13
Pangꞌbba min Dusa maka Kapamutawan min Tuhan
1 Na, ma waktu inaꞌan-i aniyaꞌ saga aꞌa anuli-nuli ni si Isa pasal saga aꞌa Jalil, ya bay sinōꞌ binonoꞌ eꞌ gubnul Pilatu pasaltaꞌ ma waktu kapanumbaliꞌ sigām hayop pagkulban ni Tuhan. 2 Anambung si Isa ma sigām, yukna, “Pangannalbi bahāꞌ in dusa saga aꞌa inān labi giꞌ min aꞌa kamemon maitu ma lahat Jalil, ya angkan sigām tꞌkkahan balaꞌ buwattēꞌ? 3 Nggaꞌi ka! Sagōꞌ hakaꞌanta kam, bang kaꞌam ilu mbal angꞌbba min dusabi, ya du kaꞌam amatay buwat saga aꞌa Jalil eꞌ. 4 Saga aꞌa isab sangpūꞌ maka waluꞌ hekana, ya bay amatay mahēꞌ ma Silowam pagka kahꞌbbaꞌan eꞌ lumaꞌ pamantawan, pangannalbi bahāꞌ in sigām dusahan lagiꞌ min aꞌa Awrusalam kaseheꞌ. 5 Tantu nggaꞌi ka! Sagōꞌ bang kaꞌam ilu mbal angꞌbba toꞌongan min dusabi, amatay du kam buwat sigām.”
6 Manjari aniyaꞌ paralilan pangissa si Isa ma sigām. Yukna, “Aniyaꞌ aꞌa taga-kayu igira patomoꞌ ma deyom kabbunna, ya panomoꞌan bahan anggul. Pinaꞌan iya amiha buwaꞌ igira sagōꞌ halam aniyaꞌ tapihana, 7 angkan yukna ni tungguꞌ kabbun inān, ‘Ndaꞌun, tꞌlluntahun na kapagpiꞌitu-piꞌituku ni kayu igira itu amiha buwaꞌ sagōꞌ halam aniyaꞌ tapihaku. Puwarun na, sabab kaliman tanaꞌ itu.’ 8 Saguwāꞌ anambung tungguꞌ kabbun eꞌ, yukna, ‘Daꞌa, tuwan. Pasagaranta giꞌ dantahun. Kalutku pahāp tanaꞌna, tambalanku maka taiꞌ hayop. 9 Bang hatiꞌ amuwan buwaꞌ ma musim sinōng itu, ahāp isab. Bang mbal, na minsan puwadnu na.’ ”
Dꞌnda Buggul Kauliꞌan ma Llaw Paghali
10 Ma dakayuꞌ llaw Sabtuꞌ, inaꞌan si Isa amanduꞌ ma deyom langgal. 11 Aniyaꞌ mainaꞌan dakayuꞌ dꞌnda asaki sabab min saitan, sangpūꞌ na maka waluntahun tꞌggolna. Parukkug sidda bukutna, mbal tapahꞌnnat. 12 Pagꞌndaꞌ si Isa ma dꞌnda itu, sinōꞌ iya pasekot. Yuk si Isa ma iya, “Arung, apuwas na ka min sakinu ilu.” 13 Jari pinaꞌabut eꞌ si Isa tanganna ma iya. Magtūy iya pahꞌnnat ati ananglit ma Tuhan.
14 Sagōꞌ nakuraꞌ langgal inān, apasuꞌ atayna pagka si Isa amauliꞌ aꞌa ma llaw Sabtuꞌ. Yukna ma saga aꞌa mainaꞌan, “Nnom llaw ma deyom dapituꞌ wajib paghinangtam ai-ai. Piꞌitu kam ma deyom nnom llaw inān bang kam bilahi kauliꞌan sakibi, daꞌa bang llaw Sabtuꞌ.”
15 Sinambungan nakuraꞌ inān eꞌ si Isa, yukna, “Magbauꞌ-bauꞌ pahāp kaꞌam ilu. Aniyaꞌ bahāꞌ ma kaꞌam mbal angahubaran sapiꞌna atawa kuraꞌna boꞌ yampa guyudbi ni boheꞌ supaya painumbi, minsan pasabu ma llaw Sabtuꞌ? 16 Dꞌnda itu panubuꞌ si Ibrahim du buwat kaꞌam. Aniyaꞌ na sangpūꞌ maka waluntahun tꞌggolna bay katahanan eꞌ nakuraꞌ saitan. Mbal bahāꞌ iya wajib pinuwasan min susana ma llaw Sabtuꞌ?” 17 Magtūy kaiyaꞌan saga aꞌa ya anaggaꞌ si Isa ma sabab panambungna heꞌ. Sagōꞌ saga aꞌa inān akōd kamemon ma sabab hinang makainu-inu kamemon ya tahinang eꞌna.
Paralilan Pasal Bigi-tinanom Landuꞌ Anahut
18 Amissala giꞌ si Isa, yukna, “Ai pamasaliꞌantam pagparinta Tuhan ma bangsa manusiyaꞌ? Ai pamaralilanku iya? 19 Ya pagparinta Tuhan,” yuk si Isa, “saliꞌ dalil dansolag bigi-tinanom arikiꞌ-dikiꞌ, tinanom eꞌ aꞌa ma tanaꞌna. Patomoꞌ paꞌin itu, manjari tahinang kayu na, ati pinaꞌan saga manuk-manuk patapuꞌ ma sangana.”
Paralilan Pasal Pasulig ya Pangalamud Tirigu
(Matiyu 13.33)
20 Ahꞌlling si Isa pabīng, yukna, “Ai pamaralilanku pagparinta Tuhan ma manusiyaꞌ? 21 Ya pagparinta Tuhan,” yukna, “saliꞌ dalil pasulig ginuna eꞌ dꞌnda pinalamud ni tirigu aheka, saga duwampūꞌ maka lima kilu. Pagaddun paꞌin, abuskag kamemon addunan.”
Lawang Akiput
22 Jari palanjal si Isa tudju ni daꞌira Awrusalam hinabuna angalatag saga kalumaꞌan aheya-arikiꞌ amanduꞌ ma saga aꞌa. 23 Aniyaꞌ inān dakayuꞌ aꞌa atilaw iya, yuk-i, “Tuwan, akulang bahāꞌ saga aꞌa lappasan eꞌ Tuhan min mulkaꞌ?”
Yuk sambung si Isa ma saga aꞌa inān, 24 “Bang kam bilahi pasōd ni deyoman Tuhan subay kam amuspus boꞌ kam makasōd min lawangna akiput. Sabab hakaꞌanta kam, aheka aꞌa anulay pasōd sagōꞌ mbal makasōd. 25 Makabungkal paꞌin tag-dapu lumaꞌ anambol lawang, mbal na kam makasōd. Ma luwasan lawang sadja kam angukuꞌ maka angalingan. Yukbi, ‘O tuwan, ukabin kami.’ Sinambungan du kam eꞌna, yukna, ‘Mbal kataꞌuwanku kam bang minningga!’ 26 Jari yukbi, ‘Takalipatnu bahāꞌ kami? Bay kami dakakanan maka kaꞌa. Bay ka amanduꞌ ma lahat kami.’ 27 Sagōꞌ balikanna du bay llingna ma kaꞌam, yukna, ‘Hakaꞌanta kam, mbal kataꞌuwanku bang kam minningga. Alaꞌan kam min aku, kaꞌam kamemon maghinang kalaꞌatan ilu!’ 28 Manjari magalud du kam, magtageꞌot isab emponbi ma waktu inaꞌan bang taꞌndaꞌbi kaꞌmboꞌ-mboꞌanbi disi Ibrahim, si Isaꞌak maka si Yakub, sampay saga kanabi-nabihan kamemon waꞌi bay pinasōd ni deyom pagparintahan Tuhan. Malaingkan kaꞌam ya nilarukan paluwas. 29 Patimuk du isab pinaꞌan saga aꞌa min mpat pidjū alam ati magtingkōꞌan sigām mainaꞌan boꞌ magjamu ma deyom pagparintahan Tuhan. 30 Pataꞌu kam, aniyaꞌ saga aꞌa taramuli ma buwattinaꞌan, pinarahū du ma sinosōng. Maka aniyaꞌ saga aꞌa makarahū ma buwattinaꞌan, pinaramuli isab ma waktu sinōng.”
Lasa si Isa ma saga Aꞌa Awrusalam
31 Manjari ma waktu inaꞌan, aniyaꞌ pinaꞌan ni si Isa saga aꞌa Parisi. Yuk sigām, “Tuwan, subay ka alaꞌan minnitu sabab sultan Herod inān bilahi amapatay kaꞌa.”
32 Anambung si Isa, yukna, “Pehēꞌ kam angahakaꞌan si Herod pangangakkal inān bang ai hinangku. Llaw itu maka salung landuꞌanku hinangku amalaꞌan saitan min baran aꞌa, sampay amauliꞌ saga aꞌa asaki. Ati ma llaw katꞌlluna atangbus eꞌku hinangku. 33 Sagōꞌ subay aku palanjal ni palꞌngngananku llaw itu maka salung sampay isab ni kasimuddayan. Halam du aniyaꞌ laꞌat makani-aku maitu sabab Awrusalam ya lahat pamapatayan kahekaꞌan saga nabi.”
34 Sakali magkarukkaꞌan si Isa ma pasal daꞌira Awrusalam. “Arōy!” yukna. “Kaꞌam saga aꞌa Awrusalam, makasusa koꞌ kam ilu! Saga nabi min Tuhan hal papataybi. Saga sosohoꞌan Tuhan isab hal bantungbi bang sigām pinapiꞌilu ni kaꞌam. Min pila aku bay bilahi animuk kaꞌam ma sabakanku? Saliꞌ sapantun manuk dꞌnda bang pasabakna anak-anakna ma deyoꞌ pikpikna. Sagōꞌ mbal kam bilahi. 35 Ndaꞌunbi na, asiya-siya du langgalbi eꞌ Tuhan. Maka hakaꞌanta kam, song na aku mbal taꞌndaꞌbi satꞌggol halam taꞌabut waktu pananglitbi aku. Subay yukbi, ‘Bang paꞌin binarakatan iya pinapiꞌitu kawakilan eꞌ Tuhan,’ boꞌ yampa aku taꞌndaꞌbi.”