8
Aꞌa Niꞌipul Kauliꞌan
1 Makalūd paꞌin si Isa min bīd-bīd inān, aheka toꞌongan aꞌa bay paturul ma iya. 2 Manjari aniyaꞌ aꞌa niꞌipul pinaꞌan ni si Isa boꞌ angōk-tuꞌut min dahuanna. Yukna, “Tuwan, bang ka bilahi, kauliꞌannu aku.”
3 Magtūy tinꞌppak aꞌa inān eꞌ si Isa. Yuk si Isa, “Bilahi sadja aku. Kauliꞌan na ka!” Saruꞌun-duꞌun du kauliꞌan ipul aꞌa inān. 4 Yuk si Isa ni iya, “Pakale ka. Daꞌa ka angahaka ni sai-sai ya bay tahinang ma kaꞌa ilu. Sagōꞌ pehēꞌ ka patūy ni imam boꞌ palilingun barannu ma iya. Puwas eꞌ tukbalin kukulbanan ni Tuhan buwat bay pamanduꞌ eꞌ si Musa, tandaꞌ saksiꞌ ni kahekaꞌan aꞌa in kaꞌa ilu alanuꞌ na.”
Sosohoꞌan Kapitan Kauliꞌan
5 Manjari itu, pasōd paꞌin si Isa ni deyom daꞌira Kapirnaum, aniyaꞌ dakayuꞌ kapitan bangsa Rōm bay pasampang ni iya angamuꞌ tabang. 6 Yukna ni si Isa, “Tuwan, aniyaꞌ sosohoꞌanku ma lumaꞌ. Inaꞌan iya palege, mbal minsan makaosegan di-na. Kapꞌddiꞌan iya toꞌongan.”
7 Yuk si Isa, “Pehēꞌ du aku amauliꞌ iya.”
8 “Daꞌa ka pehēꞌ, Tuwan,” yuk kapitan. “In lumaꞌku mbal tōp papeheꞌannu. Angabtang sadja ka minnilu ati kauliꞌan du sosohoꞌanku heꞌ. 9 Minsan aku itu, biyaksa du pinagbayaꞌan eꞌ aꞌa min diyataꞌanku, maka aniyaꞌ isab sundalu pagbayaꞌanku. Bang sōꞌku dangan pehēꞌ, pehēꞌ du iya. Bang sōꞌku dangan piꞌitu, piꞌitu du iya ni aku. Damikiyanna bang aniyaꞌ pahinangku ma sosohoꞌanku, magtūy nihinang eꞌna.”
10 Pagkale paꞌin pahꞌlling kapitan itu eꞌ si Isa, ainu-inu iya. Yukna ni saga aꞌa paturul ma iya inān, “Hakaꞌanta kam toꞌongan. Minsan ma deyom bangsatam Israꞌil halam aku bay makabāk aꞌa buwat kapitan itu, akosog imanna. 11 Pakale kam. Ma waktu sinōng aheka aꞌa min bangsa kaginisan, aꞌa bay min sobangan maka min sꞌddopan, magtingkōꞌan magsalu maka disi Ibrahim, si Isaꞌak maka si Yakub. 12 Sagōꞌ saga bangsa Israꞌil itu, ya sukuꞌ ma pagparintahan Tuhan, nilarukan du tudju ni kalendoman, ati mainaꞌan magalud maka magtageꞌot empon sigām sabab min kapagsusun sigām.”
13 Sakali amissala si Isa ni kapitan inān, yukna, “Amoleꞌ na ka. Tahinang ma kaꞌa buwat bay pagkahagadnu.” Manjari saruꞌun-duꞌun kauliꞌan sosohoꞌanna ma waktu heꞌ-i du.
Aheka Aꞌa Kauliꞌan
14 Sakali palanjal si Isa pehēꞌ ni lumaꞌ disi Simun. Pagsōdna ni deyom lumaꞌ inān, taꞌndaꞌna matoꞌa si Simun dꞌnda palege mainaꞌan, nilꞌmmun. 15 Niꞌntanan eꞌ si Isa tangan dꞌnda itu, ati pahali magtūy bay lꞌmmunna. Puwas eꞌ punduk iya angalabotan disi Isa.
16 Taꞌabut paꞌin pasꞌddop llaw, aheka aꞌa sinōd saitan bay binowa pinaꞌan ni si Isa. Ati pinalaꞌan eꞌna saga saitan, min kabtanganna sadja. Maka aꞌa taga-saki inān kamemon bay kauliꞌan eꞌna. 17 Buwattēꞌ hinangna boꞌ aniyaꞌ kamaksuran ma bay tasulat ma Kitab eꞌ nabi Isaya, ya yuk-i,
“Bay iya anguliꞌan saga kalammahantam,
bay iya ananggung saga sakitam.”
Aꞌa Maghawal-hawal Ameyaꞌ ma si Isa
18 Taꞌndaꞌ paꞌin eꞌ si Isa aheka aꞌa ma sakalibutna, yukna ni saga mulidna, “Sūng kitam pauntas ni dambilaꞌ danaw.”
19 Ma halam giꞌ sigām makauntas, aniyaꞌ dakayuꞌ guru saraꞌ agama bay pinaꞌan ni si Isa. Yukna, “Tuwan Guru, lillaꞌ aku ameyaꞌ ma kaꞌa piꞌingga-piꞌingga papeheꞌannu.”
20 Yuk sambung si Isa, “Gom hayop talun aniyaꞌ patapukanna, maka saga kamanuk-manukan aniyaꞌ pugaranna. Sagōꞌ aku Anak Manusiyaꞌ itu, halam aniyaꞌ minsan patulihanku luggiyaꞌ.”
21 Aniyaꞌ isab dakayuꞌ mulid inān ahꞌlling ni si Isa, yukna, “Tuwan, pabaꞌirun lagiꞌ aku pabīng ni lumaꞌ. Subay na apuwas pangubulku ma mmaꞌku boꞌ yampa aku ameyaꞌ ma kaꞌa.”
22 Sagōꞌ yuk si Isa, “Ameyaꞌ na ka ma aku. Patut bang aꞌa amatay pinakubul ma saga aꞌa ya halam kaniyaꞌan kallum taptap.”
Baliyu maka Goyak
23 Puwas eꞌ paruwaꞌ si Isa ni bayanan, maka ameyaꞌ isab saga mulidna. 24 Makauntas paꞌin, parugpak hunus ni danaw inān. Agon-agon sigām abuhaw sabab sinasay eꞌ goyak, sagōꞌ inaꞌan si Isa atuli. 25 Pasekot ni iya saga mulidna amatiꞌ iya. “O Tuwan,” yuk sigām, “anabang ka sabab abuhaw na kitam!”
26 Yuk si Isa ma sigām, “Angay kam tināw? Kulang pahāp imanbi!” Manjari pabungkal si Isa boꞌ yampa sohoꞌna baliyu maka goyak inān pahondong. Saruꞌun-duꞌun du magtūy atꞌddoꞌ lahat inān.
27 Ainu-inu saga mulid eꞌ. “Ai bahāꞌ aꞌa itu?” yuk sigām. “Minsan baliyu maka goyak kapagagihan eꞌna.”
Duwangan Aꞌa Kapalaꞌanan Saitan
28 Pagubus, makatandan disi Isa pehēꞌ ni dambilaꞌ danaw, ni lahat saga aꞌa Gadara. Makarungguꞌ paꞌin, aniyaꞌ pasampang ni iya duwangan aꞌa bay paluwas min kakubulan, aꞌa sinōd saga saitan. Landuꞌ abꞌngngis saga aꞌa itu angkan halam aniyaꞌ makatawakkal palabay minnaꞌan. 29 Magtūy sigā angolang, yuk-i, “O Anak Tuhan! Ai lamudnu ma kami? Piꞌitu ka bahāꞌ aminasa kami ma mbal giꞌ taꞌabut gantaꞌan?”
30 Na, atā-tā lagiꞌ minnēꞌ, aniyaꞌ baꞌanan bawi magkakanan. 31 Sakali anganjunjung saga saitan eꞌ ma si Isa, yuk-i, “Bang kami subay palaꞌannu, pasōrun kami ni deyom baran saga bawi inān.”
32 “Pehēꞌ na kam,” yuk si Isa. Sakali alaꞌan saga saitan min baran aꞌa heꞌ boꞌ pasalin pehēꞌ ni deyom baran baꞌanan bawi. Magtūy maglumpat paragan baꞌanan bawi heꞌ min pampang tudju ni deyom danaw, ati alembo kamemon.