20
Tinilaw si Isa Pasal Kapatutna
1 Ma dakayuꞌ llaw, inaꞌan isab si Isa ma langgal pagkulbanan amanduꞌan saga aꞌa maka magnasihatan sigām lapal ahāp. Jari pehēꞌ ni iya saga kaimaman alanga, maka saga guru saraꞌ agama, maka saga pagmattoꞌahan. 2 Yuk sigām ni iya, “Ai kapatutnu maghinang buwattilu? Sai bay amuwanan kaꞌa kapatut ilu?”
3 Yuk sambungna, “Aniyaꞌ dakayuꞌ panilawku ma kaꞌam dahū. Hakaꞌinbi aku: 4 ya kapatut si Yahiya magpandi aꞌa heꞌ, kapatut min Tuhan bahāꞌ atawa min manusiyaꞌ sadja?”
5 Sakali magisun-isun saga aꞌa, yuk-i, “Bang saupama yukta in kapatut si Yahiya inān bay min Tuhan, tantu kitam tinilaw eꞌna bang angay kitam halam bay amꞌnnal ma si Yahiya. 6 Sagōꞌ bang yukta in kapatut si Yahiya inān min manusiyaꞌ sadja, na, piligdu kitam. Pinagbantung kitam eꞌ saga aꞌa itu kamemon sabab magkahagad asal sigām in si Yahiya nabi bay min Tuhan.” 7 Angkan buwattitu panambung saga nakuraꞌ inān ma panilaw si Isa, yuk-i, “Sittaꞌa. Mbal kataꞌuwan kami bang minningga kapatutna.”
8 “Na,” yuk si Isa, “ya du isab aku, mbal kam hakaꞌanku bang minningga ya kapatutku maghinang saga hinangku itu.”
Pasal saga Magtutungguꞌ ma Kabbun Anggul
9 Manjari amaralilan lagiꞌ si Isa ma saga aꞌa. “Aniyaꞌ,” yukna, “dakayuꞌ aꞌa tag-kabbun bay ananom bahan anggul ma kabbunna. Bay patungguꞌanna ma saga magtutungguꞌ. Puwas eꞌ atulak iya ni lahat saddī ati atꞌggol mahēꞌ. 10 Taꞌabut paꞌin musim pagpusuꞌ buwaꞌ anggul-i, sinohoꞌ eꞌ tag-dapu kabbun inān dakayuꞌ sosohoꞌanna pehēꞌ ni saga magtutungguꞌ boꞌ angāꞌ bahagiꞌna. Sagōꞌ niraplosan sosohoꞌan itu eꞌ sigām ati pinapoleꞌ ma halam aniyaꞌ tabowana. 11 Puwas eꞌ aniyaꞌ sosohoꞌan saddī pinapehēꞌ eꞌ tag-kabbun. Ya du iya niraplosan eꞌ sigām, nihalipulu maka pinapoleꞌ ma halam aniyaꞌ tabowana. 12 Puwas eꞌ sohoꞌna isab sosohoꞌan saddī pehēꞌ, kamintꞌlluna na. Jari sosohoꞌan damuli itu binakatan eꞌ sigām boꞌ yampa nijudjalan paluwas min likusan anggul eꞌ. 13 Manjari yuk tag-kabbun, ‘Ai bahāꞌ subay hinangku? Papehēꞌku giꞌ anakku luggiyaꞌ, ya kalasahanku. Tantu iya pinagaddatan eꞌ sigām.’
14 “Sagōꞌ pagꞌndaꞌ saga tungguꞌ ma anak tag-dapu, magtūy sigām magisun, yuk-i, ‘Ya na koꞌ ilu anak tag-dapu. Sūng na kitam, papataytam na boꞌ taꞌāꞌtam tanaꞌ itu.’ 15 Jari nijudjalan iya eꞌ sigām paluwas min likusan, pinapatay.
“Na,” yuk si Isa, “ai bahāꞌ nihinang eꞌ tag-dapu kabbun eꞌ? 16 Tantu iya pehēꞌ amapatay saga tungguꞌ inān, ati patungguꞌanna kabbunna ma aꞌa saddī.”
Pagkale paꞌin saga aꞌa ma bissala si Isa itu, yuk sigām, “Ē! Sꞌlleꞌ bale puhuꞌ, bang paꞌin mbal kinabbul bowaꞌnu!”
17 Sagōꞌ pinatongan sigām eꞌ si Isa, yukna, “Bang ma kaꞌam, ai hatina, ya tasulat ma Kitab, ya yuk-i:
‘Ya batu bay sinulak eꞌ aꞌa maghinang lumaꞌ, kinabāꞌ halam aniyaꞌ gunana,
ya na inaꞌan batu aheya toꞌongan kagunahanna.’ ”
18 Yuk si Isa giꞌ, “Sasuku ahūg ni batu itu atumu-tumu du baranna. Maka sasuku kahūgan batu itu apodjak du kamemonna.”
Pasal Pagbayad Sukay ni Parinta
19 Angkan saga guru saraꞌ agama maka saga kaimaman alanga bilahi anaggaw si Isa saruꞌun-duꞌun, sabab tahati eꞌ sigām in sigām ya bay paꞌandiganna ma paralilan pasal tungguꞌ kabbun inān. Sagōꞌ halam iya tasaggaw eꞌ sigām sabab tināw ma saga aꞌa mahadjanaꞌ.a 20 Amiha giꞌ sigām waktu ahāp boꞌ supaya iya tinandanan eꞌ sigām pehēꞌ ni pangꞌntanan gubnul. Jari aniyaꞌ saga aꞌa tinambahan eꞌ sigām, aꞌa magbauꞌ-bauꞌ in sigām asaltun. Pinapehēꞌ sigām ni si Isa, kalu iya tajallat ma bissalana. 21 Yuk saga aꞌa tinambahan itu ni si Isa, “Tuwan guru, “kataꞌuwan kami in bissalanu maka pamanduꞌnu abontol toꞌongan. Mbal ka amapagbiddaꞌ ma aꞌa minsan sai, maka bꞌnnal sadja pamanduꞌnu pasal kaul maka piꞌil ya kinabayaꞌan eꞌ Tuhan. 22 Hakaꞌin kami konoꞌ. Bang kita gantaꞌ amayad sukay ni parinta Rōm, ya deyoꞌ min Sultan Mahatinggi heꞌ, langgalta bahāꞌ saraꞌ agamatam?”
23 Sagōꞌ kinataꞌuwan asal eꞌ si Isa pangangakkal sigām, angkan yukna ma sigām, 24 “Paꞌndaꞌin aku sīn.” Pagꞌndaꞌ si Isa ma sīn, yukna, “Pattaꞌ sai maka ōn sai ma sīn itu?”
“Pattaꞌ Sultan Mahatinggi maka sulatna,” yuk sambung sigām.
25 “Na,” yuk si Isa, “pagka sukuꞌ sultan koꞌ itu, pamayarunbi ni iya. Damikiyanna, bang aniyaꞌ ai-ai sukuꞌ Tuhan, tukbalinbi isab ni Tuhan.”
26 Manjari mbal iya takoleꞌ nijallat eꞌ sigām ma pasal pahꞌllingna ma mairan. Landuꞌ sigām ainu-inu ma panambungna, angkan sigām mbal makapamissala.
Pasal Kallum Balik ma saga Aꞌa Magpatayan
27 Puwas eꞌ aniyaꞌ pinaꞌan ni si Isa saga aꞌa Saddusi, daginis agama Yahudi ya amanduꞌ halam aniyaꞌ aꞌa magpatayan allum pabīng ma llaw damuli. 28 Atilaw sigām ma si Isa, yuk-i, “Tuwan Guru, aniyaꞌ saraꞌ bay pangꞌbba kitam eꞌ si Musa pasal aꞌa amatay ma halam taga-tubuꞌ. In baluna subay niāꞌ hꞌnda eꞌ siyalina, boꞌ supaya aniyaꞌ anak binista tubuꞌ min aꞌa bay amatay heꞌ. 29 Na,” yuk sigām, “aniyaꞌ bay pituꞌ lꞌlla magdanakan. Maghꞌnda siyaka sagōꞌ amatay iya ma halam taga-anak. 30 Jari nihꞌnda balu eꞌ danakan pasunuꞌ ati amatay isāb ma halam taga-anak. 31 Damikiyanna isab siyali katꞌlluna. Jari in pituꞌ magdanakan bay makahꞌnda ni dakayuꞌ dꞌnda heꞌ, boꞌ amatay sigām kamemon ma halam taga-anak. 32 Ma katapusanna amatay isab dꞌnda. 33 Na, Tuwan,” yuk sigām, “bang taꞌabut llaw pagpakallum pabalik saga aꞌa magpatayan, hꞌnda sai bahāꞌ dꞌnda heꞌ? Sabab bay iya taꞌāꞌ hꞌnda eꞌ sigām kapituꞌ magdanakan.”
34 Anambung si Isa ma sigām, yukna, “Saga aꞌa ma dunya itu maghꞌnda asal maka maghꞌlla. 35 Sagōꞌ saga aꞌa ya binista eꞌ Tuhan makajari pinakallum pabalik min kamatay, ya tōp isab maglahat mahēꞌ ma sulgaꞌ, mbal na sigām maghꞌnda-hꞌlla. 36 Sabab mbal na sigām magkamatay sagōꞌ parasaliꞌ na sigām ni saga malaꞌikat. Anak Tuhan na sigām sabab pinakallum na pabīng min kamatay sigām. 37 Pinatampal isab eꞌ si Musa pasal kapakallum aꞌa min kamatay. Sabab ma waktu kaꞌndaꞌna poꞌon puhung bay sabbutna Panghūꞌ Tuhan, yuk-i, ‘Tuhan pagtuhanan disi Ibrahim maka si Isaꞌak maka si Yakub.’ 38 Hatina Tuhan itu pagtuhanan asal eꞌ saga aꞌa allum, nggaꞌi ka eꞌ aꞌa magpatayan. Allum asal aꞌa kamemon ma pangꞌndaꞌ Tuhan.”
39 Ahꞌlling saga guru saraꞌ agama kaseheꞌ, yuk-i, “Tuwan Guru, ahāp sambungnu ilu.” 40 Jari halam aniyaꞌ makatawakkal anilaw iya pabalik.
Panilaw pasal Al-Masi
41 Jari atilaw si Isa ma sigām, yukna, “Angay saga aꞌa magpinaꞌin in Al-Masi tubuꞌ sultan Daꞌud? 42 Sabab si Daꞌud magbaran bay angallam ma deyom Kitab Jabul, yukna,
‘Bay angabtang Tuhan ni Panghūꞌku, yukna,
“Daiꞌ ka, aningkōꞌ ka ma bihingku kowan,
43 ati bowaku palbantahannu ni deyoꞌ pād-tapeꞌnu.” ’
44 Na,” yuk si Isa, “pagka Al-Masi niōnan Panghūꞌ eꞌ sultan Daꞌud, tantu iya nggaꞌi ka hal panubuꞌ si Daꞌud.”
Pamituwa si Isa Pasal saga Guru Saraꞌ Agama
45 Pasaltaꞌ paꞌin pakale saga aꞌa inān kamemon, ahꞌlling si Isa ni saga mulidna, yukna, 46 “Halliꞌinbi saga guru saraꞌ agama, ya tagihan maglunsul magpamakay juba atahaꞌ. Tagihan isab sigām nihulmat bang ma mairan. Bang ma deyom langgal, bilahi sigām pinatingkōꞌ ma tingkōꞌan bangsahan. Damikiyanna bang sigām ma pagjamuhan, subay paningkōꞌan aꞌa alanga ya paningkōꞌan sigām. 47 Niꞌinyaya eꞌ sigām saga balu dꞌnda boꞌ taꞌāꞌ lumaꞌ sigām, ati pinatahaꞌ sambahayang sigām, paglaku-laku in sigām bal-iman. Angkan pinakalap kabinasahan sigām.”