22
Pasal Jamuhan Pagkawin
1 Manjari magparalilan si Isa pabīng ma saga aꞌa, yukna, 2 “In kapagparinta Tuhan saliꞌ dalil sultan bay magsakap pagjamu ma waktu kapagkawin anakna lꞌlla. 3 Sinohoꞌ eꞌ sultan saga ipatanna amataꞌu saga aꞌa ya bay sinōꞌ paluruk. Sagōꞌ mbal ameyaꞌ.
4 “Angkan aniyaꞌ ipatan saddī pinapehēꞌ eꞌ sultan. Yukna ni sigām, ‘Pataꞌuhunbi saga aꞌa ya sohoꞌku paluruk in pagjamuku sakap na. Bay na sinumbaliꞌ saga sapiꞌku lꞌlla maka saga anak sapiꞌ alꞌmmok. Sakap na kamemon. Sōꞌun sigām paluruk na ni pagkawinan.’ 5 Sagōꞌ agagga saga aꞌa inān, sabab aniyaꞌ gawi sigām saddī. Dangan inān waꞌi ni humana maghinang, dangan ni tindana, 6 kaseheꞌan bay anaggaw saga sosohoꞌan sultan inān. Niraplosan eꞌ sigām maka pinapatay. 7 Pagtaꞌu paꞌin sultan, landuꞌ akagit atayna angkan sohoꞌna tumpukan sundaluna pehēꞌ amapatay saga pamomonoꞌ heꞌ. Sinōꞌ isab tinunuꞌ kalumaꞌan sigām. 8 Puwas eꞌ nilinganan eꞌ sultan saga ipatanna, yukna, ‘Sakap na jamu pagkawin sagōꞌ mbal na tōp saga aꞌa bay taꞌabbitku. 9 Jari pehēꞌ kam ni lān aheka aꞌana, ati sōꞌunbi paluruk sasuku tabākbi mahēꞌ.’ 10 Angkan pehēꞌ saga ipatan inān ni kalān-lānan amatimuk sasuku aꞌa tabāk eꞌ sigām, aꞌa ahāp ka atawa alaꞌat. Jari in lumaꞌ pagkawinan eꞌ apꞌnnoꞌ eꞌ luruk.
11 “Sakali itu, makasōd paꞌin sultan pehēꞌ angꞌndaꞌ ma saga luruk, aniyaꞌ taꞌndaꞌna mainaꞌan dakayuꞌ aꞌa amakay sꞌmmek mbal tōp ma pagkawinan. 12 Yuk sultan ni aꞌa itu, ‘Bagay, buwattingga kasōdnu piꞌitu ma halam aniyaꞌ sꞌmmeknu tōp ma pagkawinan?’ Sagōꞌ halam anambung aꞌa inān. 13 Angkan ahꞌlling sultan ni saga sosohoꞌanna, yukna, ‘Engkotinbi tapeꞌ-tangan aꞌa itu, boꞌ larukinbi iya pehēꞌ ni deyom kalendoman. Magtangis saga aꞌa mainaꞌan maka magtageꞌot empon kabowa susun sigām.’
14 “Sababna,” yuk si Isa, “aheka aꞌa tinaꞌabbit ameyaꞌ ma pamarinta Tuhan, sagōꞌ salat du tapeneꞌ.”
Pasal Pagbayad Sukay ni Parinta
15 Na, paluwas saga Parisi minnēꞌ boꞌ magisun bang buwattingga eꞌ sigām anganjallat si Isa ma bissalana. 16 Jari aniyaꞌ saga mulid sigām maka saga bebeyaꞌan si Herod pinapehēꞌ ni si Isa. “Tuwan Guru,” yuk sigām ma iya, “kataꞌuwan kami in kaꞌa apoteꞌ asal ataynu. Bꞌnnal sadja pamanduꞌnu pasal kaul-piꞌil ya kinabayaꞌan eꞌ Tuhan. Mbal ka tināw sinoway eꞌ sai-sai, sabab saliꞌ du bowahannu ma aꞌa kamemon. 17 Na, hakaꞌin kami konoꞌ bang ai pikilannu pasal itu-i: bang kita gantaꞌ amayad sukay ni parinta Rōm, ya deyoꞌ min Sultan Mahatinggi heꞌ, langgalta bahāꞌ saraꞌ agamatam?”
18 Sagōꞌ kinataꞌuwan asal eꞌ si Isa aniyaꞌ kalaꞌatan minaksud eꞌ sigām, angkan yukna ni sigām, “Kaꞌam ilu hal magbauꞌ-bauꞌ atilaw buwattilu. Tuꞌud kam bilahi anganjallat aku ma panambungku. 19 Pandaꞌin aku sīn, ya pamayad sukay parinta.” Jari binowahan iya sīn atibuꞌuk. 20 Yuk si Isa ma sigām, “Pattaꞌ sai maka ōn sai ma sīn itu?”
21 “Pattaꞌ Sultan Mahatinggi maka ōnna,” yuk sambung sigām.
“Na,” yuk si Isa, “pagka sukuꞌ sultan, pamayarunbi ni sultan. Damikiyanna, bang aniyaꞌ ai-ai sukuꞌ Tuhan, tukbalinbi isab ni Tuhan.” 22 Pagkale saga aꞌa inān ma panambung si Isa itu, magtūy sigām ainu-inu ati angꞌbba sigām min iya boꞌ alaꞌan minnēꞌ.
Pasal Kallum Balik ma Aꞌa Magpatayan
23 Na ma llaw du inaꞌan, aniyaꞌ pinaꞌan ni si Isa saga aꞌa min umpigan Saddusi.a Atilaw sigām ma iya, 24 “Tuwan guru, aniyaꞌ saraꞌ bay min si Musa pasal lꞌlla amatay ma halam taga-tubuꞌ. In baluna subay niāꞌ hꞌnda eꞌ siyalina boꞌ supaya aniyaꞌ anak binista tubuꞌ min aꞌa bay amatay heꞌ. 25 Na,” yuk sigām, “aniyaꞌ bay ma lahat kami pituꞌ lꞌlla magdanakan. Taga-hꞌnda kasiyakahan heꞌ, sagōꞌ amatay ma halam aniyaꞌ tubuꞌna. Jari baluna bay taꞌāꞌ hꞌnda eꞌ siyali pasunuꞌ. 26 Sagōꞌ ya du siyali itu, bay amatay ma halam taga-tubuꞌ. Damikiyanna isab siyali pasunuꞌ. Papuꞌutta na, in pituꞌ magdanakan bay makahꞌnda ni dakayuꞌ dꞌnda heꞌ, boꞌ amatay sigām kamemon ma halam taga-anak. 27 Ma katapusanna amatay isab dꞌnda. 28 Na, Tuwan,” yuk sigām, “bang taꞌabut llaw pagpakallum pabalik saga aꞌa magpatayan, hꞌnda sai bahāꞌ dꞌnda heꞌ? Sabab bay iya taꞌāꞌ hꞌnda eꞌ sigām kapituꞌ magdanakan.”
29 Anambung si Isa ma sigām, yukna, “Asāꞌ kam, sabab halam kataꞌuwanbi bang ai tasulat ma Kitab, maka mbal kataꞌuwanbi kosog kawasa Tuhan. 30 Sabab bang taꞌabut waktu kallum pabīng min kamatay, in manusiyaꞌ makasaliꞌ du ni bangsa malaꞌikat ma deyom sulgaꞌ. Mbal na sigām maghꞌnda-maghꞌlla. 31 Ya pasal isab saga aꞌa pinakallum pabīng min kamatay, kilāku halam tabassabi bay pangallam Tuhan ma kaꞌam, ya yuk-i, 32 ‘Aku ya Tuhan disi Ibrahim, si Isaꞌak maka si Yakub.’ In Tuhan itu,” yuk si Isa, “pagtuhanan asal ma saga aꞌa allum, nggaꞌi ka ma aꞌa magpatayan.”
33 Makakale paꞌin kahekaꞌan aꞌa inān ma bissala si Isa inān, sidda sigām ainu-inu.
Panohoꞌan Ahalgaꞌ Min Kamemon
34 Sakali itu, pagkale saga Parisi in si Isa bay makatambol bowaꞌ saga Saddusi heꞌ, pinaꞌan sigām patimuk ni iya. 35 Aniyaꞌ ma sigām dakayuꞌ guru saraꞌ agama bay atilaw si Isa, kalu tajallat ma panambungna. 36 Yukna, “Tuwan Guru, ma saraꞌ agama, ingga ya panohoꞌan ahalgaꞌ min kamemon?”
37 Yuk sambung si Isa, “Wajib kam alasa toꞌongan ma Panghūꞌbi Tuhan. Ya lasabi ma iya subay min deyom ataybi maka min deyom tawhidbi maka min panahuꞌanbi. 38 Ya na koꞌ heꞌ panohoꞌan umbul dakayuꞌ, ahalgaꞌ min kamemon. 39 Maka ya na itu panohoꞌan karuwana, ahalgaꞌ isab: wajib kam alasahan pagkahibi manusiyaꞌ buwat eꞌbi alasahan baranbi. 40 Ya panohoꞌan kamemon bay pangꞌbba eꞌ si Musa, sampay pamanduꞌ saga nabi, luwas du min duwa panohoꞌan tasabbutku itu.”
Panilaw Pasal Al-Masi
41 Hinabu magtimuk mainaꞌan saga Parisi, aniyaꞌ tinilaw eꞌ si Isa ma sigām, 42 yuk-i, “Ai pikilanbi pasal Al-Masi? Tubuꞌ sai iya?”
Ya sambung sigām, “Tubuꞌ sultan Daꞌud.”
43 “Na bang buwattēꞌ,” yuk si Isa, “angay angkan si Daꞌud bay angōn ‘Panghūꞌ’ ma Al-Masi, ma waktu kapagbayaꞌ Rū Tuhan ma iya? Buwattitu bay pagkallam si Daꞌud eꞌ,
44 ‘Bay angabtang Tuhan ni Panghūꞌku, yukna,
daiꞌ ka aningkōꞌ ma bihingku kowan,
ati bowaku palbantahannu
tatauꞌ ma deyoꞌ pād-tapeꞌnu.’