4
Kapanulay ma si Isa
1 Manjari si Isa inān binowa eꞌ Rū Tuhan kaleya ni lahat paslangan, ati sinasat iya eꞌ nakuraꞌ saitan, kalu tabowa magdusa. 2 Halam bay makatimtim si Isa ai-ai ma deyom mpatpūꞌ ngꞌllaw maka mpatpūꞌ bahangi. Puwas eꞌ landuꞌ iya lingantu, 3 jari pehēꞌ ni iya nakuraꞌ saitan, ya mananasat, yukna, “Bang ka sabꞌnnal-bꞌnnal Anak Tuhan, sohoꞌun saga batu itu papinda ni tinapay.”
4 Sagōꞌ anambung si Isa, yukna, “Tasulat asal ma Kitab Tawrat, ya yuk-i, ‘Nggaꞌi ka hal kinakan baran ya makakallum ma manusiyaꞌ, saguwāꞌ lapal kamemon ya binissala eꞌ Tuhan.’ ”
5 Puwas eꞌ binowa si Isa eꞌ nakuraꞌ saitan ni daꞌira Awrusalam, ya niōnan Daꞌira Mahasussi, ati pinatongod iya ma puttuk langgal pagkulbanan ya mainaꞌan. 6 Yuk saitan, “Bang ka sabꞌnnal-bꞌnnal Anak Tuhan, pakuppa ka minnilu, sabab tasulat asal ma Kitab Jabul, ya yuk-i,
‘Aniyaꞌ malaꞌikat sinohoꞌ eꞌ Tuhan angahampanan kaꞌa.
Tinayak ka eꞌ sigām
boꞌ mbal makahantak tapeꞌnu ni batu.’ ”
7 Yuk si Isa, “Tasulat isab buwattitu: ‘Daꞌa sulayinbi kawasa Panghūꞌbi Tuhan.’ ”
8 Puwas eꞌ binowa si Isa eꞌ nakuraꞌ saitan ni diyataꞌ būd alanga toꞌongan, boꞌ yampa pinaꞌndaꞌan lahat kamemon ma kaluhaꞌan dunya, maka kawasa saga aꞌa ya magnakuraꞌan kalahat-lahatan inān. 9 Yuk nakuraꞌ saitan ni si Isa, “Bang ka pasujud ma aku amudji, pamuwanku inaꞌan kamemon ma kaꞌa.”
10 Ya sambung si Isa ni iya, “Alaꞌan ka, saitan! Sabab tasulat asal ma Kitab Tawrat, yuk-i, ‘Panghūꞌbi Tuhan sadja ya subay pudjibi. Tunggal iya paghinanganbi!’ ”
11 Puwas eꞌ alaꞌan nakuraꞌ saitan min si Isa, ati aniyaꞌ saga malaꞌikat pinaꞌan ni si Isa angayura iya.
Anagnaꞌ si Isa Amanduꞌ
12 Manjari pagkale eꞌ si Isa in si Yahiya Magpapandi waꞌi bay takalabusu, pehēꞌ iya ni lahat Jalil. 13 Alaꞌan iya min kauman Nasaret, boꞌ patꞌnnaꞌ ma daꞌira Kapirnaum ya inaꞌan ma bihing danaw Jalil, ma paglahat Sibulun maka Naptali. 14 Jari aniyaꞌ kamaksuran ma bay tasulat eꞌ si Isaya, ya yuk-i,
15 “Lahat Sibulun maka lahat Naptali,
ya ma llot sapaꞌ Jordan maka tahik sꞌddopan,
lahat Jalil, ya kalamugayan bangsa nggaꞌi ka Yahudi.
16 Saga aꞌa bay hantang patꞌnnaꞌ ma deyom kalendoman,
makaꞌndaꞌ kasawahan landuꞌ asahaya.
Saga aꞌa bay kalokoban eꞌ kamatay,
taluwaꞌ kasawahan.”
17 Tinagnaꞌan minnēꞌ magnasihat na si Isa, yuk-i, “Taikutinbi na dusabi sabab asekot na waktu kapagparinta Tuhan ma kaꞌam.”
Mpat Aꞌa Binowa Pamulid ma si Isa
18 Na, hinabu si Isa lumꞌngngan ma bihing danaw Jalil, aniyaꞌ taꞌndaꞌna duwangan magdanakan. Dakayuꞌ inān si Simun, ya niōnan isab si Petros. Dakayuꞌ inān si Andariyas. Inaꞌan sigā angahūg pokot ma danaw, sabab magdaraing asal sigā. 19 Jari ahꞌlling si Isa ni sigā, yukna, “Piꞌitu kam ameyaꞌ ma aku. Bay kam asal magāꞌ daing, sagōꞌ panduꞌanta kam magāꞌ pagkahibi manusiyaꞌ ameyaꞌ ma aku.” 20 Takale paꞌin lling si Isa eꞌ duwangan itu, magtūy niꞌbbahan pokot sigā boꞌ yampa ameyaꞌ ma iya.
21 Makalanjal paꞌin si Isa minnēꞌ, aniyaꞌ isab taꞌndaꞌna duwangan magdanakan, si Yakub maka si Yahiya, anak si Sibidi. Inaꞌan sigā ma diyataꞌ bayanan magbeyaꞌ maka mmaꞌ sigā amahāp pokot. Nilinganan eꞌ si Isa duwangan itu, sinōꞌ ameyaꞌ ma iya. 22 Magtūy niꞌbbahan mmaꞌ sigā maka bayanan, boꞌ ameyaꞌ ma si Isa.
Kauliꞌan eꞌ si Isa Saki Kaginisan
23 Na, nilatag eꞌ si Isa kaluhaꞌan lahat Jalil inān. Amanduꞌ na paꞌin iya ma deyom kalanggalan. Magnasihat iya lapal ahāp pasal kapagparinta Tuhan ma manusiyaꞌ. Kauliꞌan eꞌna saga aꞌa kamemon ya taluwaꞌ saki maka kalammahan indaginis. 24 Jari pasaplag kabantuganna ni kaluhaꞌan lahat Siriya. Angkan saga aꞌa mainaꞌan bay amowa pagkahi sigām ni si Isa, sai-sai kapꞌddiꞌan atawa taluwaꞌ saki indaginis, saga aꞌa sinōd saitan, aꞌa binawi-bawi, maka aꞌa amatay ugat sigām. Kauliꞌan sigām kamemon eꞌ si Isa. 25 Jari landuꞌ aheka saga aꞌa bay paturul ma iya, aꞌa min lahat Jalil maka min Sangpūꞌ Daꞌira. Aniyaꞌ isab saga aꞌa min daꞌira Awrusalam, min kaluhaꞌan lahat Yahudiya, sampay min dambilaꞌ sapaꞌ Jordan.