2
Aꞌa Amatay Ugatna Kauliꞌan eꞌ si Isa
1 Palabay paꞌin daka pilangꞌllaw, pabīng si Isa pehēꞌ ni daꞌira Kapirnaꞌum ati tataꞌu in iya inaꞌan na ma lumaꞌ. 2 Jari landuꞌ aheka aꞌa patimuk pinaꞌan ni lumaꞌ patꞌnnaꞌan si Isa ya angkan halam aniyaꞌ palabayan minsan ma luwasan bowaꞌ lawang. Ati ninasihatan sigām eꞌ si Isa lapal Tuhan. 3 Pasaltaꞌ, aniyaꞌ pinaꞌan ni iya mpat aꞌa magtanggung aꞌa dangan amatay ugatna. 4 Sagōꞌ mbal sigām makasekot ni si Isa sabab kaheka aꞌa inān, ya angkan sigām bay angalangkat atop min diyataꞌ kōk si Isa. Tahinang paꞌin pasōran eꞌ sigām, pinatonton aꞌa amatay ugatna inān palege ma diyataꞌ palegehanna. 5 Makataꞌu paꞌin si Isa in aꞌa ananggung inān angandol ma iya, yukna ni aꞌa amatay ugatna, “Otoꞌ, niampun na dusanu.”
6 Na, aniyaꞌ magtingkōꞌan mainaꞌan saga guru saraꞌ agama. Amikil-mikil sigām pasal bay pahꞌlling si Isa. 7 “Oy!” yuk sigām. “Angay aꞌa itu! Bissala kupul koꞌ ya pahꞌllingna ma Tuhan. Halam aniyaꞌ makaꞌampun dusa, luwal Tuhan dakayuꞌ-kayuꞌ!”
8 Kinataꞌuwan magtūy eꞌ si Isa bang ai ya pinikil eꞌ sigām angkan yukna ma sigām, “Angay kam magtilaw-tilaw buwattilu ma deyom pikilanbi! 9 Kumpasunbi bang ingga ya aluhay, bang yukku ma aꞌa, ‘Niampun na dusanu’, atawa bang yukku, ‘Pabungkal ka, bowahun palegehannu boꞌ ka lumꞌngngan na’? 10 Na, buwananta kam tandaꞌ palsaksiꞌan boꞌ kataꞌuwanbi in aku, Anak Manusiyaꞌ, taga-kapatut du angampun dusa ma deyom dunya itu.” Jari ahꞌlling si Isa ni aꞌa amatay ugatna heꞌ, yukna, 11 “Ya na itu llingku ma kaꞌa, pabungkal na ka. Bowahun palegehannu ilu amoleꞌ.”
12 Jari pabungkal aꞌa inān, maka eꞌna amowa palegehanna. Paluwas iya minnēꞌ min pangꞌndaꞌ saga aꞌa inān kamemon. Landuꞌ sigām ainu-inu kamemon, ati sinanglitan Tuhan eꞌ sigām, yuk-i, “Yambohoꞌ kitam makaꞌndaꞌ buwattitu.”
Si Libi Binowa Pamulid ma si Isa
13 Jari itu pabīng na si Isa pehēꞌ ni bihing danaw Jalil. Patimuk ni iya saga aꞌa landuꞌ aheka ati panduꞌanna sigām. 14 Pasaltaꞌ paꞌin iya lumꞌngngan, taꞌndaꞌna si Libi anak si Alpa aningkōꞌ ma deyom upisna, ya pagbabayaran sukay parinta. Yuk si Isa ma iya, “Piꞌitu na ka ameyaꞌ ma aku.” Anꞌngge magtūy si Libi boꞌ ameyaꞌ ma si Isa.
15 Puwas minnaꞌan, hinabu si Isa amangan ma lumaꞌ si Libi, aheka saga magāꞌ sukay parinta maka saga aꞌa baldusa kaseheꞌ, pinaꞌan pasalu ni iya maka saga mulidna. Aheka asal bay pamulid ma iya. 16 Jari aniyaꞌ mainaꞌan guru saraꞌ agama Yahudi min umpigan Parisi. Pagꞌndaꞌ sigām ma si Isa dangkakanan maka saga aꞌa baldusa maka saga magaꞌāꞌ sukay parinta, ahꞌlling sigām ni saga mulid si Isa, yuk-i, “Angay si Isa palamud magsalu maka aꞌa baldusa ilu?”
17 Takale eꞌ si Isa patilaw saga guru inān ati yukna ma sigām, “Bang aꞌa abasag mbal magpadoktol. Ya magpadoktol bang aꞌa taga-saki. Nggaꞌi ka aꞌa ahāp ya bay mohotku piꞌitu ni dunya, sagōꞌ aꞌa taga-dusa, boꞌ supaya sigām ameyaꞌ ma aku.”
Pasal Pagpuwasa
18 Ma dakayuꞌ llaw, pasaltaꞌ paꞌin magpamuwasa saga mulid si Yahiya maka saga aꞌa Parisi, aniyaꞌ aꞌa pehēꞌ ni si Isa atilaw iya. Yuk sigām, “Magpuwasa saga mulid si Yahiya Magpapandi maka saga mulid Parisi, sagōꞌ mulidnu mbal amuwasa. Angay bahāꞌ?”
19 Anambung si Isa magparalilan, yukna, “Amuwasa bahāꞌ saga luruk satꞌggol mainaꞌan lagiꞌ pangantin lꞌlla ma atag sigām? Tantu mbal. Mbal sigām amuwasa satꞌggol inaꞌan ma sigām pangantin lꞌlla. 20 Sagōꞌ ma llaw sinōng, bang taꞌabut llaw pamalaꞌan pangantin lꞌlla min sigām, ya na heꞌ waktu pagpuwasa.”
21 Amaralil giꞌ si Isa pasal pamanduꞌ tagnaꞌ maka pamanduꞌna, yukna, “Halam aniyaꞌ aꞌa amatupak kakanaꞌ bahaꞌu ni badjuꞌ ndang. Bang gantaꞌ buwattēꞌ hinangna, pakongkong tupak bahaꞌu, ati ageseꞌ min badjuꞌ ndang eꞌ. Jari paheya gom paꞌin geseꞌna.” 22 Pinaralil isab pamanduꞌna ni binu-anggul bahaꞌu, yukna, “Halam aniyaꞌ angisi binu bahaꞌu, ya masi giꞌ amukal, ni deyom pangisihan ndang. Bang gantaꞌ buwattēꞌ hinangna tantu abustak pangisihan eꞌ binu-anggul. Abuꞌus binu ati kaugun bay pangisihan eꞌ. Sagōꞌ in binu bahaꞌu subay niꞌisi ni pangisihan bahaꞌu.”
Panduꞌ Pasal Llaw Paghali
23 Ma dakayuꞌ llaw Sabtuꞌ, llaw mulliya ma saga Yahudi, inaꞌan disi Isa lumꞌngngan labay min tꞌngngaꞌ huma pananoman pai-tirigu. Jari itu, saltaꞌ ma palꞌngnganan, aniyaꞌ pai kinꞌttuꞌ eꞌ saga mulid eꞌ. 24 Ahꞌlling saga Parisi ni si Isa, yuk sigām, “Ndaꞌun ba saga mulidnu ilu! Talanggal eꞌ sigām saraꞌ agamatam maghinang buwattilu ma llaw Sabtuꞌ!”
25-26 Anambung si Isa, yukna, “Angay, halam bahāꞌ bay tabassabi pasal bay tahinang eꞌ si Daꞌud ma waktu si Abiyatar bay Imam Muwallam? Bay aotas si Daꞌud maka saga aꞌana pagka halam aniyaꞌ ai-ai takakan sigām. Jari bay pasōd si Daꞌud ni deyom lumaꞌ pangarapan ni Tuhan ati takakanna saga tinapay ya pinatꞌnnaꞌ mainaꞌan panukbal ni Tuhan. Na bang ma agamatam, luwal du saga kaimaman wajib amangan tinapay bay tinukbalan inān, malaingkan kinakan eꞌ si Daꞌud maka bay pamuwanna isab ma saga seheꞌna. Saguwāꞌ halam iya bay makarusa maghinang buwattēꞌ. 27 Llaw paghali itu,” yuk si Isa ma saga Parisi inān, “bay pinaniyaꞌ eꞌ Tuhan panabang ma manusiyaꞌ. Nggaꞌi ka manusiyaꞌ ya pinapanjari ma sabab aniyaꞌ llaw Sabtuꞌ. 28 Aku itu, anak Manusiyaꞌ, taga-kapatut magbayaꞌ ma llaw Sabtuꞌ, ya llaw paghali ni Tuhan.”