7
Pasal Panoway Pagkahi
1 “Daꞌa sāꞌunbi pagkahibi boꞌ kam mbal sināꞌ eꞌ Tuhan. 2 Sabab bang kam gantaꞌ amatꞌnnaꞌ hukuman ma seheꞌbi, ya du kaꞌam pinatꞌnnaꞌan hukuman eꞌ Tuhan, pinapagtongod maka bay pangahukumbi seheꞌbi heꞌ. Ai-ai panꞌppongbi ma seheꞌbi, ya du isab panꞌppong Tuhan ma kaꞌam. 3 Kaꞌam magsoway seheꞌbi ilu, angay taꞌndaꞌbi bukbuk ma mata seheꞌbi, ati mbal taꞌndaꞌbi batang kayu ya ma deyom matabi? 4 Mamarahi pahāp kaꞌam ilu! Yukbi, ‘Tabiyaꞌ, laꞌananta bukbuk min matanu ilu.’ Boꞌ paꞌin aniyaꞌ batang kayu ma deyom matabi! 5 In kaꞌam ilu maglaku-laku halam taga-sāꞌ! Laꞌaninbi giꞌ dahū ya bukbuk ma matabi ilu supaya asawa pangꞌndaꞌbi, boꞌ yampa kam angalaꞌanan bukbuk min mata seheꞌbi.
6 “Daꞌa kam amuwan ai-ai asussi ma saga aꞌa alaꞌat, ya saliꞌ sapantun eroꞌ. Ya aniyaꞌ pabibud angalꞌkkob kaꞌam. Lapalbi ahalgaꞌ, ya pinagbahasa mussaꞌbi, daꞌa larukinbi ni saga bawi. Ya aniyaꞌ pinaggiꞌik-giꞌikan eꞌ sigām.”
Angamuꞌ-ngamuꞌ, Amiha, Mikiukab
7 “Angamuꞌ-ngamuꞌ kam, ati binuwanan du. Amiha kam, ati makabāk du kam. Mikiukab kam, ati niukaban du kam. 8 Sabab sai-sai angamuꞌ kabuwanan du. Sai-sai amiha makabāk du. Sai-sai isab mikiukab niukaban du. 9 Kaꞌam taga-anak ilu, abila kam pangamuꞌan tinapay eꞌ anakbi, buwananbi bahāꞌ batu? 10 Atawa bang angamuꞌ daing, buwananbi bahāꞌ sowa? 11 Minsan kaꞌam dusahan ilu ataꞌu amuwanan anakbi ai-ai makahāp, lubaꞌ-lagiꞌna na Mmaꞌbi ma sulgaꞌ ataꞌu du amuwanan ai-ai makahāp ni sasuku angamuꞌ ni iya.
12 “Manjari bang kabayaꞌanbi kinahāpan eꞌ aꞌa, subay isab sigām kahāpanbi. Ya na heꞌ kamaksuran saraꞌ ya bay tasulat eꞌ si Musa maka saga kanabi-nabihan.”
Lawang Akiput
13 “Pasōd kam min lawang akiput, sabab ya lān tudju ni nalkaꞌ aluha pasōranna maka aluhay nilꞌngngan. Aheka isab manusiyaꞌ ameyaꞌ min lān inān. 14 Saguwāꞌ ya pasōran tudju ni sulgaꞌ akiput maka ahunit nilꞌngngan. Akulang isab aꞌa makatuliꞌ iya.”
Pasal Kayu maka Buwaꞌna
15 “Kamayaꞌ-mayaꞌ kam boꞌ kam mbal kaꞌakkalan eꞌ saga aꞌa magbauꞌ-bauꞌ in sigām nabi. Ahāp pangluwahan sigām bang ma pangꞌndaꞌta, saliꞌ sapantun bili-bili mbal makamula. Sagōꞌ ma deyom atay sigām saliꞌ sigām eroꞌ talun, sidda abꞌngngis. 16 Takilābi du sigām min kahinangan sigām, buwat kayu takilā min buwaꞌna. Mbal kita angāꞌ buwaꞌ anggul min kayu puhung, atawa buwaꞌ kayu igiraa min sampinit. 17 Bang kayu ahāp, ahāp isab buwaꞌna. Sagōꞌ bang kayu mbal ahāp, mbal isab ahāp buwaꞌna. 18 Bang kayu ahāp mbal makabuwan buwaꞌ alaꞌat. Damikiyanna bang kayu alaꞌat suligna, mbal makabuwan buwaꞌ ahāp. 19 Bang aniyaꞌ kayu mbal ahāp pagbuwaꞌna, pinuwad du boꞌ tinimanan ni deyom api. 20 Angkan yukku ma kaꞌam, takilābi du saga nabi ya nggaꞌi ka bꞌnnal sabab min kahinangan sigām.”
Saga Aꞌa Mbal Takilā
21 “Nggaꞌi ka aꞌa kamemon ya anabbut aku ‘Panghūꞌ, O Panghūꞌ,’ makasōd ni deyom pagparintahan Tuhan. Luwal saga aꞌa ya ameyaꞌ ma kabayaꞌan Mmaꞌku ma sulgaꞌ. 22 Bang taꞌabut na llaw pangahukum ma manusiyaꞌ, aheka du amissala ni aku, yuk-i: ‘O Panghūꞌ, bay kami amatanyag lapal Tuhan min kawasa ōnnu. Bay kami amalaꞌan baꞌanan saitan min deyom baran aꞌa, maka aheka isab saga hinang makainu-inu bay tahinang kami, min kawasa ōnnu.’ 23 Sakali bontolanku sigām, yukku, ‘Mbal kam takilāku. Alaꞌan kam min aku, kaꞌam kamemon maghinang kalaꞌatan ilu.’ ”
Duwa Ginis Aꞌa Magpatꞌngge Lumaꞌ
24 “Na, sasuku aꞌa akale ma bissalaku itu sampay ameyaꞌ, in iya saliꞌ aꞌa ahāp akkalna, ya bay makahinang lumaꞌna ma papagan abatu. 25 Manjari aniyaꞌ ulan alandos bay patumbuk, maka angandunuk kasapaꞌan, maka taluwaꞌ hunus lumaꞌ inān. Sagōꞌ halam ahꞌbbaꞌ sabab ahogot papaganna. 26 Sasuku isab akale ma bissalaku boꞌ mbal ameyaꞌ, saliꞌ kahantang aꞌa kulang akkalna, ya makahinang lumaꞌna ma kalꞌbbohan. 27 Jari aniyaꞌ ulan alandos patumbuk, boꞌ angandunuk kasapaꞌan, boꞌ taluwaꞌ hunus lumaꞌ inān. Magtūy ahꞌbbaꞌ, alubu toꞌongan.”