9
Aꞌa Amatay Ugatna Kauliꞌan
1 Paruwaꞌ na si Isa ni bayanan bay pameyaꞌanna boꞌ yampa pabīng ni dambilaꞌ danaw, ni kauman ya patꞌnnaꞌanna. 2 Jari mainaꞌan paꞌin, aniyaꞌ binowa ni iya aꞌa amatay ugatna, hal pabahak laꞌa ma palegehanna. Makataꞌu paꞌin si Isa in aꞌa amowa inān angandol ma iya, yukna ni aꞌa amatay ugatna, “Otōꞌ, daꞌa ka asusa. Niampun na paldusahannu.”
3 Aniyaꞌ mainaꞌan saga guru saraꞌ agama magupama danseheꞌan. Yuk sigām, “Oy! Aꞌa itu ahꞌlling kupul ma Tuhan!”
4 Sagōꞌ asal kinataꞌuwan eꞌ si Isa bang ai ma pikilan sigām. Yukna, “Angay alaꞌat honaꞌ-honaꞌbi ilu? 5 Kumpasunbi bang ingga ya aluhay: bang yukku ni aꞌa, ‘niampun na dusanu’, atawa bang yukku, ‘pabungkal ka boꞌ ka lumꞌngngan?’ 6 Na, buwananta kam tandaꞌ palsaksiꞌan boꞌ kataꞌuwanbi in aku, Anak Manusiyaꞌ, taga-kapatut angampun dusa ma deyom dunya itu.” Jari amissala si Isa ni aꞌa amatay ugatna inān. “Pabungkal na ka,” yukna. “Bowahun palegehannu ilu boꞌ ka amoleꞌ.” 7 Sakali pabungkal aꞌa inān sampay amoleꞌ. 8 Pagꞌndaꞌ saga aꞌa inān ma hinang si Isa, sinōd sigām tāw. Sinanglitan Tuhan eꞌ sigām ma sabab kawasa bay pamuwanna ma manusiyaꞌ makahinang buwattēꞌ.
Si Matiyu Binowa Ameyaꞌ ma si Isa
9 Makalꞌngngan paꞌin si Isa, aniyaꞌ taꞌndaꞌna dakayuꞌ aꞌa niōnan Matiyu aningkōꞌ ma deyom upis pagāꞌanna sukay parinta. Yuk si Isa ma iya, “Piꞌitu na ka ameyaꞌ ma aku.” Anꞌngge magtūy si Matiyu boꞌ ameyaꞌ ma si Isa.
10 Jari amangan si Isa ma lumaꞌ si Matiyu. Aheka isab saga magaꞌāꞌ sukay parinta maka saga aꞌa baldusa kaseheꞌ, inaꞌan pasalu ni si Isa maka saga mulidna. 11 Hinabu sigām magsalu, aniyaꞌ saga Parisi angꞌndaꞌ ni sigām. Yuk saga Parisi itu ni mulid si Isa, “Angay gurubi ilu magsalu maka saga magaꞌāꞌ sukay parinta maka saga aꞌa dusahan kaseheꞌ?”
12 Takale eꞌ si Isa patilaw sigām ati yukna, “Bang aꞌa abasag mbal na magpadoktol. Ya magpadoktol bang aꞌa taga-saki. 13 Kira-kirahunbi ya bay tasulat ma Kitab Jabul, ya yuk-i, ‘Mbal ahalgaꞌ ma aku susumbaliꞌan ya pagkulbanbi. Ya kabayaꞌanku toꞌongan subay kam maꞌaseꞌ ma pagkahibi.’ ” Yuk si Isa giꞌ, “Nggaꞌi ka aꞌa aꞌadil ya maksudku piꞌitu, sagōꞌ aꞌa baldusa supaya sigām ameyaꞌ ma aku.”
Pasal Pagpuwasa
14 Manjari pehēꞌ saga mulid si Yahiya Magpapandi ni si Isa atilaw iya, yuk-i, “Tuwan, kami maka saga Parisi magpuwasa na paꞌin, sagōꞌ mulidnu ilu mbal amuwasa. Angay bahāꞌ?”
15 Anambung si Isa magparalilan. “Asusa bahāꞌ saga luruk ni pagkawinan satꞌggol mainaꞌan lagiꞌ pangantin lꞌlla ma atag sigām? Tantu mbal. Sagōꞌ ma llaw sinōng, bang taꞌabut na waktu kapamalaꞌan pangantin lꞌlla min sigām, minnēꞌ sigām anagnaꞌ amuwasa.”
16 Puwas eꞌ magparalilan si Isa pasal pamanduꞌna, yukna, “Halam aniyaꞌ aꞌa amatupak kakanaꞌ bahaꞌu, kakanaꞌ halam bay nirakdakan, ni badjuꞌ ndang. Sabab bang buwattēꞌ pakongkong du tupak bahaꞌu, ati ageseꞌ du min kakanaꞌ ndang. Jari paheya gom paꞌin geseꞌna.” 17 Pinaralil isab pamanduꞌna ni binu-anggul bahaꞌu, yukna, “Halam aniyaꞌ angisi binu bahaꞌu ni deyom pangisihan kuwit hayop bang ndang na. Bang gantaꞌ buwattēꞌ tantu abustak. Abuꞌus du binu, ati kaliman bay pangisihan eꞌ. Sagōꞌ in binu bahaꞌu subay niꞌisi ni pangisihan bahaꞌu. Jari ya binu maka pangisihanna anatas saliꞌ-saliꞌ.”
Ondeꞌ-ondeꞌ Amatay maka Dꞌnda Asaki
18 Sabu si Isa masi amanduꞌ ma sigām, aniyaꞌ pinaꞌan ni iya dakayuꞌ nakuraꞌ langgal. Pasujud iya ma dahuan si Isa. Yukna, “Tuwan, yambohoꞌ amatay anakku dꞌnda. Sagōꞌ bang ka ameyaꞌ ma aku amatꞌnnaꞌ tangannu ma iya, tantu iya allum.”
19 Sakali anꞌngge si Isa boꞌ paturul ma nakuraꞌ inān. Pabeyaꞌ isab ma iya saga mulidna.
20 Na, aniyaꞌ mainaꞌan dakayuꞌ dꞌnda sakihan. Sangpūꞌ na maka duwantahun halam bay atitis lahaꞌna. Pasekot iya ni si Isa min buliꞌan, boꞌ amaꞌabut tanganna ni tōng juba si Isa. 21 Yukna ma deyom pikilanna, “Bang sadja tasagidku minsan laꞌa hal tōng sꞌmmekna, pauliꞌ du sakiku.”
22 Jari palingiꞌ si Isa ati taꞌndaꞌna dꞌnda itu. Yukna, “Arung, daꞌa ka asusa. Pauliꞌ na sakinu sabab min pangandolnu.” Magtūy saruꞌun-duꞌun kauliꞌan dꞌnda itu.
23 Pagtꞌkka si Isa ni lumaꞌ nakuraꞌ inān, taꞌndaꞌna mainaꞌan saga aꞌa magsuling maka baꞌanan aꞌa magkasensongan. 24 Yuk si Isa ma sigām, “Paluwas kam kamemon. Halam amatay ondeꞌ ilu, hal iya atuli.” Minnēꞌ pinagtittowahan si Isa. 25 Aubus paꞌin bay pinaluwas saga aꞌa inān, pasōd si Isa ni deyom bilik ondeꞌ dꞌnda inān boꞌ yampa balutanna ma tangan. Magtūy iya punduk min baina. 26 Jari in suli-suli pasal hinang si Isa itu bay pasaplag ni kaluhaꞌan lahat eꞌ.
Duwangan Aꞌa Buta Kauliꞌan
27 Palanjal paꞌin si Isa minnēꞌ, aniyaꞌ duwa aꞌa buta bay paturul ma iya. Angalingan sigā pakosog, yuk-i, “Oy! Tubuꞌ si Daꞌud! Maꞌaseꞌ na ka ma kami!”
28 Jari pagsōd paꞌin si Isa ni deyom lumaꞌ, pasekot ni iya duwangan buta inān. Yuk si Isa ma sigā, “Magsabꞌnnal kam in aku makapauliꞌ du?”
“Ahoꞌ, Tuwan,” yuk sigā.
29 Jari pinatꞌnnaꞌ eꞌ si Isa tanganna ni mata sigā maka eꞌna ahꞌlling, yukna, “Tahinang ma kaꞌam buwat bay pagsabꞌnnalbi.” 30 Magtūy du sigā makaꞌndaꞌ pabīng, ati niebot-ebotan eꞌ si Isa, yukna, “Daꞌa kam angahaka ni sai-sai pasal itu-i.” 31 Sagōꞌ alaꞌan paꞌin duwangan itu minnēꞌ, amatanyag sigā pasal si Isa ma sakalingkal lahat inān.
Aꞌa Aumaw Kauliꞌan
32 Ma sabu paꞌin alaꞌan duwangan inān, aniyaꞌ saga aꞌa pinaꞌan ni si Isa amowa seheꞌ sigām ya mbal makabissala ma sabab sinōd saitan. 33 Aubus paꞌin eꞌ si Isa bay amalaꞌan saitan min baran aꞌa itu, magtūy iya makabissala. Ainu-inu saga aꞌa mainaꞌan kamemon. Yuk sigām, “Halam aniyaꞌ bay taꞌndaꞌtam buwattitu ma kaluhaꞌan lahat Israꞌil itu. Yampa.”
34 Sagōꞌ yuk saga Parisi, “Aꞌa itu taga-barakat min nakuraꞌ saitan, ya angkan tapaluwasna saga saitan.”
Kulang Aꞌa Magaꞌani
35 Manjari talatag eꞌ si Isa kamemon daꞌira maka kalumaꞌan ma jadjahan eꞌ-i. Amanduꞌ na paꞌin iya ma deyom langgal, anganasihat na paꞌin lapal ahāp pasal pagparinta Tuhan. Kauliꞌan eꞌna saga saki maka kalammahan indaginis. 36 Pagꞌndaꞌna ma aꞌa kamemon inān, landuꞌ iya maꞌaseꞌ, sabab inaꞌan sigām ma deyom kasusahan ma halam aniyaꞌ anabangan sigām. Saliꞌ sigām sapantun bili-bili halam aniyaꞌ angupiksaꞌ sigām. 37 Sakali yuk si Isa ni saga mulidna, “Saga aꞌa itu saliꞌ dalil huma atigumaꞌ na buwaꞌna. Aluha tanaꞌ, sagōꞌ kulang aꞌa magani. 38 Angkan kam subay angamuꞌ-ngamuꞌ ni Tuhan ya tag-dapu tanaꞌ, boꞌ supaya iya anohoꞌ saga aꞌa magani piꞌitu.”