3
Aꞌa Pakongkong Tanganna Kauliꞌan eꞌ si Isa
1 Manjari pasōd pabalik si Isa ni deyom langgal. Aniyaꞌ mainaꞌan aꞌa pakongkong tanganna. 2 Aniyaꞌ isab saga Parisi mainaꞌan amiha palsababan panuntut sigām ma si Isa, angkan iya nijagahan eꞌ sigām kalu iya amauliꞌ saki aꞌa heꞌ ma llaw Sabtuꞌ. 3 Jari ahꞌlling si Isa ni aꞌa pakongkong tanganna, yukna, “Piꞌitu ka anꞌngge ma tꞌngngaꞌ itu.” 4 Puwas eꞌ tinilaw eꞌ si Isa saga aꞌa heꞌ, yukna, “Ai ya apatut nihinang ma llaw paghali? Hinang makahāp ka atawa hinang makalaꞌat? Amakallum ka atawa amapatay?”
Saguwāꞌ halam aniyaꞌ panambung sigām. 5 Pinatongan sigām dangan maka dangan eꞌ si Isa. Angastol iya maka asusa sabab agagga sigām alasahan pagkahi sigām. Jari yukna ma aꞌa pakongkong tanganna inān, “Pahꞌnnatun tangannu ilu.” Na, pinahꞌnnat eꞌna ati kauliꞌan iya. 6 Paluwas magtūy saga Parisi min langgal eꞌ ati paraiꞌ-daiꞌ sigām magisun maka saga bebeyaꞌan sultan Herod bang buwattingga eꞌ sigām amapatay si Isa.
Landuꞌ Aheka Aꞌa Paurul ma si Isa
7 Manjari itu maglaꞌanan disi Isa maka saga mulidna tudju ni bihing danaw. Sidda aheka aꞌa bay paturul, nggaꞌi ka hal min lahat Jalil 8 sagōꞌ min lahat Yahudiya isab maka min daꞌira Awrusalam. Aniyaꞌ isab aꞌa min lahat Idumiya maka min dambilaꞌ sapaꞌ Jordan, maka min lahat isab ya ma jadjahan daꞌira Tira maka Sidun. Saga aꞌa aheka itu pinaꞌan ni si Isa sabab takale eꞌ sigām pasal saga hinang bay tahinangna. 9 Jari sinohoꞌ eꞌ si Isa saga mulidna angalꞌbbos bayanan paruwaꞌanna boꞌ supaya iya mbal tagipit eꞌ katimukan aꞌa inān. 10 Pagka aheka aꞌa bay kauliꞌan eꞌna, sasuku taga-saki pajudjal na paꞌin boꞌ supaya paꞌabut tangan sigām ni iya. 11 Pagꞌndaꞌ isab saga aꞌa sinōd saitan ma iya, magpatihantak sigām ma dahuanna maka eꞌ sigām angolang, yuk-i, “Kaꞌa ilu Anak Tuhan!”
12 Sagōꞌ nilāng saga saitan eꞌ si Isa, sinōꞌ daꞌa angahaka ni aꞌa bang sai iya.
Pangwakil saga Mulid si Isa Kasangpūꞌ maka Duwa
13 Manjari itu patukad si Isa pehēꞌ ni lorosan būd. Nilinganan eꞌna pinaꞌan saga aꞌa kabayaꞌanna nihinang mulid, ati patukad sigām pehēꞌ ni iya. 14 Jari pineneꞌ eꞌna sangpūꞌ maka duwa aꞌa ati ōnanna sigām aꞌa kawakilanna. Yukna ma sigām, “Kaꞌam ilu bay peneꞌku aneheꞌan aku. Sohoꞌta kam lumꞌngngan isab magnasihat lapal Tuhan. 15 Pinaniyaꞌan du kam kawasa pamalaꞌan saga saitan min deyom baran aꞌa.”
16 Ya na itu ōn aꞌa kasangpūꞌ maka duwa ya bay tapeneꞌ eꞌ si Isa: si Simun, ya bay ōnanna isab Petros, 17 boꞌ si Yakub maka si Yahiya, saga anak si Sibidi. Niranglay duwangan itu eꞌ si Isa “Bowanerges”, hatina aꞌa saliꞌ dalil lꞌggon. 18 Pasunuꞌ si Andariyas maka si Pilip, si Bartolome maka si Matiyu, si Tomas maka si Yakub anak si Alpa. Pasunuꞌ isab si Taddiyu, boꞌ si Simun aꞌa pangangatu. 19 Katapusan si Judas Iskariyut ya anukbalan si Isa ni saga bantana ma waktu damuli minnēꞌ.
Si Isa maka Beꞌelsebul
20 Pagubus, pasōd disi Isa ni lumaꞌ ati aheka aꞌa patimuk pabīng pinaꞌan, ya poꞌon si Isa maka mulidna mbal makaluhaya minsan amangan. 21 Jari itu, pagka takale eꞌ saga mattoꞌa-danakan si Isa pasal itu-i, pehēꞌ sigām angāꞌ iya. Sabab na maghimumungan saga aꞌa in si Isa konoꞌ inān kulang pikilanna.
22 Aniyaꞌ isab saga guru saraꞌ agama bay palūd pinaꞌan min Awrusalam. Angupama sigām, yuk-i, “Si Isa itu sinōd Beꞌelsebul ya pagnakuraꞌan saga saitan, angkan iya makapalaꞌan saga saitan min deyom baran aꞌa.”
23 Jari nilinganan saga aꞌa inān eꞌ si Isa, ati magparalilan iya ma sigām, yuk-i, “Na, buwattingga eꞌ saitan amalaꞌan saitan? Mbal makajari! 24 Bang saupama aniyaꞌ pagsultanan abahagiꞌ duwa saga aꞌana boꞌ magbonoꞌ-biyonoꞌi, mbal anatas pagsultanan eꞌ. 25 Damikiyanna bang aniyaꞌ aꞌa magdaokom abahagiꞌ duwa ati magsaggaꞌan di-sigām, magkaukanat sadja sigām. 26 Angkanna, bang nakuraꞌ saitan magsaggaꞌ maka pagkahina saitan ati abahagiꞌ duwa, mbal du anatas pagnakuraꞌna. Alꞌkkas du pahalam. 27 Nakuraꞌ saitan itu saliꞌ dalil aꞌa agaꞌos taga-lumaꞌ. Lumaꞌna mbal tasōd, ai-aina mbal kalangpasan, luwal bang aꞌa gaꞌosan inān niengkotan dahū boꞌ yampa kalangpasan deyom lumaꞌna.
28 “Bꞌnnal ya pangahakaku itu ma kaꞌam,” yuk si Isa. “Niampun du eꞌ Tuhan kamemon dusa manusiyaꞌ sampay lling sigām pangkal ni Tuhan. 29 Sagōꞌ bang Rū Sussi ya pinahꞌllingan pangkal eꞌ aꞌa, halam toꞌongan aniyaꞌ kaꞌampunan aꞌa inān sabab angakkot dusana ma iya saumul-umul.” 30 Angkan buwattēꞌ pahꞌlling si Isa sabab aniyaꞌ amūng-mūng in iya sinōd saitan.
Inaꞌ si Isa maka Dauranakanna Lꞌlla
31 Jari itu atꞌkka pinaꞌan inaꞌ si Isa maka saga danakanna lꞌlla. Angagad sigām ma luwasan lumaꞌ heꞌ ati amabeyaꞌ sigām haka ni si Isa sinōꞌ paluwas. 32 Aheka aꞌa bay magtingkōꞌan ma sakalibut si Isa, yuk sigām ma iya, “Tuwan, ilu inaꞌnu maka saga danakannu ma luwasan. Amiha kaꞌa konoꞌ.”