21
Pagmahaldikaꞌ ma si Isa Pagsōdna ni Awrusalam
1 Jari itu, asekot paꞌin disi Isa ni daꞌira Awrusalam, boꞌ ma tongod būd Kayu Jaitun na, taꞌabut eꞌ sigām kalumaꞌan Betpage. Mahēꞌ paꞌin, sinohoꞌ eꞌ si Isa duwangan mulidna parahū. 2 Yukna, “Pehēꞌ na kam ni kalumaꞌan ya ma dahuanbi ilu. Pagtꞌkkabi pinaꞌan, makabāk du kam kuraꞌa maka anakna paengkot mainaꞌan. Hubarinbi boꞌ bowahunbi piꞌitu. 3 Bang aniyaꞌ gantaꞌ atilaw kaꞌam bang angay ngāꞌbi, hakaꞌinbi buwattitu, yukbi, ‘Tuꞌud pagguna eꞌ nakuraꞌ.’ Jari pinasagaran du kam magtūy eꞌna.”
4 Pinaniyaꞌ buwattēꞌ boꞌ magtandaꞌ ya bay pinagkallam eꞌ dakayuꞌ nabi, ya yuk-i,
5 “Hakaꞌinbi saga aꞌa Awrusalam,
Ilu na sultanbi atꞌkka ni kaꞌam.
Areyoꞌ pangatayanna,
anguraꞌ iya ma anak kuraꞌ.”
6 Na, pehēꞌ duwangan mulid eꞌ, nihinang eꞌ sigā ya bay panohoꞌan si Isa. 7 Binowa eꞌ sigā kuraꞌ maka anakna, nilampikan maka badjuꞌ sigā boꞌ yampa panguraꞌan eꞌ si Isa. 8 Anguraꞌ paꞌin iya, landuꞌ aheka aꞌa bay amꞌllat sꞌmmek sigām ma lān palabayanna. Saga aꞌa kaseheꞌ bay anabulakan pinaꞌan saga engas-engas dahunan bay labasan sigām. 9 Manjari baꞌanan saga aꞌa ya maglꞌngnganan min dahuan si Isa, sampay sigām paturul min buliꞌanna, magpangolang sama-sama yuk-i,
“Mahaldikaꞌ ni tubuꞌ sultan Daꞌud!
Bang paꞌin binarakatan ya kawakilan eꞌ Tuhan piꞌitu!
Sanglitantam Tuhan Mahatinggi!”
10 Manjari pagtꞌkka si Isa ni Awrusalam, ahiluhalaꞌ deyom daꞌira inān kamemon. Yuk saga aꞌa mainaꞌan, “Sai bahāꞌ aꞌa ilu?”
11 Anambung kahekaꞌan, yuk sigām, “Si Isa koꞌ itu, nabi min Nasaret ma lahat Jalil.”
Si Isa ma Langgal Pagkulbanan
12 Sakali itu pasōd si Isa ni deyom langgal pagkulbanan boꞌ yampa pinalaꞌan eꞌna sasuku maglilitu maka magdagang mainaꞌan. Binaliskat eꞌna lamisahan saga aꞌa magsambiꞌan sīn bangsa liyu ni sīn Yahudi. Ya du binaliskat eꞌna paningkōꞌan saga aꞌa magdagang assang pagkulban. 13 Yuk si Isa ni saga aꞌa inān, “Tasulat asal ma Kitab Kanabi-nabihan bay pagkallam Tuhan, ya yuk-i, ‘Lumaꞌku itu niōnan lumaꞌ pagsambahayangan saga aꞌa.’ Sagōꞌ tahinangbi na saliꞌ lumaꞌ patapukan mundu.”
14 Mainaꞌan lagiꞌ si Isa ma deyom langgal, pinaꞌan ni iya saga aꞌa buta maka aꞌa pengkaꞌ ati kauliꞌan sigām eꞌna. 15 Sagōꞌ angastol saga kaimaman alanga maka saga guru saraꞌ agama, pagꞌndaꞌ sigām ma hinang si Isa makainu-inu inān, maka pagkale sigām ma saga ondeꞌ magpangolang ma deyom langgal, ya yuk-i, “Mahaldikaꞌ ni tubuꞌ Sultan Daꞌud!”
16 Jari ahꞌlling saga nakuraꞌ inān ni si Isa, yuk sigām, “Takalenu bahāꞌ ya pinahꞌlling eꞌ saga ondeꞌ-ondeꞌ itu?”
“Ahoꞌ,” yuk si Isa. “Angay? Kilāku halam tabassabi ya tasulat ma Kitab Jabul, ya yuk-i,
‘Min kahandaknu saga kamanahutan amudji ōnnu,
saga anak duruꞌan lagiꞌ ananglitan kaꞌa.’ ”
17 Puwas eꞌ alaꞌan si Isa min sigām boꞌ paluwas min daꞌira tudju ni kalumaꞌan Betani. Pahantiꞌ iya mahēꞌ dambahangi.
Kayu Igira Halam Aniyaꞌ Buwaꞌna
18 Pagkꞌllat llaw, ma labayan paꞌin si Isa tudju ni Awrusalam pabīng, lingantu iya. 19 Taꞌndaꞌna dampoꞌon kayu igira ma bihing lān, sagōꞌ pagpehēꞌna, halam aniyaꞌ buwaꞌ tabākna mainaꞌan, luwal dahun. Jari sinapdahan eꞌ si Isa kayu inān, yukna, “Puwas minnitu, kayu itu mbal toꞌongan magbuwaꞌ pabīng.” Magtūy alanos kayu inān.
20 Pagꞌndaꞌ saga mulidna, ainu-inu sigām. “Allā,” yuk sigām, “angay kayu igira itu alanos saruꞌun-duꞌun?”
21 “Na, hakaꞌanta kam toꞌongan,” yuk si Isa, “bang kam angandol toꞌongan ma halam aniyaꞌ hawal-hawal deyom ataybi, makahinang du kam buwat bay hinangku ma kayu igira itu. Maka nggaꞌi ka hal eꞌ-i. Minsan būd inān, bang sohoꞌbi alaꞌan min baina boꞌ patꞌnnaꞌ ni deyom sꞌllang, tantu du ameyaꞌ. 22 Bang kam angandol, tasambutbi du ai-ai pangamuꞌ-ngamuꞌbi ni Tuhan.”
Tinilaw si Isa Pasal Kapatutna
23 Jari pabīng na si Isa ni deyom langgal pagkulbanan boꞌ amanduꞌ. Sabuna paꞌin amanduꞌ, pinaꞌan ni iya saga kaimaman alanga maka saga pagmattoꞌahan Yahudi. Yuk sigām, “Ai kapatutnu maghinang ka buwattilu? Sai bay amuwanan kaꞌa kapatut?”
24 Anambung si Isa, yukna, “Aniyaꞌ dakayuꞌ patilawku ma kaꞌam dahū. Bang itu sambunganbi, hakaꞌanta du kam bang ai kapatutku maghinang buwattitu. 25 Ya bay kapatut si Yahiya magpandi saga aꞌa, kapatut min Tuhan bahāꞌ atawa min manusiyaꞌ sadja?”
Na, magisun-isun sigām, yuk-i, “Bang saupama yukta in kapatut si Yahiya inān bay min Tuhan, tantu kitam tinilaw eꞌna bang angay kitam halam bay magkahagad ma si Yahiya. 26 Sagōꞌ bang yukta in kapatut si Yahiya inān min manusiyaꞌ sadja, na piligdu kitam. Sabab saga aꞌa itu magkahagad kamemon in si Yahiya nabi min Tuhan.” 27 Angkan buwattitu ya panambung saga nakuraꞌ ma panilaw si Isa, yuk-i, “Mbal kataꞌuwan kami.”
“Na,” yuk si Isa, “ya du aku mbal angahakaꞌan kaꞌam bang minningga ya kapatutku maghinang saga hinang itu.”
Pasal Duwangan Magdanakan
28 Amissala si Isa, yukna, “Pikilunbi paralilanku itu. Aniyaꞌ aꞌa duwa anakna lꞌlla. Na pehēꞌ aꞌa itu ni anakna siyaka, yukna, ‘Otōꞌ, pehēꞌ ka llaw ilu maghinang ma kabbun.’ 29 Yuk sambung siyaka heꞌ, ‘Mbal aku.’ Saguwāꞌ apinda pikilanna ati pehēꞌ iya ni kabbun maghinang. 30 Jari pehēꞌ aꞌa itu ni anakna siyali, anohoꞌ iya maghinang buwat bay panohoꞌanna ma siyaka. ‘Ahoꞌ, Mmaꞌ,’ yuk sambung siyali. Sagōꞌ halam iya bay pehēꞌ. 31 Na,” yuk si Isa ni saga aꞌa inān, “bang ma kaꞌam, sai ya bay ameyaꞌ ma kabayaꞌan mmaꞌna?”
“Ya anak siyaka,” yuk sambung sigām.
“Hakaꞌanta kam toꞌongan,” yuk si Isa, “saga aꞌa dusahan, ya buwat magaꞌāꞌ sukay parinta maka dꞌnda alaꞌat, parahū sigām min kaꞌam ameyaꞌ ma pagparinta Tuhan. 32 Sabab si Yahiya Magpapandi bay piꞌilu ni kaꞌam amataꞌuwan kaꞌam bang ingga ya lān abontol, sagōꞌ halam iya bay kahagadbi. Malaingkan saga aꞌa magāꞌ sukay parinta maka saga dꞌnda alaꞌat, bay magkahagad. Maka minsan taꞌndaꞌbi inaꞌan-i, halam bay apinda pikilanbi boꞌ kam magkahagad ma si Yahiya.”
Pasal saga Magtutungguꞌ ma Kabbun Anggul
33 “Pakale kam ma paralilan dakayuꞌ itu,” yuk si Isa. “Aniyaꞌ dakayuꞌ aꞌa tag-dapu tanaꞌ bay ananom bahan anggul ma kabbunna. Nilikus eꞌna maka ād, kinali eꞌna lowang pagpꞌggaꞌan buwaꞌ anggul, maka nihinang eꞌna pamantawan alanga. Puwas eꞌ patungguꞌanna kabbun inān ma saga magtutungguꞌ, boꞌ yampa iya atulak ni lahat saddī. 34 Taꞌabut paꞌin musim pagpusuꞌ buwaꞌ anggul, sinohoꞌ eꞌ tag-dapu kabbun saga sosohoꞌanna pehēꞌ ni saga magtutungguꞌ angāꞌ palsukuꞌanna.
35 “Sagōꞌ pagtꞌkka pehēꞌ saga sosohoꞌan itu, sinaggaw sigām eꞌ magtutungguꞌ. Dakayuꞌ sosohoꞌan inān bay niraplosan, dakayuꞌ bay pinapatay, dakayuꞌ isab bay pinagbantung. 36 Puwas eꞌ in tag-dapu bay amapehēꞌ saga sosohoꞌan saddī, aheka lagiꞌ min bay dahū. Ya du sigām bay nilaꞌat eꞌ saga tungguꞌ, buwat bay pangalaꞌat sigām ma sosohoꞌan tagnaꞌ. 37 Na, ma katapusan, bay pinapehēꞌ anak tag-dapu, sabab pangannalna, ‘Tantu pinagaddatan anakku eꞌ saga tungguꞌ heꞌ.’
38 “Sagōꞌ pagꞌndaꞌ saga tungguꞌ ma anak tag-dapu itu, magtūy sigām magisun, yuk-i, ‘Ya na koꞌ ilu anak tag-dapu. Sūng kitam, papataytam iya boꞌ taꞌāꞌtam tanaꞌna.’ 39 Manjari sinaggaw eꞌ sigām anak tag-dapu. Nijudjalan iya paluwas min likusan, boꞌ pinapatay.
40 “Na,” yuk si Isa, “bang atꞌkka tag-dapu kabbun pehēꞌ, ai bahāꞌ hinangna ma saga aꞌa magtutungguꞌ?”
41 Anambung sigām, yuk-i, “Tantu papatayna saga pilliyu inān. Patungguꞌanna kabbunna ma aꞌa saddī, ya bilahi angꞌndeꞌan palsukuꞌanna bang taꞌabut musimna.”
42 Yuk si Isa ni sigām, “Halam bahāꞌ tabassabi ayat Kitab ya yuk-i,
‘Ya batu bay sinulak eꞌ aꞌa maghinang lumaꞌ,
ya na batu manjari pamapagon lumaꞌ.
Hinang Tuhan koꞌ inān,
landuꞌ ahāp ma pangꞌndaꞌ kami.’
43 “Angkan kam hakaꞌanku,” yuk si Isa, “nilaꞌanan du min kaꞌam bay palsukuꞌanbi ma deyom pagparintahan Tuhan boꞌ pinapinda ni aꞌa saddī bangsa. Jari sigām ya amaluwas kahāpan ya tōp ma pagparintahan Tuhan. [ 44 Sasuku ahūg ni batu itu atumu-tumu du baranna. Maka sasuku kahūgan batu itu apipis du kamemonna.]”