14
Pinagisunan si Isa
1 Na, duwangꞌllaw giꞌ boꞌ Hinang Paglakad maka Hinang Tinapay Halam Pasuligna. Manjari saga kaimaman alanga maka saga guru saraꞌ agama magisun na paꞌin bang buwattingga eꞌ sigām anaggaw si Isa ma halam aniyaꞌ makataꞌu, boꞌ supaya iya pinapatay. 2 “Daꞌa pasaltaꞌta ma pagjamu,” yuk sigām, “boꞌ mbal ahiluhalaꞌ saga aꞌa kamemon.”
Si Isa Binusugan Nsꞌllan Pahamut
3 Na, inaꞌan si Isa ma Betani, ma lumaꞌ si Simun aꞌa bay niꞌipul. Ma pagkakanan paꞌin si Isa, aniyaꞌ pinaꞌan ni iya dakayuꞌ dꞌnda amowa bingkiꞌ-bingkiꞌ nihinang min batu poteꞌ, isihan nsꞌllan pahamut. Nsꞌllan itu nsꞌllan narda halam aniyaꞌ lamudna, landuꞌ ahalgaꞌ. Jari pinateꞌ eꞌ dꞌnda kꞌllong bingkiꞌ-bingkiꞌ ati binusugan kōk si Isa maka nsꞌllanna. 4 Aniyaꞌ mainaꞌan saga aꞌa magdugal kabowa kagit atay sigām. Magbissala sigām dangan-parangan, yuk-i, “Angay nsꞌllan ahalgaꞌ itu pinakaꞌat? 5 Arapun pinabꞌllihan labi tꞌllu hatus pilak ati bꞌllihanna inān pamuwan ni kamiskinan.” Jari sinoway sidda eꞌ sigām dꞌnda bay amusug nsꞌllan eꞌ.
6 Sagōꞌ ahꞌlling si Isa, yukna, “Pasagarinbi na iya. Angay iya sasawbi? Ahāp sidda hinangna ma aku itu. 7 Sabab paddas na paꞌin aniyaꞌ aꞌa miskin ma kaꞌam. Makatabang du kam ma sigām bang sumiyan-sumiyan kabayaꞌanbi. Saguwāꞌ aku itu mbal du paddas ma kaꞌam. 8 Dꞌnda itu bay makahinang ya takoleꞌna, hatina buꞌusanna nsꞌllan pahamut ni baranku pangawal llaw pagkubul ma aku. 9 Bꞌnnal ya pahꞌllingku itu ma kaꞌam,” yuk si Isa, “piꞌingga-piꞌingga lahat pagnasihatan lapal ahāp ma kaluhaꞌan dunya, kinissa du pasal bay hinang dꞌnda itu pangentoman ma iya.”
Panipu si Judas Iskariyut ma si Isa
10 Puwas paꞌin inaꞌan, si Judas Iskariyut, dakayuꞌ mulid si Isa min kasangpūꞌ maka duwa, bay pehēꞌ ni kaimaman alanga magisun anōngan si Isa ni sigām. 11 Pagkale sigām bang ai gawi si Judas itu, magtūy sigām kinōgan ati anganjanjiꞌ sigām anambahan iya maka sīn. Pagubus, amiha iya waktu ahāp panōngna si Isa ni sigām.
Pagsakap ma Hinang Paglakad
12 Na, taꞌabut tagnaꞌan llaw paghinang saga Yahudi ma Hinang Tinapay Halam Pasuligna. Ya na inaꞌan llaw panumbaliꞌ saga anak bili-bili ya kinakan eꞌ sigām pangentoman waktu bay kapangalappas Tuhan ma kaꞌmboꞌ-mboꞌan sigām. Tinilaw si Isa eꞌ saga mulidna, yuk-i, “Maingga kabayaꞌannu panakapan kami pagjamuhannu ma Hinang Paglakad?”
13 Jari sinohoꞌ eꞌ si Isa duwangan mulidna, yukna, “Pehēꞌ kam ni deyom daꞌira inān. Sinampang du kam eꞌ dakayuꞌ lꞌlla amowa kibut isihan boheꞌ. Turulunbi iya 14 sampay iya pasōd na ni deyom lumaꞌ. Amissala kam isab ni tag-dapu lumaꞌ ya pasōranna, yukbi, ‘Sinōꞌ ka tinilaw eꞌ Guru bang maingga bilik pagjamuhanna maka saga mulidna ma Hinang Paglakad?’ 15 Jari pinaꞌndaꞌan du kam bilik aluha ma diyataꞌ angkap,” yuk si Isa. “Panyap asal bilik inān ati mainaꞌan kam magsakap kinakantam.”
16 Na, pehēꞌ duwangan mulid eꞌ ni deyom daꞌira. Taꞌndaꞌ eꞌ sigā mahēꞌ buwat bay pamissala ma sigā eꞌ si Isa, ati sinakap eꞌ sigā kinakan ma Hinang Paglakad.
17 Taꞌabut paꞌin abay kohap magbeyaꞌ si Isa maka mulidna kasangpūꞌ maka duwa pinaꞌan ni lumaꞌ pagsakapan kinakan eꞌ. 18 Jari itu, hinabu sigām amangan, amissala si Isa ni sigām, yukna, “Bꞌnnal ya pamissalaku itu ma kaꞌam, aniyaꞌ dangan min kaꞌam magbantu anōngan aku ni bantaku. Itiyaꞌ iya maitu magsalu maka aku.”
19 Magtūy katꞌkkahan susa saga mulid eꞌ ati atilaw sigām ma si Isa magsunuꞌ-sunuꞌ. Yuk-i, “Nggaꞌi ka bahāꞌ aku?”
20 Yuk sambung si Isa, “Aꞌa du min kaꞌam kasangpūꞌ maka duwa, seheꞌku magsalu anꞌnnoꞌan tinapayna ni deyom pinggan itu. 21 Aku itu, Anak Manusiyaꞌ,” yuk si Isa, “amatay du buwat bay tasulat ma pasalanku ma deyom Kitab. Saguwāꞌ siya-siya du aꞌa ya anōngan Anak Manusiyaꞌ ni bantana. Ahāp lagiꞌ aꞌa inān halam bay nianakan.”
Jamuhan Pangentoman ma Panghūꞌ Isa
22 Sabu sigām masi amangan, niāꞌ tinapay eꞌ si Isa. Niamuꞌan eꞌna pagsukulan boꞌ yampa pinagpōng-pōng eꞌna ati pamuwanna ma saga mulidna. “Sambutunbi,” yukna, “sabab tinapay itu baranku koꞌ.”
23 Niāꞌ isab eꞌna dakayuꞌ sawan ati niamuꞌan eꞌna isab pagsukulan boꞌ yampa sōnganna ni sigām panginuman sigām kamemon. 24 Yukna, “Lahaꞌku koꞌ itu, tandaꞌ sin kapagsulutan Tuhan maka manusiyaꞌ. Lahaꞌku song pinabuꞌus ma sababan aꞌa aheka, supaya sigām kalappasan. 25 Bꞌnnal ya pangahakaku itu ma kaꞌam, puwas itu mbal na aku anginum binu-anggul itu pabīng. Subay aku ma deyom pagparintahan Tuhan na boꞌ yampa aku anginum binu-anggul pabalik.”
26 Puwas eꞌ, aubus paꞌin eꞌ sigām bay angalang dakayuꞌ kalangan pamudji Tuhan, paluwas na sigām minnēꞌ tudju ni būd Kayu Jaitun.
Papata si Isa Pasal Pamalilu si Petros
27 Manjari ahꞌlling si Isa ni sigām, yukna, “Alahi du kam kamemon angꞌbba min aku sabab tasulat koꞌ inān ma deyom Kitab, ya yuk-i,
‘Bonoꞌku,’ yuk Tuhan, ‘aꞌa bay angupiksaꞌ bili-bili
ati akaukanat saga bili-bili bay daumpigan.’
28 Sagōꞌ bang aku tapakallum na pabīng min kamatayku, parahū du aku min kaꞌam tudju ni lahat Jalil.”
29 Ahꞌlling si Petros ni iya, yukna, “Mbal toꞌongan ka bbahanku minsan ka niꞌbbahan eꞌ kaseheꞌan itu.”
30 Yuk si Isa, “Hakaꞌanta ka toꞌongan, ma sangom itu, ma halam giꞌ kaminduwa pangukkuꞌuk manuk, amalilu du ka min tꞌllu in aku mbal kataꞌuwannu.”
31 Gom paꞌin akosog eꞌ si Petros ahꞌlling, yukna, “Minsan aku paunung amatay ma kaꞌa mbal du ka paliluhanku.” Ya du saga mulid kaseheꞌan, buwattēꞌ isab pahꞌlling sigām.
Ma Kabbun Getsemane
32 Manjari palanjal giꞌ sigām ni kabbun niōnan Getsemane ati yuk si Isa ni saga mulidna, “Maitu giꞌ kam aningkōꞌ. Pinaꞌan lagiꞌ aku anabbut ni Tuhan.” 33 Ya binowa eꞌ si Isa seheꞌna pinaꞌan si Petros, si Yakub maka si Yahiya. Sakali magkasusahan iya, magkꞌbba-kꞌbba atayna. 34 Yukna ni tꞌllungan mulidna heꞌ, “Aku itu agon magkamamatay ma sabab kasusahan itu. Angagad kam maitu magjaga.”
35 Makalawak-lawak paꞌin iya min sigām, pahantak iya ni tanaꞌ maka eꞌna anabbut ni Tuhan. Ya niamuꞌ eꞌna bang makajari, mbal na iya pinatꞌkkahan kabinasahan ya song taꞌabutna. 36 “Arōy, Mmaꞌ!” yukna. “Bang makajari laꞌanin lagiꞌ min aku sawan kabinasahan itu. Sagōꞌ nggaꞌi ka kabayaꞌanku subay nirūlan, bang paꞌin min kabayaꞌannu.”
37 Puwas eꞌ pabīng si Isa ni saga mulidna tꞌllungan ati tabākna sigām magtulihan. Yukna ni si Petros, “O Simun, atuli ka? Mbal ka bahāꞌ makatatas anganjaga minsan laꞌa hal danjām? 38 Pajaga kam. Angamuꞌ kam tabang ni Tuhan boꞌ kam mbal tabowa-bowa eꞌ sasat. Lillaꞌ deyom ataybi sagōꞌ abuhat pamarananbi.”
39 Sakali pehēꞌ si Isa ni baina anabbut ni Tuhan pabīng buwat bay panabbutna dahū. 40 Makabalik paꞌin iya ni disi Petros tabākna isab sigām magtulihan pabīng sabab kinaruꞌ sidda. Mbal kinataꞌuwan eꞌ sigām bang ai panambung sigām ma si Isa.
41 Pagbalik si Isa kamintꞌlluna, yukna ni sigām, “Oy, atuli giꞌ kam? Pahali-hali giꞌ kam? Sarang na koꞌ ilu. Taꞌabut na waktu. Aku, Anak Manusiyaꞌ itu, song na tinukbalan ni pangꞌntanan saga aꞌa alaꞌat. 42 Pabungkal na kam! Sūng na kitam sabab ilu na aꞌa ya anōngan aku ni sigām.”
Pagsaggaw ma si Isa
43 Na, hinabu si Isa ahꞌlling giꞌ ni saga mulidna, magtūy atꞌkka pinaꞌan si Judas, dakayuꞌ mulid si Isa min kasangpūꞌ maka duwa. Aheka aꞌa magbeyaꞌ maka iya magpamowa takos maka saga kakakal. Saga aꞌa inān bay sinōꞌ pinaꞌan eꞌ saga kaimaman alanga sampay eꞌ saga guru saraꞌ agama maka saga pagmattoꞌahan.
44 Aniyaꞌ asal pandoga bay pamuwan si Judas ma saga aꞌa heꞌ. Bay yukna ma sigām, “Ya aꞌa siyumku, ya na heꞌ saggawbi. Bowahunbi iya pehēꞌ maka jagahinbi iya pahāp.” 45 Pagtꞌkka si Judas pinaꞌan, magtūy iya paꞌabut ni si Isa. “Tuwan Guru,” yukna. Jari siyumna. 46 Sinaggaw si Isa eꞌ saga aꞌa inān, binalutan pahogot. 47 Sagōꞌ aniyaꞌ dakayuꞌ min saga aꞌa magtꞌnggehan mainaꞌan angahurusan patakosna. Nilagut eꞌna dakayuꞌ sosohoꞌan Imam Muwallam ati autas dambilaꞌ taingana.
48 Ahꞌlling si Isa ni saga aꞌa bay anaggaw iya, yukna, “Kabāꞌbi bahāꞌ in aku itu mundu, ya poꞌon kam subay amowa takos maka kakakal panaggawbi aku? 49 Llaw-llaw aku bay amanduꞌ ma deyom langgal pagkulbanan eꞌ. Mahēꞌ aku ma kaꞌam boꞌ halam aku bay saggawbi. Sagōꞌ ai-ai bay tasulat ma deyom Kitab subay aniyaꞌ kamaksuranna.” 50 Manjari maglahian saga mulid si Isa kamemon ati pinasagaran iya mainaꞌan.
51 Aniyaꞌ isab mainaꞌan dakayuꞌ subul paturul ma si Isa. Luwal hōs ya pasꞌmmekna. Na, arak iya sinaggaw eꞌ sigām, 52 sagōꞌ niꞌbbahan eꞌna hōsna ati alahi iya magpanantang.
Si Isa Pinaharap ni Tumpukan Maghuhukum
53 Manjari itu binowa si Isa eꞌ sigām ni lumaꞌ Imam Muwallam. Inaꞌan magsakaum saga kaimaman alanga kamemon maka saga pagmattoꞌahan maka saga guru saraꞌ agama. 54 Bay paturul isab si Petros ma si Isa sagōꞌ min katahan. Paturul iya sampay pasōd na ni deyom halaman lumaꞌ Imam Muwallam ati mainaꞌan iya magtingkōꞌan maka saga jaga imam eꞌ, parangka ma bihing api.
55 Ya kaimaman alanga maka kamemon saga aꞌa ma Tumpukan Maghuhukuma amiha sababan panuntut sigām ma si Isa boꞌ supaya iya pinatꞌnnaꞌan hukuman ni kamatay. Saguwāꞌ halam aniyaꞌ panuntutan tabāk eꞌ sigām. 56 Aheka magsaksiꞌ puting bahasa iya katuntutan sagōꞌ mbal maguyun saksiꞌ sigām.
57 Aniyaꞌ aꞌa kaseheꞌ bay anꞌngge amuwan saksiꞌ itu panuntut sigām ma si Isa boꞌ paꞌin putingan. 58 Yuk-i, “Bay takale kami aꞌa itu angupama in iya angalubu langgal pagkulbanan ya hinangan tangan manusiyaꞌ inān. Ma deyom tꞌllungꞌllaw konoꞌ amatꞌngge iya langgal saddī, sagōꞌ nggaꞌi ka manusiyaꞌ ya angahinang iya.” 59 Malaingkan minsan buwattēꞌ panaksiꞌ sigām mbal du maguyun bissala sigām.
60 Manjari anꞌngge Imam Muwallam ma tꞌngngaꞌ sigām atilaw ma si Isa. Yukna, “Kaꞌa ilu, halam bahāꞌ aniyaꞌ pangandaꞌawanu ma panuntutan kaꞌa itu?”
61 Saguwāꞌ halam ahꞌlling si Isa, halam iya anambung. Amissala pabīng Imam Muwallam, yukna, “Kaꞌa bahāꞌ Al-Masi, Anak Tuhan?”
62 “Ahoꞌ, aku na,” yuk si Isa. “Ati taꞌndaꞌbi du aku, Anak Manusiyaꞌ itu, aningkōꞌ ma bihing Sangat Kawasa, tampal ni kowan. Maka taꞌndaꞌbi du aku piꞌitu ameyaꞌ ma gabun min deyom sulgaꞌ.”
63 Manjari gineseꞌ eꞌ Imam Muwallam jubana kabowa astolna. Yukna, “Mbal na kitam amiha saksiꞌ saddī! 64 Takalebi na llingna pangkal ni Tuhan! Ai pangahukumbi?” Sakali dauyunan na pangahukum sigām kamemon, in si Isa patut subay pinapatay.
65 Jari aniyaꞌ sigām kaseheꞌan anagnaꞌ angaludjaꞌan si Isa. Tinambunan isab matana eꞌ sigām boꞌ yampa pinagtibuꞌ. Yuk sigām ma iya, “Tokorun konoꞌ bang sai anibuꞌ kaꞌa!” Jari binowa si Isa eꞌ saga jaga inān boꞌ binutug.
Kapamalilu si Petros Pasal si Isa
66 Na, ma halaman lumaꞌ paꞌin si Petros, aniyaꞌ palabay minnaꞌan dakayuꞌ dꞌnda sosohoꞌan Imam Muwallam. 67 Pagꞌndaꞌna ma si Petros parangka ma api, magtūy ndaꞌna pahāp ati yukna, “Kaꞌa ilu, bay ameyaꞌ ma si Isa, ya aꞌa Nasaret inān!”
68 Sagōꞌ amalilu magtūy si Petros. “Mbal kataꞌuwanku,” yukna. “Mbal tahatiku bang ai pahꞌllingnu ilu.” Ati alaꞌan iya minnēꞌ tudju ni bowaꞌ lawang ya paluwasan min halaman eꞌ. Jari angukkuꞌuk manuk.
69 Taꞌndaꞌ na iya pabīng eꞌ sosohoꞌan dꞌnda heꞌ ati ahꞌlling iya ni saga aꞌa magtꞌnggehan mainaꞌan. Niꞌisaban eꞌna bay pahꞌllingna tagnaꞌ. “Aꞌa ilu,” yukna, “bay seheꞌ sigām.” 70 Sagōꞌ amalilu na isab si Petros.
Mbal atꞌggol, ahꞌlling ni si Petros saga aꞌa magtꞌnggehan mainaꞌan. Yuk sigām, “Kataꞌuwan kami in kaꞌa bꞌnnal bay seheꞌ disi Isa sabab aꞌa Jalil du ka isab!”
71 Sakali anuknaꞌan di-na si Petros ati yukna, “Mbal kataꞌuwanku aꞌa pagbissalabi ilu!”
72 Saruꞌun-duꞌun du angukkuꞌuk manuk, kaminduwana na, ati taentom eꞌ si Petros ya bay lling si Isa ma iya, ya bay yukna, “Ma mbal giꞌ angukkuꞌuk manuk min duwa, amalilu du ka min tꞌllu in aku mbal kataꞌuwannu.” Pagentom itu eꞌ si Petros, magtūy iya anangis, magdukka toꞌongan.