5
Aꞌa Sinōd Saitan Kapalaꞌanan eꞌ si Isa
1 Manjari itu patandan disi Isa ni dambilaꞌ danaw Jalil, ni lahat saga aꞌa Gerasa. 2 Pagdeyoꞌ paꞌin si Isa ni gintanaꞌan aniyaꞌ pasampang ni iya dangan aꞌa bay paluwas min deyom kakubulan mainaꞌan, aꞌa sinōd saitan. 3 Patꞌnnaꞌ asal iya ma deyom kakubulan. Mbal iya kaengkotan eꞌ aꞌa minsan kilikili basiꞌ ya pangengkot iya. 4 Min heka iya bay niengkotan ma tapeꞌ-tanganna sagōꞌ abꞌkkat sadja eꞌna saga kilikili. Tabꞌkkat isab eꞌna engkot tapeꞌna ati halam aniyaꞌ makahawiran iya sabab kosogna. 5 Ya sadja hinangna llaw-sangom hal magpehēꞌ-piꞌitu ma deyom kakubulan maka ma kabūd-būran. Angolang na paꞌin iya pakosog sampay magkanaman di-na maka batu.
6 Na, pagꞌndaꞌ aꞌa itu ma si Isa min katāhan lagiꞌ, paragan iya boꞌ pasujud ma dahuanna. 7 Akosog pangalinganna ma si Isa, yukna, “O Isa, Anak Tuhan Mahatinggi! Ai kagunahannu ma aku? Anapa ka ma ōn Tuhan, daꞌa aku binasahun.” 8 Angkan buwattēꞌ junjungna sabab aniyaꞌ bay panohoꞌan si Isa ma saitan eꞌ, ya yukna, “Alaꞌan ka min deyom baran aꞌa ilu, saitan!”
9 Tinilaw iya eꞌ si Isa, yukna, “Sai ōnnu?”
Yuk sambung lꞌlla inān, “Ōnku Laksaꞌan sabab kami itu asal aheka.” 10 Ati angamuꞌ-ngamuꞌ na paꞌin saga saitan inān ma si Isa bang paꞌin sigām mbal pinalaꞌan min lahat inān.
11 Jari aniyaꞌ baꞌanan bawi magkakanan mainaꞌan ma lorosan būd, landuꞌ aheka. 12 Sakali angamuꞌ-ngamuꞌ saga saitan ma si Isa, yuk-i, “Sohoꞌun kami pehēꞌ ni saga bawi inān, pasōrun kami ni deyom baran sigām.” 13 Na, pinabaꞌid eꞌ si Isa saga saitan inān ati paluwas sigām min baran aꞌa boꞌ yampa pasōd ni baran saga bawi. Magtūy maglumpat magdaganan baꞌanan bawi inān min pampang tudju ni deyom danaw boꞌ yampa alembo kamemon. Ya heka bawi maglembohan inān aniyaꞌ kulang-labi duwangibu.
14 Pagꞌndaꞌ itu eꞌ saga magiꞌipat inān, paragan sigām ni daꞌira maka ni saga aꞌa maghuma angahaka pasal pakaradjaꞌan itu. Jari sasuku makakale bay pehēꞌ angꞌndaꞌ. 15 Pagtꞌkka sigām ni atag si Isa, taꞌndaꞌ aꞌa bay sinōd saitan laksaꞌan eꞌ. Inaꞌan iya aningkōꞌ, magsinꞌmmek na maka ahāp na akkal-pikilanna. Jari tināw sigām. 16 Sinuli-sulihan isab sigām eꞌ saga aꞌa bay makaꞌndaꞌ pasal bay tajari ma aꞌa sinōd saitan maka ma pasal saga bawi. 17 Jari angamuꞌ junjung saga aꞌa inān ma si Isa bang paꞌin iya alaꞌan min lahat sigām.
18 Manjari itu, pasaltaꞌ paꞌin si Isa paruwaꞌ ni bayanan, angamuꞌ aꞌa bay sinōd saitan inān ameyaꞌ ma iya.
19 Sagōꞌ mbal si Isa. Yukna ma iya, “Amoleꞌ na ka ni lahatnu, ni saga lūng-kampungnu. Hakaꞌin sigām pasal hinang aheya ya bay tahinang eꞌ Tuhan ma kaꞌa maka pasal kaꞌaseꞌna ma kaꞌa.”
20 Manjari alaꞌan aꞌa inān minnēꞌ boꞌ angalatag lahat niōnan Sangpūꞌ Daꞌira angahakaꞌan saga aꞌa mahēꞌ pasal hinang aheya bay tahinang ma iya eꞌ si Isa. Ati ainu-inu ma iya saga aꞌa kamemon.
Ondeꞌ-ondeꞌ Amatay maka Dꞌnda Asaki
21 Na, amayan si Isa pehēꞌ ni dambilaꞌ danaw Jalil boꞌ pabīng ni bay baina. Jari itu, pagtꞌkkana ni bihing, aheka toꞌongan saga aꞌa patimuk ni iya. 22 Aniyaꞌ isab pinaꞌan dakayuꞌ nakuraꞌ langgal, ōnna si Jayrus. Pagꞌndaꞌna ma si Isa, pasujud iya ni atag tapeꞌna 23 maka eꞌna angamuꞌ-ngamuꞌ. “Tuwan,” yukna, “araiꞌ na amatay anakku dꞌnda-dꞌnda. Daiꞌ lagiꞌ ka amatꞌnnaꞌ tangannu ma iya boꞌ pauliꞌ sakina ati allum.” 24 Sakali ameyaꞌ si Isa ma iya. Aheka toꞌongan saga aꞌa parongan isab ma iya, angkan sidda asembol.
25 Na, aniyaꞌ mainaꞌan dakayuꞌ dꞌnda sakihan, sangpūꞌ na maka duwantahun halam atitis lahaꞌna. 26 Minsan aheka doktol bay kalabayanna sampay aubus na kamemon sīnna panamba, halam aniyaꞌ kagām-gāmanna. Gom paꞌin anambahina sakina. 27 Manjari takale eꞌ dꞌnda itu suli-suli pasal si Isa, angkan iya palamud ma baꞌanan aꞌa inān ati pasekot iya ni si Isa min buliꞌan. 28 Ahꞌlling iya ni baranna, yukna, “Bang sadja tasagidku minsan laꞌa hal tōng sꞌmmekna, kauliꞌan du aku.”
29 Pagsagidna paꞌin, saruꞌun-duꞌun pahondong lahaꞌna ati tananamna ma deyom baranna in iya kauliꞌan na. 30 Magtūy tananam isab eꞌ si Isa aniyaꞌ barakat bay paluwas min baranna, angkan iya pahondong boꞌ palingiꞌ ni saga aꞌa ma buliꞌanna. Yukna, “Sai bay angꞌntanan aku?”
31 Ya sambung saga mulidna, “Tuwan, taꞌndaꞌnu heka aꞌa pagipit itu ni kaꞌa! Ati tilawnu bang sai angꞌntanan kaꞌa!”
32 Sagōꞌ amiha-miha lagiꞌ si Isa bang sai bay angꞌntanan iya. 33 Jari dꞌnda inān, pagka kataꞌuwanna in iya kauliꞌan na, pehēꞌ ni si Isa maka eꞌna amidpid sabab tināw sidda. Pasujud iya ma atag tapeꞌ si Isa boꞌ magsabꞌnnal. 34 Yuk si Isa ma iya, “Arung, kauliꞌan na ka ma sabab pangandolnu ma aku. Pehēꞌ na ka, daꞌa ka asusa. Kauliꞌan na ka toꞌongan.”
35 Manjari itu, hinabu paꞌin si Isa amissala ni dꞌnda inān, aniyaꞌ saga aꞌa atꞌkka pinaꞌan min lumaꞌ si Jayrus amowahan iya lling, yuk-i, “Amatay na anaknu. Daꞌa pamaleꞌun guru ilu!”
36 Sagōꞌ halam niasip eꞌ si Isa lling sigām. Yukna ni si Jayrus, “Daꞌa ka tināw, angandol sadja ka.” 37 Jari halam aniyaꞌ nirūlan eꞌ si Isa pabeyaꞌ ma iya, luwal si Petros maka duwangan magdanakan eꞌ, si Yakub maka si Yahiya. 38 Makatꞌkka paꞌin sigām pehēꞌ ni lumaꞌ si Jayrus, anā, taꞌndaꞌna aheka aꞌa maghiluhalaꞌ. Magtangisan sigām maka maglemong pakosog. 39 Pasōd si Isa ni deyom lumaꞌ boꞌ yukna ma saga aꞌa mainaꞌan, “Magay kam maghiluhalaꞌ maka magtangis ilu? Halam du amatay ondeꞌ ilu. Hal iya atuli.”
40 Pinagtittowahan iya eꞌ sigām, angkan sigām sinōꞌ paluwas kamemon. Binowa eꞌna inaꞌ-mmaꞌ ondeꞌ maka mulidna tꞌllungan pasōd ni deyom bilik ya kamainaꞌanan dꞌnda-dꞌnda. 41 Binalutan eꞌ si Isa tanganna ati yukna ni iya ma buwat bahasa sigām, “Talita kum.” (Hatina ma bahasatam, “Arung, sohoꞌta ka papunduk.”)