22
Pinagisunan si Isa
1 Na, maraiꞌ na Hinang Tinapay Halam Pasuligna, ya pinagōnan isab Hinang Paglakad. 2 Saga imam alanga maka saga guru saraꞌ agama amikil-mikil bang buwattingga eꞌ sigām amapatay si Isa ma halam aniyaꞌ makataꞌu. Tuꞌud sigām tināw ma saga aꞌa katimukan.
Kapanipu si Judas ma si Isa
3 Manjari pasōd nakuraꞌ saitan ni deyom pikilan si Judas, ya niōnan Judas Iskariyut, dakayuꞌ mulid si Isa min kasangpūꞌ maka duwa. 4 Pehēꞌ si Judas itu ni saga imam alanga maka ni saga nakuraꞌ ma jaga langgal pagkulbanan, boꞌ sigām bowana magisun bang buwattingga eꞌna anōngan si Isa ni sigām. 5 Kinōgan sigām toꞌongan ati anganjanjiꞌ sigām anambahan iya maka sīn. 6 Angahoꞌ magtūy si Judas ati anagnaꞌ iya amiha waktu ahāp panōngna ma si Isa ni saga bantana ma halam aniyaꞌ aꞌa saddī mainaꞌan.
Pagsakap ma Hinang Paglakad
7 Manjari taꞌabut na Hinang Tinapay Halam Pasuligna. Ya na inaꞌan llaw panumbaliꞌ anak bili-bili ma Hinang Paglakad. 8 Sinōꞌ eꞌ si Isa si Petros maka si Yahiya, yukna, “Pehēꞌ kam magsakap ai-ai pagkakantam ma Hinang Paglakad.”
9 Yuk sigā ma iya, “Tuwan, maingga kabayaꞌannu panakapan kami?”
10 Yukna ni sigā, “Makasōd paꞌin kam ni deyom daꞌira ilu, sinampang du kam eꞌ dakayuꞌ lꞌlla amowa kibut isihan boheꞌ. Turulunbi iya ni lumaꞌ pasōranna, 11 ati yukbi ma tag-dapu lumaꞌ, ‘Sinōꞌ ka tinilaw eꞌ guru bang maꞌai konoꞌ bilik pagtimukanna maka saga mulidna?’ 12 Jari pinaꞌndaꞌan du kam bilik aluha ma diyataꞌ angkap,” yuk si Isa. “Panyap asal bilik inān. Mainaꞌan kam magsakap pagkakantam.”
13 Jari pehēꞌ na sigā. Taꞌndaꞌ eꞌ sigā mahēꞌ buwat bay pangahaka si Isa, ati sinakap eꞌ sigā pagkakan ma Hinang Paglakad.
Jamuhan Pangentoman ma Panghūꞌ Isa
14 Taꞌabut paꞌin waktu pagjamu, aningkōꞌ na si Isa maka saga aꞌa bay kawakilanna boꞌ sigām magkakan. 15 Ahꞌlling iya ni sigām, yukna, “Ya itu kabayaꞌanku toꞌongan, subay magsalu maka kaꞌam amangan ma Hinang Paglakad itu, ma mbal lagiꞌ aku makalabay kabinasahan. 16 Sabab hakaꞌanta kam, puwas itu mbal na aku amangan jamu itu pabīng, subay na asampulnaꞌ pagparinta Tuhan.”
17 Manjari niāꞌ eꞌ si Isa dakayuꞌ sawan. Niamuꞌan eꞌna pagsukulan boꞌ yampa ahꞌlling ni sigām, yukna, “Sambutunbi inuman itu boꞌ inumunbi dangan maka dangan. 18 Sabab hakaꞌanta kam, puwas minnitu mbal na aku anginum binu-anggul itu satꞌggol halam giꞌ patꞌnnaꞌ pagparinta Tuhan ma manusiyaꞌ.”
19 Puwas eꞌ niāꞌ eꞌna tinapay. Niamuꞌan eꞌna pagsukulan boꞌ yampa pagpōng-pōngna ati pamuwanna ma saga mulidna. “Tinapay itu baranku koꞌ, ya pamalillaꞌku ma pasalbi. Hinangunbi itu pangentomanbi aku.” 20 Damikiyanna isab, pagubus sigām amangan, pamuwan eꞌna inuman ma sigām. “Inuman itu,” yukna, “taꞌndaꞌ sin kapagsulutan Tuhan maka manusiyaꞌ, ya hinangna bahaꞌu itu. Ati tatuman du pagka pinabuꞌus lahaꞌku ma sababbi.
21 “Sagōꞌ ndaꞌunbi,” yuk si Isa, “ya aꞌa song anōngan aku ni bantaku, itiyaꞌ maitu magsalu maka aku. 22 Sabab aku Anak Manusiyaꞌ itu, amatay du buwat asal panganggantaꞌ Tuhan ma aku. Saguwāꞌ asiya-siya du aꞌa ya anōngan aku ni bantaku.” 23 Jari magtilaw-tilawan di-sigām saga mulid inān bang sai min sigām ya anganiyat anōngan si Isa ni bantana.
Paglugat saga Mulid bang Sai Sigām Alanga
24 Na, maglugat saga mulid inān bang sai ma sigām subay pinalanga. 25 Sagōꞌ yuk si Isa ma sigām, “Maitu ma dunya, saga sultan ma kabangsa-bangsahan magmanda asal ni saga aꞌa ma deyoꞌan sigām. Maka saga nakuraꞌ sigām pagmakōkan bilahi nihulmat eꞌ aꞌa kamemon, in sigām konoꞌ poꞌonan kahāpan ma deyom lahat eꞌ. 26 Sagōꞌ kaꞌam ilu daꞌa subay magbuwattēꞌ. Ya bangsahan toꞌongan ma kaꞌam subay sumaliꞌ bowahanna ni bowahan kasiyalihan. Maka aꞌa pagnakuraꞌan subay sumaliꞌ ni sosohoꞌan. 27 Sai bahāꞌ bangsahan? Aꞌa aningkōꞌ amangan atawa aꞌa magbubuhat kinakan? Ya tantu bangsahan aꞌa aningkōꞌ amangan. Sagōꞌ aku itu, itiyaꞌ ma kaꞌam saliꞌ sosohoꞌanbi.
28 “Kaꞌam ilu bay pataptap ma aku minsan aku ma deyom kasusahan. 29 Manjari itu, pagka aku kabuwanan kapatut eꞌ Mmaꞌku magꞌntan parinta ma sinosōng, pamuwanku isab ma kaꞌam kapatut buwattēꞌ. 30 Magbeyaꞌ du kitam amangan ma deyom pagparintahanku. Patingkōꞌta du kam ma paningkōꞌan bangsahan boꞌ kam angahukum ma sangpūꞌ maka duwa bangsa panubuꞌ si Israꞌil.”
Papata si Isa Pasal Pamalilu si Petros
31 Manjari ahꞌlling si Isa ma si Simun Petros. “Simun!” yukna. “Niamuꞌ ka eꞌ nakuraꞌ saitan boꞌ niayak eꞌna sapantun tirigu. 32 Sagōꞌ bay ka amuꞌanku tabang ni Tuhan, Simun, bang paꞌin mbal apinda pangandolnu ma aku. Taikutannu du aku, sagōꞌ bang ka pabīng ni aku subay ka amatꞌttog iman saga dauranakannu.”
33 Yuk si Petros, “Tuwan Panghūꞌ, mbal ka taikutanku. Bang ka gantaꞌ pinakalabusu, parongan du aku ma kaꞌa. Bang ka pinapatay, lillaꞌ du aku paunung ma kaꞌa.”
34 Yuk sambung si Isa, “Hakaꞌanta ka, Petros, ma sangom itu ma halam giꞌ angukkuꞌuk manuk, amalilu du ka min tꞌllu in aku mbal kataꞌuwannu.”
Pasal Pitaka, Paglutuꞌanan maka Pakokos
35 Ahꞌlling giꞌ si Isa ma saga mulidna, yukna, “Waktu bay kapanohoꞌku kaꞌam palꞌngngan magnasihat ma halam aniyaꞌ pitaka atawa paglutuꞌanan atawa taumpaꞌ tabowabi, aniyaꞌ bahāꞌ bay kulang ma kaꞌam?”
“Halam,” yuk sigām.
36 “Sagōꞌ buwattinaꞌan,” yuk si Isa, “bang aniyaꞌ sīnbi atawa paglutuꞌananbi, bowahunbi na ma palꞌngngananbi. Maka sasuku halam aniyaꞌ patakosna subay pabꞌllihanna badjuꞌna boꞌ aniyaꞌ pamꞌllina kalis. 37 Sabab hakaꞌanta kam, song na maujud lapal Kitab ya bay tasulat ma sabab aku, ya yuk-i, ‘Talapay iya ma saga aꞌa angalanggal saraꞌ.’ ”
38 Yuk saga mulid, “Ndaꞌun, Tuwan, aniyaꞌ maitu duwa kalis.”
“Sarang na koꞌ ilu,” yuk si Isa.
Ma Kabbun Getsemane
39 Jari paluwas si Isa min daꞌira tudju ni būd Jaitun buwat asal kabiyaksahanna, maka ameyaꞌ ma iya saga mulidna. 40 Pagtꞌkkana ni papehēꞌanna, yukna ma sigām, “Angamuꞌ kam tabang ni Tuhan boꞌ kam mbal tabowa eꞌ sasat.”
41 Puwas eꞌ alaꞌan iya min sigām, saga dabantungan lawakna, ati pasujud iya angamuꞌ-ngamuꞌ ni Tuhan. 42 Yukna, “O Mmaꞌ, bang ka bilahi, laꞌanin lagiꞌ min aku sawan kabinasahan itu. Sagōꞌ nggaꞌi ka kabayaꞌanku subay nirūlan, bang paꞌin kabayaꞌannu du.” 43 Manjari aniyaꞌ panyataꞌ ni iya dakayuꞌ malaꞌikat min sulgaꞌ amuwanan iya kosog panandalna. 44 Na, pagka mbal manjari dukkana, akosog gom paꞌin panganjunjungna ni Tuhan ati amꞌttak hulasna ni tanaꞌ, pinaka na luwa lahaꞌ.
45 Aubus paꞌin eꞌna angamuꞌ-ngamuꞌ, anꞌngge iya boꞌ pabalik pehēꞌ ni saga mulidna ati tabākna sigām magtulihan kabowa sukkal sigām. 46 Yuk si Isa ma sigām, “Angay kam atuli? Punduk kam angamuꞌ-ngamuꞌ ni Tuhan boꞌ kam mbal tabowa eꞌ sasat.”
Pagsaggaw ma si Isa
47 Na, hinabu lagiꞌ si Isa ahꞌlling ni saga mulidna, aheka aꞌa atꞌkka pinaꞌan. Ya pameyaꞌan sigām si Judas, dakayuꞌ mulid si Isa min kasangpūꞌ maka duwa heꞌ. Paꞌabut iya magtūy ni si Isa arak aniyum iya. 48 Sagōꞌ ahꞌlling si Isa ma iya, yukna, “Buwattitu bahāꞌ, Judas, pangakkalnu ma Anak Manusiyaꞌ?”
49 Kinataꞌuwan paꞌin eꞌ saga mulid ma atag si Isa bang ai song nihinang ma iya, atilaw sigām, “Tuwan, guna kami na bahāꞌ kalis kami?” 50 Jari nilagut sosohoꞌan Imam Muwallam eꞌ dakayuꞌ mulid inān, ati autas magtūy dambilaꞌ taingana.
51 Sagōꞌ yuk si Isa, “Sarang na koꞌ ilu.” Jari niꞌntanan eꞌna tainga aꞌa heꞌ ati kauliꞌan magtūy.
52 Ahꞌlling si Isa ni saga aꞌa bay pinaꞌan anaggaw iya, ya na saga imam alanga maka saga nakuraꞌ jaga langgal, maka saga pagmattoꞌahan bangsa Yahudi. Yukna ma sigām, “Kabāꞌbi ba in aku itu mundu, ya poꞌon kam amowa kalis maka kakakal? 53 Llaw-llaw mahēꞌ na paꞌin aku ma deyom langgal pagkulbanan, sagōꞌ halam aku bay tasaggawbi. Saguwāꞌ ya na itu waktu pamasukuꞌ kaꞌam boꞌ aku tasaggawbi, maka waktu isab kapagagi nakuraꞌ saitan.”
Kapamalilu si Petros Pasal si Isa
54 Manjari sinaggaw si Isa eꞌ sigām, binowa alaꞌan minnēꞌ tudju ni lumaꞌ Imam Muwallam. Paturul si Petros ma si Isa min katāhan. 55 Aniyaꞌ api bay pinakeyat eꞌ saga sundalu ma halaman lumaꞌ Imam Muwallam ati parakayuꞌ si Petros ni sigām magtingkōꞌan ma atag api heꞌ. 56 Jari itu, sabu paꞌin iya aningkōꞌ ma kasinagan api, taꞌndaꞌ iya eꞌ dakayuꞌ dꞌnda ipatan Imam Muwallam. Pinatongan iya pahāp-hāp eꞌ dꞌnda itu maka eꞌna ahꞌlling, yukna, “Aꞌa itu bay ameyaꞌ ma si Isa.”
57 Sagōꞌ amalilu si Petros, yukna, “Arung, mbal iya kataꞌuwanku!”
58 Mbal atꞌggol minnēꞌ aniyaꞌ dakayuꞌ lꞌlla angꞌndaꞌ ma si Petros ati yukna, “Ya du kaꞌa dambeyaꞌan maka sigām!”
Sagōꞌ ahꞌlling si Petros, yukna, “Nggaꞌi ka aku, tuwan!”
59 Palabay paꞌin danjām aniyaꞌ isab aꞌa saddī angegot-ngegot, yukna, “Kataꞌuwanku aꞌa itu bay du seheꞌna, sabab aꞌa Jalil isab iya!”
60 Anambung si Petros, yukna, “Tuwan, mbal kataꞌuwanku bang ai pahꞌllingnu ilu!”
Hinabu si Petros masi ahꞌlling, magtūy angukkuꞌuk manuk. 61 Jari palingiꞌ si Isa angꞌndaꞌ ma si Petros ati taentom eꞌ si Petros bay pahꞌlling si Isa ma iya, ya yukna, “Ma mbal giꞌ angukkuguꞌuk manuk sangom itu, amalilu du ka min tꞌllu in aku mbal kataꞌuwannu.” 62 Magtūy paluwas si Petros minnēꞌ. Anangis iya, magdukka toꞌongan.
Si Isa Pinagtunggīng maka Pinagtibuꞌ
63 Pinagtunggīngan si Isa eꞌ saga aꞌa anganjagahan iya, maka pinagtibuꞌ iya eꞌ sigām. 64 Tinambunan matana boꞌ yampa nilata. “Tokorun konoꞌ,” yuk sigām, “bang sai anibuꞌ kaꞌa!” 65 Aheka giꞌ isab pamūng-mūng sigām pamahinaꞌ sigām ma iya.
Pinaharap si Isa ni saga Pagnakuraꞌan
66 Pagkꞌllat llaw na, magtimuk saga pagmattoꞌahan bangsa Yahudi maka saga kaimaman alanga maka saga guru saraꞌ agama. Jari binowa si Isa paharap ni palhimpunan sigām. 67 Yuk sigām ma iya, “Hakaꞌin kami toꞌongan bang kaꞌa ya Al-Masi.”
Anambung si Isa, yukna, “Minsan kam hakaꞌanku mbal du aku kahagadbi. 68 Maka bang aniyaꞌ tilawku ma kaꞌam, mbal du kam anambung. 69 Sagōꞌ puwas min llaw itu in aku, Anak Manusiyaꞌ, aningkōꞌ du ma atag Tuhan Sangat Kawasa, ma bihingna kowan.”
70 Yuk sigām kamemon, “Na, bang buwattēꞌ, Anak Tuhan ka bahāꞌ?”
Yuk sambung si Isa, “Ya na yukbi, aku na.”
71 Jari ahꞌlling sigām, yuk-i, “Angay kitam amiha saksiꞌ saddī! Sabab takaleta himumūnganna itu.”