3
Pagnasihat si Yahiya Magpapandi
1 Manjari ma waktu heꞌ-i atꞌkka si Yahiya Magpapandi pehēꞌ ni paslangan Yahudiya magnasihat. 2 Yuk nasihatna ni saga aꞌa bay patimuk pinaꞌan, “Pataikut kam min dusabi sabab asekot na waktu kapagparinta Tuhan ma kitam.” 3 Si Yahiya itu bay pinagbissala asal eꞌ nabi Isaya, yuk-i,
“Aniyaꞌ aꞌa angalingan ma lahat paslangan, yukna,
‘Lanuꞌinbi lān ya palabayan Panghūꞌ.
Pabontolunbi palꞌngngananna.’ ”
4 Ya pasꞌmmek si Yahiya inān kakanaꞌ hinangan bulbul untaꞌ, maka dakayuꞌ sabitan kuwit sapiꞌ pakambot ma hawakanna. Ya pagkakanna ampan maka gulaꞌ buwani. 5 Na, pehēꞌ ni si Yahiya saga aꞌa min daꞌira Awrusalam, min kaluhaꞌan lahat Yahudiya, maka min saga kalumaꞌan ma karuwambilaꞌ sapaꞌ Jordan. 6 Magpasabꞌnnal sigām pasal bay dusa sigām, ati pinandi sigām eꞌ si Yahiya ma sapaꞌ Jordan eꞌ.
7 Sagōꞌ pagꞌndaꞌ si Yahiya ma baꞌanan aꞌa Parisi maka aꞌa Saddusi pinaꞌan ni iya mikipandi, yukna ni sigām, “Ē, kaꞌam ilu, addatbi sapantun sowa pangangakkal! Sai bahāꞌ bay amandaꞌan kaꞌam subay papuwas min mulkaꞌ Tuhan ya song patꞌkka? 8 Bang kam sabꞌnnal-bꞌnnal pataikut na min dusabi, hinangunbi hinang ahāp, palsaksiꞌan in addatbi apinda na. 9 Daꞌa kam magpikil in kaꞌam mbal minulkaꞌan saukat na kam panubuꞌ si Ibrahim. Hakaꞌanta kam, minsan saga batu itu tahinang du panubuꞌ si Ibrahim eꞌ Tuhan! 10 Kaꞌam ilu hantang saga kayu araiꞌ na pinuwad maka kapa, tobtob min poꞌonna. Sabab kayu kamemon mbal ahāp buwaꞌna pinuwad du, nilarukan ni deyom api tinunuꞌ. 11 Aku itu,” yuk si Yahiya, “hal boheꞌ ya pamandiku kaꞌam, tandaꞌ saksiꞌ in kaꞌam pataikut min dusabi. Sagōꞌ aniyaꞌ piꞌitu damuli min aku aheya giꞌ kawasana min kawasaku. Minsan hal taumpaꞌna mbal aku tinōp amenten. Saddī bowahan pamandina ma kaꞌam, sabab in iya amahōp Rū Sussi ni deyom baranbi. Saga aꞌa kaseheꞌ isab pinandi eꞌna maka api. 12 Sinilang du eꞌna aꞌa ahāp maka aꞌa alaꞌat, buwat sapantun aꞌa anahapan pai. Ya paina tinauꞌ ma deyom tauꞌanna, saguwāꞌ hampaꞌna tinunuꞌ eꞌna ma api mbal kapꞌddahan.”
Pamandi ma si Isa
13 Jari itu, ma waktu heꞌ-i, atꞌkka si Isa min lahat Jalil pinaꞌan ni sapaꞌ Jordan, boꞌ mikipandi ma si Yahiya. 14 Sagōꞌ mbal bilahi si Yahiya. Yukna ni si Isa, “Angay ka mikipandi ma aku? Aku itu subay pandinu!”
15 Saguwāꞌ anambung si Isa, yukna, “Hinangun na ma waktu itu, sabab patut du bang beyaꞌta panohoꞌan Tuhan kamemon.” Jari pasulut si Yahiya ma si Isa.