18
Panaggaw ma si Isa
1 Aubus paꞌin eꞌ si Isa angamuꞌ-ngamuꞌ ni Tuhan, alaꞌan iya maka saga mulidna tudju ni dambilaꞌ sapaꞌ Kedron. Aniyaꞌ kabbun kayu jaitun mainaꞌan ati pasōd disi Isa pehēꞌ.
2 Na, kinataꞌuwan eꞌ si Judas bang piꞌingga ya papehēꞌan si Isa sabab araran iya maka saga mulidna bay magtimuk mainaꞌan. Si Judas itu aꞌa song anōngan si Isa ni saga bantana. 3 Jari pinaꞌan si Judas ni kabbun inān angamaliman dambaꞌan sundalu bangsa Rōm maka saga bagꞌllal bay pinabeyaꞌan iya eꞌ saga imam alanga maka saga Parisi. Magtakos sigām maka aniyaꞌ suwariyan maka palitaꞌan binowa eꞌ sigām. 4 Kinataꞌuwan asal eꞌ si Isa kamemon ya song makani-iya, angkan iya pasōng pasampang ni saga aꞌa inān. Yukna ni sigām, “Sai pihabi?”
5 Yuk sigām, “Piha kami si Isa aꞌa Nasaret.”
“Aku na koꞌ itu,” yuk si Isa. Si Judas, ya aꞌa anukbalan si Isa ni saga bantana, inaꞌan anꞌngge maka saga aꞌa inān. 6 Pagpaꞌin si Isa, “Aku na koꞌ itu”, magtūy sigām pasuhut pahantak. 7 Jari atilaw si Isa pabalik, yukna, “Sai pihabi?”
Yuk sambung sigām, “Si Isa, aꞌa min Nasaret.”
8 Jari ahꞌlling si Isa, yukna, “Bay na kam hakaꞌanku, aku na koꞌ. Bang aku ya pihabi, na pasagarinbi saga seheꞌku itu amoleꞌ.” 9 Buwattitu pahꞌllingna boꞌ aniyaꞌ kamaksuran ma bay pangamuꞌ-ngamuꞌna ni Mmaꞌna Tuhan, ya yuk-i, “O Mmaꞌ, halam aniyaꞌ pabutawan minsan dakayuꞌ min saga aꞌa bay pamasukuꞌnu aku.”
10 Magtakos asal si Simun Petros, jari niurusan eꞌna kalisna boꞌ lagutna sosohoꞌan Imam Muwallam inān. Ya tauwaꞌ taingana kowan, autas magtūy. Ōn sosohoꞌan itu si Malkus. 11 Yuk si Isa ni si Petros, “Pabalikun pakokosnu ni tagubanna. Akuhanku du kamemon kabinasahan ilu pamakadal ma aku eꞌ Mmaꞌku.”
12 Manjari sinaggaw si Isa eꞌ saga sundalu maka nakuraꞌ sigām maka saga bagꞌllal Yahudi, ati niengkotan. 13 Binowa iya eꞌ sigām pehēꞌ ni si Annas dahū. Si Annas itu matoꞌa si Kayapas, Imam Muwallam ma tahun inaꞌan. 14 Bay angahūg garaꞌ si Kayapas ma saga nakuraꞌ Yahudi, ya yukna ahāp lagiꞌ bang dakayuꞌ du aꞌa amatay panganggantiꞌ saga aꞌa kamemon.
Kapamalilu si Petros Pasal si Isa
15 Na, paturul ma si Isa si Simun Petros maka mulid dakayuꞌ. Mulid dakayuꞌ itu magkataꞌu asal maka Imam Muwallam, angkan iya makabeyaꞌ ma si Isa sampay pasōd ni deyom halaman lumaꞌ Imam Muwallam heꞌ. 16 Sagōꞌ si Petros iya taꞌbba ma luwasan lawang. Daipara paluwas pabīng mulid si Isa dakayuꞌ heꞌ, boꞌ amaꞌid min dꞌnda anungguꞌan lawang bang paꞌin bowana si Petros pasōd. 17 Tinilaw si Petros eꞌ dꞌnda ma lawang inān, yuk-i, “Bang aku mbal alaung, dakayuꞌ mulid ka ma aꞌa itu.”
Amalilu magtūy si Petros. “Ē, nggaꞌi ka!” yukna.
18 Na, ahaggut sangom inān, angkan saga sosohoꞌan maka saga bagꞌllal bay angandokot api, ati inaꞌan sigām magtꞌnggehan ma sakalibut api magdangkahan. Pinaꞌan isab si Petros patimbul ni sigām.
Si Isa Sinumariya eꞌ Imam Muwallam
19 Manjari si Annas, ya bay Imam Muwallam, amariksaꞌ si Isa ma pasal saga mulidna maka ma pasal pamanduꞌna. 20 Anambung si Isa, yukna, “Bay aku amanduꞌan saga aꞌa kamemon ma mata mairan. Ai-ai pamanduꞌku bay pahꞌllingku ma pagtimukan saga Yahudi, ma deyom kalanggal-langgalan maka ma langgal pagkulbanan. Halam aniyaꞌ bay pamanduꞌku ma kalimbungan aꞌa. 21 Angay aku tilawnu? Tilawun saga aꞌa bay akale ma pamanduꞌku. Tilawun sigām bang ai bay pamanduꞌku. Kinataꞌuwan asal eꞌ sigām.”
22 Pagbissala paꞌin itu eꞌ si Isa, magtūy iya sinampak eꞌ dakayuꞌ jaga bay mainaꞌan, ati yukna ni si Isa, “Halam bahāꞌ aniyaꞌ addatnu anambungan Imam Muwallam buwattilu!”
23 Sinambungan jaga inān eꞌ si Isa, yukna, “Bang hatiꞌ asāꞌ pahꞌllingku ma Imam Muwallam, hakaꞌin saga aꞌa kamemon ma pagsaraꞌan itu bang ai kasāꞌan llingku. Sagōꞌ bang halam aniyaꞌ sāꞌna, angay aku sampaknu?” 24 Puwas eꞌ, ma masi niengkotan si Isa, tinandanan na iya eꞌ si Annas pehēꞌ ni si Kayapas, ya Imam Muwallam.
Amalilu Pabīng si Petros
25 Inaꞌan masi si Simun Petros anꞌngge ma parangkahan. Tinilaw iya eꞌ saga seheꞌna magtꞌnggehan, yuk-i, “Kaꞌa, mulid ka bahāꞌ ma aꞌa inān?”
Amalilu magtūy si Petros. “Nggaꞌi ka,” yukna.
26 Inaꞌan isab dakayuꞌ sosohoꞌan Imam Muwallam, sugsug ni aꞌa bay autas taingana eꞌ si Petros. Yuk sosohoꞌan itu ni si Petros “Nggaꞌi ka kaꞌa bahāꞌ bay taꞌndaꞌku ameyaꞌ ma aꞌa inān hinabuna ma kabbun?”
27 Amalilu si Petros pabīng. “Nggaꞌi ka,” yukna. Magtūy angukkuꞌuk manuk.
Si Isa Binowa Paharap ma Gubnul Pilatu
28 Daiꞌ llaw paꞌin, pininda si Isa min lumaꞌ si Kayapas tudju ni astanaꞌ gubnul bangsa Rōm. Sagōꞌ saga nakuraꞌ Yahudi halam bay pasōd ni deyom astanaꞌ sabab makabatal konoꞌ bang sigām pasōd ni deyom lumaꞌ nggaꞌi ka lumaꞌ Yahudi, ati mbal sigām makajari palamud magjamu ma Hinang Paglakad. 29 Angkan paluwas gubnul Pilatu ni sigām boꞌ atilaw, yukna, “Ai panuntutanbi aꞌa itu?”
30 Yuk sambung sigām, “Mbal du bay tukbalan kami aꞌa itu ni kaꞌa bang halam aniyaꞌ dusana.”
31 “Na,” yuk si Pilatu ni sigām, “kaꞌam na angahukum iya ma buwat kalꞌngnganan saraꞌbi.”
Anambung saga Yahudi, yuk sigām, “Halam aniyaꞌ kapatut kami amatꞌnnaꞌ hukuman ni kamatay minsan ma sai.” 32 Buwattēꞌ kahālanna boꞌ supaya magmaksud bay pahꞌlling si Isa dahū pasal buwattingga kamatayna.
33 Pasōd si Pilatu ni deyom astanaꞌ pabīng ati sohoꞌna si Isa binowa patampal ni iya. Yukna ni si Isa, “Kaꞌa ilu, sultan ka bahāꞌ ma bangsa Yahudi?”
34 Yuk sambung si Isa, “Ya patilawnu itu, min paghonaꞌ-honaꞌnu bahāꞌ, atawa aniyaꞌ aꞌa saddī bay angahakaꞌan kaꞌa ma pasalanku?”
35 Anambung si Pilatu, yukna, “Oy! Pangannalnu aku itu Yahudi bahāꞌ! Saga bangsanu du maka saga nakuraꞌ kaimamanbi ya bay anukbalan kaꞌa piꞌitu ni aku. Angay, ai dusanu?”
36 Anambung si Isa, yukna, “Ya pagsultananku nggaꞌi ka maitu ma dunya. Abila bay maitu ma dunya, bay du angatu saga bebeyaꞌanku boꞌ aku mbal tasaggaw eꞌ saga nakuraꞌ Yahudi. Ahoꞌ, nggaꞌi ka maitu pagsultananku.”
37 Jari tinilaw iya eꞌ si Pilatu, yukna, “Bang buwattilu, sultan ka bahāꞌ?”
Yuk sambung si Isa, “Kaꞌa ya ahꞌlling in aku sultan. Ya na itu sababanna angkan aku nianakan maka angkan aku piꞌitu ni dunya, supaya aku makapamissala ma pasal kasabꞌnnalan. Sasuku ameyaꞌ ma kasabꞌnnalan akale du ma aku.”
38 Yuk si Pilatu, “Ai bahāꞌ in kasabꞌnnalan?”
Si Isa Pinatꞌnnaꞌan Hukuman ni Kamatay
Apuwas paꞌin inaꞌan-i, paluwas si Pilatu pehēꞌ ni saga Yahudi ati yukna ma sigām, “Halam aniyaꞌ tapihaku sababan pangahukumanku aꞌa itu. 39 Sagōꞌ kahabaꞌ waktu paghinang Hinang Paglakad, ya kabiyaksahanbi subay aniyaꞌ dakayuꞌ pilisu paluwasku. Bilahi kam bahāꞌ bang paluwasanku kaꞌam sultan bangsa Yahudi itu?”
40 Magpangolang saga aꞌa inān, yuk-i, “Daꞌa bang aꞌa ilu-i. Si Barabbas ya kabayaꞌan kami.” Na, mundu asal si Barabbas.