12
Pasal Llaw Paghali
1 Dakayuꞌ Sabtuꞌ, lumꞌngngan disi Isa labay min tꞌngngaꞌ huma pananoman pai-tirigu. Jari itu, pagka lingantu saga mulidna, aniyaꞌ batang pai bay kinꞌttuꞌ eꞌ sigām boꞌ niꞌintaꞌ isina. 2 Pagꞌndaꞌ saga Parisi ma bay tahinang eꞌ saga mulid itu, yuk sigām ni si Isa, “Ndaꞌun ba saga mulidnu ilu. Langgal saraꞌ koꞌ hinang sigām pagka pasabu ma llaw Sabtuꞌ.”
3 Anambung si Isa, yukna, “Angay, halam tabassabi bang ai bay tahinang eꞌ si Daꞌud ma masa awal eꞌ, waktu bay kaotas sigām maka saga aꞌana? 4 Bay pasōd si Daꞌud ni deyom langgal Pangarapan ni Tuhan boꞌ yampa ngāꞌna saga tinapay ya panukbal ni Tuhan. Pinagkakan eꞌ sigām tinapay inān minsan langgal saraꞌ, sabab luwal saga kaimaman ya wajib amangan tinapay bay tinukbalan inān. 5 Halam bahāꞌ isab bay tabassabi ma Kitab Tawrat pasal saga imam ya maghinang ma deyom langgal pagkulbanan sabu ma llaw paghali ni Tuhan? Minsan sigām makalanggal saraꞌ agama halam du sigām bay magdusa. 6 Hakaꞌanta kam, aniyaꞌ maitu aheya kapatutna min langgal pagkulbanan inān. 7 Aniyaꞌ lling Tuhan bay tasulat ma Kitab Kanabi-nabihan, ya yuk-i, ‘Mbal ahalgaꞌ ma aku susumbaliꞌan ya pagkulbanbi. Sagōꞌ ya kabayaꞌanku toꞌongan subay kam maꞌaseꞌ ma pagkahibi.’ Bang bay tahatibi toꞌongan panduꞌ itu, mbal du kam bay amatꞌkka hukuman ni saga aꞌa ya halam bay magdusa. 8 Sabab aku, Anak Manusiyaꞌ, taga-kapatut magbayaꞌ ma llaw Sabtuꞌ, ya llaw mulliya.”
Aꞌa Pakongkong Tanganna Kauliꞌan
9 Manjari palanjal si Isa minnēꞌ ni lahat dakayuꞌ, ati pasōd iya ni deyom langgal sigām. 10 Aniyaꞌ mainaꞌan aꞌa pakongkong tanganna, maka aniyaꞌ isab saga aꞌa bilahi amiha dusa ma si Isa panuntut sigām ma iya. Tinilaw iya eꞌ sigām, yuk-i, “Langgal saraꞌ bahāꞌ ma agamatam bang kita amauliꞌ aꞌa ma llaw paghali ni Tuhan?”
11 Anambung si Isa, yukna, “Ai bahāꞌ hinangbi bang aniyaꞌ dakayuꞌ bili-bilibi ahūg ni deyom lowang hinabu ma llaw paghali? Mbal bahāꞌ ngāꞌbi hayop inān, pinaluwas min deyom lowang? 12 In kita binangsa manusiyaꞌ labi giꞌ ahalgaꞌ min bili-bili. Angkan wajib bang kita maghinang kahāpan ma llaw paghali ni Tuhan.”
13 Sakali ahꞌlling si Isa ni aꞌa pakongkong tanganna inān, yukna, “Pahꞌnnatun tangannu ilu.” Na, pinahꞌnnat eꞌna, magtūy kauliꞌan tanganna pasaliꞌ na ni tanganna dambilaꞌ. 14 Sagōꞌ paluwas saga Parisi min deyom langgal inān boꞌ magisun bang buwattingga eꞌ sigām amapatay ma si Isa.
Si Isa Sosohoꞌan Tuhan
15 Pagtaꞌu si Isa ma kaisunan saga Parisi eꞌ, alaꞌan iya min lahat inaꞌan. Aheka aꞌa bay paturul ma iya, ati kauliꞌan eꞌna sigām kamemon sasuku magsakian. 16 Bay sigām bandaꞌanna daꞌa sinōꞌ anuli-nuli pasal iya. 17 Minnēꞌ aniyaꞌ katumanan ma bay pinagkallam eꞌ Tuhan, ya tasulat eꞌ nabi Isaya. 18 Yuk-i,
“Itiyaꞌ sosohoꞌanku bay peneꞌku.
Kalasahanku iya, landuꞌ aku kasulutan ma iya.
Pahōpku ni iya Rū-ku,
ati iya ya magpasaplag kabontol hukumanku
ni sabarang bangsa.
19 Mbal iya angalugat, mbal isab angamahit.
Mbal iya amatanog suwalana ma paglabayan aꞌa.
20 Maꞌaseꞌ iya ma sasuku alamma pangandolna,
maka tabangna sasuku mbal makakoleꞌan di-na,
sampay ni waktu kapatꞌnnaꞌna hukuman abontol
maka taraꞌug kamemon kalaꞌatan.
21 Jari iya ya pangasahan eꞌ kamemon palbangsahan.”
Si Isa maka si Beꞌelsebul
22 Sakali aniyaꞌ binowa ni si Isa dakayuꞌ aꞌa umaw maka buta sabab sinōd saitan. Kauliꞌan aꞌa itu eꞌ si Isa, jari makabissala maka makaꞌndaꞌ na iya. 23 Ainu-inu saga aꞌa bay mainaꞌan. Yuk sigām, “Ya itu bahāꞌ tubuꞌ si Daꞌud dakayuꞌ-kayuꞌ?”
24 Pagkale lling inān eꞌ saga Parisi, yuk sigām, “Angkan aꞌa itu makapalaꞌan saitan min deyom baran aꞌa sabab taga-kawasa iya bay min si Beꞌelsebul, ya pagnakuraꞌan saitan.”
25 Sagōꞌ kinataꞌuwan asal eꞌ si Isa bang ai pinikil eꞌ sigām, angkan yukna, “Bang saupama aniyaꞌ pagsultanan abahagiꞌ duwa saga aꞌana, boꞌ magbonoꞌ saliꞌ-saliꞌ, mbal atꞌggol magkaꞌat pagsultanan eꞌ. Damikiyanna bang aniyaꞌ aꞌa magdalahat atawa magdaokom, boꞌ abahagiꞌ duwa magsaggaꞌan di-sigām, alꞌkkas sigām magkaukanat. 26 Angkan koꞌ, bang nakuraꞌ saitan amaluwas pagkahina saitan, hatina magkuntarahan iya di-na. Tantu mbal anatas kapagbayaꞌna. 27 Yukbi in aku itu makapaluwas saitan ma sabab aniyaꞌ kawasaku pamuwan aku eꞌ si Beꞌelsebul. Bang heꞌ-i bꞌnnal, minningga bahāꞌ pangāꞌan mulidbi kawasa, ya angkan sigām isab makapaluwas saitan? Mulidbi luggiyaꞌ ya amabukis kasāꞌanbi. 28 Sagōꞌ ya bꞌnnalna, ya angkan aku makapalaꞌan saitan sabab taga-kawasa aku deyoꞌ bay min Rū Tuhan. Ya na koꞌ ilu paltandaꞌan in Tuhan itiyaꞌ na magparinta ma kaꞌam.
29 “Nakuraꞌ saitan inān saliꞌ dalil aꞌa agaꞌos. Lumaꞌna mbal tasōd, pangaltaꞌna mbal kalangpasan. Luwal bang aꞌa gaꞌosan inān niengkotan dahū boꞌ yampa kalangpasan deyom lumaꞌna.
30 “Sai-sai mbal amogbogan aku,” yuk si Isa, “anaggaꞌ aku du. Maka sai-sai mbal anabangan aku amatipun saga sukuꞌku, amakaukanat du iya. 31 Angkan kam hakaꞌanku, sai-sai kam angandusa maka amahꞌlling pangkal tudju ni Tuhan, niampun du kam. Sagōꞌ sai-sai amahꞌlling pangkal ni Rū Sussi, mbal kaꞌampunan. 32 Sai-sai amahꞌlling laꞌat ma aku, Anak Manusiyaꞌ, makajari niampun dusana. Sagōꞌ sai-sai amahꞌlling laꞌat ma Rū Sussi, mbal toꞌongan niampun dusana, ai na ka ma masa itu, ai na ka ma masa sinōng.”
Kayu maka Buwaꞌna
33 “Bang saupama kayu ahāp,” yuk si Isa, “ahāp isab buwaꞌna. Damikiyanna isab bang kayu alaꞌat, buwaꞌna mbal ahāp. Sabab takilā asal kayu min buwaꞌna. 34 Kaꞌam saga pangangakkal ilu! Mbal kam makabissala ahāp sabab alaꞌat deyom ataybi. Ai-ai bay ma deyom atay manusiyaꞌ, gana-gana paluwas min bowaꞌna. 35 Bang aꞌa ahāp, ahāp du isab kaul-piꞌilna sabab luwas min kahāpan ya bay tauꞌna ma deyom atayna. Sagōꞌ bang aꞌa alaꞌat, alaꞌat du isab kaul-piꞌilna sabab luwas min kalaꞌatan bay tauꞌna ma deyom atayna.
36 “Hakaꞌanta kam, bang taꞌabut llaw pangahukum Tuhan ma manusiyaꞌ, in aꞌa kamemon subay angahaka pasal bissala kamemon bay tapahꞌllingna ma halam aniyaꞌ kapūsanna. 37 Sabab min pamissalana ya sababan angkan aꞌa nihukum, bang niampun atawa bininasa.”
Guru maka Parisi Mikipaꞌndaꞌ Paltandaꞌan
38 Manjari aniyaꞌ saga guru saraꞌ agama maka saga Parisi bay mainaꞌan. Yuk sigām ni si Isa, “Tuwan Guru, bilahi kami angꞌndaꞌ dakayuꞌ paltandaꞌan luwas min barakatnu.”
39 Sagōꞌ anambung si Isa, yukna, “Dusahan pahāp saga aꞌa tahun itu-i, mbal toꞌongan bilahi magtaꞌat ma Tuhan. Kaꞌam ilu mikipaꞌndaꞌ paltandaꞌan panulayanbi aku. Sagōꞌ halam aniyaꞌ paltandaꞌan paꞌndaꞌanku kaꞌam, luwal paltandaꞌan bay min si Yunus ma masa awal eꞌ. 40 Sabab si Yunus bay tꞌllungꞌllaw tꞌllumbahangi ma deyom bꞌttong sattuwa dilaut. Damikiyanna aku, Anak Manusiyaꞌ, tꞌllungꞌllaw tꞌllumbahangi du aku ma deyom gumi ma sinosōng. 41 Bang taꞌabut na llaw pangahukum Tuhan ma manusiyaꞌ, magtꞌnggehan du saga aꞌa bay ma daꞌira Niniba ma masa awal eꞌ, ati sigām ya anaksiꞌ in kaꞌam taga-dusa. Sabab sigām ya bay akale ma nasihat si Yunus, magtūy apinda min dusa sigām. Hakaꞌanta kam, itiyaꞌ na dakayuꞌ aꞌa labi lagiꞌ alanga min si Yunus eꞌ, sagōꞌ mbal iya bꞌnnalbi. 42 Bang taꞌabut isab llaw pangahukum Tuhan ma manusiyaꞌ aniyaꞌ du anꞌngge dakayuꞌ sultan dꞌnda bay ma lahat Seba ma masa awal eꞌ. Anaksiꞌ du iya in kaꞌam taga-dusa. Ya angkan dꞌnda inān taga-kapatut anaksiꞌ, sabab bay piꞌitu min lahatna ma bihing dunya supaya takalena bissala pangitaꞌu min sultan Sulayman. Hakaꞌanta kam, ma buwattinaꞌan aniyaꞌ maitu pasōng lagiꞌ pangitaꞌuna min bay taꞌu si Sulayman, sagōꞌ mbal bꞌnnalbi.”
Kabalik Saitan ni Baina
43 “Na, bang takdil ni saitan,” yuk si Isa, “bang aniyaꞌ saitan paluwas min baran aꞌa, nilunsul eꞌna lahat halam bay kaulanan amiha pahalian. Jari bang halam aniyaꞌ tabākna, 44 ahꞌlling saitan inān ni baranna, yukna, ‘Gom na aku pabīng ni deyom baran aꞌa bay patꞌnnaꞌanku heꞌ.’ Pagbīng paꞌin, taꞌndaꞌna halam giꞌ aniyaꞌ patꞌnnaꞌ mainaꞌan, maka waꞌi bay sinapuhan maka minomos. 45 Puwas eꞌ pehēꞌ iya angāꞌ pituꞌ saitan akalap giꞌ laꞌat sigām min iya, ati pasōd sigām kamemon ni deyom baran aꞌa patꞌnnaꞌ mainaꞌan. Jari in aꞌa inān palaꞌat gom paꞌin kahālanna damuli min bay dahū. Buwattēꞌ isab ma saga aꞌa baldusa ya allum ma tahun itu-i.”
Inaꞌ si Isa maka Saga Danakanna Lꞌlla
46 Na, hinabu si Isa masi amissala ni saga aꞌa inān, atꞌkka pinaꞌan inaꞌna maka saga danakanna lꞌlla. Inaꞌan sigām angagad ma luwasan pagka bilahi magsuli-suli maka iya. 47 Jari aniyaꞌ bay anambuku ma si Isa, yukna, “Tuwan, inaꞌan inaꞌnu maka saga danakannu ma luwasan. Bilahi magsuli-suli maka kaꞌa.”