15
Si Isa Pinaharap ni Gubnul Pilatu
1 Taꞌabut paꞌin pagkꞌllat llaw, magtūy pasaꞌut saga kaimaman alanga magsakaum maka pagmattoꞌahan maka saga guru saraꞌ agama. Jari magisun sigām maka Tumpukan Maghuhukum kamemon bang inay sigām si Isa. Pagisun paꞌin, niengkotan iya eꞌ sigām boꞌ binowa pehēꞌ, tinukbalan ni si Pilatu. 2 Mahēꞌ paꞌin, atilaw si Pilatu ma si Isa, yukna, “Kaꞌa ilu, sultan ka bahāꞌ ma bangsa Yahudi?”
Anambung si Isa, yukna, “Ya na yuknu ilu.”
3 Na, aheka panuntut saga kaimaman alanga inān ma iya, 4 angkan iya tinilaw pabīng eꞌ si Pilatu, yukna, “Halam aniyaꞌ panambungnu? Ndaꞌun kaheka panuntut sigām itu ma kaꞌa.”
5 Sagōꞌ halam aniyaꞌ sambung si Isa, angkan ainu-inu toꞌongan si Pilatu heꞌ.
Si Isa Pinatꞌnnaꞌan Hukuman ni Kamatay
6 Na, kahabaꞌ tahun, ma waktu paghinang bangsa Yahudi ma Hinang Paglakad, ya kabiyaksahan si Pilatu subay aniyaꞌ dakayuꞌ pilisu palꞌppana, sai-sai pineneꞌ eꞌ saga aꞌa Yahudi. 7 Jari ma waktu inaꞌan aniyaꞌ aꞌa bay takalabusu, ōnna si Barabbas. In iya inān maka saga seheꞌna bay amapatay aꞌa ma waktu panaggaꞌ sigām ma parinta. 8 Sakali itu aheka saga aꞌa paꞌalop ni si Pilatu angamuꞌ pinalꞌppa eꞌna dakayuꞌ pilisu buwat kabiyaksahan kahabaꞌ-kahabaꞌ tahun. 9 Tinilaw sigām eꞌ si Pilatu, yukna, “Bilahi kam bahāꞌ bang palꞌppahanku kaꞌam sultan bangsa Yahudi itu?” 10 Angkan sigām tilawna buwattēꞌ sabab kataꞌuwanna asal bang ai sababanna angkan si Isa bay tinꞌkkahan ni iya. Tuꞌud angihid saga kaimaman ma si Isa.
11 Sagōꞌ baꞌanan aꞌa inān bay pinitnahan asal eꞌ kaimaman eꞌ, sinōꞌ angamuꞌ si Barabbas pinalꞌppa eꞌ si Pilatu, nggaꞌi ka si Isa. 12 Amissala si Pilatu ni sigām pabīng, yukna, “Inayku bahāꞌ aꞌa itu, ya ōnanbi sultan bangsa Yahudi?”
13 Angolang sigām pakosog, yuk-i, “Lansangun iya ni hāg!”
14 “Angay?” yuk si Pilatu. “Ai bay hinangna alaꞌat?”
Luhūy pakosog pangolang sigām eꞌ, yuk-i, “Lansangun iya ni hāg!”
15 Na, bilahi si Pilatu amarūl saga aꞌa magtimukan eꞌ, angkan palꞌppana si Barabbas ni sigām. Boꞌ arapun in si Isa tinukbalan ni saga sundalu, sinōꞌ niraplosan boꞌ pinalansang ni hāg pinapatay.
Si Isa Pinagtunggīngan eꞌ saga Sundalu
16 Manjari binowa na si Isa eꞌ saga sundalu pehēꞌ ni halaman astanaꞌ ati nilinganan patimuk pehēꞌ dambaꞌan sundalu inān kamemon. 17 Pinajubahan si Isa sꞌmmek taluk pinaka luwa pakayan sultan. Nilangbid isab bahan itingan eꞌ sigām, nihinang saliꞌ panumping sultan pinatꞌnnaꞌ ni kōkna. 18 Jari anagnaꞌ sigām magbauꞌ-bauꞌ magaddat ma iya. Yuk sigām, “Mahaldikaꞌ! Mahaldikaꞌ! Sultan Yahudi!” 19 Pinagpꞌppok kōkna eꞌ sigām maka tungkud, maka niludjaꞌan iya. Angōk-tuꞌut sigām pagmahaltabat sigām ma iya. 20 Na, aubus paꞌin eꞌ sigām magtunggīng inān, niurusan eꞌ sigām sꞌmmek taluk bay pajubana boꞌ yampa iya pinasꞌmmekan bay sꞌmmekna tagnaꞌ. Puwas eꞌ binowa iya paluwas minnēꞌ boꞌ nilansang ni hāg pamapatayan iya.
Si Isa Nilansang ni Hāg
21 Manjari aniyaꞌ aꞌa palabay minnaꞌan, ōnna si Simun, bay min deya. Si Simun itu mmaꞌ si Iskandar maka si Rupus, aꞌa iya min lahat Kirini. Jari minandahan iya eꞌ saga sundalu, sinōꞌ ananggung hāg ya song pangalansangan si Isa. 22 Binowa iya patukad ni jadjahan lahat niōnan Golgota, hatina lahat Peyaꞌ-peyaꞌ Kōk. 23 Mahēꞌ paꞌin, aniyaꞌ arak pamainum saga sundalu ma si Isa binu-anggul kalamuran tambal niōnan mira, sagōꞌ halam taimaꞌna. 24 Puwas eꞌ nilansang iya ni hāg eꞌ saga sundalu, boꞌ yampa pinatꞌngge hāgna. Pinagbahagiꞌan eꞌ sigām saga sꞌmmekna, pinagkoꞌot-koꞌotan boꞌ kinataꞌuwan bang sꞌmmek ingga ma sigām dangan maka dangan. 25 Ya waktu kapangalansang sigām ma si Isa saga lisag siyam subu. 26 Buwattitu in sulat bay pinatꞌnnaꞌ panuntut iya, yuk-i: “SULTAN BANGSA YAHUDI.” 27 Aniyaꞌ isab duwangan mundu bay pinasambeyaꞌ ma si Isa nilansang ma hāg sigā. Dakayuꞌ hāg inān bay pinatꞌngge ma bihing si Isa kowan, dakayuꞌ ma bihingna gibang. 28 (Minnēꞌ aniyaꞌ kamaksuran ma bay tasulat ma deyom Kitab, ya yuk-i, “Talapay iya ma saga aꞌa langgal saraꞌ.”)
29 Na, pinaggunyak-gunyak si Isa eꞌ aꞌa maglaulabay. Pinaghanduk-handukan iya eꞌ sigām pangudjuꞌ. “Nē!” yuk sigām. “Kaꞌa na ya arak angalangkat langgal pagkulbanan inān ati pabangunnu konoꞌ pabīng ma deyom tꞌllungꞌllaw! 30 Pareyoꞌ ka min hāg ilu boꞌ ka angalappasan di-nu!”
31 Ya du magpangudjuꞌ saga imam alanga maka saga guru saraꞌ agama. Yuk suli-suli sigām ma pasalna, “Aꞌa itu ataꞌu angalappas ma aꞌa saddī sagōꞌ mbal makalappasan di-na! 32 Al-Masi konoꞌ iya, sultan bangsa Israꞌil. Subay iya pareyoꞌan di-na min hāg inān. Bang iya taꞌndaꞌtam pareyoꞌ, amꞌnnal kitam ma iya!”
Ya du duwangan aꞌa bay nilansang ni hāg pinasambeyaꞌ ma si Isa, ameyaꞌ-meyaꞌ isab angudjuꞌ iya.
Kamatay si Isa
33 Jari itu, augtu paꞌin llaw, taluwaꞌ lendom kaluhaꞌan lahat eꞌ sampay ni lisag tꞌllu kohap. 34 Paglisag tꞌllu, akosog eꞌ si Isa angalingan, yukna, “Eloi, Eloi, lama sabaktani?” Hatina, “Tuhanku, O Tuhanku, angay aku pasagarannu?”
35 Pagkale itu eꞌ saga aꞌa magtꞌnggehan mainaꞌan, yuk sigām kaseheꞌ, “Pakale kam. Angalinganan iya nabi Elija.” 36 Magtūy aniyaꞌ dakayuꞌ aꞌa paraiꞌ-daiꞌ angꞌggoman lꞌppus ni deyom binu alꞌssom. Puwas eꞌ pinasagnat eꞌna ni tōng kayu-kayu boꞌ yampa sōnganna ni si Isa pamasꞌssopna ma iya. Yuk aꞌa-i, “Angagad giꞌ kam. Ndaꞌta lagiꞌ bang patuwaꞌ si Elija amareyoꞌ iya min hāg.”
37 Sakali angolang si Isa min tꞌdda, magtūy abꞌkkat napasna.
38 Saruꞌun-duꞌun du in kultina bay pangagpang ma deyom langgal pagkulbanan inān ageseꞌ duwa min diyataꞌna tudju pareyoꞌ. 39 Taꞌndaꞌ paꞌin eꞌ kapitan ya paharap ma hāg inān bang buwattingga kabꞌkkat napas si Isa, anibahat iya, yukna, “Bꞌnnal aꞌa itu Anak Tuhan!”
40 Aniyaꞌ isab mainaꞌan saga dꞌnda magpangꞌndaꞌ min katāhan. Inaꞌan ma sigām disi Mariyam min Magdala maka si Salome, inaꞌan isab si Mariyam inaꞌ si Joses maka Yakub dakayuꞌ, ya abataꞌ giꞌ. 41 Saga dꞌnda itu bay ameyaꞌ paumpig ma si Isa angussap iya waktu kamahēꞌna lagiꞌ ma lahat Jalil. Aheka isab saga dꞌnda saddī mainaꞌan, aꞌa bay ameyaꞌ ma iya tudju ni Awrusalam.
Pagkubul ma si Isa
42 Llaw Pagsakap koꞌ inān, hatina dangꞌllaw dahū min llaw Sabtuꞌ. Jari itu, pagkohap paꞌin ma llaw inān, 43 atꞌkka pinaꞌan si Yusup aꞌa min kauman Arimati. Dakayuꞌ iya pagmattoꞌahan ma Tumpukan Maghuhukum, aꞌa abantug. Atuyuꞌ asal iya angalagaran waktu pamatꞌnnaꞌ kapagparinta Tuhan. Sakali anawakkal iya paꞌalop ni si Pilatu angamuꞌ mayat si Isa. 44 Ainu-inu si Pilatu pagka takalena amatay na si Isa. Nilinganan eꞌna kapitan, ya bay mahēꞌ, ati tilawna bang bꞌnnal amatay na. 45 Pagkale si Pilatu ma lapal kapitan in si Isa amatay na, patugutanna si Yusup angāꞌ mayatna. 46 Amꞌlli si Yusup kakanaꞌ panaput ati pinareyoꞌ eꞌna mayat si Isa min diyataꞌ hāg boꞌ yampa sinaput eꞌna. Puwas eꞌ pinatꞌnnaꞌ eꞌna ma deyom pagkubulan bay kinehean ma deyom batu lakit ati ginulungan eꞌna batu ya panaplok bowaꞌ lowang eꞌ. 47 Inaꞌan angꞌndaꞌ-ngꞌndaꞌ si Mariyam min Magdala maka si Mariyam inaꞌ si Joses, ati tapandoga eꞌ sigā bang maingga pangubulan si Isa.