21
Pasal Sīn ya Panukbal eꞌ Balu Dꞌnda
1 Manjari patongas si Isa ati taꞌndaꞌna saga aꞌa dayahan magpangahūg sīn pagjakat sigām ni tuꞌung ma deyom langgal inān. 2 Aniyaꞌ isab taꞌndaꞌna dakayuꞌ dꞌnda balu, miskin toꞌongan, angahūg duwa unud sīn. 3 Yuk si Isa, “Bꞌnnal ya pangahakaku ma kaꞌam itu, ya duwa unud sīn tahūg eꞌ dꞌnda miskin itu labi giꞌ halgaꞌan min pilak bay tahūg eꞌ kamemon saga aꞌa kaseheꞌan. 4 Sabab,” yuk si Isa, “bay sigām amuwan min altaꞌ sigām manglabi-labihan. Saguwāꞌ dꞌnda itu, minsan iya miskin sidda, bay amuwan sīnna kamemon ya arak pamꞌllina napakana.”
Pamandogahan Pasal Llaw Kiyamat
5 Aniyaꞌ saga mulidna kaseheꞌ magsuli-suli pasal langgal pagkulbanan. Ahāp konoꞌ nindaꞌ saga batu bay ginuna pangahinang langgal eꞌ, maka aheka alti-altina bay panukbal ni Tuhan. Takale paꞌin suli-suli sigām itu eꞌ si Isa, yukna, 6 “Ma sinōng nilubu du kamemon ya taꞌndaꞌbi ilu. Halam du aniyaꞌ batuna angapin magbangkat, sabab pinagkaukanat kamemon.”
Kasigpitan maka Katiksaꞌan
7 Tinilaw iya eꞌ sigām. “Tuwan Guru,” yuk sigām, “sumiyan paniyaꞌ ya bay yuknu insiniꞌ? Maka ai pandogana boꞌ kinataꞌuwan in pakaradjaꞌan inān atꞌkka na?”
8 Anambung iya, yukna, “Kamayaꞌ-mayaꞌ kam boꞌ kam mbal kaꞌakkalan. Sabab ma sinosōng ilu aheka piꞌitu anabbut ma ōnku, maglaku-laku in sigām Al-Masi. Ya pahꞌlling sigām, ‘Kiyamat na!’ Sagōꞌ daꞌa kam magkahagad ma sigām. 9 Bang aniyaꞌ takalebi hunub-hunub pasal pagbonoꞌ atawa pasal lengog, daꞌa kam agawa. Tantu paniyaꞌ saga pagbonoꞌ sagōꞌ nggaꞌi ka giꞌ inaꞌan-i llaw kiyamat.”
10 Ahꞌlling giꞌ si Isa, yukna, “Magbonoꞌ du bangsa dakayuꞌ maka dakayuꞌ, parinta dakayuꞌ isab maka dakayuꞌ. 11 Paniyaꞌ du saga linug aheya maka gotom maka saki bonglay ma kaluhaꞌan dunya. Aniyaꞌ isab saga paltandaꞌan taꞌndaꞌ ma bꞌttong langit, paltandaꞌan makainu-inu maka makatāw-tāw. 12 Sagōꞌ dahū min inaꞌan-i sinaggaw kam eꞌ saga aꞌa maka nilaꞌat. Binowa du kam ni langgal sigām boꞌ kam nihukum maka niꞌisi ni deyom kalabusu. Tinukbalan du isab kam ni saga sultan maka ni gubnul boꞌ kam nihukum ma sabab pameyaꞌbi ma aku. 13 Bang kam ma alopan sigām, ya na inaꞌan waktu kapangahakabi ma sigām lapal ahāp pasal aku. 14 Sagōꞌ daꞌa kasusahinbi bang ai pangandaꞌawabi waktu kapanumariya kaꞌam, 15 sabab aku ya amuwanan kaꞌam taꞌu boꞌ kam makasambungan sigām. Jari halam aniyaꞌ kuntarabi makasaggaꞌ kaꞌam, maka mbal katangkisan bissalabi. 16 Minsan saga mattoꞌabi maka dauranakanbi, minsan saga lūng-kampungbi maka saga kabagayanbi, sinōngan du kam eꞌ sigām ni kuntarabi. Maka aniyaꞌ min kaꞌam pinapatay du eꞌ sigām. 17 Kinabꞌnsihan du kam eꞌ aꞌa kamemon ma sabab pameyaꞌbi ma aku. 18 Sagōꞌ mbal kam kalungayan ai-ai minsan dalamba buꞌunbi. 19 Lappasan du kam bang paꞌin pahogotbi pangandolbi.”
Katiksaꞌan Sangat Abisa
20 “Bang taꞌndaꞌbi daꞌira Awrusalam itu alibut eꞌ sundalu, na, kataꞌuwanbi song na waktu pamakaꞌat iya. 21 Jari sasuku patꞌnnaꞌ ma lahat Yahudiya subay alahi pehēꞌ ni kabūd-būran. Sasuku ma deyom daꞌira Awrusalam subay paluwas magdaiꞌ-daiꞌ, maka sasuku ma deya daꞌa subay pabīng pehēꞌ ni deyom daꞌira. 22 Sabab ya inaꞌan waktu pangamulkaꞌ Tuhan ma manusiyaꞌ. Minnēꞌ aniyaꞌ kamaujuran ma kamemon bay tasulat ma deyom Kitab. 23 Ndūꞌ, makaꞌaseꞌ-aseꞌ sidda saga dꞌnda abꞌttong ma masa inaꞌan-i, maka saga dꞌnda taga-anak duruꞌan lagiꞌ. Sabab aniyaꞌ kabinasahan aheya pinatꞌkka ni kaluhaꞌan lahat itu. Pinatꞌkkahan du mulkaꞌ Tuhan saga aꞌana. 24 Aniyaꞌ sigām kaseheꞌan nilagut eꞌ sundalu, pinapatay. Aniyaꞌ aꞌa kaseheꞌan sinaggaw, nihinang pilisu boꞌ binowa ni sabarang lahat. Daꞌira Awrusalam itu pinakaꞌat du eꞌ saga kabangsahan nggaꞌi ka Yahudi. Subay na ajukup gantaꞌan pagparinta bangsa inān boꞌ yampa sigām alaꞌan.”
Pasal Kabalik Al-Masi Piꞌitu ni Dunya
25 “Ma waktu sinōng ilu aniyaꞌ paltandaꞌan paniyaꞌ ma mata llaw maka ma bulan maka ma saga bituꞌun. Saga kabangsa-bangsahan maitu ma dunya isab agꞌmma du sumangat sigām. Alengog pikilan sigām sabab mbal manjari pangꞌllub tahik maka landos goyak. 26 Agon amatay saga aꞌa sabab min tāw maka susa sigām, pagka aniyaꞌ balaꞌ niagaran eꞌ sigām song patꞌkka ni dunya. Sabab saga pandoga ma tongaꞌan ayan pinalaꞌan du min patꞌnnaꞌan sigām. 27 Puwas inaꞌan-i,” yuk si Isa, “makaꞌndaꞌ du saga aꞌa ma aku, Anak Manusiyaꞌ, piꞌitu labay min gabun. Taꞌndaꞌ eꞌ sigām barakatku maka kosog sahayaku. 28 Jari bang anagnaꞌ saga pakaradjaꞌan ya yukku itu, pabuhat kam maka patongas sabab mbal na atꞌggol, lappasan du kam.”
Pamintāngan min Kayu Igira
29 Jari aniyaꞌ paralilan pinahꞌlling eꞌ si Isa ma sigām, yukna, “Pandogahinbi kayu igira maka saga kayu kaseheꞌan. 30 Bang taꞌndaꞌbi angugbus dahunna, minnēꞌ kataꞌuwanbi song musim pangꞌllaw na. 31 Damikiyanna itu bang taꞌndaꞌbi paniyaꞌ bay pamissalaku ma kaꞌam insiniꞌ heꞌ, minnēꞌ isab kataꞌuwanbi asekot na waktu pagparinta Tuhan ma dunya. 32 Bꞌnnal ya pangahakaku ma kaꞌam,” yuk si Isa. “Ma mbal giꞌ magpatayan kamemon saga aꞌa ya allum ma buwattinaꞌan, paniyaꞌ du pakaradjaꞌan kamemon bay yukku-i. 33 Papinda du langit maka dunya sagōꞌ kabtanganku itu mbal toꞌongan magkapinda.”
Saga Bebeyaꞌan si Isa Sinōꞌ Pahalliꞌ
34 “Subay kam pahalliꞌ,” yuk si Isa, “boꞌ kam mbal taꞌabutku magdūl-bayaꞌan di-bi, maka maglango-lango, maka kabuhatan eꞌ legot dunya itu. Sabab taghaꞌ sadja tꞌkka llaw inaꞌan-i, sapantun litag bang pinassik, 35 ati taluwaꞌ saga aꞌa kamemon ma babaw dunya itu. 36 Pajaga kam toꞌongan. Daꞌa kam pahali angamuꞌ tabang ni Tuhan bang paꞌin aniyaꞌ kosogbi, boꞌ kasandalanbi kamemon pakaradjaꞌan inān. Angamuꞌ kam tabang isab bang paꞌin kam makatampal ni aku, Anak Manusiyaꞌ.”