5
Si Isa Anagnaꞌ Ameneꞌ Aꞌa Pamulid ma Iya
1 Manjari aniyaꞌ llaw dakayuꞌ anꞌngge si Isa ma bihing danaw Gennesaret. Magtimuk na paꞌin saga aꞌa ni bihingna supaya sigām makakale palman Tuhan. 2 Na, aniyaꞌ taꞌndaꞌ eꞌ si Isa duwa bayanan pasanglad ma bihing danaw. Bay niꞌbbahan eꞌ saga aꞌa magdaraing hinabu sigām angoseꞌan pokot. 3 Paruwaꞌ si Isa ni bayanan dakayuꞌ ya sukuꞌ si Simun, ati angamuꞌ iya ma si Simun pinatā-tā dangkuriꞌ min bihing tampe. Jari aningkōꞌ si Isa ma bayanan boꞌ amanduꞌ ma saga aꞌa.
4 Na, aubus paꞌin eꞌ si Isa amanduꞌ, ahꞌlling iya ni si Simun, yukna, “Pasōngun giꞌ ni kalaloman, ati hūgunbi pokot boꞌ kam makaꞌāꞌ.”
5 Anambung si Simun, yukna, “Tuwan Guru, luꞌugan na kami amokot dibuhiꞌ sampay ni kaꞌllawan boꞌ halam kami bay makaꞌāꞌ. Sagōꞌ pagka kaꞌa ya anohoꞌ, hūg kami na.” 6 Tahūg paꞌin pokot inān, aheka toꞌongan daing taꞌāꞌ. Agon na ageseꞌ saga pokot eꞌ, 7 angkan sininyalan eꞌ disi Petros saga abay sigām, sinōꞌ anabang angahellaꞌ. Makapinaꞌan paꞌin saga abay, magtūy niruwaꞌ daing inān ni diyataꞌ bayanan. Aꞌllop karuwa bayanan inān eꞌ daing, saꞌagon-agon patꞌnde. 8 Pagꞌndaꞌ si Simun Petros ma baꞌanan daing inān, magtūy iya pasujud ma si Isa. Yukna, “O Tuwan, palawak ka min aku sabab dusahan aku.”
9 Angkan buwattēꞌ llingna, sabab ainu-inu iya maka saga abayna ma pasal heka daing bay taꞌāꞌ sigām. 10 Ya du ainu-inu saga seheꞌ si Simun magdaraing eꞌ, ya si Yakub maka si Yahiya duwangan anak si Sibidi. Manjari ahꞌlling si Isa ma si Simun, yukna, “Daꞌa ka tināw. Puwas min llaw ītu, ya hinangnu subay magāꞌ manusiyaꞌ ameyaꞌ ma aku.” 11 Manjari nihellaꞌ bayanan sigām ni gintanaꞌan ati niꞌbbahan kaniyaꞌ sigām kamemon boꞌ yampa ameyaꞌ ma si Isa.
Aꞌa Niꞌipul Kauliꞌan eꞌ si Isa
12 Ma llaw dakayuꞌ, waktu paꞌin si Isa ma dakayuꞌ kauman, aniyaꞌ mainaꞌan aꞌa niꞌipul. Alapat baranna eꞌ sakina. Makaꞌndaꞌ paꞌin aꞌa itu ma si Isa, magtūy iya pasujud ma dahuanna anganjunjung. “Tuwan,” yukna, “bang ka bilahi kauliꞌannu du aku.”
13 Sakali pinaꞌabut eꞌ si Isa tanganna ma aꞌa inān. Yuk si Isa, “Bilahi sadja aku. Kauliꞌan na ka.” Saruꞌun-duꞌun du alaꞌan ipulna. 14 Niamay-amayan iya eꞌ si Isa, yukna, “Daꞌa ka angahaka ni sai ni sai pasal itu-i. Saguwāꞌ pehēꞌ ka patūy ni imam boꞌ palilingun barannu ma iya. Pagubus tukbalin pagkulban ni Tuhan buwat bay pamanduꞌ eꞌ si Musa, tandaꞌ saksiꞌ ni kahekaꞌan aꞌa in kaꞌa ilu alanuꞌ na min sakinu.”
15 Sagōꞌ minsan buwattēꞌ pangalāng si Isa, pasaplag gom paꞌin suli-suli pasalna, angkan aheka saga aꞌa patimuk ni iya boꞌ akale ma panduꞌna sampay angamuꞌ pinauliꞌ saga saki sigām. 16 Saguwāꞌ bang pasān, alaꞌan si Isa min kahekaꞌan aꞌa inān ni lahat kulang aꞌana boꞌ anambahayang mahēꞌ.
Aꞌa Amatay Ugatna Kauliꞌan eꞌ si Isa
17 Dakayuꞌ llaw, hinabu si Isa amanduꞌ, aniyaꞌ saga Parisi maka saga guru saraꞌ agama Yahudi aningkōꞌ ma atagna. Saga aꞌa itu bay pinaꞌan min daꞌira Awrusalam maka min kamemon lūngan ma lahat Jalil maka lahat Yahudiya. Taga-kawasa asal si Isa min Panghūꞌ angkan iya makauliꞌ saga aꞌa sakihan. 18 Manjari aniyaꞌ atꞌkka pinaꞌan saga aꞌa ananggung aꞌa amatay ugatna. Pasulay sigām pasekot ni atag si Isa, 19 sagōꞌ mbal makalabay sabab sikatimukan saga aꞌa mainaꞌan. Angkan sigām parāg ni diyataꞌ lumaꞌ angalangkat atop boꞌ amatonton aꞌa amatay ugatna maka palegehanna. Jari pinatꞌnnaꞌ iya ma dahuwan si Isa ma tꞌngngaꞌ-tꞌngngaꞌ katimukan aꞌa. 20 Makataꞌu paꞌin si Isa in aꞌa amowa inān angandol ma iya, ahꞌlling iya ni aꞌa amatay ugatna, yukna, “Bagay, niampun na dusanu.”
21 Na, takale paꞌin lling si Isa itu eꞌ saga guru saraꞌ agama maka saga Parisi, magtūy sigām magtilaw-tilawan di-sigām dangan maka dangan, “Sai sa aꞌa itu?” yuk-i. “Amahꞌlling iya kupul ni Tuhan magbissala buwattēꞌ sabab halam aniyaꞌ makaꞌampun dusa, luwal Tuhan.”
22 Sagōꞌ kinataꞌuwan eꞌ si Isa bang ai pinikil eꞌ sigām, ati yukna ma sigām, “Angay kam magpikil-pikil buwattilu? 23 Kumpasunbi bang ingga aluhay: bang yukku ma aꞌa, ‘niampun na dusanu’, atawa bang yukku, ‘pabungkal ka boꞌ ka palꞌngngan?’ 24 Na, buwananta kam tandaꞌ palsaksiꞌan boꞌ kataꞌuwanbi in aku, Anak Manusiyaꞌ, taga-kapatut angampun dusa ma deyom dunya itu.” Jari ahꞌlling si Isa ni aꞌa amatay ugatna heꞌ, yukna, “Sohoꞌta ka pabungkal. Bowahun pabahakannu ilu amoleꞌ.”
25 Saruꞌun-duꞌun du pabungkal iya ma matahan sigām kamemon. Binuhat eꞌna bay pabahakanna boꞌ yampa amoleꞌ ni lumaꞌna, maka eꞌna ananglitan Tuhan. 26 Ainu-inu toꞌongan saga aꞌa inān kamemon maka sinōd sigām tāw. Ananglit sigām ma Tuhan, yuk-i, “Hinang makainu-inu ya taꞌndaꞌta llaw itu!”
Si Libi Binowa Ameyaꞌ ma si Isa
27 Pagubus, paluwas si Isa minnaꞌan ati aniyaꞌ taꞌndaꞌna magaꞌāꞌ sukay parinta, ōnna si Libi. Inaꞌan iya aningkōꞌ ma deyom upisna pangāꞌanna sukay. Yuk si Isa ma iya, “Piꞌitu na ka ameyaꞌ ma aku.” 28 Pabuhat magtūy si Libi. Niꞌbbahan eꞌna kamemonna boꞌ ameyaꞌ ma si Isa.
29 Manjari aniyaꞌ jamu pinatꞌnnaꞌ eꞌ si Libi ma lumaꞌna pamaheyana ma si Isa. Aheka isab magaꞌāꞌ sukay parinta maka saga aꞌa kaseheꞌan bay magbeyaꞌ amangan maka sigām. 30 Sagōꞌ saga aꞌa Parisi maka saga guru saraꞌ ya daumpigan maka sigām bay anoway si Isa. Yuk sigām ni mulidna, “Angay kam palamud magsalu maka saga magaꞌāꞌ sukay parinta maka baꞌanan aꞌa dusahan?”
31 Anambung si Isa ma saga aꞌa atilaw inān, yukna, “Bang aꞌa abasag mbal magpadoktol. Ya magpadoktol bang aꞌa taga-saki. 32 Nggaꞌi ka aꞌa ahāp ya mohotku piꞌitu ni dunya, sagōꞌ ya piꞌituku aꞌa taga-dusa boꞌ supaya angꞌbba min dusa sigām.”
Panilaw Pasal Pagpuwasa
33 Manjari aniyaꞌ saga aꞌa ahꞌlling ni si Isa, yuk-i, “Saga mulid si Yahiya araran magpuwasa maka anambahayang. Ya du saga mulid Parisi, sagōꞌ mulidnu mbal. Amangan sadja sigām maka anginum.”
34 Anambung si Isa ma saga aꞌa heꞌ, labay min paralilan. Yukna, “Amuwasa bahāꞌ saga luruk bang masi giꞌ ma sigām pangantin lꞌlla? Tantu mbal. 35 Sagōꞌ ma llaw sinōng, bang taꞌabut waktu kapamalaꞌan pangantin lꞌlla, ya na heꞌ waktu pagpuwasa sigām.”
36 Manjari amaralil giꞌ si Isa pasal pamanduꞌ tagnaꞌ maka pamanduꞌna, yukna, “Halam aniyaꞌ anganggeret badjuꞌ bahaꞌu panupakna ni badjuꞌ ndang. Bang buwattēꞌ, ageret badjuꞌ bahaꞌu. Sabab sꞌmmek bahaꞌu mbal tōp panupak sꞌmmek ndang.” 37 Pinaralil isab eꞌ si Isa pamanduꞌna ni binu-anggul bahaꞌu nihinang bang niꞌisi ni deyom pangisihan kuwit kambing. Yukna, “Halam aniyaꞌ angisi binu bahaꞌu, bang masi giꞌ amukal, ni deyom pangisihan ndang. Bang buwattēꞌ hinangna, tantu abustak pangisihan ndang eꞌ binu bahaꞌu. Jari abuꞌus binu ati kaugun bay pangisihanna. 38 Sagōꞌ in binu bahaꞌu subay niꞌisi ni pangisihan bahaꞌu.” 39 Amaralil giꞌ si Isa, yukna, “Bang aꞌa biyaksa anginum binu-anggul atꞌggol bay ma tauꞌan, mbal iya bilahi anginum binu bahaꞌu. Sabab bang ma iya, ahāp lagiꞌ nanam binu-anggul atꞌggol bay ma tauꞌan.”