10
Mulid si Isa Kasangpūꞌ maka Duwa
1 Manjari nilinganan eꞌ si Isa saga mulidna kasangpūꞌ maka duwa boꞌ buwananna sigām kawasa pamalaꞌan saitan min deyom baran aꞌa sampay pamauliꞌ saki maka lamma indaginis. 2 Ya na itu ōn aꞌa kasangpūꞌ maka duwa bay kawakilan eꞌ si Isa: kaissa, si Simun ya niōnan isab si Petros, maka danakanna si Andariyas, boꞌ si Yakub maka danakanna si Yahiya, saga anak si Sibidi. 3 Pasunuꞌ si Pilip maka si Bartolome maka si Tomas, boꞌ si Matiyu ya bay magāꞌ sukay parinta, boꞌ si Yakub ya anak si Alpa. Pasunuꞌ isab si Taddiyu, 4 boꞌ si Simun aꞌa pangangatu. Katapusan si Judas Iskariyut, ya anukbalan si Isa ni saga bantana ma waktu damuli minnēꞌ.
Kasangpūꞌ maka Duwa Mulid Sinōꞌ Magnasihat
5 In sangpūꞌ maka duwa aꞌa itu bay pinanduꞌan eꞌ si Isa boꞌ yampa sinōꞌ palꞌngngan. Yukna, “Daꞌa kam pehēꞌ ni kalumaꞌan aꞌa nggaꞌi ka bangsa Israꞌil, atawa ni kalumaꞌan aꞌa Samariya. 6 Sagōꞌ pehēꞌ kam ni bangsa Israꞌil sadja, ya sapantun bili-bili alungay. 7 Pehēꞌ kam magnasihat in waktu kapagparinta Tuhan song na atꞌkka. 8 Pauliꞌunbi sasuku asaki. Pakallumunbi saga aꞌa bay magpatayan, palanuꞌunbi sasuku niꞌipul, maka paluwasunbi saga saitan min deyom baran aꞌa. Bay kam anaimaꞌ kapatut min aku ma halam aniyaꞌ bayadna, angkan kam subay anabang ma halam aniyaꞌ tongodna. 9 Daꞌa kam amowa bulawan atawa pilak minsan hal pisita ma deyom sabitanbi. 10 Daꞌa kam amowa paglutuꞌanan, atawa badjuꞌ pasalinanbi, atawa taumpaꞌ atawa tungkud. Sabab bang aꞌa maghinang, wajib iya binuwanan napakana.a
11 “Bang kam atꞌkka ni daꞌira atawa ni kalumaꞌan, pihaꞌunbi aꞌa mainaꞌan ahāp kasuddahanna, ati pahantiꞌ kam ma iya sampay taꞌabut waktu kalaꞌanbi min lahat inaꞌan-i. 12 Bang kam pasōd ni lumaꞌ aꞌa, saginahunbi buwattitu, ‘Bang paꞌin kam kaniyaꞌan kasannangan!’ 13 Jari bang ahāp kasuddahan sigām ma lumaꞌ inān, katꞌkkahan du sigām kasannangan ya bay pangamuꞌbi. Sagōꞌ bang mbal ahāp kasuddahan sigām, papellengunbi ni kaꞌam kasannangan heꞌ. 14 Bang gantaꞌ aniyaꞌ saga aꞌa mbal anagina kaꞌam, atawa mbal bilahi akale ma kaꞌam, alaꞌan kam min lumaꞌ atawa min kauman inān. Paspasinbi dahū bagunbunna min tapeꞌbi, tandaꞌ saksiꞌ in kaꞌam apuwas min sigām. 15 Hakaꞌanta kam, bang taꞌabut llaw pangahukum Tuhan ma manusiyaꞌ, kalabihan giꞌ buhatna ma saga aꞌa ma lahat inān min bay hukuman ma daꞌira Sodom maka daꞌira Gomora, lahat abantug ma sabab dusa aꞌana ma masa awal eꞌ.”
Pasal Kabinasahan Sōng Patꞌkka
16 “Pakale kam,” yuk si Isa. “Ilu kam song papehēꞌku ni deyoman saga aꞌa alaꞌat. Saliꞌ kam sapantun bili-bili pinapehēꞌ ni deyoman baꞌanan eroꞌ talun, ya magpangalꞌkkob. Angkan subay atahaꞌ akkalbi, maka subay ahatul kajarihanbi. 17 Pahalliꞌ kam, sabab aniyaꞌ aꞌa anꞌkkahan kam ni paghukuman maka angandaplosan kam ma deyom kalanggalan. 18 Pinaharap kam ni saga gubnul maka ni saga sultan boꞌ pinapariksaꞌ eꞌ sigām, ati makasaksiꞌ du kam ma pasalanku ni sigām sampay ni saga aꞌa ya nggaꞌi ka Yahudi. 19 Jari bang kam tinandanan ni saraꞌ, daꞌa kam magsusa bang ai pamissalabi atawa bang buwattingga eꞌbi ahꞌlling. Tantu kam binuwanan lapal pamissalabi bang taꞌabut waktuna. 20 Sabab nggaꞌi ka baranbi ya ahꞌlling ma waktu heꞌ-i, sagōꞌ Rū Mmaꞌbi Tuhan ya anabangan kaꞌam amissala.
21 “Ma waktu sinosōng inān aniyaꞌ du saga aꞌa anukbalan danakan sigām boꞌ pinapatay. Aniyaꞌ du isab saga mattoꞌa lꞌlla anukbalan anak sigām boꞌ pinapatay. Saga anak isab amantahan mattoꞌa sigām, anohoꞌ isab subay pinapatay. 22 Maka kaꞌam saga mulidku,” yuk si Isa, “kinabꞌnsihan du eꞌ aꞌa kamemon ma sabab aku ya pameyaꞌanbi. Sagōꞌ sasuku ahogot imanna sampay ni kahinapusan, makasampay ni kasalamatan ma deyom sulgaꞌ. 23 Bang kam gantaꞌ bininasa ma kalumaꞌan dakayuꞌ, alahi kam ni kalumaꞌan saddī. Hakaꞌanta kam, ma halam giꞌ talatagbi kalahatan Israꞌil kamemon, in aku Anak Manusiyaꞌ pabalik du piꞌitu.
24 “Halam aniyaꞌ mulid palanga min guruna. Halam aniyaꞌ ata palanga min nakuraꞌna. 25 In mulid subay magsukul bang makasaliꞌ ni guruna, maka sosohoꞌan subay magsukul bang makasaliꞌ ni nakuraꞌna. Na, bang aku nakuraꞌbi pinagōnan eꞌ sigām Beꞌelsebul, hatina nakuraꞌ saitan, lubaꞌ-lagiꞌna na kaꞌam sosohoꞌanku niōnan alaꞌat du eꞌ sigām.”
Pasal Sai Subay Kinatāwan
26 “Daꞌa kam tināw ma saga manusiyaꞌ. Kamemon bay nilimbungan tantu du pinaluwas. Kamemon bay tinauꞌ ma deyom atay tantu du pinataꞌu. 27 Ai-ai pangahakaku kaꞌam ma deyom kalendoman, pahꞌllingunbi ma kasawahan. Maka ai-ai nihagas-hagas ma taingabi, patanyagunbi ma mairan. 28 Daꞌa kam tināw ma aꞌa ya makapatay baranbi, sabab mbal taꞌabut palnyawahanbi. Ahāp lagiꞌ bang Tuhan ya katāwanbi, sabab in iya taga-kawasa aniksaꞌ baranbi sampay nyawabi ma deyom nalkaꞌ. 29 Pikilunbi manuk-manuk paupit ilu, tabꞌllita duwa hekana maka pisita, sagōꞌ minsan areyoꞌ halgaꞌna halam aniyaꞌ paupit minsan dakayuꞌ ahūg ni tanaꞌ bang nggaꞌi ka min kabayaꞌan Mmaꞌbi Tuhan. 30 Ya lagiꞌna kaꞌam. Minsan lamba buꞌunbi ilu, taitung eꞌ Tuhan bang pila hekana. 31 Angkan kam subay mbal tināw, sabab ahalgaꞌ giꞌ kam min baꞌanan paupit.”
Pagsabꞌnnal Pasal si Isa ya Pameyaꞌan
32 “Sai-sai angahaka ma alopan kahekaꞌan aꞌa in aku pameyaꞌanna, angahaka du aku ma alopan Mmaꞌku ma deyom sulgaꞌ, in aꞌa inān palsukuꞌanku. 33 Sagōꞌ sai-sai amalilu ma alopan kahekaꞌan in aku nggaꞌi ka pameyaꞌanna, paliluhanku du isab aꞌa inān ma alopan Mmaꞌku ma deyom sulgaꞌ.”
Si Isa Pagsaggaꞌan Aꞌa
34 “Araiꞌ pangannalbi in maksudku piꞌitu amowa kasannangan ni dunya, boꞌ nggaꞌi ka. Ya maksudku piꞌitu nggaꞌi ka kasannangan sagōꞌ pagsaggaꞌan. 35 Bay aku piꞌitu amapagsaggaꞌ manusiyaꞌ dangan maka dangan. Anak lꞌlla magbonoꞌ maka mmaꞌna, anak dꞌnda maka inaꞌna, ayuwan dꞌnda maka matoꞌana dꞌnda. 36 Binantahan aꞌa eꞌ seheꞌna magdalumaꞌ.
37 “Bang aꞌa alasahan mmaꞌna maka inaꞌna palabi min aku, mbal iya wajib tahinang mulidku. Damikiyanna isab bang aꞌa alasahan anakna lꞌlla-dꞌnda palabi min aku, mbal iya manjari tahinang mulidku. 38 Sai-sai bilahi anunuran aku subay tanggungna hāgna pamapatayan iya. Bang hati mbal paglillaꞌna, mbal iya manjari tahinang mulidku. 39 Sai-sai allogan kallum baranna, halam du aniyaꞌ kallumna taptap. Sagōꞌ sai-sai mbal allogan kallum baranna boꞌ lillaꞌ isab amatay ma sababku, makabāk iya kallum kakkal.”
Tungbas min Tuhan
40 “Sai-sai anaimaꞌ kaꞌam, aku ya tinaimaꞌ eꞌ sigām, sampay Tuhan ya bay amapiꞌitu aku ni dunya. 41 Sasuku anaimaꞌ nabi ma sabab lapal Tuhan ya pamissalana, aꞌa inān katungbasan kahāpan ya panungbas nabi. Damikiyanna, sasuku anaimaꞌ aꞌa adil ma sabab kaꞌadilna, katungbasan iya kahāpan ya panungbas saga aꞌa adil. 42 Hakaꞌanta kam toꞌongan, sai-sai amuwan minsan laꞌa hal dasawan boheꞌ dingin ma dakayuꞌ aꞌa areyoꞌ kapagaꞌana pagka mulidku iya, tantu aꞌa inān tinungbasan kahāpan.”