11
Pagmahaldikaꞌ ma si Isa Pagsōdna ni Awrusalam
1 Jari itu, asekot-sekot paꞌin disi Isa ni daꞌira Awrusalam boꞌ ma atag kalumaꞌan Betpage maka Betani na, taꞌabut eꞌ sigām būd Kayu Jaitun. Mahēꞌ paꞌin, sinohoꞌ eꞌ si Isa duwangan mulidna parahū. 2 “Pehēꞌ na kam,” yukna, “ni kalumaꞌan ma dahuanbi ilu. Pagtꞌkkabi pinaꞌan makabāk du kam dakayuꞌ anak kuraꞌ pahengkot, kuraꞌ halam bay tapanguraꞌan aꞌa. Hubarinbi boꞌ bowahunbi piꞌitu. 3 Bang aniyaꞌ gantaꞌ atilaw kaꞌam bang angay ngāꞌbi, hakaꞌinbi buwattitu. Yukbi, ‘Tuꞌud pagguna eꞌ nakuraꞌ. Mbal du atꞌggol tinūran du eꞌna.’ ”
4 Na, pehēꞌ duwangan mulid eꞌ ati tabāk eꞌ sigā anak kuraꞌ ma lān, pahengkot ma tambol lumaꞌ mainaꞌan. Sabu paꞌin sigā angahubad, 5 tinilaw sigā eꞌ saga aꞌa bay magtꞌnggehan asal ma atag inaꞌan-i, yuk-i, “Angay hubaranbi ilu?”
6 Anambung duwangan mulid inān buwat bay pangidda si Isa ma sigā ati pinasagaran palanjal. 7 Binowa kuraꞌ eꞌ sigā ni si Isa ati nilampikan bukutna maka badjuꞌ sigā boꞌ yampa panguraꞌan eꞌ si Isa. 8 Sakali itu aheka aꞌa amꞌllat sꞌmmek sigām ma lān palabayanna. Kaseheꞌan isab bay anagpeꞌ saga engas-engas dahunan min huma boꞌ sinabulakan eꞌ sigām ma lān. 9 Manjari baꞌanan saga aꞌa ya palꞌngngan min dahuan si Isa sampay sigām paturul min buliꞌanna, maglinganan sama-sama, yuk-i,
“Mahaldikaꞌ! Bang paꞌin binarakatan ya kawakilan eꞌ Tuhan piꞌitu!
10 Bang paꞌin binarakatan pamarintana ya song patꞌnnaꞌna,
buwat pamarinta pangkatantam si Daꞌud.
Mahaldikaꞌ ni Tuhan Mahatinggi!”
11 Manjari patꞌngngaꞌ-tꞌngngaꞌ si Isa ni daꞌira Awrusalam boꞌ yampa pasōd ni deyom langgal pagkulbanan. Nililing eꞌna ai-ai kamemon ma deyomna inān, sagōꞌ, pagka song sangom na, paluwas iya minnēꞌ. Pabīng iya maka saga mulidna kasangpūꞌ maka duwa ni kauman Betani.
Kayu Igira Taluwaꞌ Sapda
12 Pagꞌllaw dakayuꞌ paꞌin, hinabu sigām pauntas min Betani heꞌ, lingantu na si Isa. 13 Jari aniyaꞌ taꞌndaꞌna min katāhan dakayuꞌ kayu igira alapat eꞌ dahun, angkan iya pinaꞌan angꞌndaꞌ bang taga-buwaꞌ. Sagōꞌ pagpinaꞌanna, luwal du dahun ya taꞌndaꞌ mainaꞌan sabab nggaꞌi ka giꞌ musimna pagbuwaꞌ. 14 Sinapdahan eꞌ si Isa kayu inān, yukna, “Puwas minnitu halam du aniyaꞌ amangan buwaꞌ min kayu itu sampay ni kasaumulan.” Na, takale sapda itu eꞌ saga mulidna.
Pasōd si Isa ni Langgal Pagkulbanan
15 Na, atꞌkka paꞌin sigām ni Awrusalam, pasōd si Isa ni deyom langgal pagkulbanan boꞌ yampa anagnaꞌ amalaꞌan saga magdaragang maka maglilitu mainaꞌan. Binulangkayat eꞌna lamisahan saga magsasambiꞌ sīn bangsa liyu ni sīn Yahudi. Ya du paningkōꞌan saga aꞌa magdagang assang pagkulban, binulangkayat isab eꞌna. 16 Halam aniyaꞌ bay pasagaranna angahangkut ai-ai labay min deyom langgal eꞌ. 17 Jari amanduꞌ si Isa ma saga aꞌa inān, yukna, “Tasulat asal pangallam Tuhan ma deyom Kitab, ya yuk-i,
‘Lumaꞌku itu niōnan lumaꞌ pagsambahayangan
ma saga aꞌa kabangsa-bangsahan.’
Sagōꞌ hinangbi na saliꞌ lumaꞌ patapukan mundu!”
18 Kahakaꞌan saga imam alanga maka saga guru saraꞌ agama pasal hinang si Isa itu, ya poꞌon sigām anagnaꞌ maggaraꞌ bang buwattingga eꞌ sigām amapatay iya. Tināw asal sigām ma iya sabab kinainu-inuhan panduꞌna eꞌ aꞌa kamemon.
19 Pagabay kohap paꞌin, maglaꞌanan disi Isa min Awrusalam eꞌ.
Pamintāngan min Kayu Igira
20 Subu-subu paꞌin, hinabu paꞌin disi Isa pabalik ni Awrusalam, taꞌndaꞌ eꞌ sigām in kayu igira bay sapdahanna heꞌ, alanos na min gamut sampay pariyataꞌ. 21 Taentom eꞌ si Petros bay lling si Isa ati yukna, “Ndaꞌun ba, Tuwan! Alanos na kayu igira bay sapdahannu heꞌ!”
22 Anambung si Isa ma sigām, yukna, “Angandol kam ma Tuhan. 23 Hakaꞌanta kam toꞌongan, bang saupama sohoꞌbi būd itu alaꞌan min paꞌataganna boꞌ patꞌnnaꞌ ni deyom sꞌllang, tahinang du ma kaꞌam bang paꞌin halam aniyaꞌ hawal-hawal ma deyom ataybi, bang paꞌin kam amꞌnnal isab in bay amuꞌbi tahinang du. 24 Angkan yukku ma kaꞌam, bang aniyaꞌ ai-ai amuꞌbi ni Tuhan, tantu kam pinaniyaꞌan bang paꞌin kam amꞌnnal in kaꞌam makasambut na. 25 Maka bang kam anꞌngge angarap ni Tuhan, boꞌ aniyaꞌ akon-akon ma deyom ataybi ni aꞌa, ampununbi iya boꞌ supaya kam niampun isab eꞌ Tuhan ma kalaꞌatan bay tahinangbi. [ 26 Ya balikna na, bang mbal ampunbi aꞌa bay amakay dusa ni kaꞌam, ya du kaꞌam mbal niampun eꞌ Mmaꞌbi Tuhan ma deyom sulgaꞌ.]”
Panilaw Pasal Kapatut si Isa
27 Na, atꞌkka sigām pabīng ni Awrusalam. Manjari itu, pasaltaꞌ paꞌin si Isa palunsul ma deyom langgal pagkulbanan, pehēꞌ ni iya saga kaimaman alanga, maka saga guru saraꞌ agama, maka saga pagmattoꞌahan Yahudi. 28 Yuk sigām ni iya, “Ai kapatutnu maghinang buwattilu? Sai bay amuwanan kaꞌa kapatut?”
29 Yuk si Isa, “Aniyaꞌ panilawku ma kaꞌam dahū. Bang itu sambunganbi, hakaꞌanta du kam bang ai kapatutku maghinang buwattitu. 30 Ya bay kapatut si Yahiya magpandi saga aꞌa, kapatut min Tuhan bahāꞌ atawa min manusiyaꞌ sadja? Sambunginbi aku.”
31 Sakali magisun saga pagnakuraꞌan inān, yuk-i, “Bang saupama yukta in kapatut si Yahiya inān bay min Tuhan, tinilaw du kitam eꞌna itu bang angay kitam halam bay magkahagad ma iya. 32 Sagōꞌ bang yukta in kapatut si Yahiya inān min manusiyaꞌ sadja, allā, piligdu.” Tināw asal sigām sabab magkahagad saga aꞌa kamemon in si Yahiya dī nabi min Tuhan. 33 Angkan buwattitu ya panambung saga nakuraꞌ inān ma panilaw si Isa, yuk-i, “Mbal kataꞌuwan kami bang minningga kapatutna.”
“Na,” yuk si Isa, “ya du isab aku mbal aku angahakaꞌan kaꞌam bang minningga kapatutku maghinang saga hinangku itu.”