23
Katiksaꞌan Pituꞌ Hekana
1 Manjari ahꞌlling si Isa ni katimukan aꞌa maka ni saga mulidna. 2 Yukna, “Aniyaꞌ kapatut saga guru saraꞌ agama maka saga Parisi amanduꞌan aꞌa pasal saga saraꞌ si Musa. 3 Angkan subay beyaꞌbi ai-ai pamanduꞌ sigām. Subay ikutbi pahāp pamissala sigām. Sagōꞌ daꞌa panunurinbi kahinangan sigām, sabab halam tabeyaꞌ eꞌ sigām ya bay pamanduꞌ sigām ma aꞌa kaseheꞌan. 4 Pinabuhat eꞌ sigām saga panohoꞌan ya pamatanggung sigām ma saga aꞌa kaseheꞌan, sagōꞌ mbal sigām bilahi anabang ma saga aꞌa inān, minsan laꞌa hal tabang arikiꞌ. 5 Ai-ai nihinang eꞌ saga Parisi maka saga guru heꞌ subay ma matahan kahekaꞌan aꞌa. Ndaꞌunbi kaheya puyuꞌ-puyuꞌ pangisihan ayat Kitab ya pinꞌkkos ma tuktuk maka ma lꞌngngon sigām. Ndaꞌunbi isab juba sigām, katahaꞌ jambayna. 6 Bang sigām gantaꞌ ma pagjamuhan, kabilahian sigām subay pinatingkōꞌ ma paningkōꞌan bangsahan. Ya du bang sigām ma deyom langgal, subay paningkōꞌan ya tinauꞌan aꞌa alanga. 7 Bilahi sigām nihulmat bang ma mairan, bilahi isab pinagsabbut ‘Tuwan Guru.’
8 “Sagōꞌ kaꞌam ilu subay mbal angangut niōnan ‘Tuwan Guru’ eꞌ pagkahibi, sabab in kaꞌam magdauranakan kamemon, maka dakayuꞌ du gurubi luggiyaꞌ. 9 Daꞌa panabbutinbi ‘Mmaꞌ’ sai-sai ma deyom dunya itu, sabab dakayuꞌ du pagꞌmmaꞌanbi, ya Tuhan ma deyom sulgaꞌ. 10 Daꞌa kam mikiōn nakuraꞌ, sabab tunggal Al-Masi ya pagnakuraꞌanbi. 11 Sai-sai bilahi alanga ma deyomanbi, subay iya magpaꞌata ma kaseheꞌanna. 12 Sai-sai magpalanga ma baranna, pinareyoꞌ du iya, maka sai-sai amareyoꞌ di-na pinalanga du isab.”
Saga Aꞌa Magbauꞌ-bauꞌ in Sigām Ahāp
13 “Makaꞌaseꞌ-aseꞌ sidda ya pamakadal kaꞌam, saga guru saraꞌ agama maka saga Parisi!” yuk si Isa. “Magbauꞌ-bauꞌ sadja kam in kaꞌam ahāp addatbi, sagōꞌ tambolanbi saga aꞌa boꞌ supaya sigām mbal makasōd ni deyom pagparintahan Tuhan. Kaꞌam baranbi ilu mbal bilahi pasōd pinaꞌan, maka lāngbi isab sasuku bilahi pasōd. [ 14 Makaꞌaseꞌ-aseꞌ sidda ya pamakadal kaꞌam, saga guru saraꞌ agama maka saga Parisi, ya magbauꞌ-bauꞌ in kaꞌam ahāp! Niꞌinyaya eꞌbi saga dꞌnda balu boꞌ taꞌāꞌbi lumaꞌ sigām, ati patahaꞌbi panambahayangbi paglaku-lakubi in kaꞌam bal-iman, boꞌ paꞌin katapukan kahinanganbi alaꞌat. Angkan pinakalap kabinasahanbi ma ahirat.]
15 “Makaꞌaseꞌ-aseꞌ sidda ya pamakadal kaꞌam, saga guru maka saga Parisi! Magbauꞌ-bauꞌ kam ahāp addatbi! Atuyuꞌ kam amasaplag panduꞌbi, ya angkan lintasbi deya-dilaut bang paꞌin aniyaꞌ tabowabi ameyaꞌ ma panduꞌbi minsan laꞌa hal dakayuꞌ aꞌa. Ati bang aniyaꞌ gantaꞌ makabeyaꞌ, akalap giꞌ iya min kaꞌam pinagantaꞌan nalkaꞌ, ma sabab pamanduꞌbi ya pameyaꞌanna.
16 “Makaꞌaseꞌ-aseꞌ sidda ya pamakadal kaꞌam! Saliꞌ kam sapantun aꞌa buta angambit pagkahina. Yuk pamanduꞌbi, bang aniyaꞌ anganjanjiꞌ boꞌ sabbutna langgal pagkulbanan palsaksiꞌan janjiꞌna, halam du aniyaꞌ dusana minsan mbal suhulna bay janjiꞌna heꞌ. Sagōꞌ bang kapanyapan bulawan ma deyom langgal ya panabbutanna, wajib konoꞌ subay suhulna toꞌongan. 17 Asāꞌ landuꞌ pikilanbi, bāꞌnu kam abuta! Langgal inān asal pangarapan ni Tuhan, angkan yukta asussi kapanyapanna. 18 Aniyaꞌ isab pamanduꞌbi dakayuꞌ, yuk-i, sai-sai anabbut tongod pagkulbanan palsaksiꞌan janjiꞌna, makajari minsan mbal sinuhul janjiꞌna. Sagōꞌ bang panabbutanna ai-ai tinukbalan ni Tuhan ma diyataꞌ pagkulbanan eꞌ, in janjiꞌna konoꞌ wajib subay sinuhul toꞌongan. 19 Asāꞌ landuꞌ pikilanbi! Ingga aheya gunana, ya ai-ai tinukbalan ma diyataꞌ pagkulbanan, atawa pagkulbanan sussi, ya makabuwan kasussihan isab ma tutukbalan eꞌ? 20 Angkanna, bang aniyaꞌ aꞌa gantaꞌ anabbut pagkulbanan, panabbutanna isab kamemon ya tinukbalan ni Tuhan mainaꞌan. 21 Damikiyanna, bang aniyaꞌ anabbut langgal pagkulbanan, panabbutanna isab Tuhan ya patꞌnnaꞌ asal mainaꞌan. 22 Bang aniyaꞌ anabbut sulgaꞌ, panabbutanna isab paningkōꞌan Tuhan maka panabbutanna isab Tuhan.
23 “Makaꞌaseꞌ-aseꞌ sidda ya pamakadal kaꞌam, saga guru saraꞌ maka saga Parisi! Magbauꞌ-bauꞌ kam ahāp addatbi. Atukid sidda kam anukbal ni Tuhan bahagiꞌ sangpūꞌ min ai-aibi kamemon, minsan laꞌa hal ginisan sayul-sayul ya pamapābi kinakan. Ahāp isab kapanukbalbi buwattēꞌ, daꞌa subay niꞌbbahan, sagōꞌ ya panohoꞌan ahalgaꞌ min kamemon halam kabogboganbi. Mbal kam aꞌadil, mbal kam maꞌaseꞌ ma pagkahibi, mbal kam kapangandolan. Arapun ilu-i panuyuꞌanbi toꞌongan dahū min kamemon. 24 Saliꞌ kam aꞌa buta ya angambit seheꞌna. Sapantun kam aꞌa angayak inumanna boꞌ mbal makainum kammut, boꞌ paꞌin tatꞌllonna untaꞌ ma katibuꞌukanna.
25 “Makaꞌaseꞌ-aseꞌ sidda ya pamakadal kaꞌam, saga guru maka saga Parisi! Magbauꞌ-bauꞌ kam ahāp addatbi. Saliꞌ kam sapantun sawan maka lai. Koseꞌanbi luwasanna sagōꞌ haram deyomna sabab apꞌnnoꞌ eꞌ pangalangpasbi maka pagnapsubi dumasiyaw. 26 Kaꞌam saga Parisi, asāꞌ sidda pikilanbi! Lanuꞌinbi dahū deyomna ati alanuꞌ sampay luwasanna.
27 “Makaꞌaseꞌ-aseꞌ sidda ya pamakadal kaꞌam, saga guru maka saga Parisi! Magbauꞌ-bauꞌ kam ahāp addatbi. Saliꞌ kam sapantun kubul bay pininta poteꞌ luwasanna boꞌ ahāp nindaꞌ, sagōꞌ deyomna akansang eꞌ toꞌolang mayat maka ginis kahaluꞌan. 28 Buwattēꞌ isab hantangbi. Bang pangluwahanbi taꞌndaꞌ eꞌ aꞌa, ahāp sadja, sagōꞌ deyom ataybi ilu apꞌnnoꞌ eꞌ pagbauꞌ-bauꞌbi maka kalaꞌatanbi.”
Kadal saga Guru Agama maka saga Parisi
29 “Makaꞌaseꞌ-aseꞌ ya pamakadal kaꞌam, saga guru maka saga Parisi! Magbauꞌ-bauꞌ kam ahāp addatbi. Tahinangbi tampat ma kanabi-nabihan, tapaꞌaltibi saga kubul bay pangubulan aꞌa kaꞌadilan. 30 Yukbi isab, ‘Bang bay kami allum ma waktu kaꞌmboꞌan kami heꞌ, mbal du kami bay palamud ma hinang saga aꞌa kaseheꞌan, ya kapamapatay sigām ma saga nabi heꞌ.’ 31 Na,” yuk si Isa, “pagka buwattilu pahꞌllingbi, magpasabꞌnnal kam in kaꞌam panubuꞌ min saga aꞌa bay amonoꞌ kanabihan eꞌ. 32 Pehēꞌunbi na, talusunbi saga dusa ya bay tinagnaꞌan eꞌ kaꞌmboꞌanbi.
33 “Mbal tasipat laꞌatbi! Halam aniyaꞌ kaholatanbi papuwas min hukuman nalkaꞌ. 34 Hakaꞌanta kam, papiꞌiluku du ni kaꞌam saga nabi, saga aꞌa bal-akkal, maka saga guru. Bonoꞌbi du sigām kaseheꞌ, kaseheꞌ isab lansangbi du ni hāg pinapatay, kaseheꞌ daplosanbi ma deyom langgal, maka kaseheꞌan turulbi du min kalumaꞌan dakayuꞌ ni dakayuꞌ. 35 Angkan kam pinatꞌkkahan hukuman, ma sabab kapamapataybi ma saga aꞌa halam taga-dusa, tinagnaꞌan min si Habil anak si Adam, sampay ni si Jakariya anak si Baraki. Si Jakariya heꞌ bay pinapatay eꞌ bangsabi ma llotan langgal maka tongod pagkulbanan. 36 Hakaꞌanta kam toꞌongan, kaꞌam ma ahil jaman itu pamatanggungan du karusahan saga aꞌa inān kamemon.”
Lasa si Isa ma saga Aꞌa Awrusalam
37 Magkarukkaꞌan si Isa yukna, “Arōy! Kaꞌam saga aꞌa Awrusalam, makasusa koꞌ kaꞌam ilu! Saga nabi min Tuhan hal papataybi. Saga sosohoꞌan Tuhan hal bantungbi bang pinapiꞌilu ni kaꞌam. Min pila aku bay bilahi animuk kaꞌam ma sabakanku, saliꞌ sapantun manuk dꞌnda bang magsabak anak-anakna ma deyoꞌ pikpikna. Sagōꞌ mbal kam. 38 Ndaꞌunbi na, asiya-siya lahatbi eꞌ Tuhan. 39 Hakaꞌanta kam, mbal na aku taꞌndaꞌbi pabalik sampay ni waktu kapananglitbi ma aku, ya yukbi, ‘Bang paꞌin binarakatan ya pinapiꞌitu kawakilan eꞌ Tuhan.’ ”