12
Si Isa Binuꞌusan Nsꞌllan Pahamut
1 Nnom llaw laꞌa boꞌ Hinang Paglakad, atꞌkka si Isa ni Betani, kalumaꞌan si Lasarus ya aꞌa bay pakallumna min kamatayna. 2 Mahēꞌ paꞌin si Isa, sinakapan iya kinakan eꞌ saga aꞌa mahēꞌ pagmahaltabat sigām ma iya. Si Marta anabang magbowa bubuhatan, ati si Lasarus maka aꞌa kaseheꞌan inaꞌan dangkakanan maka si Isa. 3 Manjari itu ningāꞌ eꞌ si Mariyam tongaꞌ kilu nsꞌllan pahamut, ōnna narda. Nsꞌllan itu halam aniyaꞌ lamud-lamudna, ahalgaꞌ sidda. Binuꞌusan eꞌ si Mariyam nsꞌllan pahamut itu ni tapeꞌ si Isa boꞌ sapuhanna maka buꞌunna. Asaplag deyom lumaꞌ eꞌ hamut nsꞌllan eꞌ.
4 Manjari anuꞌal si Judas Iskariyut, dakayuꞌ mulid si Isa. Ya na koꞌ itu aꞌa song anukbalan si Isa ni saga bantana. 5 “Oy!” yuk si Judas. “Arapun pahamut ilu pinabꞌllihan ati bꞌllihanna pamuwan ma saga aꞌa miskin. Halgaꞌna ilu saliꞌ gadji dantahun.” 6 Buwattēꞌ bissala si Judas inān ma sabab pilliyu iya, nggaꞌi ka ma sabab lasana ma saga miskin. Bay pangandol ma iya sīn kamuliran inān, boꞌ paꞌin anangpas iya angāꞌ sīn minnēꞌ.
7 Manjari yuk si Isa, “Pasagarin dꞌnda itu. Tuꞌud pangawal eꞌna ma llaw kapangubul aku. 8 Aniyaꞌ na paꞌin kamiskinan tabangbi, sagōꞌ aku itu mbal taptap ma kaꞌam.”
9 Pasaltaꞌ aheka aꞌa makataꞌu in si Isa inaꞌan ma Betani, angkan sigām pinaꞌan. Nggaꞌi ka hal si Isa ya sababanna, tuꞌud sigām bilahi angꞌndaꞌ si Lasarus, ya bay pinakallum eꞌ si Isa. 10 Angkan magisun saga imam alanga amapatay isab si Lasarus. 11 Buwattēꞌ pagisun sigām, sabab min si Lasarus angkan aheka saga Yahudi papinda angandol na ma si Isa.
Pagmahaldikaꞌ ma si Isa Pagsōdna ni Awrusalam
12 Pagkꞌllat llaw dakayuꞌ, takale eꞌ baꞌanan aꞌa magtimukan ma Hinang Paglakad in si Isa ilu ma labayan tudju ni Awrusalam. 13 Jari itu anagpeꞌ sigām saga engas-engas dahunan ati paluwas sigām pehēꞌ anampang si Isa. Angalingan sigām pakosog, yuk sigām,
“Mahaldikaꞌ!
Bang paꞌin binarakatan ya kawakilan eꞌ Tuhan piꞌitu!
Bang paꞌin binarakatan sultan bangsa Israꞌil!”
14 Aniyaꞌ dakayuꞌ anak kuraꞌ bay tabāk eꞌ si Isa panguraꞌanna, buwat tasulat asal ma deyom Kitab, ya yuk-i,
15 “Kaꞌam saga aꞌa Awrusalam, daꞌa kam tināw.
Iluꞌun sultanbi anguraꞌ ma anak kuraꞌ.”
16 Ma waktu inaꞌan-i halam tahati eꞌ saga mulidna bang ai paniyaꞌ itu. Sagōꞌ pagpoleꞌ si Isa ni sulgaꞌ, yampa taentom eꞌ sigām in pakaradjaꞌan itu bay asal tasulat ma deyom Kitab. Maka taentom eꞌ sigām bay hinang sigām inān ma iya.
17 Pinasaplag na paꞌin suli-suli pasal si Isa eꞌ kahekaꞌan aꞌa bay makasabu ma iya waktu kapangalinganna ma si Lasarus paluwas min kubul, maka kapamakallumna ma iya. 18 Angkan aheka paluwas min daꞌira boꞌ anampang si Isa ma labayan, sabab takale eꞌ sigām pasal hinang si Isa makainu-inu inān. 19 Sakali maghimumūngan saga Parisi, yuk-i, “Ndaꞌunbi! Ameyaꞌ na ma iya saga aꞌa kamemon. Halam aniyaꞌ dapattam!”
Amissala si Isa Pasal Kamatayna
20 Aniyaꞌ saga aꞌa bangsa Girīk bay magdongan pinaꞌan ni Awrusalam boꞌ anambahayang ma waktu Paghinang inān. 21 Pehēꞌ sigām itu ahꞌlling ni si Pilip, yuk-i, “Tuwan, bilahi kami magꞌndaꞌ maka si Isa.” Si Pilip itu dakayuꞌ mulid si Isa, aꞌa min kauman Betsaida mahēꞌ ma lahat Jalil. 22 Pehēꞌ si Pilip angahakaꞌan si Andariyas ati pehēꞌ sigā karuwangan angahakaꞌan si Isa.
23 Anambung si Isa yukna, “Asekot na waktuku. Araiꞌ na aku, in Anak Manusiyaꞌ, pinabangsa toꞌongan. 24 Bꞌnnal ya panapantunku itu ma kaꞌam, in dansolag bigi-tinanoma taptap na paꞌin dansolag satꞌggol mbal tinanom ni tanaꞌ. Ma tanaꞌ paꞌin, pahansul boꞌ patomoꞌ, ati boꞌ amuwan buwaꞌ paheka. 25 Sapantun bigi-tinanom isab kitam manusiyaꞌ. Sasuku allogan kallum-baranna ma dunya itu, amutawan du kallum-nyawana min Tuhan. Sagōꞌ sasuku mbal allogan kallum-baranna ma dunya, kakkal du kallum-nyawana sampay ni kasaumulan.” 26 Yuk si Isa giꞌ, “Sasuku bilahi maghinang ni aku subay ameyaꞌ ma aku. Manjari piꞌingga-piꞌingga papehēꞌanku, inaꞌan isab iya ameyaꞌ ma aku, maka sasuku maghinang ni aku pinalanga du eꞌ Mmaꞌku.”
27 Masi ahꞌlling si Isa, yukna, “Asusa deyom atayku ma buwattitu. Daka ai pangamuꞌku. Parahing bahāꞌ aku ni Mmaꞌku boꞌ mbal patꞌkkana ni aku kabinasahan itu? Daꞌa na, sabab ya na itu maksudku piꞌitu, subay labayanku kabinasahan itu.” 28 Manjari anabbut si Isa ni Tuhan, yukna. “O Mmaꞌ, paheyaꞌun ōnnu.”
Magtūy aniyaꞌ suwala min sulgaꞌ ahꞌlling, yukna, “Bay na paheyaku ōnku, maka paheyaku du pabalik.”
29 Takale suwala itu eꞌ saga aꞌa magtꞌnggehan mainaꞌan ati yuk kaseheꞌ, “Oy! Lꞌggon koꞌ inān.”
Yuk kaseheꞌ, “Malaꞌikat koꞌ inān amissala ni iya.”
30 Sagōꞌ yuk si Isa ni sigām, “Suwala inān nggaꞌi ka ma kahāpanku sagōꞌ ma kahāpanbi. 31 Taꞌabut na waktu pangahukum saga manusiyaꞌ ma dunya. Taꞌabut na waktu pamahalam kosog nakuraꞌ saitan, ya magagi ma babaw dunya itu. 32 Bang aku niangkat na ni hāg, bowaku du saga aꞌa kamemon ameyaꞌ ma aku.” 33 Binissala itu eꞌ si Isa pamataꞌuna ma saga aꞌa mainaꞌan bang buwattingga kamatayna.
34 Anambung saga aꞌa aheka inān ni si Isa, yuk sigām, “Bang ma Kitab in Al-Masi allum du salama-lama. Sagōꞌ yuknu in Anak Manusiyaꞌ subay pinaꞌangkat ni hāg pinapatay. Sai bahāꞌ Anak Manusiyaꞌ itu?”
35 Anambung si Isa, yukna, “Itiyaꞌ masi ma deyomanbi ya niōnan sawa, sagōꞌ mbal atꞌggol maitu. Satꞌggol iya masi giꞌ ma kaꞌam, subay palanjalbi lꞌngnganbi boꞌ kam mbal kalendoman. Sabab sasuku lumꞌngngan ma kalendoman, mbal kataꞌuwanna papehēꞌanna. 36 Angkanna,” yuk si Isa, “subay kam angandol ma sawa satꞌggol masi ma kaꞌam, supaya kam manjari panganak kasawahan.” Aubus paꞌin eꞌ si Isa amissala, alaꞌan iya boꞌ palimbu min saga aꞌa inān.
Mbal na paꞌin Magkahagad saga Yahudi
37 Minsan aheka hinang makainu-inu bay tahinang si Isa ma pangꞌndaꞌ sigām, masi sigām mbal magkahagad ma iya. 38 Jari tatuman ya tasulat ma deyom Kitab eꞌ nabi Isaya, ya yuk-i,
“O Panghūꞌ, sai bay magkahagad ma haka kami?
Sai bay kapaꞌndaꞌan kawasanu?”
39 Ya na itu poꞌonna angkan sigām mbal magkahagad, buwat tasulat eꞌ si Isaya ma ayat dakayuꞌ, ya yuk-i,
40 “Pinabuta sigām eꞌ Tuhan supaya mbal makaꞌndaꞌ.
Nilimbuhan pikilan sigām supaya mbal makahati.
Jari mbal sigām papinda ni aku, yuk Tuhan,
boꞌ kauliꞌanku kasusahan sigām.”
41 Binissala itu eꞌ si Isaya sabab taꞌndaꞌna sahaya si Isa, maka pinagpaꞌin iya eꞌna.
42 Malaingkan, aheka saga nakuraꞌ Yahudi magkahagad ma si Isa. Sagōꞌ mbal sigām anuli-nuli patampal pasal pagkahagad sigām, sabab tināw sigām ma saga Parisi. Tināw sigām pinaluwas tūy min deyom langgal ati mbal na pinasōd pabīng. 43 Tuꞌud sigām bilahi sinanglitan eꞌ pagkahi manusiyaꞌ, labi giꞌ min sanglit min Tuhan.
44 Manjari atanog eꞌ si Isa amissala, yukna, “Sasuku magkahagad ma aku, nggaꞌi ka hal aku ya pagkahagadna, sagōꞌ Tuhan isab, ya bay amapiꞌitu aku. 45 Maka sasuku angꞌndaꞌ aku, taꞌndaꞌna isab ya bay amapiꞌitu aku. 46 Bay aku piꞌitu ni dunya amuwan sawa ma pikilan manusiyaꞌ, boꞌ supaya in sasuku magkahagad ma aku mbal paddas ma deyom kalendoman. 47 Sasuku akale panduꞌku boꞌ mbal beyaꞌna, nggaꞌi ka aku angahukum iya, sabab nggaꞌi ka pangahukum ma manusiyaꞌ ya maksudku piꞌitu ni dunya. Piꞌitu aku supaya sigām lappasanku min hukuman dusa. 48 Ma llaw kahinapusan aniyaꞌ du angahukum saga aꞌa ya anulak aku maka mbal anaimaꞌ pamanduꞌku. Pamanduꞌku ma sigām ya pangahukuman sigām ma llaw katapusan. 49 Taluwaꞌ koꞌ itu sabab nggaꞌi ka min pagnahuꞌ-nahuꞌku ya angkan aku amanduꞌ, sagōꞌ min Mmaꞌku ya bay amapiꞌitu aku. Bay aku tinugpangan eꞌna bang ai subay pamanduꞌku, maka bang buwattingga eꞌku amanduꞌ. 50 Maka kataꞌuwanku in panohoꞌan Mmaꞌku itu amuwan kallum kakkal sampay ni kasaumulan. Angkan ai-ai pamissalaku ma manusiyaꞌ bay panohoꞌan aku asal eꞌ Mmaꞌku.”