianakan ma kalumaꞌan Betlehem ma lahat Yahudiya, ma masa kapagsultan si Herod. Mbal atꞌggol, aniyaꞌ saga aꞌa alim bay min sobangan atꞌkka pehēꞌ ni Awrusalam. Saga aꞌa itu pangangadjiꞌ ma saga bituꞌun. 2 Pagtꞌkka sigām ni Awrusalam magtūy sigām atilaw, yuk-i, “Maingga na ondeꞌ-ondeꞌ bay nianakan, ya ginantaꞌ magsultan ma bangsa Yahudi? Taꞌndaꞌ kami bituꞌun ya pamandogahan iya, paluwaꞌ min sobangan, jari itiyaꞌ kami piꞌitu amudji iya.”
3 Pagkale itu eꞌ Sultan Herod, magtūy landuꞌ asasaw pikilanna. Sampay saga aꞌa kamemon ma deyom daꞌira inān magkasasawan du isab. 4 Magpanohoꞌan si Herod subay magtipun saga nakuraꞌ kaimaman maka saga guru saraꞌ agama. Atilaw iya ma sigām, yukna, “Maingga konoꞌ panganakan Al-Masi?”
5 Anambung saga aꞌa inān, yuk-i, “Ma kalumaꞌan Betlehem, ma lahat Yahudiya, sabab tasulat asal eꞌ nabi ma deyom Kitab, ya yuk-i:
6 ‘In kauman Betlehem, ya ma lahat Yahudiya,
aheya kabantuganna min saga daꞌira babantugun ma lahat Yahudiya,
sabab aniyaꞌ palahil minnēꞌ dakayuꞌ aꞌa magmakōk,
aꞌa angupiksaꞌ saga aꞌaku bangsa Israꞌil!’ ”
7 Puwas eꞌ pinalinganan eꞌ sultan Herod saga aꞌa alim eꞌ, binowa magbissala ma halam aniyaꞌ makataꞌu. Tinilaw sigām eꞌna bang sumiyan waktu bay kasobang bituꞌun. 8 Kahakaꞌan paꞌin sultan, pinapehēꞌ sigām ni Betlehem. Buwattitu panohoꞌanna ma sigām, yuk-i, “Pehēꞌ kam, pihaꞌunbi toꞌongan ondeꞌ-ondeꞌ inān. Bang iya tabākbi, pataꞌuhunbi aku supaya aku isab pehēꞌ amudji iya.”
9-10 Aubus paꞌin sigām binissalahan eꞌ sultan, palanjal na sigām tudju ni Betlehem. Ma labayan paꞌin, parahū min sigām bituꞌun ya bay taꞌndaꞌ sigām ma lahat sobangan lagiꞌ. Pagꞌndaꞌ itu, landuꞌ aheya kakōgan sigām. Jari patongod bituꞌun inān min diyataꞌ lumaꞌ ya patꞌnnaꞌan ondeꞌ. 11 Makasōd paꞌin saga aꞌa alim inān ni deyom lumaꞌ, taꞌndaꞌ eꞌ sigām ondeꞌ-ondeꞌ maka inaꞌna si Mariyam. Jari pasujud sigām amudji iya, maka pinaluwas isab saga huhulmatan bay bowa sigām pamuwan ma ondeꞌ inān. Aniyaꞌ bulawan, kamanyan, maka pahamut mira.a
12 Puwas eꞌ binandaꞌan sigām eꞌ Tuhan ma deyom uppi, sinōꞌ daꞌa pabalik ni si Herod. Manjari amoleꞌ sigām ni lahat labay min lān saddī.
Kalahi disi Yusup ni Lahat Misil
13 Paglaꞌan sigām, aniyaꞌ malaꞌikat min Tuhan magpanyataꞌ ni si Yusup ma deyom uppi. Yuk malaꞌikat, “Punduk ka. Bowahun ondeꞌ maka inaꞌna ilu ati alahi kam ni lahat Misil. Mahēꞌ giꞌ kam satꞌggol kam mbal palaꞌanku minnēꞌ. Ilu si Herod amiha ondeꞌ ilu pinapatay.”
14 Magtūy punduk si Yusup. Niāꞌ eꞌna ondeꞌ maka inaꞌna boꞌ sigām pauntas minnēꞌ tudju ni lahat Misil ma sangom du inān. 15 Mahēꞌ sigām sampay amatay si Herod. Jari aniyaꞌ kamaksuran ma bay pangallam Tuhan, ya tasulat ma Kitab eꞌ nabi Hoseya. Yukna, “Bay sohoꞌku anakku piꞌitu min lahat Misil.”
Pamapatay saga Ondeꞌ
16 Pagtaꞌu paꞌin eꞌ si Herod in iya bay niakkalan heꞌ saga aꞌa alim eꞌ, apasuꞌ toꞌongan atayna. Magtūy iya magpanohoꞌan pinapatay saga ondeꞌ-ondeꞌ lꞌlla kamemon ma Betlehem sampay ma sakalibutna, sasuku angumul duwantahun sampay pareyoꞌ giꞌ minnēꞌ. Binista eꞌ si Herod umul saga ondeꞌ inān tinagnaꞌan min waktu bay pamataꞌu iya eꞌ saga aꞌa alim pasal waktu katuwaꞌ bituꞌun.
17 Minnēꞌ aniyaꞌ kamaksuran ma bay tasulat eꞌ nabi Irimiya, ya yukna,
18 “Aniyaꞌ lengog takale ma lahat Rama,
lengog aꞌa magkarukkaꞌan maka maglemong.
Si Rakiya anangisan saga anakna.
Mbal tapahali paglemongna,
sabab waꞌi pinapatay anakna kamemon.”
Amoleꞌ disi Yusup ni Nasaret
19 Amatay paꞌin si Herod, aniyaꞌ malaꞌikat min Tuhan bay pauppi ni si Yusup mahēꞌ ma lahat Misil. 20 Yuk malaꞌikat, “Punduk ka. Bowahun ondeꞌ maka inaꞌna pabalik ni lahat Israꞌil, sabab magpatayan na saga aꞌa bilahi amapatay ondeꞌ ilu.” 21 Sakali pabangun si Yusup. Binowa eꞌna ondeꞌ maka inaꞌna pabalik ni lahat Israꞌil.
22 Pagtaꞌu paꞌin eꞌ si Yusup in si Arkilas pagantiꞌ na min mmaꞌna si Herod magsultan ma lahat Yahudiya, atāw iya palahat mainaꞌan. Binandaꞌan iya pabalik ma deyom uppi, ya angkan sigām magtaiꞌanak pehēꞌ ni lahat Jalil 23 boꞌ patꞌnnaꞌ ma kalumaꞌan niōnan Nasaret. Jari aniyaꞌ kamaksuran ma bay pinagkallam eꞌ saga kanabihan pasal Al-Masi, ya yuk-i, “Niōnan iya aꞌa Nasaret.”